Asithiyana eeli oolipa nrima

Josuwe ahaahoolela apoovu a Nluku myaakha cinci ni aakhwile narina myaakha 110. Ukati Josuwe waaryaawe nkumi, a Sarayeeli yaananswalela Yehova khampa caapheelaawe. Vano Josuwe ukhwa wawe, ayo yahopacera waatakiha makananewu ni yaananswalela anluku oohikhweeli. Phimaana, Yehova aahonhiya mwene o Ukanaa eehaniya Jabim wiira aahuvihe a Sarayeeli. Uyo ukatyuuyo, ayo yaanonlompa Yehova wiira aakavihere. Vano Yehova ahonthanla nlopwana mmoca eehaniya Paraki wiira aakavihere ni aturuwele upanka citthu comaana.

Paraki ahaana wiitthuca citthu cikhwaawe, phimaana, Yehova ahonruma Teepora nthiyana mmoca aari porofeeta wiira amuulumane. Teepora aahomwiirela co: “Waathanle alopwana 10.000 wiira yaane ikhotto ni mwene Jabim umoolokoni Kisom. Unaahala untthema Siisera nhooleli aanakhotto a Jabim.” Paraki aahomwaakhula Teepora eeraka co: “Mi kinaarwaa wakhalaka wiira weeva unaakitthara.” Teepora ahaakhula eeraka co: “Aaye, nttwee.” Vano Yehova, aheera wiira masi khunakhala weeva phinhala umwiiva Siisera. Masi nthiyana phinhala umwiiva.

Vano Teepora, Paraki ni alopwana 10.000 yaahorwaa umwaakoni Tabor wiira yiitthenkace para waana ikhotto. Ukati Siisera waacuwenlyaawe iyo itthwiiyo, ahaatthenkaca anatoropa enci ni ikaaro co ikhotto. Vano, aahorwaa ukumaana ni asarayeli umoolokoni Kisom. Teepora aahomwiirela Paraki co: “ileelo nihuku Yehova nohalaawe uwiirihani utthema!” Paraki wamoca naalopwana 10.000 yaahokhuruwa umwaakoni yatthawaka ni yaahorwaa waana ikhotto ni Siisera wamoca naanakhottwaawe

Vano Yehova aaheeriha mooloko Kisom ucara ni mpaka uphya ni maacyaayo yaahomwaryeela mpaka nipuro yaaryaaya anakhotto a Siisera ni nlattu woonanaca ikaaro caya nnyo caahopara mmaroveni. Paraki naanakhottwaawe, yahaatthema anakhotto a Siisera, vano, Siisera aahokhuruwa nkaaroni wawemmo ni aahotthawa. Uyo aheepittha nheemani wanthiyana mmoca eehaniya Jayeli. Vano ayo athiyanaayo, yaahonvaha ileeti wiira awuryeke ni yaahonkhuneela niilensooli. Ukhala wiira uyo khaamala woocya aahorupa. Vano ayo athiyana yeehaniya Jayelyaayo, woohinyakula yaahomwaattamela ni yaahonkhomela nthale mmurummo ni yaahomwiiva.

Paraki aahorwaa umwaavyaavya Siisera. Vano athiyana yeehaniya Jayeli yaahokhuma nheemani wayammo ni yaaheera co: “Nlopwana umwaavyooyo ula va.” Paraki aahokela nheemani mmo ni aahomoona Siisera nakhwile. Vano asarayeli yaahaatthema awanannyaaya. Vano, Paraki ni Teepora yaahopacera wiipa icipo yansukhuruku Yehova nlattu wowaakavihera. Ukhuma ule ukatyuule, asarayeli yaahoviriha myaakha 40 anari ninnema.