IHANTISI 25
Nipuro naatthenkaciye wiira aswaleliye Yehova
Ukati Moceesi waaryaawe waculu mwaako Sinai, Yehova aahonruma wiira ampanke heema eehaniya itabernaakulu. Nno phaari nipuro asarayeli yaalamuliyaaya unswalela Yehova. Moceesi aahoteka iyo itabernaakulwiiyo ni mananna yaahalaaya uhirika utaphula ni ukhuna wiira akhitiri uteesa.
Wiira akavihere utekiya, Yehova ahaalepela asarayeli wiira avahe citthu caakhitiryaaya. Vano, asarayeli yaahovaha iwooru, iparaatha, ikoopere, maluku oopharela, ijoia, ilaa, itesiitu, marapala onama ni citthu cinci cikhwaawe. Yaahovaha citthu cinci ni mpaka Moceesi aheera co: “Paahi! Pooti uhivaha-tho itthu.”
Alopwana enci nkhayi naathiyana yaakhitiri uvara miteko coovirikana, yahokavihera nteko wooteka itabernaakulu. Ukati atthu akhwaawe waavarelaaya nteko itesiitu, atthu akhwaawe yanwacera maluku oopharela, iwooru awula ithaapwa. Yehova ahaakavihera asarayeli awiitthucihaka khula nteko wiira akhitiri uteka itabernaakulu.
Asarayeli yaahokhitiri uteka itabernaakulu khampa yaarumiyaaya ni Yehova. Vate waya iyo itabernaakulwiiyo yahaavo ipuwa. Wapuwani va yahaavo ipasiya yuulupale niikhilompi yaapahiya itthuvo coopahiya. Nhina waya mmo, yahaavo ikurtiina yomaana yaakawaniha itabernaakulu miphantte miili, nipuro nowaarya ni ciicammo nipuro nootepa waarya. Nhina waya nipuro nootepa waarya, yahaavo isaminiinya yowooru, meeca niikhilompi. Vano nhina waya nipuro nootepa waarya, yahaavo ikasa yo nleehano. Iyo ikaseeyo yaapankiye niithaapwa ni ciicammo iwooru. Nnacuwela itthu ineehaniya nleehano? Inkhala itthu yuulupale ntthu nokhuluvelihaawe. Ikasa yo nleehano yanwuupusera asarayeli wiira yahonkhuluveliha unswalela paahi Yehova.
Yehova ahaathanla asaana a Arawu wiira akhale anankuttho. Ayo yahaana uwacera itabernaakulu ni citthu apoovu yawaanaaya wiira yanvahe Yehova. Yehova ciicammo ahonthanla Arawu wiira akhale nankuttho muulupale. Uyo paahi phalamuliya ukela nipuro nootepa waarya ni khula mwaakha aakela nkwaha mmoca paahi. Nnacuwela nlattuni? Wiira anlepele Yehova unlevelela itampi cawe, itampi ca asaanaawe ni ciicammo itampi ca asarayeli otheene.
Itabernaakulu yaamalihiye unavinreene mwaakha mmoca asarayeli anaturuwile Wiciipitu. Vano, asarayeli yahaana nipuro nonswalela Yehova.
Yehova aahowaana nihutte nculu waya iyo itabernaakulwiiyo. Ukati nno nihuttenno neemelaaya, asarayeli yancuwela wiira khayaalamuliya uthama nno nipuronno. Masi ukati nno nihuttenno naawelaaya nculu, asarayeli yancuwela wiira vano uhophiya ukati woothama. Ni yankhunakhuna iyo itabernaakulwiiyu ni upacera weetta nkwaha yattharaka nno nihuttenno.
“Vano, kaaheewa ncu nuulupale naakhuma wahiceeni neeraka: Woone! Inupa ya Nluku iri naapinaatamu; uyo naarwaa ukhala naayova ni ayo anhala ukhala nloko nawe. Nluku nohala ukhala naayova.’”—Apokalipise 21:3