Yehova ahonkhicera Yehosafaa

Yehosafaa ari mwene o Yuuta, ukati aalamulelaawe uyo ahomalamaliha uswali woohikhweeli wa Bahaali. Yehosafaa aapheela wiira apoovu amwiiweleleke Yehova. Vano, ahaathanla alopwana yaacuwela saana malamulo a Yehova wiira awiitthucihe apoovu.

Maloko yaattamenle, yaanoova waatuphela a Yuuta, kontha yancuwela wiira Yehova anaakhikicera apoovwaawe. Ayo malokwaayo yaanonvahaka itthuvo mwene Yehosafaa. Masi atthu o amowapi, maamonita ni atthu yaakhala ncoko wo u seyiri yaahorwa waanana a Yuuta. Yehosafaa ancuwela wiira aalamuliya ukaviheriya ni Yehova. Phimaana ahaaruma alopwana, athiyana ni asaana wiira arwee u Yerusalemu. Aneemenleene uhoolo wo atthu otheene, ayo yaholompa yiiraka: “Pwiiya Yehova, khaninhala ukhitiri uthema nihikaviheriyaka ni nyuuva. sontte nnihimeerye itthu inlamuliyeehu upanka.”

Yehova ahaakhula eeraka co: “Nhoove mi kiri ninyuuva, khaavo nolamuliya waana, nnawoona itthu inhalaaka upanka. Masi Yehova ahaala upankani wiira awoopole apoovwaawe?

Usawaya, amwene Yehosafaa yahaathanla makantoore wiira yeemele uhoolo wo a nakhotto amwiipelaka Yehova anatteeliyeene nrima. Ayo yaahetta ikhumelo u Yerusalemu mpaka utekowa nipuro naahalaaya waaniya ikhotto.

Yiipacakoono, Yehova ahopanka itthu yootikhiniha. Uyo ahowiiriha amowaapita ni maamonita waanihanaa yaaworu mpaka wiivakanaca otheene. Masi Yehova ahaakhikicera apoovwaawe, khampa aakhukuvelihilyaawe. Maloko yaattamenle u Yuuta yaahocuwela wiira khula ukati Yehova nawaavya mananna o waakavihera apoovwaawe. Ni uyo khanweherera ukaviheriya ni ntthu wiira apanke iyo.