Itempulu ya Yehova

Ukati Salomau waakhanlyaawe mwene o Isarayeli, Yehova ahonkoha co: “Salomau, isiyani yoocivenle wiira mi kuuvahe?” Salomau ahaakhula co: “Yehova, mi kimmirawo akincuwela itthu yoopanka. Sontte ukivahe ucuwelaca wiira kikhitiri uweettiha apoovwaa.” Ukati Yehova eewilyaawe iyo ahomwaakhula co: “Ukhala wiira ukilepenle ucuwelaca kinaawiiriha ukhala ntthu ootepa ukhala oocuwelaca ntuniyani motheene. Ciicammo kinawuukhaliha thaciri. Ni waahihiyeke ukiiwelela unaahala ukhala myaakha cinci.”

Salomau ahopacera uteka itempulu. Vano alopwana enci ni athiyana yahokavihera nhina uyo ntekooyo ni yaavarelaka nteko ikaruma comaana. Uvira waya myaakha 7 itekiyaka itempulu, vano wahophiya ukati woovahereriya wa Yehova. Salomau ahotthenkaca mikuttho ni aheesa waculuikhilompi. Vano ahokhoroma ni aholompa eeraka: “Pwiiya Yehova nyuuva unawuuphwanelani nipuro nooreera cinene uvikana ila itempulwiila. Masi sontte mwaakhelele ila itempulwiila ni nniviriyane ukati ninhaleehu ukhala mu nuulompakani.” Nnaacuwela mananna Yehova oonihenryaawe wiira ihoncivela? Ukati Salomau waamalihilyaawe ulompa, Yehova ahokurusa mooro wiirimu ni ahopaha mikuttho cotheene caari waculuikhilompiiyo. Ukati asarayeli wonnyaaya iyo yahokhala ootteeliya cinene.

Salomau ahokhala oocuwelaciya u Isarayeli wotheene nlattu wookhala oocuwelaca. Atthu olapo cikhwaawe yanrwaa u Isarayeli umoonanana Salomau wiira akaviheriye citthu caasankiha mpaka apwiyamwene yeehaniya Sabá yaakhala uttayi ni u Isarayeli Yahorwaa umoonanana Salomau. Ayo yaapheela woona wakhala wiira khweeliini Salomau ahaana ucuwelaca. Vano umoopana waya mwaha apwiyamwene yeehaniya Sabá yaheera co: “Ukati keewilyaaka wiira weeva uhaana ucuwelaca, mi akaamini. Masi va kihoona wiira ikhweeli. Yehova Nluku nawuukavihera.” Ukati waalamulelaawe Salomau makhalelo asarayeli yaari omaana ni atthu otheene yaakhala ootteeliya. Masi woohipica citthunnyo caanhala urukunuwa.