MPANTTA 08
Wanaakhitirya nyuuva ukhala mpatthani a Yehova
Yehova nopheela wiira nyuuva muncuweleehe sana-saana. Kontha isiyani? Kontha uyo noweherera wiira ukati unhaleenyu uvira ncuweleehaka saana makhalelwaawe, mananna cinaatafityaawe atthu ni citthu cimpheelaawe wuupankelani uhoolo, nyuuva mpheele cinene ukhala mpatthannyaawe. Masi niireke khweeliini wanaakhitirya ntthu ukhala mpatthani a Nluku? (Nsome Isaalimu 25:14.) Isiyani inlamuliyeenyu upanka wiira akhale mpatthaniinyu? Ibiiblya inawaakhula ala makohwaala. Ciicammo inaattonkaca nlattuni umpatthanana Yehova ukhanlyaaya upatthani muulupale uvikana upatthani unkhalaneehu ni ntthu nkhwaawe.
1. Isiyani Yehova inoolattulaaweni upanka?
Ibiiblya ineera: “Mumphiyeere Nluku, ni uyova naahala wuuphiyeerani.” (Tiyaku 4:8) Iyo itthwiiyo maanaaya isiyani? Maanaaya wiira Nluku nawuulattulani nyuuva ukhala mpatthannyaawe. Masi atthunaka ahaavo anoopuwela co: ‘Unhala ukhitirya cani miiva ukhala mpatthannyaawe Nluku ni uyo akimmoona?’ Masi mbiiblyani, uyo naahimyaca makhalelo arinaawe wiira nincuwele ni nimpatthanane. Nasomaka moolumwaawe ari mbiiblyani, upatthaniihu nuuyo unaalipa hataa ukhalaka wiira khanimmoona.
2. Kontha isiyani Yehova khanlyaawe ntthu ooreera nyuuva umpatthanana unvikana ntthu nkhwaawe?
Khaavo ntthu notepa wuufentani cinene umpwaha Yehova. Uyo nopheela wiira nyuuva nkhale ootteeliya ni mmwaakuvele uyova mwasankaka. Nyuuva pooti “unttikhela cotheene cinoohelani isukhuli, kontha uyova nawuukaviherani.” (1 Peturu 5:7) Ukati wotheene Yehova nokhala niiraati yo waakavihera, yo waamaaliha ni yo waaviriyana asipatthannyaawe.—Nsome Isaalimu 94:18, 19.
3. Wiira nikhale apatthani a Yehova, isiyani uyo inwehereraawe wiira nipanke?
Yehova nawaafenta atthu otheene, masi uyo “naapatthanana cinene atthu ookhuluvelya,” ni moolumacero makhwaawe, atthu oweettela isariya. (Miruku 3:32) Yehova nopheela wiira asipatthannyaawe yiikurumiceke upanka citthu cinoncivela, kahi citthu cinonrusa. Ahaavo anoopuwela co: ‘Mi akinhala ukhitiri upanka citthu cotheene cinoncivela Nluku.’ Masi Nluku naanoonela uthunku. Ale anonfenta ni nrimaaya wotheene ni aneekurumica untteeliha nrima unaakhitirya ayova umpatthanana.—Isaalimu 147:11; Miteko 10:34, 35.
MUNCERERE WIITTHUCA WINYU
Moone isiyani nyuuvano inlamuliyeenyu upanka wiira nkhale mpatthani a Nluku ni moonelele nlattuni Yehova khanlyaawe ntthu ooreera nyuuva umpatthanana unvikana ntthu nkhwaawe.
4. Aparahaamu aari mpatthani a Yehova
Ihantisi yo mbiiblyani immuuluma Aparahaamu (ciicammo nocuweliya ukhala Aparau) inaanikavihera ucuwela ukhala mpatthani a Nluku maanaaya isiyani. Nsome iveerusu cimmuuluma Aparahaamu nhina Uphattuwaca 12:1-4, ni mwamalihaka usoma, moopele mwaha ala makohwaala:
Isiyani Yehova yanlepenlyaawe Aparahaamu upanka?
Isiyani Yehova yankhuluvelihilyaawe Aparahaamu?
Isiyani Aparahaamu yaapankilyaawe?
5. Itthu Yehova nonwehereraawe upanka ule nokhala mpatthannyaawe
Khweeliini, cihaavo citthu cinweherereehu wiira asipatthaniihu apanke.
Citthuni cinoocivelani upankeliya naasipatthaniinyu?
Nsome 1 Joau 5:3, ni mwamalihaka usoma, moopele mwaha nna nikohonna:
Isiyani Yehova inaawehereraawe upanka asipatthannyaawe?
Wiira nimwiiwelele Yehova, nihaana nirukunusaka mapankelo citthu cihu awula makhalelweehu. Nsome Isaiya 48:17, 18, ni mwamalihaka usoma, moopele mwaha nna nikohonna:
Kontha isiyani Yehova naalepelaawe asipatthannyaawe urukunusa makhalelwaaya?
Mpatthani omaana unancivela unikavihera, phimaana naanivaha ikano comaana. Yehova commo phinaatafityaawe asipatthannyaawe.
6. Citthu Yehova cinaapankelaawe asipatthannyaawe
Yehova nawaakavihera asipatthannyaawe waanaana masakha. Moone IVIDIYU, ni mwamalihaka woona, moopele mwaha nna nikohonna.
Athiyana o nvidiyuni nimalihileehu woona khayiicoona ukhalana ifayita. Yehova aakavihenre cani ayo athiyanaayo?
Nsome Isaiya 41:10, 13, ni mwamalihaka usoma, moopele mwaha ala makohwaala:
Isiyani Yehova inaakhuluvelihaawe asipatthannyaawe?
Moonelweenyu, Yehova ntthu ooreera umpatthanana? Kontha isiyani nneereenyu commo?
Apatthani eekhweeli khanhiyerera wuukaviherani mwasankaka. Yehova ciicammo naahala wuukaviherani.
7. Wiira nimpatthanane Yehova, nihaana nimuulumanaka ni unviriyana itthu innihimyeraawe
Apatthani eeli yoopacaka mwaha upatthannyaaya unaakhala woolipa. Nsome Isaalimu 86:6, 11, ni mwamalihaka usoma, moopele mwaha ala makohwaala:
Wiira nimuulumane Yehova, isiyani inlamuliyeehu upanka?
Yehova nonuulumana hiiva manannani?
Hiiva nimmuulumana Yehova nalompaka; ni uyo nonuulumana hiiva ukati unsomeehu Ibiiblya
ATTHU AKIINA ANEERA: “Khawankhitirya ukhala mpatthani a Nluku.”
Iveerusuni yo mbiiblyani yaahaleenyu uvarela nteko wiira munkavihere ntthu ucuwela wiira wanaakhitirya hiiva ukhala apatthani a Yehova?
UTHIKILELA
Yehova nopheela wiira akhale mpatthaniinyu, ni uyo naahala wuukaviherani ukhitiri umpatthanana.
Wuupuwela:
Manannani Yehova cinaakaviheraawe asipatthannyaawe?
Kontha isiyani Yehova naalepelaawe asipatthannyaawe urukunusa makhalelwaaya?
Moonelweenyu, unaarika cinene ukhala mpatthani a Yehova? Kontha isiyani nneereenyu commo?
MWAPHEELAKA UCUWELA CITTHU CIKIINA
Manannani umpatthanana Nluku cinhalaaya urukunusa makhalelweenyu?
“Yehova khanle Nluku noreera uncuwela” (Ukhalenla, 15 yo Fevereiro yo 2003)
Moone mananna nyuuva cinlamuliyeenyu ukhala mpatthani a Nluku.
Moone manannani upatthani urinaaya athiyana amoca ni Yehova cooponlyaaya ukumyaaya.
Mwaaviriyane amirawo anttonkaca mananna cinoonelaaya upatthani urinaaya ni Yehova.