Nluku ahomumpa nlopwana ni nthiyana oopacera

Yehova ahopanka ijardim nipuro neehaniya Eeteni. Iyo ijardiiyo cahaavo ifuloore, miri ni inama cinci. Vano, Nluku ahomumpa nlopwana oopacera, eehaniya Atamu. Uyo aamumpile niitthaya. Vano ahonwucelela mphulanimmo wiira akhitiri umumula. Unaacuwela yeerannyeele? Vano nlopwanooyo ahokhala ntthu! Yehova ahonvaha ncina na Atamu ni ahomwiirela awacere ijardim, ni ciicammo wiira avahe macina inama cotheene caarivo nno nipuronno.

Yehova ahonvaha Atamu nlamulo neera: “Mihokorokho cotheene ciri mjardimmo pooti ulya, masi uhaavo mwiri mmoca iriyari. Weeva khunlamuliya ulya. Walyaakavale, unaahala ukhwa.”

Nuuwakatyaaya, Yehova aholakela upankela Atamu amwaarawe. Yeeraniyeele cani iyo itthwiiyo? Woopacera, uyo ahomwiiriha Atamu urupa ikhove. Vano, ahokumihaniparari na Atamu ni ahomumpa nthiyana ninno nipararinno. Uyo nthiyanooyo Yehova ahonvaha ncina na Hawa. Atamu ni Hawa phaari atthu oopacera ukhala va watuniyani va. Niireke Atamu yahoncivela amwaarawe? Uyo yahoncivela cinene, mpaka aheera co: “Mi kihoreeriya! Yehova hokivaha nkhunanaka. Ntthu toko miiva!”

Yehova ahomwiirela Atamu ni Hawa wiira yaayare asaana ni yincive watuniyani. Nluku aapheela wiira Atamu ni Hawa, avareke nteko nkhayi yatteeliyaka nrima, wiira ituniya yotheene ikhale ipeephooni, nipuro nooreera cinene toko ijardim yo Eeteni. Vano kontha isiyani ituniya ihikhanlyaaya ipeephooni? Ninaahala wiitthuca nhina ihantisi ikiina inttharana niila.