Nvare nteko cinene uwakati wo Nuupuwelelo

Khula mwaakha, Masaahiti a Yehova anoona upica uphiya nihuku no Nuupuwelelo na nookhwa a Kristu. Cihaleelaka isumana vakaani wiira nuupuwelele ukhwa wa Yesu, hi ninaakhalana ukati wiira ninttottopele ni ninsukhuru Yehova nlattu woonoopola. Phimaana, hi ninawiikurumica wiira nihiviriihe uyo ukatyuuyo. (Efesu 1:3, 7) Wootakihera, hi pooti wiikurumica waalattula atthu wiira yoone Nuupuwelelo. Ciicammo, ahaavo ankhitiri upanka iporokaraama wiira avare nteko weepiyoneeru ookavihera mweeri wo Março awula Abril yalalyeeraka iwoora 30 awula 50 nnyo myeerinnyo. Nyuuva nnaapheela wiikurumica ulalyeera cinene uwakati wo Nuupuwelelo? Isiyani inlamuliyeenyu upanka wiira nkhitiri?

Ikwaha cinci, wiira hiiva nikhitiri uvara ratta itthu impheeleehu nihaana niitthenkacaka. (Miru. 21:5) Ukhala wiira nihuku no Nuupuwelelo nihaattamela, mwancere wiitthenkaca nenna co. Muupuwele manannani cimpheeleenyu wuncerera nteko woolalyeera nnyo isumanannyo ni nlakele itthu yoopanka. Vano, munlepele Yehova wiira acaalihe wiikurumica winyu.—1 Jo. 5:14, 15.

Manannani cimpheeleenyu wuncerera ntekweenyu woolalyeera uwakati wo Nuupuwelelo?