Nhihiye imaaniinyu!

1. Masaahiti a Yehova araru ahimiye nhina iparaagarafu, yoonihenre cani unvaresesa Yehova?

MUUPUWELE citthu tthaaru cinaakhumelela Masaahiti a Yehova. (1) Mwanthiyana mmoca ri ucikola ni apurusoore anawaalattula anacikola otheene ari nsaala wiira arwee usukuhuuluni. Mwanthiyanoole naacuwela wiira iyo ikhanle isukuhuulu yonrusa Nluku; phimaana, niihisima uyo naakhotta urwaa. (2) Mmirawo mmoca oomaala ri wuulalyaani, akelaka khula inupa. Uyo nawoona wiira inupa impheelaawe ukela, phuuwanuwawe mmirawo mmoca nonsomanaawe pacale waatarawaca Masaahiti a Yehova. Masi hataa ukhalaka commo, uyo naarwaa mpaka ile inupeele ni nawaatta nkhora. (3) Nlopwana mmoca nawiikurumica uvara nteko wiira aalihere amucyaawe. Masi nihuku nimoca, untekoni aseefi ananruma wootha awula upanka itthu invirikaniha malamulo ookuvernu. Hataa acuwelaka wiira pooti woomoliya untekoni, uyo naahimya wiira khanlamuliya wootha ni wiira haana eettelaka malamulo, kontha iyo phi itthu Nluku inrumaawe wiira apanke ale anonswalela.—Aroo. 13:1-4; Mabere. 13:18.

2. Makohoni ninhaleehu waakhula, ni nlattuni?

² Ikhaleloni yoonihenryaaya ooraaru? Nyuuva pooti woonelela wiira ahoonihera makhalelo menci, toko ulipa nrima ni ukhuluvelya. Masi otheene ahoonihera ikhalelo imoca intepa woonannya—imaani. Ooraaru caya ahoonihera unvaresesa Yehova. Ayo ahokhotta upanka itthu inonrusa Nluku. Imaani phiwiirihale ayo upanka commo. Yehova ahokhala ootteeliya nlattu wo woona imaani yoonihenryaaya ooraaru caya. Hiivano ciicammo nimpheela untteeliha nrima Yehova. Nlattu wo iyo, ninaahala waakhula ala makohwaala: Imaani isiyani? Kontha isiyani nihaana nikhalanaka imaani? Ni isiyani ninlamuliyeehu upanka wiira nihihiye woonihera imaani ula ukati woorikoola?

IMAANI ISIYANI?

3. a) Ale anonswalela Nluku anoonihera cani imaani? b) Matakiheroni annikavihera ucuwela imaani isiyani?

³ Ale anonswalela Nluku anawoonihera imaani yanvaresesaka ni yanfentaka Yehova niiraati wanrimani waya. Yalakelaka upanka itthu, khanhiya utthara ile inoopuwelaawe Yehova. Mbiiblyani, nuulumo “imaani” ninaaca itthu yoolikana awula yoohipahuwa. Wootakihera, asarayeli yananvaha Yehova itthuvo conama, ni Nlamulo naanaahimya wiira caalamuliya ukhala inama coohipahuwa.b (Lev. 22:21, 22) Wakhala wiira iyo inameeyo inaahalela mwetto, nnyaru awula niitho nimoca; ni wakhala wiira yaari inama iretta, Yehova khaakhelela. Yehova aapheela wiira ikhaleke inama yoolikana ni yoohipahuwa. (Mal. 1:6-9) Yehova haana isariya yoopheela citthu coolikana. Wootakihera, muupuwele wiira nyuuva nnorwaa uthuma itthu yooliya, ilivuru awula ikaruma. Niireke mwaanaahala utthuna uthumiheriya itthu yoottemmwaca cinene awula yoohilikanaca? Unawoonannya wiira mena. Nimpheela uthuma itthu yoolikana ni yoohipahuwa. Yehova mpheela wiira nifento nihu ni unvaresesa wihu ukhaleke ciicammo. Uhaana ukhalaka woolikana.

4. a) Kontha isiyani ntthu oopahuwa pooti ukhitiri ukhalana imaani? b) Toko cineeraaya Isaalimu 103:12-14, isiyani Yehova ihinwehereraawe wiira nipanke?

⁴ Niireke iyo inthoonyera wiira nihaana ukhala atthu oohipahuwa wiira noonihere imaani? Unaarika hiiva wiicoona ukhala atthu “oohipahuwa”. Kontha otheene cihu ninaatthekaka. Masi cihaavo citthu piili cinthoonyera wiira khaninlamuliya ukhala oohipahuwa wiira noonihere imaani. Yoopacera, Yehova khanweheeha cinene coottheka cihu. Nuulumo nawe nineera co: “Yehova, waari wiira unaaweheeha coottheka cihu, tipani aahala weemela uhoolo waa?” (Isaa. 130:3) Uyo naacuwela wiira hiiva naatthu oopahuwa, omatampi, ni uyo naanilevelela. (Isaa. 86:5) Yonayeeli, Yehova naacuwela nipuro ninvelavelaaya ikuru cihu, ni khanweherera wiira nipanke citthu cihinkhitiriihu. (Nsome Isaalimu 103:12-14.) Vano, ninwa cani nikhalaka oolikana ni oohipahuwa uhoolo wawe?

5. Kontha isiyani ale anonswalela Yehova ahaana yooniheraka nifento wiira akhalane imaani?

⁵ Ale anonswalela Yehova wiira akhalane imaani, ahaana yooniheraka nifento. Unfenta wihu Nluku ni unvaresesa wihu khampa Paapeehu owiirimu, uhaana wakhalaka woolikana ni woohipahuwa. Wakhala wiira nifento nihu phiryaaya commo, hataa ukati woottehiya upanka itthu yoohinamaana, pooti ukupali wiira khweeli nihaana imaani. (1 Ikor. 28:9; Mat. 22:37) Muupuwele-tho yaakhumelenle Masaahiti araru niwoopenleehu mwaha. Kontha isiyani upankalyaaya commo? Niireke ule mwanthiyanoole unanrusa uthuka? Ni ule mmirawoole, niireke aanaapheela utarawaciya ukati waahalaawe ulalyeera ile inupeele? Awula nlopwanoole niireke aanaapheela woomoliya untekoni? Mena. Ayo apankale commo kontha anaacuwela itthu inonrusa ni inoncivela Yehova, ni otheene caya anaahoolelihera upanka ile inoncivela Papaaya owiirimu. Ukhala wiira ananfenta, anaapacera umuupuwela ahinaaya ulakela upanka itthu. Ala manannaala, ayo anawoonihera wiira ahaana imaani.

KONTHA ISIYANI NIHAANA NIKHALANAKA IMAANI?

6. a) Kontha isiyani nihaana nikhalanaka imaani? b) Atamu ni Hawa yooceelale cani woonihera ukhalana imaani?

⁶ Kontha isiyani otheene cihu nihaana nooniheraka ukhalana imaani? Nihaana nooniheraka ukhalana imaani kontha Sotwani homootherya Yehova ni ciicammo howootheryani nyuuva. Nno nlayikhanno, nootakhala ni niikhalihalee Sotwani awula “nlupatthi”, khalayi wanlavani no Eeteni. Sotwani ahomananiha unanariha ncina na Yehova ukati waamoothenryaawe Yehova ukhala nhooleli oohinamaana ni oohikhuluvelya. Atamu ni Hawa yahokhala mphantte wa Sotwani ni yahonrukunuwela Yehova. (Upha. 3:1-6) Makhalelo owanlavani no Eeteni, yaanawaavaha ukati woolipihaca nifento naya ni Yehova. Masi ukati Sotwani waamoothenryaawe Nluku, wahoonannya wiira nifento naya khanaari noolikana ni noohipahuwa. Wahoolo, nahokhumelela nna nikohonna: Niireke aanaahala ukhumelela pinaatamu onvaresesa Yehova ni nifento? Wo moolumelo makhwaawe, niireke apinaatamu yaanaahala ukhitiri woonihera ukhalana imaani? Nno nikohonno nahokhumelela uwakati wa Jó.

7. Toko cinttonkaaya ilivuru ya Jó 1:8-11, Yehova ni Sotwani yoonenle cani imaani yaarinaawe Jó?

⁷ Jó aakhala mahuku asarayeli waaryaaya Wiiciipitu. Imaani Jó yaarinaawe khayaalikananiya. Masi toko ciriihu hiivano, uyo aari oopahuwa ni aanaattekaka. Unookhalaru commo, Yehova aananfenta Jó nlattu wo imaani yaarinaawe. Pooti ukhalaka wiira Sotwani aanoomwiirela Yehova wiira khaavo pinaatamu nhala woonihera imaana. Phimaana Yehova ahomwiirela Sotwani wiira anwehe Jó. Makhalelo a Jó yaanawoonihera wiira Sotwani ahootha! Sotwani ahokhanyerera wiira imaani ya Jó ittehiye. Yehova aanankhuluvela Jó, phimaana ahonhiya attehiyaka ni Sotwani.—Nsome Jó 1:8-11.

8. Sotwani anttehale Jó manannani?

⁸ Sotwani ntakhali ni nakhirini. Woopacera, uyo ahomwaakha Jó mihakhu cawe, anantekwaawe ni ahonanariha ncina na Jó ncoko waakhalaawe. Sotwani ahaawaanela ihasara amucyaawe Jó ni aheeva asaana khuumi a Jó. Uhiya nnya citthunnya, Sotwani ahonwaanela Jó iretta yothuku cuulupale coowerya mwiirutthuni wawe motheene, ukhuma mmuru mpaka mmettoni. Amwaara a Jó yahokhala ni masukhuli menci ni yahontheperya Jó wiira ahiye uvilela iretta yaarinaawe, amuulume pusya Nluku wiira akhwe. Jó ahopheela ukhwa, masi uyo khaahiyale woonihera imaannyaawe. Vano, Sotwani ahomananiha mananna makina. Uyo ahaavarela nteko apatthani araru a Jó. Ayo yahorwaa umootola Jó, masi khayammaalihale. Uhiya ummaaliha, ayo yaanonvaanyiha cinene. Yaamwiirela wiira Nluku phanhuviha Jó ni khaawacera mena vakaani imaani yooniheraawe. Ni mpaka yaheera wiira Jó aanaattarusiya nlattu woopanka citthu coohinamaana!—Jó 1:13-22; 2:7-11; 15:4, 5; 22:3-6; 25:4-6.

9. Isiyani Jó yaakhottalyaawe upanka, hataa akhalaka ni masankiho menci?

⁹ Jó aapankale isiyani ukati wo masankiho otheene ayo? Ukhala wiira Jó aari oopahuwa, ahaavaanyiha apatthannyaawe naaviruwenle ni ahooluma citthu wahoolo coonelenlyaawe wiira khaalamuliya wuuluma. Uyo aahooholelihera waakihera isariyaawe, uhiya uhoolelihera waakihera isariya ya Nluku. (Jó 6:3; 13:4, 5; 32:2; 34:5) Unookhalaru commo, Jó ahokhotta unrukunuwela Yehova Nluku, hataa akhalaka ni masankiho menci. Uyo ahokhotta ukupali citthu cowoothiya coolumaaya apatthannyaawe. Uyo aheera: “Mi akaahala mena vakaani uwoonani ukhala atthu osariya! Mpaka wanhalaaka ukhwa, akinhala uhiya imaannyaaka!” (Jó 27:5) Ayo akhanle moolumo moolupale. Jó ahokhotta uhiya imaannyaawe; ni hiiva ciicammo nihaana nintakihaka.

10. Nyuuva nnokela cani nhina mwaha ukumihacalyaawe Sotwani ukati wa Jó?

¹⁰ Nyuuva nnokela cani nhina mwaha ukumihacalyaawe Sotwani ukati wa Jó? Uyo neera wiira nyuuva khannonfenta Yehova weekhweeli, nnaahala unhiya unswalela wiira mwiicoopole, ni neera wiira imaani irineenyu khinakhala yokhweeli! (Jó 2:4, 5; Apoka. 12:10) Nneecoona cani ucuwela winyu iyo? Unawuuweryaani nrima, keera? Masi muupuwele co: Yehova nawuukhuluvelani venci wiira khannohala uhiya imaaniinyu, mpaka honhiya Sotwani wiira attehe imaaniinyu ni nawuuvahani ukati wo woonihera wiira Sotwani hootha. Yehova nawuukhuluvelani ni heera wiira naahala wuukaviherani woonihera imaani. (Mabere. 13:6) Nihocaaliya venci ukhuluveliya ni Nkhulupale ontuninyani motheene! Vano munnokhitiri woona nlattuni ninlamuliyeehu woonihera imaani? Ukhalana imaani unaanikavihera woonihera wiira Sotwani hootha. Ni nakhalanaka imaani, ninawoonihera wiira niri mphantte wa Yehova ni ninaakupali wiira uyo nhooleli omaana. Vano isiyani ninlamuliyeehu upanka wiira nihihiye imaaniihu?

ISIYANI NINLAMULIYEEHU UPANKA WIIRA NIHIHIYE IMAANIIHU UKATI WOORIKOOLA?

11. Citthuni nineetthuceehu ni Jó?

¹¹ Ala mahuku ‘ookhiceraala’, Sotwani naatepa waattehatteha ale anoswalela Nluku. (2 Tim. 3:1) Ala mahuku oorikaala, isiyani ninlamuliyeehu upanka wiira nikhale oolipa ni nihihiye ukhalana imaani? Wowaakulela, khacimala citthu cineetthuceehu ni Jó. Ahinaaya unkhumelela masakha, Jó aanawoonihera imaani nenne nokhalayi. Nttweee noone citthu tthaaru cinniitthucihaawe Jó cinoonihera mananna owiilipihaca wiira nihihiye ukhalana imaani.

12. a) Toko cinttonkaaya ilivuru ya Jó 26:7, 8, 14, manannani Jó cantikhinacaawe ni canhisimaawe Yehova? b) Hiiva manannani ninlamuliyeehu utepa untikhinaca Yehova wanrimani wihu?

¹² Wiira alipihace nifento nawe ni Nluku, Jó aanaatikhinaca makhalelo a Nluku. Jó ahovira ukati mwinci awehaka citthu Yehova cumpalyaawe. (Nsome Jó 26:7, 8, 14.) Uyo ahokhala ootikhinihiya ukati woopuwelaawe inanna compiyaaya ituninya, irimu, mahutte ni itari, masi ahokupali wiira khaacuweleeha ratta citthu cotheene Yehova cumpanlyaawe. Uyo ciicammo aanaalemeliha moolumo a Yehova. Aacaka moolumo a Yehova, Jó aheera: “Kiheesa wanrimani moolumwaawe”. (Jó 23:12) Jó aanantikhinaca ni aananhisima Yehova. Uyo aananfenta Nluku khampa Paapaawe ni aapheela unciveliha. Phimaana, Jó ahotepa ulakela woonihera ukhalana imaani. Hiiva ninlamuliya upanka toko Jó. Ilelo, ninaacuweleehaa cinene citthu cowumpiya uvikana inanna atthu caacuwelaaya mahuku a Jó. Ni ciicammo nihaana Ibiiblya yotheene inhala unikavihera uncuwela Yehova ratta-raatta. Citthu cotheene cineetthuceehu pooti unikavihera utepa untikhinaca Yehova wanrimani wihu. Vano, untikhinaca wihu ni unhisima wihu Yehova, unaahala unikavihera upheela unfenta, umwiiwelela ni upheela woonihera ukhalana imaani.—Jó 28:28.

13-14. a) Toko cantikhiyaaya nlivuruni ya Jó 31:1, Jó oonihenre cani wiira aanaamwiiwelela Nluku? b) Hiiva ninlamuliya untakiha cani Jó?

¹³ Jó aholipihaca imaannyaawe nlattu wo wiiwelela. Jó aanaacuwela wiira apheela ukhalana imaani, ahaana amwiiwelelaka Yehova. Khweeliini, wiiwelela unaanilipiha wiira nihihiye imaaniihu. Jó aanawiikurumica umwiiwelela Nluku khula nihuku. Wootakihera, uyo aanawiikurumica waawehera ratta athiyana. (Nsome Jó 31:1.) Ukhala wiira ahothela, uyo aanaacuwela wiira khaalamuliya uciveliya naathiyana akina, yahaakhanle amwaarawe. Ilelo, ntuninyani ninkhaleehu ninaakhanyererihiya cinene uraruwa awula weetta uluva. Toko Jó, hiiva ninlamuliya ukhotta uciveliya ni ntthu hikhanle amwaarihu awula awanuwihu. Ciicammo ninlamuliya ukhotta woona khula inanna yolatarato cinwoonihera atthu oohiwara ikuwo ratta awula copornografia. (Mat. 5:28) Neevaracaka khula nihuku, ninaahala wiilipiha wiira nihihiye woonihera imaani.

¹⁴ Jó ciicammo ahomwiiwelela Nluku ni mananna oonelaawe mihakhu. Jó ahoona wiira aakhuluvenle mihakhu cawe, aanaahala upanka itampi yuulupale ni aanaahala uttarusiya. (Jó 31:24, 25, 28) Ituninya inkhaleehu ilelo, inoocara atthu anvaresesa maali. Noonelaka ratta mihakhu, khampa Ibiiblya cinnilakaaya wiira nipanke, ninaahala wiilipiha wiira nihihiye woonihera imaani.—Miru. 30:8, 9; Mat. 6:19-21.

15. a) Isiyani Jó yaawehereraawe yanlipihale wiira hihiye ukhalana imaani? b) Kontha isiyani unaareera wuupuwela niweherero ninnivahaawe Yehova?

¹⁵ Jó khaahiyale ukhalana imaani kontha aanaaweherera wiira wahoolo Nluku aanaahala untthuva. Uyo aanaakupali wiira Nluku aanaaciveliya ni imaani yaarinaawe. (Jó 31:6) Hataa akhalaka ni masankiho, Jó aanaakhuluvela wiira Yehova aanaahala untthuvela wahoolo. Ukhuluvela commo, wahonkavihera uhihiya woonihera imaani. Yehova yahoncivela venci imaani ya Jó, mpaka Uyo ahontthuvela cinene, hataa akhalaka oopahuwa! (Jó 42:12-17; Tiya. 5:11) Ni Jó naaweherera waakhela-tho iparakha cinci wahoolo. Niireke nyuuva nnaakhuluvela wiira Yehova naahala wuutthuvelani wahoolo? Nlukweehu kharukunusale makhalelwaawe. (Mal. 3:6) Noopuwelaka wiira uyo inancivela cinene imaaniihu, ninaahala weesa wanrimani wihu niweherero nooreera nooholo nirineehu.—1 Atesal. 5:8, 9.

16. Isiyani ninlamuliyeehu ulakela upanka?

¹⁶ Phimaana, nlakele uhihiya woonihera ukhalana imaani! Ukati nkina, nyuuva pooti wuupuwela wiira nneekurumica woonihera imaani veekha, masi khanri veekha. Nri nkhayi naatthu enci ntuninyani motheene ahinhiya woonihera imaani. Mooniheraka imaani, ciicammo nnaahala ukhala wamoca ni ikhurupu yaatthu enci, alopwana ni athiyana yahaahiyale ukhalana imaani khalayi, hataa yahalaka wiiviya. (Mebere. 11:36-38; 12:1) Otheene cihu, nilakele utthara moolumo a Jó, aneera: “akinhala uhiya imaannyaaka!” Mwaahihiyeke woonihera imaani, nnaahala unttitthimiha Yehova mpaka!