MPANTTA 30
Amuciinyu akhwile anaahala uturuwela ukhala akumi!
Ukhweliya unaawerya cinene ni unaawaana mahuviho. Phimaana ukhwa, Ibiiblya ineehana nwanani. (1 Akorintu 15:26) Nhina mpantta 27, nyuuva nheetthuca wiira Yehova naahala untthema uyo nwananiihuuyo. Vano isiyani inhala uwiirannyeela ale akhwile? Nhina ula mpanttoola, nnaahala wiitthuca-tho itthu ikhwaawe ikhuluvelihilyaawe Yehova yootteeliha nrima cinene—uyo naahala uwunweleliha atthu imiliyau cene wiira akhale mpaka. Niireke iyo itthwiiyo khweeliini inaahala wiirannya? Ayo atthwaayo anhala wunwelelihiya wiira yakhale vayi? Anhala wunwelelihiya wiira yakhale wiirimu awula va watuninyani va?
1. Isiyani Yehova impheelaawe waapankela asimuciinyu ni asipatthaniinyu akhwile?
Yehova naapheela venci cinene waaturusela ukhala akumi ale akhwile. Nlopwana mmoca ookhuluveliya eehaniya Jó aankupaleela wiira khaahala uliyaliya ni Nluku akhwaakavale. Uyo ahomwiirela Nluku: “Unaahala wiihana, ni miiva kinaahala uwaakhula [kinari mmahiye].”—Nsome Jó 14:13-15.
2. Nincuwela cani wiira atthu ookhwa unaahala ukhitirya wunwelelihiya?
Ukati Yesu waaryaawe watuninyani, Nluku ahonvaha ikuru wiira akhitiri uwunweleliha atthu. Wootakihera, uyo ahomunweleliha mwaaruusi mmoca omyaakha 12 ni ahomunweleliha mwaana aathiyana amoca yaari nankhweli. (Markus 5:41, 42; Luka 7:12-15) Ciicammo uyo ahomunweleliha mpatthannyaawe eehaniya Laazaru. Hataa ukhalaka wiira Laazaru ahoviriha mahuku macese nasikiye, Yesu ahonturusela ukhala nkumi. Yesu ahonlompa Nluku eeraka: “Laazaru, ukhumele uno vatyoono!” Ni “Nlopwana aakhwaale ahokhuma.” Laazaru ahoturuwela ukhala nkumi! (Joau 11:43, 44) Nkoopuwelani mananna asimucyaawe ni asipatthannyaawe Laazaru caakhanlyaaya ootteeliya!
3. Nwehereroni urinaaya asimuciinyu ni asipatthaniinyu akhwile?
Ibiiblya inaakhuluveliha wiira: “Unaahala ukhala wunwelela waatthu ookhwa.” (Miteko 24:15) Atthu yaawunwelelihilyaawe Yesu khalayi khayaarweele wiirimu. (Joau 3:13) Ayo wahaatteela nrima uturuwela ukhala va watuninyani va. Inanna imocaaru, woohipica Yesu naahala uwunweleliha atthu imiliyau cene wiira akhale mpaka wapeephoni va watuninyani va. Uyo enre wiira otheene ale ari mmoopuweleloni a Nluku anaahala wunwelelihiya, hataa naale aliyaliye wiira ahopaca ukhala va watuninyani va. —Joau 5:28, 29.
MUNCERERE WIITTHUCA WINYU
Moone mbiiblyani citthu cinthoonyera wiira unaahala ukhitirya wunwelelihiya atthu akhwile ni wiira iyo itthwiiyo khweeliini inaahala wiirannya. Ni ciicammo moone mananna wunwelelihiya waatthu cinhalaaya wuumaalihani ni wuuvahani nweherero.
4. Yesu hothoonyera wiira naakhitiri uwunweleliha atthu
Muncerere wiitthuca itthu Yesu yampankenlyaawe mpatthannyaawe eehaniya Laazaru. Nsome Joau 11:14, 38-44, ni mwamalihaka usoma, moopele mwaha ala makohwaala:
Nincuwela cani wiira Laazaru khweeliini ahokhwa? —Moone iveerusu 39.
Yesu aamunwelelihile Laazaru wiira aturuwele ukhala va watuninyani va. Weeriyaka wiira Laazaru ukhwa wawe ahorwaa wiirimu, niireke Yesu aanhala umunweleliha?
5. Atthu enci anaahala wunwelelihiya!
Nsome Isaalimu 37:29, ni mwamalihaka usoma, moopele mwaha nna nikohonna:
Atthu imiliyau cene anaahala wunwelelihiya. Ayo atthwaayo anhala wunwelelihiya wiira yakhale vayi?
Uhiya paasi uwunweleliha atthu yaamwiiwelela Yehova, Yesu ciicammo naahala uwunweleliha atthu akhwaawe enci. Nsome Miteko 24:15, ni mwamalihaka usoma, moopele mwaha nna nikohonna:
Tipani oocivenleni umoona-tho ukati unhalaaya wunwelelihiya atthu?
Nyari khunonrikela umunwusa mwanawe norupa. Inanna imocaaru, Yesu khunonrikela umunweleliha ntthu ookhwa.
6. Wunwelelihiya waatthu ookhwa unaakhitirya wuumaalihani ni wuuvahani nweherero
Usoma mbiiblyani itthu yaamwiirannyeenle mwaaruusi mmoca ari mwaana anlopwana eehaniya Jairo, unawaalipiha nrima ni unawaamaaliha atthu enci, unaawerya nrima nlattu wookhweliya ntthu yanfentaaya. Nsome iyo ihantisi yokhweeliiyo nhina Luka 8:40-42, 49-56.
Yesu hinaaya umunweleliha mwaana a Jairo, uyo ahowiirela athumwaannyaayo co: “Nhoove, moonihere paasi waamini winyu.” (Moone iveerusu 50.) Nweherero wo wunwelelihiya atthu manannani cinhalaaya wuukaviherani . . .
mwakhweliyaka ntthu nnonfenteenyu?
mwaananaka masakha moolupale muukumini winyu?
Moone IVIDIYU, ni mwamalihaka woona, moopele mwaha nna nikohonna:
Manannani nweherero wo wunwelelihiya atthu ookhwa waamalihilyaaya ni waalipihilyaaya nrima asithumwaane Phelicity?
ATTHU AKIINA ANEERA: “Unaarika ukupali wiira atthu akhwile anaahala wunwelelihiya wiira aturuwele ukhala va watuninyani va.”
Nyuuva nnoonela cani?
Iveerusuni yaahaleenyu uvarela nteko wiira munkavihere ntthu woona wiira khweeliini iyo itthwiiyo inaahala wiirannya?
UTHIKILELA
Ibiiblya inaakhuluveliha wiira atthu imiliyau cene akhwile anaahala wunwelelihiya. Yehova nopheela wiira ayo atthwaayo aturuwele ukhala akumi ni honvaha ikuru Yesu Kristu wiira awunwelelihe ayo atthwaayo.
Wuupuwela
Isiyani Yehova ni Yesu impheelaaya waapankela atthu akhwile?
Atthu imiliyau cene anhala wunwelelihiya ankookhala vayi —wiirimu awula va watuninyani va? Kontha isiyani nyuuva nneereenyu commo?
Nyuuva nnaakupali wiira atthu yaafenteenyu akhwile anaahala uturuwela-tho ukhala akumi? Kontha isiyani?
MWAPHEELAKA UCUWELA CITTHU CIKIINA
Moone miruku cinreera utthara ntthu unonwerya nrima nlattu wookhweliya.
“Itthu Sinaakhaliherya Ale Akhweliwe” (Nvenye!, n.º 3 yo 2018)
Niireke khweeliini mattharelelo ombiiblyani pooti unkavihera ntthu unonwerya nrima nlattu wookhweliya?
Citthu cinreera upanka ntthu akhweliyaka wiira uhitepe unwerya nrima (5:06)
Mananna oonkavihera mwanhima khweliye mmucyaawe ukhitiri uvilela.
Niireke haavo nohala wunwelelihiya wiira akhale wiirimu? Tipani hinhala wunwelelihiya?
“Wunwelelihiya ikhanle isiyani?” (Mwaha umphwanyannya nsayitini jw.org)