Manannani ittiini cowootha cinwiirihaaya atthu uhimpatthanana Nluku?

Ukhala wiira Nluku nifento, vano kontha isiyani cinaapankiya citthu cootakhala niittiini cineera wiira cinanswalela uyova? Woohincivihaca, nnyo ittiininnyo cowootha; nnyo cinooluma citthu cowoothiya camwaacaka Nluku. Manannani ittiini cowootha cinwiirihaaya atthu uhimpatthanana Nluku? Nluku noonela cani iyo itthwiiyo? Ni isiyani inhalaawe upanka?

1. Manannani ittiini cowootha cinwiirihaaya atthu uhimpatthanana Nluku ni citthu cineetthucihaaya?

Ittiini cowootha ‘cihaakakhaniha ikhweeli ca Nluku ni citthu cowoothiya.’ (Arooma 1:25) Wootakihera, ittiini cinci khacineetthuciha ncina na Nluku. Masi Ibiiblya ineera wiira ikhanle itthu yofayita uromola ncina na Nluku. (Arooma 10:13, 14) Yakhumelelaka ihasara, ahaavo mapaatere, mapastoore ni ahooleli ottiini enci aneera co: “Mwaneene Nluku phitthunnyaawe.” Masi iyo itthu yowoothiya. Nluku khampanka itthu yootakhala. (Nsome Tiyaku 1:13.) Wooriipiha nrima, nnya citthu cowoothiyannya cinaawiiriha atthu uhimpatthanana Nluku.

2. Manannani ittiini cowootha cinwiirihaaya atthu uhimpatthanana Nluku ni citthu cimpankaaya?

Ibiiblya ineera wiira itampi cinvaraaya ittiini cowootha “khacimala” (Apokalipise 18:5) Ikhumelo yokhalayi, ittiini cowootha cinawiikelakeliha isiyaasa ni cinaakavihera ikhotto. Uhiya commo, nnyo ittiini cowoothannyo ciheeriha ni cihotthuniha wiivakaciya atthu imiliyau cene. Ahooleli akhwaawe o mmattiinini akhanle mathaciri, ayo anaathacirela ale anshwali mmattiinini waya. Ittiini cowootha khacinaatafiti saana atthu toko Yehova cinaatafityaawe. Ayo ahoolelyaayo aneera wiira aveleelihiye ni Nluku masi citthu cimpankaaya cinawoonihera wiira khaanoncuwela Nluku.—Nsome 1 Joau 4:8.

3. Nluku nokhala cani oonaka ittiini cowootha?

Wakhala wiira nyuuvano cinawuurusani citthu cimpankiya mmattiinini cowootha, vano woonela winyu Yehova noonela cani nnyo citthunnyo? Ahooleli ottiini cowootha anaawiiriha atthu uhimpatthanana Nluku ni khaanaatafiti saana ale answali mmattiini waya. Yehova nawaafenta atthu ni uyo nokhala oonyoonyiya oonaka citthu coohinamaana cimpankaaya ahooleli ommattiinini. Uyo naakhuluveliha wiira woohipica naahala umalamaliha ittiini cowootha ni nnyo ‘khacinhala wooniya-tho.’—Apokalipise 18:8, 21.

MUNCERERE WIITTHUCA WINYU

4. Nluku khankupali ittiini cotheene

Atthu enci ankupali wiira ittiininnyo cihoovirikanaro cotheene cinonswalela Nluku mmoca. Masi niireke iyo ikhweeli? Nsome Matewus 7:13, 14, ni mwamalihaka usoma, moopele mwaha nna nikohonna:

• Isiyani Ibiiblya inoolumaaya yaacaka iphiro impiiha wuukumini?

Moone IVIDIYU, ni mwamalihaka woona, moopele mwaha nna nikohonna:

IVIDIYU: Niireke wiira Nluku naakupali ittiini cotheene?—Ividiyu yoothikileliya (3:22)

• Niireke Ibiiblya ineera wiira ittiini cotheene cinantteeliha nrima Nluku?

5. Ittiini cowootha khacintakiha nifento nirinaawe Nluku

Ittiini cowootha cinaawiiriha atthu uhimpatthanana Nluku nimananna menci. Inanna imoca yootepa ukhala yoohinamaana ukhanle ukavihera ikhotto. Nttwee noone ntakihero nimoca. Moone IVIDIYU, ni mwamalihaka woona, moopele mwaha ala makohwaala:

IVIDIYU: Itthu yaapankilyaaya ittiini cikiina ukati wo Ikhotto Yonayeeli yo Ntuninyani (2:22)

• Isiyani ittiini cinci caapankilyaaya ukati waalavaniyaaya Ikhotto Yonayeeli yo Ntuninyani?

• Nyuuva nnoonela cani iyo itthwiiyo?

Nsome Joau 13:34, 35 ni 17:16. Mwamalihaka usoma, moopele mwaha ala makohwaala:

• Woonela winyu, Yehova nokhala cani oonaka ittiini ceekelakelihaka ikhotto?

• Ittiini cowootha cinawiiriha ukhumelela citthu cinci coohinamaana. Citthuni nyuuva conneenyu cinthoonyera wiira ittiini cowootha khacintakiha nifento nirinaawe Nluku?

6. Nluku naapheela waakavihera atthu ukhuma mmattiinini cowootha

Nsome Apokalipise 18:4,a (Moone niwehero), ni mwamalihaka usoma, moopele mwaha nna nikohonna:

• Ittiini cowootha ciri mowaathepya atthu. Nyuuva nniicoona cani ucuwela winyu wiira Nluku naapheela waakavihera atthu ukhuma mmattiinini cowootha?

7. Nhihiyerere wiitthuca myaha ca Nluku eekhweeli

Niireke citthu cootakhala cimpankaaya ittiini cowootha cihaana ciwiirihakani uhimpatthanana Nluku? Mmuupuwele mwaana hintthuna wiiwelela ikano comaana cinvahiyaawe naathumwaane. Vano, mwaanooyo naalakela ukhuma wapuwani waasithumwaane ni nawancera upanka citthu coohinamaana. Athumwaannyaayo khacinaacivela citthu cimpankaawe. Woonela winyu, yaahala ukhala itthu yosariya waavahacera athumwaane citthu coohinamaana cimpankaawe mwanaya?

• Niireke wiira yaahala ukhala itthu yosariya unvahacera Yehova citthu coohinamaana cimpankaaya ittiini cowootha ni uhiya wiitthuca myaha cawe nlattu wo nnyo citthunnyo?

UTHIKILELA

Ittiini cowootha khacinwiiriha atthu umpatthanana Nluku. Cimpanka iyo itthwiiyo ciitthucihaka ni cipankaka citthu coohinamaana. Nluku naahala umalamaliha ittiini cowootha.

Wuupuwela

• Citthu cineetthucihaaya ni citthu cimpankaaya ittiini cowootha nnoonela cani?

• Nluku nokhala cani oonaka ittiini cowootha?

• Nluku nohala wiirihani ittiini cowootha?

MWAPHEELAKA UCUWELA CITTHU CIKIINA

Moone mananna meeli ittiini cowootha cihimpankaaya itthu impheelaawe Nluku.

“Ittiini cotheene cinaalikana? Niireke ittiini cotheene cinawaakavihera atthu umpatthanana Nluku?” (Mwaha umphwanyannya nsayitini jw.org)

Kontha isiyani Yehova nopheelaawe wiira hiivano ninswalele uyova wamoca naakhunanihu?

“Niireke unaareera ntthu ukhalana ittiini?” (Mwaha umphwanyannya nsayitini jw.org)

Nsome ihantisi ya paatere mmoca ancenre ukhalana makoho nhina ittiinnyaawe. Hataa ukhalaka commo uyo khaahiyerenre waavyaavya ikhweeli ca Nluku.

“Nlattuni paatere mmoca hiilyaawe ikereeca?” (Despertai!, yo Fevereiro yo 2015)

Ikhumelo yokhalayi ittiini cinawiitthuciha citthu cowoothiya cimwaacaka Nluku. Phimaana, atthu enci anoopuwela wiira Nluku khanniwacera ni khannoonela ikiriri. Moone citthu tthaaru cowoothiya cineetthucihiya ni itthu inhimyaaya mbiiblyani.

“Citthu cowoothiya cinwiiriha atthu uhimpatthanana Nluku” (Ukhalenla, 1 yo Novembro yo 2013)