MWAHA WOOSOMIYA 11
Manannani usoma Ibiiblya cinhalaaya wuukaviherani uvilela masakha?
“Nluku [naavaha] uvilela.”—AROO. 15:5.
NCIPO 94 Muito Obrigado Pela Bíblia
NINHALA WIITTHUCANI?a
1. Marikarikoni anaakhumelela atthu anonswalela Yehova?
ULA ukatyuula, ahaavo masakha anaananeenyu? Atthunaka munna mmoca o wanlokoni howuupankani itthu ihuucivenleni. (Tiya. 3:2) Awula pooti ukhalaka wiira ntthu nonvaraneenyu nteko awula nonsomaneenyu nawuutarawacani nlattu wookhala Saahiti a Yehova. (1 Pet. 4:3, 4) Ciicammo, pooti ukhalaka wiira ahaavo amuciinyu ammananiha wuuhiihani urwaa umikutthaanoni awula wuulalyeerani. (Mat. 10:35, 36) Yuukhumelelakani masankiho oorika toko ala, pooti uwiirihani wuupuwela uhiya unswalela Yehova. Masi nkupali wiira hataa yuukhumelelakani masakhani, Yehova naahala wuuvahani ankhili wiira ncuwele waanana masankiho ni naahala wuuvahani ikuru wiira nkhitiri uvilela.
2. Toko cinthoonyeraaya Arooma 15:4, manannani usoma Ibiiblya cinnikaviheraaya?
2 Yehova hohela nnuulumoni nawe ihantisi cinttonka mananna atthu yanswalela caakhitinryaaya waanana marikariko. Nlattuni uhenlyaawe mbiiblyani nnyo ihantisinnyo? Wiira hiiva niitthuce citthu cofayita. Phimaana, Yehova ahomwiiriha apostolu Paulu wantikha moolumo ari nhina Arooma 15:4. (Nsome)b Usoma nnyo ihantisinnyo pooti unimaaliha ni univaha nweherero. Masi wiira nnyo ihantisinnyo khweeliini cinikavihere, ninlamuliya upanka citthu cikhwaawe, uhiya usoma Ibiiblya paahi. Nihaana nihiyaka Ibiiblya wiira inivare nrima ni irukunuse inanna ninuupuweleehu. Vano wakhala wiira nimpheela ukaviheriya waanana marikariko anikhumelenle, isiyani inlamuliyeehu upanka? Nihaana nipankaka nnya citthunnya: (1) Ulompa, (2) Utanicera, (3) Wuupuwela venci insomeehu, ni (4) Weettela. Nhina ula mwahoola, ninaahala woona mananna ninlamuliyeehu upanka nnyo citthunnyo.c Ciicammo, ninaahala woona mananna ninlamuliyeehu uvarela nteko, nisomaka itthu yankhumelenle mwene Davidi ni apostolu Paulu.
1. ULOMPA
Nhinaaya wancera usoma Ibiiblya, munlepele Yehova wiira ookavihereni woona mananna oohala uphwanyera ifayita itthu inhaleenyu usoma (Nwehe iparaagarafu 3)
3. Nhinaaya wancera usoma Ibiiblya, isiyani inlamuliyeenyu upanka, ni nlattuni?
3 (1) Ulompa. Nhinaaya wancera usoma Ibiiblya, munlepele Yehova wiira ookavihereni ucuwela mananna cinhaleenyu uphwanyera ifayita itthu impheeleenyu usoma. Wootakihera, wakhala wiira nnototha ikano coohala wuukaviherani waanana marikariko arineenyu, munlompe Yehova ni munlepele wiira ookavihereni uphwanya nnuulumoni nawe mattharelelo anhala wuukaviherani ucuwela cowiira.—Afili. 4:6, 7; Tiya. 1:5.
2. UTANICERA
Ntanicere toko wiira thi nyu cinookhumelelani citthu cinttonkiya (Nwehe iparaagarafu 4)
4. Isiyani inhala wuukaviherani ucivihaca ihantisi co mbiiblyani cinsomeenyu?
4 (2) Utanicera. Yehova honumpa niinanna yootikhiniha innikhitiriha utanicera citthu. Wiira ncivihace itthu insomeenyu mbiiblyani, mmananihe utanicera awula wuupuwela inanna caaryaaya nipuro yaakhumelelaaya itthu insomeenyu ni ntanicere toko wiira thi nyuuva yuukhumelenleni. Mmananihe woona citthu coonaawe ntthuuyo ni ukhala khampa uyova caaryaawe.
3. WUUPUWELA VENCI INSOMEEHU
Muupuwele ratta-raatta itthu insomeenyu ni mananna cinlamuliyeenyu weettela (Nwehe iparaagarafu 5)
5. Isiyani inlamuliyeehu wuupuwela ratta, ni manannani cinlamuliyeehu wuupuwela?
5 (3) Wuupuwela venci insomeehu. Muupuwele ratta-raatta itthu insomeenyu ni mananna nnolamuliyeenyu weettela. Mwapankaka commo, nnaahala ucuwela mananna cinvaranacaaya citthu cinsomeenyu ni nnaahala ukhitiri wiiweeha sana-saana mwahooyo. Usoma Ibiiblya woohikumiha ukati wiira nuupuwele insomeehu, unlikanaca nuutthenkaca citthu cimpheeleehu uhela nyoolyani inaapyeehu, masi woohihela cotheene. Iyo iyoolyeeyo pooti uhiciva. Masi wuupuwela saana itthu insomeehu, unlikanaca nuuhela nyoolyani inaapyeehu citthu cotheene cinlamuliya ukela wiira iyo icive. Wiira nkhitiri wuupuwela insomeenyu, mwiikohe co: ‘Ntthu noolumiya nhina mphantte unsomaaka aapankile isiyani wiira amalihe marikariko yaarinaawe? Yehova ankavihenre cani? Citthu ciitthucilyaaka cinhala ukikavihera cani uvilela?’
4. WEETTELA
Nvarele nteko citthu ciitthucileenyu wiira nlakele upanka citthu comaana, nkhalane nnema ni wiira nlipihace waamini winyu (Nwehe iparaagarafu 6)
6. Kontha isiyani nihaana neettelaka citthu cineetthuceehu?
6 (4) Weettela. Yesu heera wiira ntthu hineettela itthu ineetthucaawe, nolikanaca ni nlopwana noteka inupaawe munthaakani. Uyo neevarihaca nteko wo mahala. Kontha isiyani? Kontha yawaaka iphyoo yuulupale ni yarupaka ipula yinci, anaahala ucara maaci ni inupa itekilyaawe inaahala umaruwa. (Mat. 7:24-27) Inanna imocaaru, neekurumicaka ulompa, utanicera ni wuupuwela venci insomeehu masi wooheettela citthu cineetthuceehu, ninhala wiikurumica mahala. Yanikhumelelaka masankiho awula nalupatthiyaka, waamini wihu khunhala ulipa. Masi neettelaka citthu cineetthuceehu, ninaakhitiri ulakela upanka citthu comaana, ninaakhalana nnema ni waamini wihu unaatepa ukhala woolipa. (Isai. 48:17, 18) Vano nttwee noone mananna ninlamuliyeehu uvarela nteko nnyo citthu cesennyo nisomaka itthu yankhumelenle mwene Davidi.
ISIYANI INEETTHUCEENYU MWASOMAKA NTAKIHERO NA MWENE DAVIDI?
7. Ihantisini yo mbiiblyani impheeleehu usoma?
7 Mpatthaniinyu awula mmuciinyu hotoko wuupankani itthu yowuuweryaani? Wakhala wiira iyo ihookhumelelani, itthu imoca inhala wuukaviherani ukhanle wuupuwela itthu yaapankilyaawe mwene Davidi ukati mwanawe eehaniya Apisalau, wanrukunuwenlyaawe ni waamananihilyaawe umwaakha umwene.—2 Sam. 15:5-14, 31; 18:6-14.
8. Isiyani inlamuliyeenyu upanka wiira nkaviheriye ni Yehova?
8 (1) Ulompa. Muupuwelakoono itthu yankhumelenle mwene Davidi, mmuulumane Yehova ni munhimerye inanna cineecooneenyu nlattu wo itthu yootakhala ipankiyeenyu. (Isaa. 6:6-9) Vano, munlepele wiira ookavihereni uphwanya mbiiblyani mattharelelo anhala wuukaviherani ucuwela cowiira.
9. Isiyani yankhumelenle Davidi ni Apisalau?
9 (2) Utanicera. Ntanicere citthu cotheene ciirannya, ni inanna Davidi ciinoonaawe nlattu wo citthu cankhumelenle. Woopacera, Apisalau, mwaana a Davidi, naakhala myaakha cinci atothaka waaminiya naapoovu. (2 Sam. 15:7) Wahoolo, oonaka wiira uhophiya ukati woopanka itthu yaapheelaawe, Apisalau nawaaruma atthwaawe weetta ilapo yotheene yo Isarayeli, yaatthenkacaka apoovu wiira antthune ukhala mwene. Ni mpaka ciicammo Aitofel, ule aari mpatthani muulupale a Davidi ni anvahaka miruku Davidi, naahapusiya ni Apisalau wiira akhale mphanttyaawe. Vano, Apisalau nawiikhaliha mwene ni naamananiha unvara ni umwiiva Davidi. Uyo ukatyuuyo, Davidi atthunaka anwerennya cinene. (Isaa. 41:1-9) Davidi naacuwela wiira horukunuweliya ni Apisalau, ni naatthawa u Yerusalemu. Wahoolo, anatoropa a Apisalau anawaattakana naanatoropa a Davidi. Apisalau naatthemiya ni nawiiviya.
10. Isiyani mwene Davidi atthunaka yaahalaawe upanka?
10 Vano, ntanicere mananna Davidi ciicoonalyaawe nlattu wo citthu cotheene cankhumelenle. Uyo aanonfenta Apisalau ni aanonkhuluvela Aitofel. Ayo yaari atthu yaakhuluvelaawe venci, masi yahonrukunuwela. Yahompanka Davidi itthu yoowerya cinene, ni mpaka ayo yaapheela umwiiva. Nlattu wo iyo, Davidi atthunaka khaahala waakhuluvela-tho asipatthannyaawe akiina, oopuwelaka wiira naayo yaari mphantte wa Apisalau. Uyo pooti aahala wuupuwela wiikhikicera veekha cawe ni umananiha utthawa veekha. Awula atthunaka aahala waaca usanka paahi, woohipanka itthu. Masi Davidi khaakhanle commo. Ayo yaari masankiho ootepa urika yankhumelenle muukumini wawe, masi Davidi ahokhitiri waanana saana. Isiyani yankavihenre?
11. Isiyani Davidi yaapankilyaawe ukati wo masankiho yankhumelenle?
11 (3) Wuupuwela venci insomeehu. Itthu yankhumelenle Davidi inwiitthucihani isiyani? Mwaakhule nna nikohonna: “Isiyani Davidi yaapankilyaawe wiira amalihe masakha yankhumelenle?” Davidi khaakuvenle upanka itthu woohipaca wuupuwela, masi uyo ahothoonyera ukhalana ankhili. Uyo khaacile uhala neemenle oovaka, woohipanka itthu. Uhiya commo, Davidi aholompa ni aholepela ukaviheriya ni Yehova. Uyo ciicammo aholepela ukaviheriya naasipatthannyaawe. Ni khaapicile upanka itthu yaalakenlyaawe. Hataa ukhalaka wiira Davidi aari ooriipiya nrima, uyo khaahiile waakhuluvela akhunanawe ni khaakhanle ntthu ootakhala nrima. Uyo khaahiyerenre unkhuluvela Yehova ni waakhuluvela apatthannyaawe.
12. Yehova ankavihenre cani Davidi?
12 Yehova ankavihenre cani Davidi? Mwatothaka ucuwela, nnaahala woonenela wiira Yehova ahonvaha Davidi ikuru wiira akhitiri uvilela. (Isaa. 3:1-8; moolumo ooculu ikapiitulu) Yehova ahocaaliha citthu Davidi caalakenlyaawe upanka. Yehova ciicammo ahaakavihera apatthani ookhuluvelya a Davidi ukati waanaaya ikhotto wiira ankhikicere mwennyaaya.
13. Ntthu ooriipihakani nrima, nnohala untakiha cani Davidi? (Matewus 18:15-17)
13 (4) Weettela. Mwiikohe co: ‘Kinlamuliya untakiha cani Davidi?’ Nhipicapice upanka itthu wiira mmalihe marikariko arineenyu. Mweettele ikano Yesu ivahilyaawe nhina Matewus ikapiitulu 18, wakhala wiira inaavaranaca ni itthu yuukhumelenleni. (Nsome Matewus 18:15-17.d) Nhaakuve ulakela upanka itthu nnaryeene oorusiya. Nlompe ni munlepele Yehova wiira ookavihereni umaaliha nrimeenyu ni wiira oovahani akhili wiira ncuwele mananna owaanana itthu yuukhumelenleni. Nhihiye waakhuluvela asipatthaniinyu. Masi ntthune ukaviheriya naayo. (Miru. 17:17) Ni itthu yuulupale cinene phi ila: nhihiye utthara ikano ca Yehova ciri mbiiblyani.—Miru. 3:5, 6.
ISIYANI INEETTHUCEENYU MWASOMAKA NTAKIHERO NA APOSTOLU PAULU?
14. Uwakatini cinhalaaya wuulipihani nnya iveerusunnya: 2 Timotiyu 1:12-16 ni 4:6-11, 17-22?
14 Nyuuva nnaalupatthiya naamuciinyu? Nnokhala ilapo cinkhottihiyaaya miteko cihu vakaani awula cotheene? Wakhala wiira iyo phi itthu inookhumelelani, nnya iveerusunnya pooti wuulipihani: 2 Timotiyu 1:12-16 ni 4:6-11, 17-22.e Paulu antikhile nnya iveerusunnya ukati waaryaawe nkhatteya.
15. Isiyani inlamuliyeenyu unlepela Yehova?
15 (1) Ulompa. Nhinaaya usoma ila ihantisiila, munhimerye Yehova marikarikoni arineenyu ni munhimerye inanna cineecooneenyu. Vano, munlepele wiira, ukati unhaleenyu usoma itthu yankhumelenle Paulu, ookavihereni uphwanya mattharelelo anhala wuukaviherani.
16. Isiyani yankhumelenle Paulu?
16 (2) Ntanicere. Ntanicere nyuuva nnari apostolu Paulu. Uyo hootthukiya u Roma ni ri nuunyolo. Apostolu Paulu ahotoko utthukiya khalayi, masi ila ikwaheela uyo naakupali wiira naahala wiiviya. Asipatthannyaawe akhwaawe ahonhiya, ni uyo ri owoocya.—2 Tim. 1:15.
17. Natthunne, isiyani Paulu yaahalaawe upanka?
17 Paulu atthunaka aahala ukhala oopuwelaka citthu co khalayi ni wiiciirela: “Kahaakhanle nkristau owiikurumica, mi akaahala utthukiya.” Natthunne, uyo anhala waaviruwela alopwana o ncoko wo Ásia yanhiile, ni atthunaka khaahala waakhuluvela-tho asipatthannyaawe akiina. Masi Paulu khaapankile commo. Isiyani yankavihenre uhihiya waakhuluvela asipatthannyaawe ni unkhuluvela Yehova?
18. Isiyani Paulu yaapankilyaawe wiira akhitiri waanana marikariko yankhumelenle?
18 (3) Wuupuwela venci insomeehu. Mwaakhule nna nikohonna: “Isiyani Paulu yaapankilyaawe wiira akhitiri waanana marikarikwaawe?” Hataa acuwelaka wiira aapheela wiiviya, Paulu khaaliyanle itthu yootepa ukhalana ifayita—unttitthimiha Yehova. Uyo khaahiile waalipiha akhwaawe. Uyo ahonkhuluvela Yehova ni khaahiile ulompa. (2 Tim. 1:3) Paulu khaakhala ukati mwinci awuupuwelaka mayamunna yanhiile. Masi uyo aheera wiira aanaasukhuru venci asipatthannyaawe yankavihenre cinene. Ciicammo, Paulu khaahiile usoma Nuulumo na Nluku. (2 Tim. 3:16, 17; 4:13) Ni venci-venci, Paulu aanaakupali wiira Yehova ni Yesu yaananfenta cinene. Ayo khayanhiile Paulu, ni yanhala untthuvela nlattu wonteko womaana waavanryaawe.
19. Manannani Yehova cankavihenryaawe Paulu?
19 Yehova ahonhimerya Paulu wiira uyo anhala ulupatthiya nlattu wookhala nkristau. (Mite. 21:11-13) Masi manannani Yehova cankavihenryaawe Paulu? Yehova ahaakhula mavekelo a Paulu, ni wahoolo ahonvaha ikuru. (2 Tim. 4:17) Paulu ahokhuluvelihiya wiira uyo anhala utthuveliya nlattu wonteko weekurumicilyaawe uvara. Ni Yehova ahaakurumica apatthani akhwaawe ookhuluvelya a Paulu wiira ankavihere.
20. Noopuwelaka itthu inhimyaaya Arooma 8:38, 39, ninhala utakiha cani waamini wa Paulu?
20 (4) Weettela. Mwiikohe co: ‘Kinlamuliya untakiha cani Paulu?’ Toko Paulu, wanihukuni hiiva ciicammo pooti ulupatthiya nlattu wonswalela Yehova. (Mark. 10:29, 30) Wiira nihihiye unswalela Yehova hataa nilupatthiyaka, nihaana ninlompaka woohihiyerera ni usoma Nuulumo nawe khula nihuku. Ni khaninlamuliya uliyala wiira itthu yuulupale cinene, ukhanle unttitthimiha Yehova. Pooti wankupaliihu wiira Yehova khanhala unihiya veekha, ni khiivo itthu impankaaya atthu inhala unhiiha Yehova unifenta hiiva.—Nsome Arooma 8:38, 39;f Mabere. 13:5, 6.
MWIITTHUCERE MATAKIHERO O MBIIBLYANI MAKHWAAWE
21. Isiyani inkavihenre Aya ni Hector umaliha marikariko yaarinaaya?
21 Hataa yanikhumelelaka marikarikoni, matakihero o mbiiblyani pooti unilipiha. Wootakihera, nrokorihu neehahiya Aya novara nteko weepiyoneeru u Japão, neera wiira ihantisi ya Jonas yahonkavihera uhiya woova ulalyeera mapuro ankhala atthu enci. Mmirawo mmoca nokhala u Indonésia neehaniya Hector, asithumwaane ahinonswalela Yehova, neera wiira ntakihero na Ruti ninankurumica utepa wiitthuca myaha ca Yehova ni unswalela.
22. Wiira idrama co mbiiblyani ni miphantte “Imite a Sua Fé” cuukavihereni cinene, isiyani inlamuliyeenyu upanka?
22 Nnohala uphwanya nipuroni matakihero o mbiiblyani anhala wuukaviherani ulipihaca waamini winyu? Coosomiya mbiiblyani ninhapo, ividiyu ni miphantte “Imite a Sua Fé,” cinaanikavihera wiira ihantisi co mbiiblyani cinivare nrima.g Mayamunna anaasomasoma cinene wiira atthenkace ikaruma cotheenennyo. Phimaana, nhinaaya uvarela nteko ukati woosoma Ibiiblya veekha, munlepele Yehova wiira ookavihereni uphwanya ipontu cinlamuliyeenyu weettela. Ukati wooviriyana awula woosoma, muupuwele toko wiira thi nyuuva cinookhumelelani citthu cinttonkiya. Muupuwele isiyani ayo atthwaayo yaapankilyaaya ni manannani Yehova caakavihenryaawe umaliha marikarikwaaya. Vano, mweettele citthu ciitthucileenyu. Munsukhuru Yehova nlattu wo mananna cinookaviherannyaawe. Ni nthoonyere usukhuru winyu mwaalipihaka ni ciicammo mwaakaviheraka akhwiinyu.
23. Toko cinhimyaaya ilivuru ya Isaiya 41:10, 13, isiyani Yehova innikhuluvelihaawe unipanka?
23 Ntuninyani ya Sotwani inkhaleehu, makhalelo anaarika. Ukati nkiina, hiiva ninaasankaka, woohicuwela yowiira. (2 Tim. 3:1) Masi nihitepe ukhala ni masukhuli ni nihoove. Yehova naacuwela citthu cinnikhumelela. Nawuluwaka, uyo hokhuluveliha wiira naahala utaphula ntata nawe nonlopwana nosariya ni univara moono. (Nsome Isaiya 41:10, 13.h) Ninaakupali wiira Yehova naahala unikavihera, ni Ibiiblya inaanivaha ikuru cimpheeleehu wiira nikhitiri waanana khula itafaawuti inhala uniphwanya.
NCIPO 96 O Livro de Deus É Um Tesouro
a Mbiiblyani, cihaavo ihantisi cinci cinthoonyera wiira Yehova nawaafenta atthu anonswalela ni naahala waakavihera uvilela khula masankiho anhala waakhumelela. Ula mwahoola unaahala uthoonyera isiyani inlamuliyeenyu upanka ukati woosoma Ibiiblya veekha wiira mphwanyere ifayita.
b Arooma 15:4 Kontha citthu cotheene cantikhiye khalayi, cantikhiye wiira ciniitthucihe, wiira nlattu woovilela wihu ni nlattu wo mamaaliho ari nhina Cowantikhiya, nikhalane niweherero.
c Citthu cinlamuliyeehu upanka ukati woosoma Ibiiblya cihimiye nhina ula mwahoola, cikhanle miruku cinvahiyeehu paasi. Mananna makhwaawe oosoma Ibiiblya amphwanyannya nhina Guia de Pesquisa para Testemunhas de Jeová. Nwehe mphantte uneera A BÍBLIA > LER E ENTENDER A BÍBLIA.
d Matewus 18:15 Uhiya iyo, munnaa avaraka matampi, urwee wanthoonyere uttheka wawe, nnari ooyeeli cinyu paahi. Awiiwelelaka, uhonkhitiri munnaa. 16 Masi akhottaka uwiiwelela, urwee wamuulumane nkhayi ni ntthu mmoca awula eeli, wiira ni moolumo o masaahiti eeli awula araru, mwaha wotheene umalihiye. 17 Akhottaka wuuviriyanani, nrwee mwahimye wanlokoni. Ni akhottaka uviriyana nloko, munwehere khampa mmalaponi ni khampa namaliviha nsokho.
e Nnya iveerusunnya khacinlamuliya usomiya wanlokoni ukati unsomiyaaya irevista Ukhalenla.
f Arooma 8:38 Kontha kinaakupali wiira nanka ukhwa, nanka ukumi, nanka malayikha, nanka makuvernu, nanka citthu cirivo, nanka citthu cinhala uwa, nanka ikuru, 39 nanka irekamelo, nanka yiiserero, ni khiivo nanka itthu ikhwaawe yumpiye inhala ukhitiri unimwalaniha nnifentoni na Nluku, niri iriyari wa Yesu Kristu, Apwiiyeehu.
g Nsayitini jw.org yeekunya, nwehe mphantte wantikhiye “Imite a Sua Fé — Homens e Mulheres da Bíblia”. (Nkele wantikhiye ENSINOS BÍBLICOS > FÉ EM DEUS.)
h Isaiya 41:10 Uhoove, kontha mi kiri ni weeva. Uhikhale ni masukhuli, kontha mi ki Nlukwaa. Kinaahala wuulipiha, iyee, kinaahala wuukavihera. Kinaahala wuuvarelela cinene nintata naka nosariya no moono wonlopwana. 13 Kontha miiva, Yehova, Nlukwaa, kinaavarelela ntata naa nonlopwana; thi mi kinwiirela: ‘Uhoove. Kinaahala wuukavihera.’