Mwiikurumice wiira wanlokoni uhihinnye waataaniya

Nakhalaka ni mayamunneehu, hiiva ninawiicoonaka khampa Davidi ceecoonaawe: “Cinreeraaya, ni cincivaaya atthu yakhalaka wamoca naasunnaya yiiwananaka!” (Isaalimu 133:1) Masi nwo waataananwo khunkhumeelela veekha caya. Khula ntthu haana eekurumicaka

1. Isiyani intepa utikhiniha iriyari ya apoovu a Yehova?

Nyuuva mwarwaaka wankutthaanoni co wanlokoni no ilapo ikhwaawe, nnaahala woona wiira hataa nhiiwaka iluukeeyo nnohala wiicoona khampa nri wanlokoni winyu. Kontha isiyani? Kontha hiiva ninsoma Ibiiblya nivarelaka nteko ilivuru cimocaaru ntuninyani motheene. Ni hiiva ninawiikurumica wiira nithoonyiherane nifento. Hataa nikhalaka ilaponi, otheene cihu ‘ninlompela ncina na Yehova, wiira ninswalele wamoca’.—Sofoniya 3:9, niwehero.

2. Isiyani nyuuva inlamuliyeenyu upanka wiira wanlokoni uhihinnye waataaniya?

Ibiiblya ineera “nfentane venci ninrimeenyu wotheene” (1 Peturu 1:22) Nyuuva nnolamuliya upanka cani iyo itthwiiyo? Nhiwacere citthu cinvonyaaya akhunaninyu, masi nwacere makhalelwaaya omaana. Uhiya paasi waapatthanana ale cinaacivela citthu nyuuva cinoocivelani, mmananihe waacuwela mayamunna oovirikana. Ciicammo wakhalaka wiira ahaavo anaathanyeehu, niikurumice umalihaca iyo itthwiiyo.—Nsome 1 Peturu 2:17.a

3. Isiyani inlamuliyeenyu upanka wakhalaka wiira khanneewanana ni munneenyu awula ninrokorinyu?

Hiiva naatthu owaataana, masi ciicammo nikhanle atthu oopahuwa. Ikwaha ikhwaawe, ninaahala utthekelana. Phimaana Ibiiblya inniirelaa co: “Nhihiye ulevelelana.” Ni ciicammo iyo ineera: “Toko Yehova cuulevelenlyaaweni niiraati, nyuuva nhaana mpankaka ciicammo.” (Nsome Akolosu 3:13.) Hiiva khaninkhitiri waalikela ikwaha cotheene cinriipihaleehu nrima Yehova. Masi hataa ukhalaka commo, uyo naanilevelela. Phimaana, uyo naapheela cinene unoona naalevelelaka mayamunneehu ni asirokorihu. Moonelelaka wiira nhonnyoonyiha munneehu awula nrokorihu, mwiikurumice wiira mummalihe nanrokottole.—Nsome Matewus 5:23, 24.b

MUNCERERE WIITTHUCA WINYU

4. Nhaathanle mayamunna oowaataanana

Hiiva nimpheela wiira naathoonyihere nifento mayamunneehu otheene. Masi pooti unirika unfenta ntthu virikanne ni hiiva. Isiyani inhala unikavihera waathoonyihera ninfento? Nsome Miteko 10:34, 35, ni mwamalihaka usoma, moopele mwaha ala makohwaala:

• Yehova khanonthanla ntthu oohala umwaataanana; khula ntthu nopheela pooti unswalela. Nlattu wo iyo itthwiiyo, manannani cinlamuliyeehu waawehera atthu avirikanne ni hiiva?

• Manannani oothanyanaciya anooneenyu ncoko unkhanleenyu? Kontha isiyani nyuuva khannohala waathanya akhunaninyu?

Nsome 2 Akorintu 6:11-13, ni mwamalihaka usoma, moopele mwaha nna nikohonna:

• Isiyani inlamuliyeenyu upanka wiira mwaatanace nimayamunna avirikanne ni nyuuva?

5. Nlevelele ninrimeenyu wotheene ni mummalihe nanrokottole

Khiivo nanka itthu inhaleehu upheela unlevelela Yehova. Hataa ukhalaka commo uyo naanilevelela. Nsome Isaalimu 86:5, ni mwamalihaka usoma, moopele mwaha ala makohwaala:

• Ulevelela wa Yehova unrwaa mpanka vayi?

• Kontha isiyani nyuuva nnaasukhuru ulevelela wa Yehova?

• Hiiva ninaapheela wiiwanana ni mayamunneehu otheene. Citthuni caahala uniiriha uhikhitiri iyo itthwiiyo?

Manannani ninlamuliyeehu untakiha Yehova ni uhihiyerera waataana ni mayamunneehu ni asirokorihu? Nsome Miruku 19:11, ni mwamalihaka usoma, moopele mwaha nna nikohonna:

• Wakhalaka wiira ntthu nawuunyoonyihani awula nawuuveehani, isiyani nyuuva inlamuliyeenyu upanka wiira mmalihace itthu yiirannyeele?

Ikwaha ikhwaawe, hiiva ninawaaveehaka akhunanihu. Yeerannyaaka iyo itthwiiyo isiyani inlamuliyeehu upanka? Moone IVIDIYU, ni mwamalihaka woona, moopele mwaha nna nikohonna:

IVIDIYU: Yehova nancaaliha ule nommalihaca nanrokottole (6:01)

• Nvidiyunimmo, manannani arokorihwaayo yammalihilyaaya nanrokottole aakhumelenle?

6. Ntepe uwacera makhalelo omaana arinaaya mayamunneehu

Navirihaka ukati mwinci ni mayamunneehu, hiiva ninaacuwela makhalelwaaya omaana ni makhalelwaaya oohinamaana. Manannani cinlamuliyeehu utepa uwacera makhalelwaaya omaana? Moone IVIDIYU, ni mwamalihaka woona, moopele mwaha nna nikohonna:

IVIDIYU: Mwaawehereke saana mayamunneehu ni asirokorihu (5:10)

• Isiyani inhala wuukaviherani woona makhalelo omaana arinaaya mayamunneehu?

Yehova naawacera makhalelweehu omaana. Nsome 2 Akoronika 16:9a, ni mwamalihaka usoma, moopele mwaha nna nikohonna:

• Yehova naawacera makhalelo omaana arineenyu. Nneecoona cani ucuwela winyu iyo itthwiiyo?

UTHIKILELA

Nyuuva pooti ukavihera uhihinnya waataaniya wanlokoni, mwakhalaka namalevelela ni mwaafentaka mayamunna otheene.

Wuupuwela

• Isiyani inhala wuukaviherani uhaathanla mayamunna oowaataanana?

• Isiyani nyuuva inhaleenyu upanka ookhumelelakani nanrokottole ni munneenyu awula ninrokorinyu?

• Kontha isiyani nyuuva nnopheeleenyu untakiha Yehova mwaalevelelaka akhunaninyu?

MWAPHEELAKA UCUWELA CITTHU CIKIINA

Moone mananna ntakihero nimoca naapankilyaawe Yesu, ninhalaaya unikavihera uhiwuuluma pusya akhunanihu.

Nkumihe ithaapwa nniithoni winyu (6:56)

Niireke hiiva pooti wanlepeleehu nsammaha hataa nicuwelaka wiira khanitthekile?

“Ulepela nsammaha ikhanle itthu inkavihera ummalihaca nanrokottole” (Ukhalenla, 1 yo Novembro yo 2002)

Moone itthu yaakavihenre waataana alopwana eeli yaakhala ncoko woothanyanaciya.

Johny ni Gideon: Khalayi yaari awanani, masi nna co akhanle ntthu ni mwaamunnawe (6:42)

Moone mananna ommaliha nanrokottole ookhumelelakani ni munneenyu awula ninrokorinyu, uyo nanrokottolyooyo hinaaya umalihaca waataana wo wanlokoni.

“Mwamalihe ananrokottole nthoonyiheraka nifento” (Ukhalenla, yo Maio yo 2016)