MWAHA WOOSOMIYA 10
Unfenta ni unsukhuru Yehova unansovenriha ntthu upattisiya
“Isiyani inkihaleela wiira kipattisiye?”—MITE. 8:36.
NCIPO 37 Amo a Jeová de Todo o Coração
NINHALA WIITTHUCANI?a
1-2. Toko cinthoonyeraaya Miteko 8:27-31, 35-38, isiyani yaamwiirihale nanteko o Etiópia ulakela upattisiya?
WEEVA waanoocivela upattisiya ni ukhala ntthari a Kristu? Ahaavo atthu enci apattisiye ni akhanle atthari a Kristu. Itthu yaasovenrihale ulakela upanka iyo ukhanle unfenta ni unsukhuru Yehova. Woone ntakihero na nlopwana mmoca okhalayi, aari nanteko aapwiyamwene o Etiópia.
2 Wiitthuca wawe Cowantikhiya Cowaarya, nanteko aapwiyamwene o Etiópia khaapicale upattisiya. (Usome Miteko 8:27-31, 35-38.b) Isiyani yaamwiirihale ulakela upattisiya? Khweeliini, uyo naanancivela cinene Nuulumo na Nluku; kontha, uyo aasoma ilivuru ya Isaiya nkaaroni wawe. Ni umaliha wawe umuulumana Filipe, nanteko aapwiyamwnene ahosukhuru cinene citthu caapankeliyaawe ni Yesu. Masi nlattuni waarwaalyaawe u Yerusalemu? Nlattu wonfenta Yehova. Nincuwela cani wiira aananfenta Yehova? Kontha Ibiiblya ineera wiira uyo aarwaale u Yerusalemu wiira answalele Yehova. Iyo maanaaya wiira ule nlopwanoole ahohiya ittiini yeettelaawe khalayi ni ahothanla ukhala wamoca naatthu yeevaherenre unswalela Nluku eekhweeli. Uyo aahiile ittiinnyaawe nlattu wonfenta Yehova. Ni unfenta Yehova wahonsovenriha ulakela upanka itthu yuulupale cinene: upattisiya ni ukhala ntthari a Kristu.—Mat. 28:19.
3. Isiyani inonhiiha ntthu upattisiya? (Uwehe ikwaaturu “Nrimaaka unlattanaca niitthayani?”)
3 Unfenta Yehova pooti wuusovenriha weeva wiira ulakele upattisiya. Masi ufenta ciicammo pooti wuuhiiha ulakela upattisiya. Toko cani? Wuupuwele ala matakiherwaala. Weeva atthunaka unawaafenta cinene amucyaa ni apatthannyaa ahiri Masaahiti a Yehova, ni unawoova waatthekela wapattisiyaka. (Mat. 10:37) Awula pooti ukhala wiira cihaavo citthu weeva cinfentaa awula cinoocivela; hataa ucuwelaka wiira nnyo citthunnyo cinanrusa Nluku, weeva khunkhitiri uhiya upanka. (Isaa. 97:10) Awula atthunaka unawuupuwela mananna caakhalaa ootteeliya ukati waapankaa ifesta cottiini cowootha ni unawuucivela cinene wuupuwela uyo ukatyuuyo; phimaana unawuurika uhiya ifesta conrusa Nluku. (1 Akor. 10:20, 21) Phimaana, itthu inlamuliyaa wiikoha phi ila: ‘Isiyani intepaaka ufenta awula tipani notepaaka unfenta?’
TIPANI NLAMULIYEEHU UTEPA UNFENTA?
4. Itthuni khweeliini inhala uwiiriha ulakela upattisiya?
4 Khacimala citthu weeva cinfentaa ni cinsukhurwelaa. Toko Ibiiblya. Pooti ukhala wiira hataa ukati wahaacuwelaa Masaahiti a Yehova, weeva waanaahisima cinene Ibiiblya. Uhiya commo, weeva atthunaka uheetthuca unfenta Yesu. Ni nna va waacuwenlyaa Masaahiti a Yehova, atthunaka unawuucivela uviriha ukati nkhayi naayo. Ufenta nnyo citthunnyo unaareera cinene. Masi nnyo citthunnyo paahi khacinhala uwiiriha uvaherera ukumyaa wa Yehova ni upattisiya. Itthu khweeliini inhala uwiiriha weeva ulakela upattisiya, ukhanle unfenta Yehova Nluku. Wakhala wiira weeva unanfenta Yehova uvikana mananna cinfentaa citthu cikhwaawe cotheene, khiivo itthu inhala wuuhiiha uvaherera ukumyaa wa Yehova. Ni hataa upattisiyaka, unfenta Yehova unaahala wuuvaha ikuru wiira uhihiye weettela ikhweeli.
5. Isiyani impheeleehu woopela mwaha?
5 Yesu eerale wiira nihaana unfenta Yehova ninrimeehu wotheene, niiroohweehu yotheene, nimoopuwelelweehu otheene ni niikuru cihu cotheene. (Mark. 12:30) Isiyani weeva inlamuliyaa upanka wiira unfente ni unhisime cinene Yehova? Wuupuwele mananna Yehova cinoofentaawe. Iyo inaahala uwiiriha upheela umpankela itthu nlattu wo nifento ninoothoonyeraawe. (1 Jo. 4:19) Wanfentaka Yehova, citthu cikhwaawennyo khacinhala wuurika upanka. Citthuni? Nttwee noopele mwaha.c
6. Toko cinthoonyeraaya Arooma 1:20, isiyani weeva inlamuliyaa upanka wiira uncuwele Yehova?
6 Uncuwele Yehova uwehaka citthu cumpalyaawe. (Usome Arooma 1:20;d Apoka. 4:11) Weemele ni wuupuwele ucuwelaca Yehova uthoonyenryaawe ukati wumpalyaawe miri ni inama. Wiitthuce vakaani mananna irutthwiihu cinvaraaya nteko. (Isaa. 139:14) Wuupuwele ikuru Yehova cihenlyaawe muncuwani numpalyaawe, woohiliyala wiira cihaavo itthonttwa cinci cene.e (Isai. 40:26) Wuupuwela commo, unaahala wuukavihera utepa unfenta Yehova. Masi khuntosa paahi ucuwela wiira Yehova haana ucuwelaca ni ikuru. Iyo ikhanle itthu imoca paahi inlipihaca upatthaniihu nuuyova. Wapheelaka wincivihaca nifento naa ni Yehova, weeva uhaana uncuwelaka cinene.
7. Wiira weeva utepe unfenta Yehova cinene, isiyani inlamuliyaa ukupali?
7 Uhaana ukupaliki wiira Yehova khweeliini nawuufenta weeva. Unawuurika ukupali wiira Ule pattusale irimu ni itthaya nawuucuwela wiira weeva uhaavo ni nawuuwacera? Wakhala wiira unawuurika ukupali iyo, wuupuwele wiira Yehova “khari uttayi wo khula ntthu.” (Mite. 17:26-28) Uyo “naacuwela iri wanrimani wa khula ntthu,” ni naakhuluveliha khampa Davidi caamwiirenlyaawe Salomau, wiira “weeva wantothaka, uyova naahala wiihiya wiira umphwanye.” (1 Ikor. 28:9) Khweeliini, weeva nna va unsoma Ibiiblya kontha Yehova nowuuthanla. (Jer. 31:3) Weeva wacuweleehaka citthu cotheene Yehova cinoopankelaawe, unaahala utepa unfenta.
8. Inannani weeva unlamuliyaa uthoonyera wiira unaasukhuru nifento na Yehova?
8 Inanna imoca yoothoonyera wiira ninaasukhuru nifento na Yehova, ukhanle umuulumana ninlompaka. Ukati woolompa, unhimyere Nluku masukhuli arinaa ni unsukhuru nlattu wo citthu comaana cinoopankelaawe. Uweheehe mananna uyo cinaakhulaawe mavekelwaa. (Isaa. 116:1) Upanka commo, unaahala wuukavihera utepa unfenta Yehova ni unaahala ulipihaca upatthani urinaa nuuyova. Weeva unaahala utepa ukupali wiira uyo naacuwela itthu inwiira. Masi wiira utepe umphiyeera Nluku, weeva unlamuliya ucuwela mananna uyova cinoopuwelaawe ni isiyani inwehereraawe wiira weeva upanke. Inanna yoocuwela iyo, ukhanle usoma Nuulumo nawe, Ibiiblya.
Usoma Ibiiblya phi inanna yomaana yomphiyeera Nluku ni ucuwela isiyani inwehereraawe wiira nipanke (Uwehe iparaagarafu 9)h
9. Unhala uthoonyera cani wiira unaalemeliha Ibiiblya?
9 Wiitthuce ulemeliha Nuulumo na Nluku, Ibiiblya. Ibiiblya paahi phinhimya ikhweeli ca Yehova ni itthu impheelaawe wuupankela. Phimaana, usome Ibiiblya khula nihuku. Utthenkace ratta mwaha unhalaa usomihiya. Weettele citthu cineetthucaa. Coo, weeva unaahala uthoonyera wiira unaalemeliha Ibiiblya. (Isaa. 119:97, 99; Joau 17:17) Uhopanka iporokaraama yoosoma Ibiiblya khula nihuku? Unnokhitiri uttharihelela iyo iporokaraameeyo khula nihuku?
10. Isiyani irivo mbiiblyani paahi?
10 Ihantisi caatthu yaamoonale Yesu co ni co cimphwanyannyaa mbiiblyani paahi. Ni iyo ikhanle ilivuru imoca paahi intaphulela itthu Yesu yuupankenlyaawe. Wiitthuca citthu Yesu cihimyalyaawe ni cipankalyaawe unaahala wuusovenriha weeva ciicammo unfenta.
11. Isiyani inhala unikavihera utepa unfenta Yehova?
11 Wiitthucaka unfenta Yesu, unaahala utepa unfenta Yehova. Kontha isiyani? Kontha Yesu naatakiha sana-saana makhalelo aathumwaane. (Joau 14:9) Phimaana, wancuwelaka Yesu, unaahala ciicammo utepa uncuwela Yehova ni unttitthimiha. Wuupuwele mananna Yesu caawoonelaawe uthunku atthu yaathanyiya—toko amasikhini, aretta ni ale yahaakhitiri wiicaakiha. Wuupuwele ciicammo ikano comaana Yesu cinvahaawe ni mananna makhalelwaa cinkhalaaya ratta weettelaka citthu Yesu cinhimyaawe.—Mat. 5:1-11; 7:24-27.
12. Wancuwelaka Yesu, isiyani weeva inhalaa upheela upanka?
12 Ciicammo, wuupuwele itthu ipankalyaawe Yesu: uyo hovaherera ukumyaawe wiira itampi cihu cileveleliye. (Mat. 20:28) Wuupuwela iyo, khweeliini unaahala wuukavihera utepa unfenta Yesu, ni ciicammo unaahala uwiiriha uttharuwa itampi caa ni ulepela uleveleliya ni Yehova. (Mite. 3:19, 20; 1 Jo. 1:9) Wanfentaka Yesu ni Yehova, unaahala utepa upheela ukhala wamoca naale ciicammo anonfenta Yesu ni Yehova.
13. Isiyani Yehova inoovahaawe?
13 Wiitthuce waafenta amucyaawe Yehova. Pooti ukhala wiira amucyaa ni apatthannyaa ahiri Masaahiti a Yehova khancuwela nlattuni weeva umpheelaa uvaherera ukumyaa wa Yehova. Ayo atthunaka pooti wuurukunuwela. Masi Yehova khanhala wuuhiya veekha: uyo nawuuvaha amuci oominepani. Wakhalaka khula ukati ni mayamunnaa ni naasirokoraa o wanlokoni, weeva unaahala ufentiya ni ukaviheriya venci. (Mark. 10:29, 30; Mabere. 10:24, 25) Wahoolo, amucyaa atthunaka anaahala ulakela unswalela Yehova wamoca ni weeva ni weettela Ibiiblya.—1 Pet. 2:12.
14. Toko cinthoonyeraaya 1 Joau 5:3, isiyani yoonelenlyaa nhina ikettelo ca Yehova?
14 Wiitthuce uhisimu ni utthara ikettelo ca Yehova. Uhinaaya uncuwela Yehova, weeva atthunaka wahaana moopuwelelwaa nhina isiyani ikhanle itthu yooreera ni yootakhala. Masi nna va, unaakupaleeha wiira ikettelo ca Yehova phiri comaana. (Isaa. 1:1-3; usome 1 Joau 5:3.f) Wuupuwele ikano Ibiiblya cinaavahaaya atheli, athiyana, anyari ni asaana. (Efesu 5:22–6:4) Woonela waa, nnyo ikanonnyo cinawaakavihera amucyaa ukhala ootteeliya? Wuupuwele ciicammo ikano Yehova cinvahaawe nhina waathanla ratta apatthani. Woonela waa, wiiwelela nnyo ikanonnyo unnookavihera ukhalana meettelo omaana? Unneecoona ukhala ootteeliya nrima? (Miru. 13:20; 1 Akor. 15:33) Unawoonannya wiira waakhunle “iyee” ala makohwaala.
15. Isiyani inhala wuukavihera weettela mattharelelo o mbiiblyani?
15 Ukati nkiina, weeva atthunaka khuncuweleeha mananna oweettela mattharelelo o mbiiblyani aneetthucaa. Phimaana Yehova naavarela nteko mphwinkwaawe woothotokanihiya wiira anikavihere. Uyo mphwinkooyo unaakumihera myaha co mbiiblyani cinookavihera ucuwela itthu yooreera ni yootakhala. (Mabere. 5:13, 14) Wiikurumice usoma nnyo myahannyo. Wapankaka commo, unaahala woona wiira cikhanle myaha cookavihera ni coohirikarika. Ciicammo, nnyo myahannyo cinaahala wuukavihera weeva upheela ukela mumphwinkoni wa Yehova.
16. Yehova naathotokaniha cani apoovwaawe?
16 Wiitthuce ufenta ni ukavihera mphwinko woothotokanihiya wa Yehova. Yehova nawaathotokaniha apoovwaawe mmalokoni. Ni honvahacera Yesu, Mwanawe, wiira akhale nhooleli o maloko otheene. (Efesu 1:22; 5:23) Ilelo, ayo malokwaayo ahaana nteko mwinci woopheela uvara. Wiira ahoolele uyo ntekooyo, Yesu hothanla ikhurupu yankaani ineehanaawe “ipottha yookhuluvelya ni yankhili.” Iyo ikhanle ikhurupu yaalopwana oothanliya anwacera sana-saana nteko uvahaceriyaaya. Nteko uvahaceriyaaya, ukhanle wuukavihera weeva ukhala mpatthani a Yehova ni ukhikicera upatthannyaa nuuyova. (Mat. 24:45-47) Inanna imoca iyo ipottheeyo cinoowaceraaya weeva, ukhanle utthenkaca nloko naa wiira akhale mahumu oohala uweettihera ni wuukhikicera. (Isai. 32:1, 2; Mabere. 13:17; 1 Pet. 5:2, 3) Mahumu anaapheela upanka yotheene inhalaaya ukhitiri wiira yuukavihere weeva; ayo anaapheela wuumaaliha ni wuukavihera ulipihaca upatthannyaa ni Yehova. Ni inanna imoca mahumu cinookaviheraaya ukhanle wuulakihera mananna owaalalyeera akhwaa myaha ca Yehova.—Efesu 4:11-13.
17. Toko cinthoonyeraaya Arooma 10:10, 13, 14, nlattuni ninaalalyeereehu akhwiihu myaha ca Yehova?
17 Waakavihere akhwaa wiitthuca unfenta Yehova. Yesu horuma wiira attharyaawe awiitthucihe akhwaaya myaha ca Yehova. (Mat. 28:19, 20) Hiiva naanaahala utthuna uvara uyo nteko urumiyeehuuyo, kontha ninaacuwela wiira nihaana nivaraka. Masi ukati weeva unviraa utepaka unfenta Yehova, unaahala wiicoona toko apostolu Peturu ni Joau. Ayo yaheera: “Khaninlamuliya uhiya wuuluma citthu coonaleehu ni ciiwaleehu.” (Mite. 4:20) Khacincivale citthu cikhwaawe coonitteeliha nrima cinene toko unkavihera ntthu unfenta Yehova. Wuupuwele mananna Filipe cantteelalyaaya nrima nlattu wonkavihera nlopwana o Etiópia ucuwela Cowantikhiya Cowaarya ni upattisiya. Weeva wantakihaka Filipe ni wavaraka nteko woolalyeera urumiyeehu, unthoonyera wiira unaapheela ukhala Saahiti a Yehova. (Usome Arooma 10:10, 13, 14.g) Wanceraka ulalyeera, weeva atthunaka unaahala wiikoha toko ceekohalyaawe nlopwana o Etiópia: “Isiyani inkihaleela wiira kipattisiye?”—Mite. 8:36.
18. Isiyani inhaleehu wiitthuca nhina mwaha nkiina unhaleehu usoma?
18 Itthu yuulupale weeva inhalaa ulakela upanka muukumini waa, ukhanle upattisiya. Ukhala wiira iyo ikhanle itthu yuulupale, weeva uhaana upacaka wuupuwela ratta upattisiya maanaaya isiyani. Isiyani weeva inlamuliyaa ucuwela nhina upattisiya? Isiyani inlamuliyaa upanka uhinaaya upattisiya ni wapattisiyaka? Ala makohwaala anhala waakhuliya nhina mwaha nkhwaawe unhaleehu usoma.
NCIPO 2 O Teu Nome É Jeová
a Atthu akiina unawaarika ulakela upattisiya wiira akhale Saahiti a Yehova. Wakhala wiira ciicammo unawuurika, ula mwahoola utthenkaceriye weeva. Ula mwahoola unaahala uhimya citthu cinlamuliyaa upanka cinhala wuukavihera ulakela upattisiya.
b Miteko 8:27 Phimaana, uyo aheetthonkomaniha ni ahokhuma. Vano, ahonkumanana nanteko muulupale aapwiyamwene o Etiópia, yeehaniya Candace. Uyo phaavahaceriye uwacera mihakhu caya cotheene, ni aarwaale uswali u Yerusalemu. 28 Ukati waahokolyaawe, uyo aanowonkoma nkaaroni wawe, ni aanaasoma ilivuru ya Isaiya akumiheraka ncu nawe vate. 29 Vano, nnepa wa Nluku wahomwiirela Filipe: “Urwee mpaka ile ikaarweele.” 30 Filipe ahotthawa mpaka waattamenlyaawe ile ikaarweele, ni ahomwiiwa ule nlopwanoole asomaka ilivuru ya porofeeta Isaiya. Filipe ahonkoha: “Nnaawiiweeha saana itthu insomeenyu?” 31 Uyo ahaakhula: “Kahaala wiiweeha cani, woohikhala ntthu ookitaphulela?” Vano uyo ahonlepela Filipe wiira awele nkaaroni ni amonkomane. 35 Filipe ahancera wuuluma ni, apaceraka mphantte waasomaawe, uyo ahonlalyeera ihapari comaana ca Yesu. 36 Yeettacaka niiphiro, yahophiya nipuro yaarivo maaci, ni nanteko aapwiyamene o Etiópia pheeraawe: “Wooneke! Va ahaavo maaci! Isiyani inkihaleela wiira kipattisiye?” 38 Vano, ahoruma weemesiya ikaaro, Filipe ni nanteko aapwiyamwene o Etiópia yahokhuruwela mmaacini; ni Filipe ahompattisa.
c Atthu khanlikana. Phimaana, atthu akiina pooti utthara citthu cinhala uhimiya nhina ula mwahoola ni mananna oovirikana toko cittonkaciyaaya.
d Arooma 1:20 Kontha makhalelwaawe ahinoonnya—toko ikuru cawe coohimala ni uNlukwaawe—anawoonannya ukhuma ukati wumpiyaaya ituninya, kontha ancuweleliya nlattu wo citthu cumpiye, phimaana ayo khanasariya.
e Uwehe matakihero makhwaawe mmabroxurani A Vida — Teve um Criador? ni A Origem da Vida — Cinco Perguntas Que Merecem Resposta.
f 1 Joau 5:3 Unfenta Nluku unkhala wiiwelela citthu cinrumaawe; ni citthu cinrumaawe khacinlemela.
g Arooma 10:10 Kontha ni nrima, ntthu nawaamini wiira aphwanye isariya, masi ni malaku, ntthu naahimya waamini wawe waatthuni wiira aphwanye woopwa. 13 Kontha “oothene ale anlompela ncina na Yehova phanhala woopwa”. 14 Masi anhala unlompela cani yaahimwaaminiki? Ni anhala umwaamini cani ule hinapacaaya wiiwa oolumiyaka? Ni anrwaa wiiwa cani hikhanle ntthu owaahimerya?
h ILATARATO: Arokorihu ananvaha ifolyetu nthiyana nipuro naarwaalyaaya uthuma citthu.