Itampi yaavanryaaya amwene Davidi

Ukati Sawuli waakhwilyaawe Davidi ahokhala mwene narina myaaka 30. Nihuku nimoca uhiyu, Davidi neemenle waculu ipereetiyu uyo ahowoona athiyana ooreera. Davidi ahocuwelela wiira yeehaniya Pate-Sepa. Ni yaatheliye ni nakhotto eehaniya Uriyasi. Vano uyo ahonruma nantekwaawe wiira amwiihane Pate-Sepa. Davidi ahonrupana ni wahoolo Pate-Sepa ahorupala irukulu. Uyo ahomananiha uvitha-vitha matampi yavanryaawe. Phimaana, ahaavya mananna wiira ikwaha yaahala urwenya ukhottoni yeeviye awannyawe Pate-Sepa yeehaniya Uriyasi. Wiiviya wawe Uriyasi Davidi ahonthela Pate-Sepa.

Masi Yehova ahoona citthu cotheene cootakhala Davidi aapankilyaawe. Vano ahonruma porofeeta Nataa wiira amuulumane Davidi. Nataa ahomwiirela Davidi co: “Nlopwana mmoca thaciri ahaana ikhontwaa cinci ni ahaavo nlopwana nkhwaawe oohuva aarina ikhontwaa imoca paahi yancivela cinene. Nnaacuwela itthu yaapankilyaawe nlopwana thaciryuuyo? Ahennya ikhontwaa ya nlopwana oohuva aarina ikhontwaa imocooyo.” Ukati Davidi eewilyaawe iyo ihantisiiyo, ahorusiya cinene ni aheera wiira ule nlopwana thaaciryuule unamphwanela wiiviya. Vano Nataa ahomwaakhula Davidi eeraka co: “Iyo phiitthu pwiiya mumpankenleenyu Uriyasi.” Davidi ahoriipiya nrima cinene ni ahohimya wiira hopanka itthu yootakhala. Phimaana, nlattu woopanka citthu cootakhala, Yehova ahonhiya Davidi unkhumelela masakha nkhayi ni amucyaawe. Masi Yehova ahonlevelela Davidi, kontha aheeyeviha ni ahohimya itthu yaapankilyaawe.

Cinavinreene myaakha, Davidi aapheela uteka itempulu ya Yehova. Masi Yehova anthanlile mwanawe Davidi eehaniya Salomau wiira ateke iyo itempulwiiyo. Vano Davidi ucuwela wawe, ahopacera utthenkaca ikaruma caahala uvareliya nteko ukati waahalaaya utekiya itempulu ya Yehova. Ni uyo ahomwiirela mwanawe co: “Ukhala wiira weeva mmirawo ni itempu ya Yehova inhala ukhala yuulupale, mi kinaahala wuukavihera.” Davidi ahokumiha nsurukhu mwinci ni ahowiihana ananteko enci ni ahothukumaniha citthu cinci co iwooru co iparaata ni ithaapwa wiira civareliye nteko. Hinaaya ukhwa Davidi ahomwiirela Salomau co: “Kinawuuvaha ila ilataratweela inoonihera mananna cinhalaaya ukhala itempulu. Uhoove mwanaka kontha Yehova naahala wuukavihera. Wiilipihe ni uvare nteko!”