Yosiya yaanoncivela malamulo a Yehova

Yosiya aarina myaakha 8 ukati aathanlilyaawe wiira akhale mwene o Yutaa. Ule ukatyuule atthwaayo yaapanka citthu canrusa Yehova, toko ukhwiri ni waaswalela anluku oohikhweeli. Ukati waapiihilyaawe myaakha 16 ahomananiha ucuwela mananna onswalela Nluku khampa caapheelaawe. Vano ukati aarinaawe myaakha 20, ahaakwanyulaca attontto ni mapuro yaaswaleliya anluku oohikhweeli u Yutaa. Ni ukati aarinaawe myaakha 26, Yosiya ahotthenkaca itempulu.

Nankuttho muulupale eehaniya Hilikiya aahophwanya ilivuru yo malamulo a Yehova inari ntempulu, inkhala toko iyo ilivurwiiyo yantikhiye ni Moceesi. Safaa namantikha aamwene ahocisa ilivurwiiyo ni ahonrwaanela Yosiya. Vano, ahopacera usoma. Ukati Yosiya eewilyaawe citthu cantikhiye nlivurunimmo, ahoriipiya nrima kontha apoovu khayaapanka itthu yaarumaaya ilivuru ya Yehova. Vano, Yosiya ahomwiirela Hilikiya co: “Yehova honiviruwela. Urwee wamuulumane. Uyo naahala wuuhimeerya itthu inlamuliyeehu upanka.” Vano, Yehova aahakhula eeraka co: “Ukhala wiira atthu o Yutaa ahokinyanyala, ayo anaahala uttarusiya. Masi iyo inhala wiirannya Yosiya akhwaakavale, kontha uyo hosoma malamulwaaka ni hopanka citthu comaana.”

Ukati eewilyaawe mananna Yehova akhunlyaawe, Yosiya ahaatthukumaniha atthu otheene o Yutaa. Vano ahaasomela nlamulo na Yehova. Yosiya ni apoovu otheene yaheera wiira yanhala umwiiwelela Yehova.

Yosiya ahoona wiira nlamulo na Yehova naahimya wiira apoovu yahaana upanka ifesta yo Paasikuwa khula mwaakha. Masi cahovira myaakha cinci apoovu o Yutaa anahiilene upanka iyo ifesteeyo. Vano Yosiya aaholakela untthenkaca Paasikuwa para untthapela Yehova. Uyo ahokumiha inama cinci wiira avahiyeke Yehova itthuvo ni ahaathanla atthu wiira yiipe utempulu. Umala wawe Paasikuwa, apoovu yaahothenkaca ifesta ikhwaawe yeehaniya ifesta yophaawu coohiheliya ifermentu, yaavirihile mahuku 7. Ikhumelo ukati wa Samuweli, aari hinapankiya Paasikuwa khampa ule. Yosiya yahoncivela malamulo a Yehova. Weeva ciicammo anawuucivela?