Weeva unaawacera ‘nkhikicerwaa muulupale ukhanle waamini’?

1-2. a) Toko cinthoonyeraaya Efesu 6:16, nlattuni ninlamuliyeehu ukhalana “nkhikicero muulupale ukhanle waamini”? b) Makohoni anhaleehu waakhula nhina ula mwahoola?

WEEVA uhaana “nkhikicero muulupale ukhanle waamini”? (Usome Efesu 6:16.) Woohaanyihaca, weeva uhaana. Toko nkhikicero waakihaaya irutthu ya natoropa, waamini waa unawuukhikicera weeva wiira unyeme citthu coohinamaana co ila ituninyeela, toko uraruwa, ikhirini ni khula itthu inonrusa Nluku.

² Masi hiiva ninkhala ukati wo “mahuku ookhicera,” ni waamini wihu unaahala uttehiya cinene. (2 Tim. 3:1) Phimaana, nihaana wiiweheeha wakhala wiira nkhikicerweehu ukhanle waamini wihu, uri saana awula mena. Unhala upanka cani iyo? Ni isiyani inhala wuukavihera uvarelela cinene nkhikicerwaa? Ninaahala waakhula ala makohwaala nhina ula mwahoola.

UWEHEEHE RATTA NKHIKICERWAA

3. Anatoropa yaawacera cani nkhikicerwaaya, ni nlattuni waapankaaya commo?

³ Khalayi, anatoropa yaavarelaka nteko nkhikicero woowarihiya nrapala nonama. Anatoropa yaanattikitthela makhura nkhikicerwaaya wiira nrapala nihunttwe ni wiira mapuro oyuuma ahinyeele nrence. Natoropa oonaka wiira nkhikicerwaawe khuri saana, aanaalokihaca woohipica. Commo, uyo aakhala owiitthenkaceene wiira arwee ukhottoni. Nna ntakiheronna ninlattanaca cani ni waamini waa?

4. Nlattuni uhaana uweheehaka nkhikicerwaa ukhanle waamini, ni manannani cinlamuliyaa upanka iyo?

⁴ Toko anatoropa o khalayi, khula ukati weeva uhaana uwehaka nkhikicerwaa khampa uri saana awula mena, ni uhaana uwaceraka. Upanka commo unaahala wuukavihera ukhala owiitthenkaceene wiira waane ikhotto yeekristau—ikhotto irineehu ni malayikha oohinamaana. (Efesu 6:10-12) Uwacera nkhikicerwaa, ukhanle waamini, khinakhala itthu weeva inlamuliyaa uweherera wiira ntthu nkhwaawe naahala wuupankela. Unhala ucuwela cani wiira weeva uri owiitthenkaceene wiira waanane marikariko? Woopacera, uhaana ulompa unlepelaka Nluku wiira ookavihere. Vano, uhaana uvarela nteko Nuulumo na Nluku wiira ukhitiri wiiwehera khampa Nluku cinooweheraawe. (Mabere. 4:12) Ibiiblya ineera: “Unkhuluvele Yehova ni nrimaa wotheene; uhikuluvele ankhilyaa.” (Miru. 3:5, 6) Uttharihaka inhimyaaya ila iveeruswiila, umananihe wuupuwela itthu yookhumelenle mphiyaaruni ni wuupuwele itthu yaapankalyaa uyo ukatyuuyo. Wootakihera, uhaavo ukati weeva woothwaalyaaya nsurukhu? Uyo ukatyuuyo, niireke wahoopuwela itthu inkhuluvelihaawe Nluku nwarakhani yo Maberewu 13:5, ineera “mi akinhala wuuhiya ni akinhala wuunyanyala”? Ukati woopuwenlyaa ayo moolumwaayo, niireke weeva wahokhuluvela wiira Yehova aanaahala wuukavihera? Wakhala wiira wahopanka commo, iyo inthoonyera wiira weeva unaawacera ratta nkhikicerwaa, ukhanle waamini.

5. Ukati wooweheeha waamini waa, isiyani weeva atthunaka inhalaa woonelela?

⁵ Ukati wooweheeha waamini waa, weeva pooti ukhala ootikhinihiya. Atthunaka unaahala woonelela citthu weeva cahaacuwelaa. Wootakihera, weeva pooti woonelela wiira cihaavo citthu cihononale waamini waa, toko utepa ukhala niiwasiwaasi, citthu cowoothiya ni masukhuli. Wakhala wiira iyo phi itthu yuukhumelenle, isiyani weeva inlamuliyaa upanka wiira waamini waa ukhale wookhikiceriya?

WIIKHIKICERE WIIRA UKHOTTE UTEPA UKHALA NIIWASIWAASI, CITTHU COWOOTHIYA NI UTEPA UKHALA NI MASUKHULI

6. Iwasiwaasini cikiina cihintakhala?

⁶ Cihaavo iwasiwaasi cikiina cihintakhala. Wootakihera, khuntakhala ukhala niiwasiwaasi nlattu woopheela untteeliha nrima Yehova ni Yesu. (1 Akor. 7:32) Navaraka matampi moolupale, ninaakhala niiwasiwaasi nlattu woopheela ulokihaca upatthaniihu ni Yehova woohipica. (Isaa. 38:18) Uhiya iyo, hiiva ninaakhala niiwasiwaasi nlattu woopheela waatteeliha nrima amwaarihu (awula awannyihu) ni nlattu woopheela waawacera amuciihu. Ciicammo ninaakhala niiwasiwaasi wiira naawacere mayamuneehu.—1 Akor. 7:33; 2 Akor. 11:28.

7. Toko cinthoonyeraaya Miruku 29:25, kontha isiyani khaninlamuliya umoova pinaatamu?

⁷ Mphantte nkiina, utepa ukhala niiwasiwaasi pooti uhonona nkhikicerweehu, ukhanle waamini wihu. Wootakihera, atthunaka ninaakhala niiwasiwaasi nlattu woopheela ukhalana iyoolya ni ikuwo cinci. (Mat. 6:31, 32) Wiira nimalihe nnyo iwasiwaasinnyo, pooti ukhala wiira ninawiikurumica ukhalana mihakhu cinci. Nlattu wo iyo, unawancera uniciva nsurukhu. Nahiya iyo inikhumelelaka, umwaamini wihu Yehova unaahala ulolovaca ni upatthaniihu ni uyova unawoopiha uhononiya. (Mark. 4:19; 1 Tim. 6:10) Itthu ikhwaawe inhala uhonona waamini wihu ukhanle utepa ukhala niiwasiwaasi nlattu wo citthu atthu akhwaawe cinoopuwelaaya. Ukhala niiwasiwaasi nlattu wo iyo, pooti uniiriha woova utarawaciya ni ulupatthiya naatthu, uhiya woova unriipiha nrima Yehova. Wiira niikhikicere, nihaana ninlepelaka Yehova wiira anivahe waamini ni ulipa nrima unhala unikhitiriha uvilela ayo marikarikwaayo.—Usome Miruku 29:25; Luka 17:5.

8. Isiyani inlamuliyeehu upanka ntthu anihimyeraka citthu cowoothiya?

⁸ Sotwani khanle “athumwaane wootha,” ni uyo nawaavarela nteko ale anaahoolelaawe wiira amwarusele citthu cowoothiya ca Yehova ni co mayamunneehu ni asirokorihu. (Joau 8:44) Wootakihera, ahaavo atthu akhumale mumphwinkoni woothotokanihiya wa Yehova ammwarusela citthu cowoothiya ni anooluma pusya mphwinko wa Yehova. Wiira apanke iyo, ayo anvarela nteko isayiti co mwinternetini, iporokaraama co TV ni citthu cikhwaawe, toko iporokaraama co nraatiyuni, ijornal ni irevista. Nnyo citthu cowoothiyannyo cikhanle ‘mavaka oopharela’ a Sotwani. (Efesu 6:16) Isiyani inlamuliyaa upanka ntthu anceraka wuuhimyera nnyo citthu cowoothiyannyo? Uhimwiilele! Kontha isiyani? Kontha ninaamwaamini Yehova ni ninawaakhuluvela mayamunneehu. Hiiva khanimpheela wiiwelela citthu cowoothiya caalupatthi. Phimaana pooti wankhalaaya mwahani, hiiva khanimpheela mena vakaani waanyakulihanana.

9. Isiyani innikhumelela natepaka ukhala ni masukhuli?

⁹ Utepa ukhala ni masukhuli ciicammo pooti uloloviha waamini wihu. Ukati nkiina ninkhalaka ni masukhuli nlattu wookhalana masankiho. Ni khaninlamuliya uhiwacera masakha ankhalaneehu. Khweeliini, umananiha upanka iyo waahala ukhala ulolo. Masi uhikhale ukati wotheene wuupuwelaka cinene masakha anookhumelela. Kontha wahiyaka iyo yookhumelelaka, weeva pooti uliyala niweherero nomaana Yehova ninnivahaawe ni unaahala utepa ukhala ni masukhuli. (Apoka. 21:3, 4) Ni utepa ukhala ni masukhuli, unaahala umaliha ikuru caa ni unaahala wuupankiha woocyeela. (Miru. 24:10) Isiyani inlamuliyaa upanka wiira iyo ihuukhumelele?

10. Isiyani yiitthucalyaa ni itthu nrokorihu yantikhalyaawe?

¹⁰ Woone itthu yankhumelenle nrokorihu nkhala u Estados Unidos. Awannyawe yahowerennya cinene ni nrokorihu ahaana aawaceraka. Isiyani yankavihenre nrokorihu uhihiya waamini wawe? Nwarakhani yaaveleelihalyaawe nipuro ninhooleliya miteko co Masaahiti a Yehova nlaponi motheene, uyo ahantikha co: “Masakha arineehu ukati nkhwaawe anaanikhaliha ni masukhuli menci. Masi niweherero nihu nikhanle nuulupale. Kinaasukhuru cinene myaha cinci cilipihacale waamini wihu ni cinikavihenre uhihiya uwehera ratta masakheehu. Hiiva ninaapheela cinene nnyo ikanonnyo ni ulipihiya nrima. Nnyo ikanonnyo cihonikavihera urwaa uhoolo ni uvilela masakha anniwaanelaawe Sotwani.” Itthu yuulumacilyaawe uyo nrokorihuuyo inthoonyera wiira hiiva pooti uhiya utepa ukhala ni masukhuli! Manannani? Uwehere marikariko anookhumelela khampa masakha aniwaanenlyaawe Sotwani. Ukupali wiira Yehova pooti wuumaaliha weeva. Ni uvahe ifayita cinene iyoolya yoominepani Yehova inoovahaawe.

11. Citthuni cinlamuliyeehu wiikoha napheelaka ucuwela wakhala wiira waamini wihu uri saana awula mena?

¹¹ Unnokhitiri woona wiira waamini waa umpheela ulokihaciya? Myeeri civinre mphiyaaruni, weeva uhokhitiri ukhotta utepa ukhala niiwasiwaasi? Uhokhitiri ukhotta wiiwelela citthu cowoothiya cinttonkaaya alupatthi ni uhokhotta waanyakulihanana? Uhokhitiri uhiya utepa ukhala ni masukhuli? Wakhala wiira uhaakhula “iyee” ala makohwaala, iyo inthoonyera wiira waamini waa uri saana. Masi khaninlamuliya wiitthaala. Cihaavo citthu cikhwaawe Sotwani cinvarelaawe nteko wiira anaanane. Nttwee noopele mwaha itthu imoca.

WIIKHIKICERE WIIRA UKHOTTE UHOOLELIHERA MIHAKHU MUUKUMINI WAA

12. Isiyani inhala ukhumelela nahooleliheraka muukumini wihu utotha mihakhu?

¹² Uhoolelihera muukumini wihu utotha mihakhu pooti uniitthaaliha ni unihiiha uwacera nkhikicerweehu, ukhanle waamini wihu. Apostolu Paulu aheera: “Khaavo natoropa nancera umweetta nakoso, wiira antteelihe nrima ule mwantikhile wiira akhale natoropa.” (2 Tim. 2:4) Anatoropa o Rooma khayaatthuniheriya umweetta nakoso. Isiyani yaahala unkumelela natoropa mmoca akhottaka weettela nna nlamulonna?

13. Nlattuni natoropa wahaalamuliyaawe umweetta nakoso?

¹³ Wuupuwele ila itthwiila: uwicisu, ikhurupu ya anatoropa inawiitthenkaca naasoowaaya. Masi natoropa mmoca khawaale wiira eetthenkace. Uyo ri usittatti atumihacaka iyoolya. Uhiyu, anatoropa anaaweheeha ikaruma caya cokhotto wakhala wiira ciri saana, ni anawaanona asoowa awula ikatana caya. Masi uyo uhiyuuyo, natoropa rina nakoso ootumihaca iyoolya nkhala atthenkacaka citthu cinrwaawe utumiha waaseele. Usa waya, anatoropa alupatthi anaakela nsittatti wiira yaane ikhotto. Natoropani waahala umphwanela urwaa waana ikhotto ni aahala untteeliha nrima nhoolelyaawe? Natoropani aahala wuucivela unkhalana nkhayi? Ule eetthenkacale, awula ule eetthaalale?

14. Hiiva nikhanle anatoropa a Kristu, isiyani inooneehu ukhala itthu yofayita cinene?

¹⁴ Hiiva nikhanle anatoropa omaana, khaninliyala itthu yuulupale cinene impheeleehu—waatteeliha nrima Ahooleliihu, Yehova ni Kristu. Iyo phi itthu inooneehu ukhala yofayita cinene, uvikana khula itthu invahaaya ituninya ya Sotwani. Hiiva ninawiikurumica ukhalana ukati ni ikuru wiira ninswalele Yehova ni wiira niwacere kahi paahi nkhikicerweehu ukhanle waamini, masi ciicammo miphantte cotheene cokaruma cokhotto coominepani cinlamuliyeehu akhalana.

15. Isiyani Paulu ihimyalyaawe, ni nlattuni?

¹⁵ Hiiva khaninlamuliya wiitthaala! Kontha isiyani? Apostolu Paulu ahohimya wiira “ale alakenle ukhala mathaciri” anaahala ‘uhapusiya nhina waamini.’ (1 Tim. 6:9, 10) Nuulumo ‘uhapusiya’ ninthoonyera wiira, neekurumicaka utotha mihakhu cihikhalanne ifayita, hiiva ninaahala wiitthaala. Ni unawoopiha hiiva ‘wanca unicivela citthu cinci coohinamaana ni cooharipu’ wanrimani wihu. Uhihiye nnyo citthunnyo cikelaka wanrimani waa, masi wuupuwele wiira nnyo phi citthu Sotwani cinvarelaawe nteko wiira alolovihe waamini waa.

16. Ihantisi ittonkaciye nlivuruni ya Markus 10:17-22, ihaana inisovenrihaka wuupuwela makohoni?

¹⁶ Atthunaka weeva uhaana nsurukhu mwinci wiira uthume citthu cinci. Niireke unaatakhala uthuma citthu cimpheeleehu, masi cihikhanle cofayita? Mena, khuntakhala. Masi wuupuwele ala makohwaala: ‘Hataa miiva kikhalanaka nsurukhu woohala uthumela itthu, kiireke kihaana ukati ni ikuru wiira kivarele nteko ni kiwacere iyo itthwiiyo? Khunoopiha miiva uvaresesa cinene mihakhu caka? Kavaresesaka cinene mihakhu caka, kiireke akinhala ukhala toko mmirawo aakhottale nlattulo na Yesu?’ (Usome Markus 10:17-22.) Khweeliini, itthu yomaana ukhanle uhirikarikiha makhalelweehu ni uvarela nteko ukatiihu ni ikuru cihu wiira nipanke impheelaawe Nluku!

UVARELELE CINENE NKHIKICERWAA UKHANLE WAAMINI

17. Isiyani ihinlamuliyeehu uliyala?

¹⁷ Uhiliyale wiira niri nkhottoni. Khula nihuku nihaana niitthenkacaka wiira naane iyo ikhottweeyo. (Apoka. 12:17) Mayamunneehu ni asirokorihu khanlamuliya uvarelela nkhikicerweehu ukhanle waamini wihu. Thi hiiva ninlamuliya uvarelela.

18. Kontha isiyani anatoropa o khalayi yaanaavarelela niikuru cinene makhikicerwaaya?

¹⁸ Khalayi, natoropa aathoonyera ulipa nrima ukhottoni aanaattitthimihiya cinene. Masi uyo aturuwelaka uwaani matataru, woohinkhikicerwaawe, anaawoona ihaaya. Namasoma ihantisi eehaniya Tácito hantikha wiira natoropa “uhiya nkhikicero inkhala itthu yowuulihaca muru cinene.” Phimaana anatoropa yaanawiikurumica uvarelela niikuru cinene nkhikicerwaaya.

19. Manannani ninlamuliyeehu uvarelela niikuru cinene nkhikicerweehu ukhanle waamini?

¹⁹ Hiiva ciicammo nihaana nivarelelaka niikuru cinene nkhikicerweehu ukhanle waamini. Manannani? Uhilova umikutthaanoni ni waahimyera akhwiihu myaha ca Yehova ni Umwennyaawe. (Mabere. 10:23-25) Uhiya commo, nihaana usoma Ibiiblya khula nihuku ni unlompa Yehova ninlepelaka wiira anikavihere weettela citthu cineetthuceehu mbiiblyani. (2 Tim. 3:16, 17) Napankaka iyo, khiivo ikaruma yokhotto ya Sotwani inhala ukhitiri uniwaanela ihasara yoohimala. (Isai. 54:17) ‘Nkhikicerweehu muulupale ukhanle waamini’ unaahala unaakiha. Ninaahala ukhala oolipa, wamoca ni mayamunneehu ni asirokorihu. Ni uhiya paahi utthema ikhotto inaaneehu khula nihuku, ninaahala ciicammo ukhalana iparakha yoomoona Yesu atthemaka ikhotto inhalaawe waana ni Sotwani naale anontthara.—Apoka. 17:14; 20:10.