Moceesi khanliyanle Yehova

Nnawuupuwela wiira Yakopi ni amucyaawe yahothamela Wiciipitu? anari Wiciipitu imuciiyo yahopacera wuunuwa ni yaahocuweliya ukhala asarayeli. Unavinreene ukati, Yakopi ni Yusufu anakhwileene, Wiicipitu ahothanliya Farawoo nkhwaawe wiira akhale mwene. Uyo ahoova cinene ukati aacuwenlyaawe wiira asarayeli yahenciva waapwaha atthu o Wiicipitu. Phimaana, uyo anaakhanyereriha asarayeli uvara nteko khampa ipottha aalimihaka mmamattani ni awuupihaka ipulooku co iticolu. Masi waavariha nteko khawantosile. Farawoo aahoruma wiiviya asaana asilopwana yaahala uyariya naatthu o wiisarayeli. Nnaakhitiri woona mananna asarayeli yaaryaaya oosanka ni uriipiya nrima?

Uyo ukatyuuyo nthiyana o wiisarayeli eehaniya Joquebede ahonyara mwaana mwanlopwana ooreera cinene. Wiira Farawoo himwiive uyo mwanooyo, Joquebede aahonhela nsestuni ni aahonvitha mmoolokoni Nilo. Mwanrokorawe uyo mwaanooyo eehaniya Miriam, aahohala ankhalelaka wiira oone itthu yaahala wiirannya.

Vano mwaana mwanthiyana a Farawoo aahorwa umoolokoninwo wiira arape, uphiya wawe nwo, ahomoona mwaana nari nsestuni onlaka ni ahomoonela uthunku. Vano Miriam mwanrokorawe mwanooyo aahomwaattamela mwaana a Farawoo ni ahonkoha co: “Nnaapheela kimwaavyeke nthiyana wiira anwacere ula mwaanoola?” Mwaana a Farawoo ahaakhula eeraka pooti umwaavya, vano Miriam aahorwa uwiihana anumwaane aneene mwanooyo yeehaniya Joquebede, vano mwaana a Farawoo aahowiirela co: “Muncise ula mwaanoola, mwankhalane ni mwanwacere, miiva kinaahala wuulivani.”

Ukati mwaanooyo onnuwiilyaawe Joquebede ahoncisa ni ahonrwaana wa mwaana a Farawoo. Mwaana a Farawoo ahoncisa ni ahonvaha ncina na Moceesi, ni ahonwacera khampa mwanawe onyara. Moceesi oonuwihiye khampa mwaana a mwene. Phimaana, pooti waakhalanaawe khula itthu yancivela. Masi ukhala wiira ahocuwela wiira ari nsarayeli, ahothanla umwiiwelela Yehova.

Ukati aarinaawe myaakha 40, Moceesi ahothanla waakavihera apoovwaawe. Nihuku nimoca, Moceesi ahomoona ntthu o Wiicipitu amwaattakacaka nsarayeli. Phimaana, Moceesi ahomwaattakaca uyo ntthu o wiciipituuyo. Ahomwaattakaca ni ikuru cawe cotheene mpaka umwiiva ni ahonvitha mmihaavani. Ukati mwene Farawoo aacuwenlyaawe, aahomananiha umwiiva Moceesi. Phimaana Moceesi ahotthawela u Midiya. Masi Yehova khaahiile unwacera Moceesi.