Mananna cinhaleehu wiikhikicera wiira nihivarihiye ni ntapha nimoca na Sotwani

ASARAYELI yaheetthenkaca wiira alapuwe mooloko Yortani. Woohipica, ayo yaanaahala ukela ilapo Nluku yaakhuluvelihalyaawe. Nihuku nimoca, asarayeli yahootoliya. Yaari athiyana yaakhuma ilapo ikhwaawe yaawaale waalattula alopwana asarayeli wiira arwee usukuhuluni yuulupale. Apatthani o phiyaaru, wiina, iyoolya yoociva—waakhala toko iyo yaari isukuhuulu yahaalamuliyaaya uviriiha. Ale athiyanaale yahaana ilema ni meettelo yaavirikaniha Nlamulo Yehova naavahalyaawe asarayeli. Hataa ukhalaka commo, pooti yahaavo alopwana asarayeli yoopuwenle co: ‘Ayo khanhala unihapusa. Ninaahala weetta ratta.’

Isiyani yaakhumelenle? Ibiiblya inaanihimyera: “Apoovu yahancera uraruwa naathiyana ooMowapi.” Khweeliini, ale athiyanaale yaapheela wiira alopwana asarayeli yaaswalele anlukwaaya oohikhweeli. Ni ayo yahaaswalela! Ni isariya, “Yehova ahaaviruwela cinene asarayeli.”—Manu. 25:1-3.

Asarayeli khayeewelenle Nlamulo na Nluku wo mananna meeli: ayo yahaaswalela anluku oohikhweeli ni yahoraruwa. Nlattu wo iyo, asarayeli enci yahokhwa. (Nkw. 20:4, 5, 14; Deut. 13:6-9) Unaacuwela nlattuni untepaaya uniwereeha nrima itthu yaapankalyaaya? Ukhalaka wiira ayo yaahaleela vakaani ukela ilapo yaakhuluvelihiyaaya. Asarayeli encaale anamwiiwelenle Nluku, ayo woohipica yaanaahala ulapuwa mooloko Yortani ni utthuveliya ni Yehova.—Manu. 25:5, 9.

Apostolu Paulu aacaka itthu yaakhumelenle asarayeli, hantikha co: “Nnyo citthunnyo caakhumelenle ayo khampa nthoonyero ni cantikhiye wiira nihimeriye hiivano, uniphiyenre umala wotuninya.” (1 Akor. 10:7-11) Khweeliini, Sotwani wahontteela nrima cinene nlattu woowoona atthu akiina oosarayeli yavaraka itampi yuulupale ni yahikelaka ilapo yaakhuluvelihiyaaya. Ikhanle itthu yuulupale cinene hiivano weesa wanrimani wihu itthu yaakhumelenle asarayeli. Khiivo itthu ikiina yoohala untteeliha nrima Sotwani cinene, uvikana unoona hiiva nihaleelaka ukela upeephoni!

NTAPHA NIMOCA NOWOOPIHA

Sotwani naapheela cinene wiira makristau avarihiye ni itapha cawe. Wiira akhitiri waavariha, uyo naavarela nteko citthu cinci cincuweleehaawe ni cinoonaawe wiira ahokhitiri waahapusera atthu enci. Toko coonaleehu, uyo ahovarela nteko uruparupa woohiloka wiira aahapuse asarayeli. Mahuku olelo, uraruwa nanlelo nikhanle ntapha nowoopiha. Inanna imoca hiivano yookhitiriya uhapusiya ni nno ntaphanno ikhanle ipornografia.

Ilelo, khula ntthu pooti ukhitiri woona ipornografia woohicuwela mena ntthu. Khalayi, ntthu aapheela woona ipornografia ahaana arwaaka woona ifiilimi ca atthu oolupale usineemani awula urwaa uthuma irevista coosece nipuro naathumihaciya ijornal. Imaara cinci, atthwaayo khayaarwaaka ayo mapurwaayo kontha yaanawoona ihaaya nlattu wo wooniya naatthu akiina. Masi ilelo, mwinternetini, ntthu pooti woona ipornografia nari untekoni ni mpaka nari nkaaroni yeemesiye. Ilapo cinci, athiyana ni alopwana anaakhitiri woona ipornografia woohikhuma wapuwani waya.

Kahi iyo paahi. Atelefoone ni itableti cihokhitiriha woona ipornografia. Eettaka munttalani awula nari nkarerani, ntthu pooti woona ilatarato coosece ni telefoone ncisalyaawe mmatatani.

Nna va uhinrikaaya woona ipornografia ni upanka iyo woohicuwela mena ntthu, ipornografia inaawaahonona atthu enci uvikana khalayi. Atthu enci anoona ipornografia anaahonona uthelanaca waya, anaahiya wiihisimu ni anaahonona muupuwelelwaaya. Intepa, ukhalaka wiira ipornografia inaahonona upatthani wa ntthu ni Nluku. Khunakhala uvonya wuuluma wiira ipornografia inanhonona ntthu noona. Iyo inaarakaliha moopuwelelo aatthu enci. Ni nnyo ilottannyo pooti nuukatyaaya uvona, masi ciicammo cinaahiya marotthela oorika umalamala.

Yehova pooti unikhikicera wiira ihinihapuse iyo itapha Sotwani invarelaawe ntekweeyo. Masi hiiva napheelaka ukhikiceriya nihaana upanka itthu asarayeli yahaapankalyaaya—‘uhihiya umwiiwelela’ Yehova. (Nkw. 19:5) Nihaana nicuwelaka wiira ipornografia ikhanle itthu yonrusa cinene Nluku. Nlattuni uyova noopuwelaawe commo?

UNTAKIHE YEHOVA—YUURUSE IPORNOGRAFIA

Wuupuwele ila: malamulo Nluku aavahalyaawe asarayeli khayaalikananiya. Khaavo apoovu yaarina malamulo oolikana ni malamulo yaavahiyaaya asarayeli. Ayo malamulwaayo yaakhala toko isiri yaakhikicera asarayeli wiira ahihapusiya ni citthu coohirya caapankaaya apoovu aattamanannyaaya. (Deut. 4:6-8) Nhina ayo malamulwaayo, yaanawoonnya ikhweeli imoca yuulupale: Yehova unanrusa uraruwa.

Yehova ahohimya citthu coohinamaana cotheene caapankaaya apoovu aattamanani aasarayeli, vano uyo ahowiirela asarayeli: “Nhipanke citthu atthu cimpankaaya nlaponi yooKanaa, ilapo inoorwaanaakani.” Ni aheera-tho: “Ilapweeyo ikhanle yoohiryaa, ni miiva kinaahala uttarusa nlattu woottheka waya.” Woonela wawe Yehova, Nluku owaarya oosarayeli, makhalelo yaarinaaya atthu ooKanaa yaari oohirya cinene mpaka ilapo yaakhalaaya ciicammo yahokhala yoohiirya, yoohononnya.—Lev. 18:3, 25.

Yehova ahaattarusa atthu ooKanaa, masi atthu olapo cikiina khayaahiile uraruwa. Cinavinre myaakha coopwaha 1.500, apostolu Paulu aheera wiira makristau yaakhala ilapo ca atthu ‘yaahiile meettelo omaana.’ Ayo yaheevaherera “utthara meettelo oohihisima wiira apanke niikhwilu khula itthu yoohiirya.” (Efesu 4:17-19) Ni ilelo khivirikanne itthu. Meettelo arinaaya atthu enci akhanle oohinamaana ni ayo anawiicoona nlattu wo ayo makhalelwaayo. Ntthu pooti uphwanya ilatarato copornografia nipuro nahaawehereraawe wiira aanaahala uphwanya. Masi hiiva, nikhanle makristau eekhweeli, nihaana nisempaka woona nnyo citthu coohinamanannyo.

Ipornografia ikhanle itthu inonveeha cinene Yehova. Uyo ompale apinaatamu khampa uyova ciryaawe. Uyo honivaha makhalelo omaana ni honivaha ankhili annikhitiriha ucuwelela itthu wakhala wiira yomaana awula yoohinamaana. Athoonyeraka ucuwelaca, Nluku hopanka malamulo nhina uruparupa nlopwana ni nthiyana. Uyo hohelela mpika wiira uruparupa nlopwana ni nthiyana ikhale itthu yoohala waatteeliha nrima paasi atthu athelanne. (Upha. 1:26-28; Miru. 5:18, 19) Niireke ale ampanka ipornografia anawuupuwela toko Yehova cinoopuwelaawe? Mena. Uhiya commo, ayo khaneettela mena vakaani ikettelo ca Nluku. Khweeliini, ayo ananveeha Yehova. Uyo naahala unhukhumu otheene ule mpanka ni mmwarusela citthu cowoonihera uraruwa—Aroo. 1:24-27.

Vano ale ansoma ni anoona ipornografia imweeni? Atthu akiina anoopuwela wiira ipornografia khinakhala itthu yootakhala. Masi khweeliini, ayo atthwaayo anawaakavihera ale ahinhisima ikettelo ca Yehova. Atthunaka iyo khinakhala itthu yaalakenlyaaya ukati wancenryaaya woona ipornografia. Masi Ibiiblya inaathoonyera ratta wiira ale anonswalela Nluku eekhweeli ahaana yaarusaka cinene ipornografia. Isaalimu 97:10 ineera: “Nyuuva nnonfenta Yehova, yuuruseni yoohiloka.”

Hataa ni ale ahimpheela woona ipornografia, pooti waarikela cinene utthawa ipornografia. Hiiva naatthu oopahuwa ni atthunaka ninawiikurumica cinene wiira ninyeme uraruwa. Ni nrimeehu woopahuwa pooti umananiha unikupaliha wiira woona ipornografia khinakhala itthu yootakhala. (Jer. 17:9) Wakhala wiira iyo inawuukhumelela, ucuwele wiira makristau enci ahokhitiri utthema iyo ikhottweeyo. Woone manannani Nuulumo na Nluku cinhalaaya wuukavihera wiira nihuuvarihe nno ntapha na Sotwani nno.

UHIKHALE WUUPUWELAKA CITTHU COOHINAMAANA

Toko coonaleehu, asarayeli enci yaahapusiye ni citthu coohinamaana cowaacivela wanrimani waya, ni nlattu wo iyo yahaakhumelela ihasara. Itthu imocaaru pooti unikhumelela ilelo. Tiyaku, mwanhimaawe Yesu ooyaraciya umaama umoca uvirikana upaapa, ahohimya itthu yo woopiha inkhumelela eeraka co: ‘Khula ntthu notheperiya ni citthu concivela wanrimani wawe. Phimaana coocivela wanrimani catepaka wiithoonyera, cinaapankiha matampi.’ (Tiya. 1:14, 15) Ntthu ahiyaka yoonuwaka wanrimani wawe itthu yoohinamaana inoncivela, uyo atthunaka mmalela uvara matampi. Phimaana, nakhalanaka moopuwelelo oosece, nihaana ukumiha mmuru wihu ayo moopuwelelwaayo—woohikhanyerera wuupuwela.

Yoophwanyaka moopuwelelo oohinamaana, uhipicapice upanka itthu. Yesu aheera: ‘Wakhala wiira ntata naa awula mwettwaa unawuutthekiha, uthikile ni urihele uttayi. Ciicammo, wakhala wiira niitho naa ninawuutthekiha, ukumihe ni urihele uttayi.’ (Mat. 18:8, 9) Yesu khaapheela uhimya wiira ntthuuyo haana eerakalihaka. Yesu waapankalyaawe nno nlattaniheronno aapheela uthoonyera wiira ntthuuyo haana ahiyaka khula itthu inontthekiha—uhiya iyo itthwiiyo woohipica ni woohituruwela-tho upanka awula ukhalana. Ninlamuliya utthara cani iyo ikannweeyo nhina woona ipornografia?

Wakumananaka ipornografia, uhuupuwele: ‘Khinhala ukiiriha itthu.’ Urukunuse meettho woohipica. Ukumihe ikanaali yo TV woohipica. Uttipihe wowaakuvya ikomputatoore awula telefoone. Wuupuwele ni uweheehe itthu ikiina yomaana. Upanka commo unaahala wuukavihera weettihera ratta moopuwelelwaa, woohihiya citthu coohinamaana cuuhapusaka.

UNLAMULIYA UPANKA ISIYANI WOOPUWELAKA CITTHU COSECE WOONALYAA KHALAYI?

Weeva atthunaka uhokhitiri uhiya woona ipornografia. Masi, ukati nkiina, atthunaka unawuupuwela ilatarato copornografia coonalyaa khalayi. Unlamuliya upanka isiyani? Wooripiha nrima, ilatarato ni moopuwelelo opornografia pooti uhala mmuruni wa ntthu ukati mwinci. Ni ukati ntthuuyo uhinwehereraawe, uyo pooti wancera wuupuwela nnyo ilataratonnyo. Yookhumelelaka iyo, weeva atthunaka unaapheela upanka itthu yoohiirya, toko wiivarakaca wiinena imaara cinci, mpaka woona uciva mwiirutthuni. Phimaana, uhaana ucuwelaka wiira ayo moopuwelelwaayo anaahala wuuphwanya ukati uhinwehereraa ni uhaana wiitthenkacaka wiira ukhitiri unyema.

Ulakele wuupuwela ni upanka citthu toko Nluku cimpheelaawe. Untakihe apostolu Paulu, aalakenle ‘uttarusa irutthwaawe ni weettihera khampa ipottha.’ (1 Akor. 9:27) Uhihiye moopuwelelo oohinamaana yookhalihaka ipottha. Utthare ikano yo mbiiblyani: “Nrukunuse meettelweenyu, nrehereryaka moopuwelelweenyu, wiira mwiithoonyere mwaasineeneenyu itthu yomaana, yootthunnyaa ni yoohipahuwa impheelaawe Nluku.” (Aroo. 12:2) Uhiliyale: Wuupuwela ni upanka citthu toko cimpheelaawe Nluku unaatteeliha nrima cinene uvikana upanka citthu coohinamaana.

Umananihe uhela mmuru iveerusu co mbiiblyani. Vano, yoophwanyaka moopuwelelo oohinamaana, wiikhanyererihe wuupuwela nnyo iveerusunnyo. Iveerusu toko: Isaalimu 119:37; Isaiya 52:11; Matewus 5:28; Efesu 5:3; Akolosu 3:5; ni 1 Atesalonika 4:4-8. Nnya iveerusunnya pooti wuukavihera uwehera ipornografia toko Yehova cinweheraawe ni wuukavihera ucuwela isiyani uyo inwehereraawe wiira weeva upanke.

Vano woonukhelaka cinene woona ipornografia awula wuupuwela citthu cosece? Isiyani inlamuliyaa upanka? Utthare ntakihero nomaana na Yesu. (1 Pet. 2:21) Yesu upattisiya wawe, ahottehiya ni Sotwani imaara cinci. Yesu aapankale isiyani? Uyo khaahiyale wiikurumica ukhotta. Yesu aromolaka iveerusu cinci co mbiiblyani khula ukati waattehiyaawe, ahonkhottela Sotwani. Yesu aheera: “Ukhume va, Sotwani!”, ni khweeliini Sotwani ahokhuma. Yesu khaahiyale wiikurumica. Weeva ciicammo khunlamuliya uhiya wiikurumica. (Mat. 4:1-11) Sotwani ni ituninyaawe khanhala uhiya umananiha ucariha mmuru wihu moopuwelelo oohinamaana, masi uhihiye wiikurumica. Weeva unaahala ukhitiri unyema ipornografia. Yehova naahala wuukavihera weeva untthema uyo nwanannyuuyo.

UNLOMPE YEHOVA NI UMWIIWELELE

Uhihiye ulompa ni ulepele ukaviheriya ni Yehova. Paulu heera: “Mpanke wiira muncuwelihe Nluku masukhuli arineenyu; ni ineema ya Nluku, invikana moopuwelelo otheene, inaarwaa usunka nrimeenyu ni moopuwelelweenyu iriyari wa Yesu Kristu.” (Afili. 4:6, 7) Nluku pooti wuuvaha nnema wiira ookhitirihe unyema itampi. Weeva wamwaattamelaka Yehova, ‘uyova naahala uwaattamela.’—Tiya. 4:8.

Ukhala nkhayi ni Nkhulupale ooverihela ntuninyani motheene phi itthu yuulupale innikhikicera. Yesu aheera: “Nhooleli otuninya [Sotwani] hophiya. Ni uyo kharina ikuru yookihoolela.” (Joau 14:30) Kontha isiyani Yesu aanaakhuluvela commo? Uwakati nkiina uyo aheera: “Ule kiveleelihale ri ni miiva; uyo khakihiyale veekha, kontha akinhiya upanka inoncivela.” (Joau 8:29) Weeva waahihiyeke wiikurumica upanka inoncivela Yehova, uyo khanhala wuuhiya veekha. Phimaana, unyeme ntapha nopornografia, ni Sotwani khanhala ukhalana ikuru yo wuuhapusa weeva.