MWAHA WOOSOMIYA 49
Wunwelelihiya waatthu ookhwa khweeliini unaahala wiirannya!
‘Miiva kihaana niweherero ninweela wa Nluku, wiira wahoolo unaahala ukhala wunwelela waatthu ookhwa.’—MITE. 24:15.
NCIPO 151 Ele Chamará
NINHALA WIITTHUCANI?a
1-2. Isiyani atthu anonswalela Yehova inwehereraaya wahoolo?
UNAAREERA ukhalana itthu yooweherera wahoolo. Ahaavo atthu anweherera uthela ni ukhala ootteeliya watthokoni waya, uwuunuwiha asaanaaya ratta, awula uvona iretta yuulupale inaawerya. Hiiva makristau, ciicammo ninaaweheraka nnyo citthunnyo. Masi ihaavo itthu itepale ukhala yofayita inweherereehu: hiiva ninaaweherera ukhalana ukumi woohimala ni urwaa ukumanaca naasipatthaniihu ni amuciihu akhwile.
2 Apostolu Paulu heera: ‘Miiva kihaana niweherero ninweela wa Nluku, wiira wahoolo unaahala ukhala wunwelela waatthu ookhwa.’ (Mite. 24:15) Apostolu Paulu khaari veekha aakupali wunwelelihiya waatthu ookhwa. Jó ciicammo aanaaweherera. Uyo ankupali wiira wanihukuni anhala wuupuweliya ni Nluku ni wunwelelihiya.—Jó 14:7-10, 12-15.
3. Nlattuni ikhanlyaaya itthu yomaana usoma iwarakha yoopacera ya Akorintu, ikapiitulu 15?
3 “Wunwelelihiya waatthu ookhwa” ukhanle “nlipihero,” awula ‘ikhanle itthu yoopacera’ inkupalyaaya makristau otheene. (Mabere. 6:1, 2) Nhina iwarakha yoopacera ya Akorintu, ikapiitulu 15, Paulu noopela mwaha wunwelelihiya waatthu ookhwa. Citthu cantikhilyaawe khweeliini cahaalipiha makristau ule ukatyuule. Ni hataa ukhalaka wiira nancenre khalayi ukupali wunwelelihiya waatthu ookhwa, iyo ikapiitulwiiyo pooti wuulipihani ni wuukaviherani utepa ukupali wunwelelihiya waatthu ookhwa.
4. Isiyani innikupaliha wiira amuciihu ni apatthaniihu akhwile anaahala wunwelelihiya?
4 Wunwelelihiya wa Yesu Kristu unaanikupaliha wiira akhwaaka mmuciihu awula mpatthaniihu, uyo naahala wunwelelihiya. Wunwelelihiya wa Yesu yaari “ihapari yomaana” apostolu Paulu yaalalyeeraawe atthu o Korintu. (1 Akor. 15:1, 2) Paulu aheera wiira nkristau ahaamini wunwelelihiya waatthu ookhwa, waamini wawe waari woohikhweeli. (1 Akor. 15:17) Wunwelelihiya wa Yesu phi itthu innikupaliha wiira atthu akhwaawe ciicammo anaahala wunwelelihiya.
5-6. Moolumo ari nhina 1 Akorintu 15:3, 4 annikupaliha isiyani?
5 Wuupaceroni ikapiitulu 15, Paulu hohimya ikhweeli tthaaru: (1) “Kristu hokhwa wiira anoopole matampiihu.” (2) “Uyo ahosikhiya.” (3) “ahonwelelihiya nihuku noneeraru, toko cinhimyaaya Cowantikhiya.”—Nsome 1 Akorintu 15:3, 4.b
6 Ukhwa, usikhiya ni wunwelelihiya wa Yesu unnikupaliha isiyani? Porofeeta Isaiya ahohimya wiira Mesiya aanaahala ‘urakalihiya nlaponi yaatthu akumi’ ni ‘mahiyaawe yaahala ukhala iriyari yaatthu oohinamaana.’ Ni ciicammo ahohimya wiira Mesiya aanaahala ‘ucisa matampi aatthu enci.’ Yesu pankile iyo uvaha wawe ukumyaawe wiira anoopole. (Isai. 53:8, 9, 12; Mat. 20:28; Aroo. 5:8) Coo, ukhwa, usikhiya ni wunwelelihiya wa Yesu unaanikupaliha wiira hiiva pooti woopoliya mmatampini ni muukhwani, ni unaanikhuluveliha wiira amuciihu ni apatthaniihu akhwile anaahala wunwelelihiya.
MASAAHITI ENCI YAHOONA
7-8. Isiyani inaakavihera makristau ukupali wiira Yesu khweeliini honwelelihiya?
7 Wiira naamini wunwelelihiya waatthu ookhwa woohoolo, nihaana nipacaka ukupali wiira Yesu honwelelihiya. Isiyani innikupaliha wiira uyo khweeliini honwelelihiya?
8 Atthu enci yahomoona Yesu ukati wonwelelihiyaawe ni yahokupali wiira khweeli ahonwelelihiya. (1 Akor. 15:5-7) Saahiti oopacera umoona Yesu himiye ni Paulu, aari Peturu (Sefas). Ikhurupu yaatthari a Yesu yahohimya wiira Peturu khweeli ahomoona Yesu wunwelelihiya wawe. (Luka 24:33, 34) Paulu ciicammo hohimya wiira Yesu wunwelelihiya wawe, maapostolu 12 yahomoona. Kristu “ahaakhumelela mayamunna oopwaha 500 wonkwaha mmoca.” Uyo atthunaka aakhumelenle wankutthaanoni waapankiye u Kalileya waatepile waatteeliha nrima attharyaawe, uhimiye nhina Matewus 28:16-20. Yesu ciicammo “ahonkhumelela Tiyaku.” Atthunaka Tiyaku aari mwanhimaawe Yesu, ahaakupali wiira Yesu khanle Mesiya. (Joau 7:5) Umoona wawe Yesu nonwelelihiye, Tiyaku ahomwaamini. Mwaakha wo 55, ukati Paulu wantikhilyaawe iwarakha ya Akorintu, atthu enci yaamonne Yesu yaari ahinakhwa. Phimaana, ntthu wanrika ukupali wiira Yesu ahonwelelihiya, pooti waawoopanaawe mwaha ayo atthwaayo.
9. Toko cinthoonyeraaya Miteko 9:3-5, isiyani-tho inthoonyera wiira Yesu khweeliini honwelelihiya?
9 Wahoolo, Yesu ahonkhumelela Paulu. (1 Akor. 15:8) Paulu (Saulu) aarwaa u Damasco. Nari niiphiro, uyo aheewa ncu na Yesu ni ahomoona Yesu wiirimu. (Nsome Miteko 9:3-5.c) Itthu yankhumelenle Paulu ciicammo ikhanle itthu inthoonyera wiira Yesu khweeliini honwelelihiya.—Mite. 26:12-15.
10. Ukupali wiira Yesu honwelelihiya wahomwiiriha Paulu upanka isiyani?
10 Atthu akiina yankhala ootikhinihiya umoona Paulu alalyeeraka wunwelelihiya wa Yesu, kontha uyo aanawaalupatthaka venci makristau. Masi ukati waakupanlyaawe wiira Yesu honwelelihiya, Paulu aheekurumica wiira aakavihere akhunanawe ukupali iyo ikhweeliiyo. Uyo mpaka ahovilela waattakaciya, utthukiya ni upinttuwa ikalawa caakelaawe wiira aalalyeere akhwaawe wiira Yesu ahokhwa, masi honwelelihiya. (1 Akor. 15:9-11; 2 Akor. 11:23-27) Paulu ankupali wiira Yesu honwelelihiya, mpaka aahaamini wiiviya wiira hihiye ulalyeera itthu yaaminnyaawe. Khweeliini, usaahati wo ayo makristau oopaceraayo unaatepa unikupaliha wiira Yesu khweeliini honwelelihiya ni wiira wahoolo atthu akhwile anaahala wunwelelihiya.
UVAANYIHA MOOPUWELELO OOHINAMAANA
11. Nlattuni atthu akiina u Korintu waarinaaya moopuwelelo oohiloka nhina wunwelelihiya waatthu ookhwa?
11 Atthu akiina o wasittatti yo Grécia yeehaniya Korintu, yahaana moopuwelelo oohiloka nhina wunwelelihiya waatthu ookhwa. Ayo yeera wiira “khuuvo wunwelelihiya waatthu ookhwa.” Nlattuni weeraaya commo? (1 Akor. 15:12) Anafilosofiya o wasittatti ikiina yo Grécia ineehaniya Atenas, yaanaatarawaca ale yeetthuciha ikhweeli caahimya wiira Kristu honwelelihiya. Ayo moopuwelelwaayo atthunaka yahaahapusa atthu akhwaawe o Korintu. (Mite. 17:18, 31, 32) Akiina atthunaka yoopuwela wiira wunwelelihiya waatthu ookhwa khayaari itthu yokhweeli, masi naari nthoonyero paasi. Ayo yeera wiira ntthuuyo hinakhala nkristau aari “ookhwa” nlattu wo matampi, masi wakhanlyaawe nkristau, uyo “honwelelihiya.” Nlattu wo ayo moopuwelelwaayo, waamini waya ayo atthwaayo wahokhala woohifayita. Kontha, unari wiira Nluku khamunwelelihile Yesu, khaavo aahala woopoliya ni otheene cihu nanlelo naahala ukhala mmatampini. Phimaana, otheene ale yahaakupali wunwelelihiya waatthu ookhwa, yahohiya ukhalana niweherero nokhweeli uhoolo.—1 Akor. 15:13-19; Mabere. 9:12, 14.
12. Toko cinthoonyeraaya 1 Peturu 3:18, 22, wunwelelihiya wa Yesu uvirikanne cani naatthu akhwaawe yonwelelihiye khalayi?
12 Paulu ankupaleeha wiira “Kristu honwelelihiya muukhwani.” Wunwelelihiya wa Yesu phaari wootepa ukhalana ifayita waavikana atthu otheene yonwelelihiye khalayi; kontha atthu yonwelelihiye khalayi ahokhwa tootho. Paulu heera wiira Yesu aari “oopacera iriyari wo ale arupile muukhwani.” Manannani uyo cikhanlyaawe oopacera? Uyo phaari pinaatamu oopacera onwelelihiye niirutthu yo nlayikha ni oopacera urwaa wiirimu.—1 Akor. 15:20; Mite. 26:23; nsome 1 Peturu 3:18, 22.d
ALE ANHALA “WAAKHELA UKUMI”
13. Manannani Paulu cinvirikanihalyaawe Atamu ni Yesu?
13 Manannani ukhwa wa ntthu mmoca cinaaphwanyihaaya ukumi atthu enci? Paulu nawaakhula nno nihokonno. Uyo hohimya mananna cinvirikanaaya masakha aniwaanenlyaawe Atamu ni itthu inipankenlyaawe Yesu. Amwaacaka Atamu, Paulu hantikha co: “Ukhwa uwaale nlattu wa nlopwana mmoca.” Ukati Atamu uvanryaawe matampi, uyo heewaanela ukhwa mwaaneennyaawe ni haawaanela ukhwa apinaatamu otheene. Mpaka ilelo, ninawoona masakha ankhumelela nlattu Atamu woohimwiiwelela Nluku. Masi Nluku umunweleliha wawe mwanawe, uyo honiphwanyiha niweherero nomaana uhoolo! Paulu hantikha: “Wunwelelihiya waatthu ookhwa ciicammo unwa nlattu wa nlopwana mmoca,” Yesu. Uyo ciicammo heera: “Toko cinkhwaaya atthu otheene nlattu wa Atamu, ciicammo atthu otheene anaahala waakhela ukumi nlattu wa Yesu.”—1 Akor. 15:21, 22.
14. Niireke Atamu naahala wunwelelihiya wahoolo? Ntaphulele.
14 Isiyani Paulu yaapheelaawe uhimya wiira wawe: “Toko cinkhwaaya atthu otheene nlattu wa Atamu”? Paulu aaca ucuulu wa Atamu, awula apinaatamu otheene. Ukhala wiira Atamu haaraviha matampi ni upahuwa, ayo anaakhwa. (Aroo. 5:12) Atamu khari iriyari wo ale anhala “waakhela ukumi.” Wiivaherera wa Yesu khunhala umoopola Atamu nhina itampi ivaralyaawe, kontha uyo aari nlopwana oohipahuwa, ni aalakenle imweeni uhimwiiwelela Nluku. Itthu inkhumelenle Atamu phi itthu inhala waakhumelela atthu “Mwaana a ntthu” nohalaawe waahukhumu khampa “ipuri”: ‘utankanyiya.’—Mat. 25:31-33, 46; Mabere. 5:9.
Yesu phaapacenre wunwelelihiya wiira arwee akhale wiirimu (Nwehe iparaagarafu 15-16)f
15. Phaapani akhanle “otheene” ale anhala “waakhela ukumi”?
15 Muupuwele itthu Paulu yiiralyaawe: “Atthu otheene anaahala waakhela ukumi nlattu wa Yesu.” (1 Akor. 15:22) Paulu aawantikhenle ila iwarakheela makristau oothanliya o Korintu yaahala wunwelelihiya wiira yakhale wiirimu. Ayo makristawaayo ‘yahoreerihiya iriyari ya Yesu Kristu ni yahiihaniya wiira akhale owaarya.’ Ni Paulu howuuluma “ale arupile muukhwani wamoca ni Kristu.” (1 Akor. 1:2; 15:18; 2 Akor. 5:17) Nhina iwarakha ikiina, Paulu hantikha wiira ale ‘ankhwa toko [Yesu] cikhwilyaawe,’ anhala “wunwelelihiya toko uyova cunwelelihiyaawe.” (Aroo. 6:3-5) Yesu onwelelihiye niirutthu yo nlayikha ni horwaa wiirimu. Iyo phi itthu inhala waakhumelela otheene ale ari “wamoca ni Kristu,” awula, makristau otheene oothanliya ni nnepa wowaarya.
16. Isiyani Paulu yaapheelaawe uhimya wenryaawe Yesu khanle “oopacera”?
16 Paulu hantikha wiira Kristu phikhanle “oopacera iriyari wo ale arupile muukhwani.” Ninaacuwela wiira atthu akiina, toko Laazaru, yahonwelelihiya watuninyani vaava. Masi Yesu phaari oopacera wunwelelihiya niirutthu yo nlayikha ni waakhela ukumi woohimala. Uyo pooti waalattanihiyaawe ni mihokorokho coopacera asarayeli canvahereraaya Nluku. Ciicammo, Paulu wenryaawe Yesu khanle “oopacera,” uyo aathoonyera wiira atthu akhwaawe, ciicammo yanhala wunwelelihiya wiira yakhale wiirimu. Maapostolu ni atthu akiina ari “wamoca ni Kristu,” wahoolo yanhala wunwelelihiya wiira arwee yakhale wiirimu, toko Yesu.
17. Ukatini waahalaaya wunwelelihiya ale ari “wamoca ni Kristu”?
17 Ukati Paulu waawantikhenlyaawe iwarakha a Korintu, wunwelelihiya waatthu ari “wamoca ni Kristu” waari uhinancera. Paulu hothoonyera wiira iyo yaahala wiirannya wahoolo. Uyo heera: “Khula ntthu ukatyaaweru: nohala upacera Kristu; vano wahoolo phinhalaaya waakhela ukumi ale anontthara Kristu ukati unhalaawe uwa.” (1 Akor. 15:23; 1 Atesal. 4:15, 16) Ilelo hiiva ninkhala mahuku aneehaniya “ukati” wa Kristu. Maapostolu naatthu akiina yahaana yawehereraka mpaka uphiya uyo ukatyuuyo wiira yunwelelihiye “toko [Yesu] cunwelelihiyaawe.”
NYUUVA NHAANA NIWEHERERO NOKHWEELI!
18. a) Isiyani innikupaliha wiira inaahala ukhala inanna ikhwaawe yowunwelelihiya atthu ookhwa? b) Toko cinthoonyeraaya 1 Akorintu 15:24-26, isiyani inhala wiirannya wiirimu?
18 Vano ale ahinweherera wunwelelihiya wiira yakhale wiirimu? Ayo ciicammo anaaweherera wunwelelihiya. Ibiiblya ineera wiira Paulu ni atthu akiina anrwaa wiirimu, anaakavihera “wunwelelihiya waatthu ookhwa unhala wiirannya woohipica.” (Afili. 3:11) Iyo iveeruswiiyo inthoonyera wiira wahoolo yaanaahala ukhala inanna ikiina yowunwelelihiya atthu ookhwa. Ni iyo inaalipihera itthu yuulumalyaawe Jó. (Jó 14:15) “Ale anontthara Kristu ukati unhalaawe uwa” anhala ukhala wiirimu ni Yesu ukati unhalaawe umalamaliha ikuvernu, ukhulupale ni ikuru cotheene. Ni hataa ciicammo “nwanani oomalela,” awula ukhwa, unaahala umalamalihiya. Otheene ale anhala wunwelelihiya wiira arwee yakhale wiirimu khanhala ukhwa-tho. Vano atthu akiinaayo?—Nsome 1 Akorintu 15:24-26.e
19. Isiyani inwehereraaya ale anhala ukhala watuninyani?
19 Isiyani inwehereraaya ale anhala ukhala watuninyani? Itthu inwehereraaya phi ile yantikhalyaawe Paulu: ‘Miiva kihaana niweherero wiira wahoolo unaahala ukhala wunwelela waatthu ookhwa yeettenle isariya ni ale yaheettenle.’ (Mite. 24:15) Ukhala wiira atthu yaheettenle isariya khanlamuliya urwaa wiirimu, ayo moolumwaayo anwaaca atthu anhala wunwelelihiya wiira akhale watuninyani.
Ukupali wiira wahoolo unaahala ukhala wunwelelihiya waatthu ookhwa unaaniphwanyiha niweherero nomaana (Nwehe iparaagarafu 20)g
20. Ula mwahoola ulipihacale cani ukhuluvela winyu wiira wahoolo unaahala ukhala wunwelelihiya waatthu ookhwa?
20 Khweeliini, “unaahala ukhala wunwelelihiya waatthu ookhwa”! Ale anhala wunwelelihiya wiira akhale watuninyani anaahala waakhela ukumi woohimala. Nyuuva pooti ukhuluvela wiira iyo khweeliini inaahala wiirannya! Nno niwehereronno pooti wuumaalihani mwawuupuwelaka amuciinyu ni apatthaniinyu akhwile. Ayo anaahala wunwelelihiya ukati Kristu unhalaawe ulamulela wamoca naatthu akhwaawe “ukati wo myaakha 1.000.” (Apoka. 20:6) Nyuuva ciicammo pooti ukhuluvela wiira mwakhwaaka uhinaaya uphiya ukati wo myaakha 1.000 unhalaawe ulamulela Kristu, nnaahala wunwelelihiya. Niweherero nirineehu “khaninhala uninyoonyiha,” kontha khweeliini ninaahala wiirannya. (Aroo. 5:5) Nno niwehereronno ninaanilipiha nna va ni ninaanitteeliha nrima ukati unonswaleleehu Nluku. Masi cihaavo citthu cikiina cineetthuceehu nhina iwarakha yoopacera ya Akorintu, ikapiitulu 15. Ninaahala woona nnyo citthunnyo nhina mwaha nkiina unhaleehu usoma.
NCIPO 147 A Vida Eterna – Que Bela Promessa!
a Iwarakha yoopacera ya Akorintu, ikapiitulu 15, inoopela mwaha wunwelelihiya waatthu ookhwa. Nlattuni uyo mwahooyo ukhanlyaaya muulupale? Isiyani innikupaliha wiira Yesu honwelelihiya? Ula mwahoola unaahala waakhula ala makohwaala ni makoho moolupale makiina antaphulela wunwelelihiya waatthu akhwile.
b 1 Akorintu 15:3 Kontha, nhina wo citthu coopacera cuuhimenryaakani, kahoottonkelani ciicammo itthu miiva yaakhenlyaaka: Kristu hokhwa wiira anoopole matampiihu, toko cinhimyaaya Cowantikhiya; 4 uyo ahosikhiya ni ahonwelelihiya nihuku noneeraru, toko cinhimyaaya Cowantikhiya.
c Miteko 9:3 Nareene niikwaha ni naattamenleene u Damasco, woowaakuvyaaca wene wahaarya nipuro naaryaawe, nwo waarya nwo waakhuma wiirimu, 4 ni uyo ahomorela vathi ni ahiiwa ncu niiraka: “Saulu, Saulu, unkilupatthelani?” 5 Uyo ahokoha co: “Pwiiya, nyuuva mwaapani?” Uyo ahaakhula: “Thi mi Yesu, ule unonlupatthaa.”
d 1 Peturu 3:18 Ukhala wiira Kristu khwile nlattu wo matampi weemaara imoca mpaka, ntthu oweettela isariya ukhwa nlattu wo ale ooheettela isariya, wiira aarweehele wa Nluku. Uyo khwile niirutthu yeepinaatamu, masi haakhela ukumi wonnepa. 22 Uyo ri mphantte wo moono wonlopwana wa Nluku, kontha horwaa wiirimu ni hovahaceriya malayikha, akhulupale ni ikuru.
e 1 Akorintu 15:24 Vano wuumaleloni, phinhalaawe waahokolosera Umwene Athumwaane ni Nlukwaawe, napacile toko umalamaliha ikuvernu cotheene, ukhulupale wotheene ni ikuru cotheene. 25 Kontha uyo haana alamuleka mpaka Nluku wanhalaawe uweesa awanani vathi inyaa cawe. 26 Ni ukhwa phi nwanani oomalela nhala umalihiya.
f ILATARATO Ipaagina: Yesu phaapacenre wunwelelihiya wiira arwee akhale wiirimu. (Mite. 1:9) Atthari a Yesu akiina yunwelelihiye wiira yakhale wiirimu phaala: Tomé, Tiyaku, Lídia, Joau, Mariya ni Paulu.
g ILATARATO Ipaagina: Amunneehu ahokhwa amwaaraya yaakhalannyaaya ukati mwinci answalelaka Yehova wamoca naayo. Masi anaakupali wiira wahoolo amwaaraya anaahala wunwelelihiya, phimaana anaalipa ni khanhiya unswalela Yehova.