Mweettele “nlamulo no unamaana”

“UNAMAANA wo mayamunna ni wo mayanuunu o wanlokoni phaakiirihile upheela weettela ikhweeli.” Iyo phi itthu yuulumilyaawe Lisa.a Itthu toko iyo ciicammo yahomwiirannyeela Anne. Uyo neera: “Wiipaceroni, itthu yaakivanre nrima waari unamaana wo mayamunna, kahi citthu ceetthucihiyaaka.” Ayo mayanuunu eelyaayo unawaacivela venci usoma Ibiiblya ni wuupuwela itthu inhimyaaya. Masi woona unamaana wo mayamunna wahorukunusa venci makhalelwaaya.

Manannani ninlamuliyeehu uthoonyera unamaana wiira naavare nrima akhunanihu? Ninaahala woona mananna meeli oothoonyera unamaana: nhina citthu cinoolumeehu ni nhina citthu cimpankeehu. Ciicammo, ninaahala woona tipani nolamuliyeehu unthoonyihera unamaana.

NTHOONYERE “NLAMULO NO UNAMAANA” NIINANNA CINOOLUMEENYU

Nthiyana omaana noolumiya nhina Miruku ikapiitulu 31 ahaana “nlamulo no unamaana” wanlimini wawe. (Miru. 31:26) Uyo nthiyanooyo naahiya nno nlamulonno nankaviheraka ucuwela itthu yowuuluma ni inanna yo wuuluma iyo itthwiiyo. Nnyari nlopwana ciicammo haana akhalanaka nno nlamulonno wanlimini wawe. Ayari enci anaacuwela wiira wuuluma yacacaka venci pooti waanyoonyiha asaana ni uwiiriha uhiwiiwelela asithumwanaya. Masi ayari yoolumaka ninifento, asaana khunaarikela wiiwelela ni weettela citthu cinhimyeeriyaaya naasithumwanaya.

Hataa ukhalaka wiira nyuuva khanrina asaana, isiyani inlamuliyeenyu upanka wiira muulume nthoonyeraka unamaana? Itthu innikavihera ihimiye nhina Miruku 31:26: “Uyo nawuuluma athoonyeraka ucuwelaca.” Iyo maanaaya wiira nihaana nikhalanaka ucuwelaca wiira nithanle ratta moolumweehu nihinaaya wuuluma ni wiira nicuwele mananna owuuluma. Hiiva pooti wiikoha co: ‘Itthu impheelaaka wuuluma inaahala uwiiriha akhunanaka urusiya awula uhirusiya?’ (Miru. 15:1) Khweeli, wuupuwela nihinaaya wuuluma unthoonyera ucuwelaca.

Iveerusu ikhwaawe yo mbiiblyani ineera: “Moolumo oohuupuweliya ratta ankhala toko uhoma wosoowa.” (Miru. 12:18) Neemelaka nuupuwelaka mananna akhunanihu cinhalaaya ukhala nlattu wo moolumweehu, ninawaakuva wiivaraca wiira nihuulume itthu yoohiloka. Neettelaka “nlamulo no unamaana” nhina mananna ninoolumeehu khaninhala wuuluma citthu coohinamaana awula cowaariipiha nrima akhunanihu. (Efesu 4:31, 32) Uhiya commo, hiiva ninaanyema moopuwelelo ni moolumo oohiloka wiira nikhalane moolumo ooloka ni wiira nuulume ninifento. Iyo phi itthu Yehova yaapankilyaawe waaphenlyaawe ummaaliha porofeeta Eliyasi ukati waakhanlyaawe owoova cinene. Nlayikha nanhimenrye Eliyasi moolumo a Yehova, naamuulumanne “nincu noomaalya.” (1 Mam. 19:12) Masi, nihaana nihiliyalaka wiira uthoonyera unamaana khunakhala paasi wuuluma saana. Nihaana ciicammo nithoonyeraka unamaana nhina citthu cimpankeehu. Manannani?

UPANKA CITTHU NITHOONYERAKA UNAMAANA UNAWAAKURUMICA AKHUNANIHU

Hiiva ninontakiha Yehova kahi nithoonyeraka unamaana nhina citthu cinoolumeehu paahi, masi ciicammo nhina citthu cimpankeehu. (Efesu 4:32; 5:1, 2) Muupuwele itthu yuulumilyaawe Lisa, romoliye wiipaceroni, aacaka unamaana waawonnyaawe Masaahiti a Yehova yathoonyeraka. Uyo enre co: “Ukati mi naamucyaaka waakhanyererihiyeehu uthama nipuro naakhaleehu, mayamunna eeli ni asaaraya yahokumiha ifeeriya mmamitekoni waya wiira anikavihere uthotokaniha citthu caahaleehu ucisa. Ule ukatyuule, mi kaari kihinancera usomihiya Ibiiblya.” Nwo unamaananwo wahomwiiriha Lisa upheela wiitthuca ikhweeli co mbiiblyani.

Anne, romoliye wiipaceroni, ciicammo ahosukhurweela cinene unamaana waathoonyiheriyaawe ni Masaahiti a Yehova. Uyo enre: “Nlattu wo makhalelo oohiloka o ntuninyani, mi khaavo ntthu ankhuluvelaaka. Ukati waacuwenlyaaka Masaahiti a Yehova mi akaakhuluvela. Mi kaaneekoha: ‘Nlattuni unkiwaceeraaya saana co?’ Masi athiyana Saahiti a Yehova yaakisomiha Ibiiblya yaanaakiwacera sana-saana, mpaka mi kahancera waakhuluvela.” Isiyani yankhumelenle Anne? Uyo heera: “Nuuwakatyaaya, mi kahancera weettela citthu ceetthucaaka.”

Nhoona isiyani yanvanre nrima Lisa ni Anne? Caari citthu coothoonyera unamaana caapankilyaaya mayamunna ni mayanuunu o wanlokoni. Iyo phi itthu yaawiirihile upheela wiitthuca ikhweeli. Unamaana wo mayamunna wahowiiriha unkhuluvela Yehova ni waakhuluvela apoovwaawe.

MUNTAKIHE NLUKU NI MWAATHOONYIHERE AKHUNANINYU UNAMAANA

Atthu akhwaawe akhanle ooreera nrima ni anaathoonyera unamaana nlattu wokhapila yo nipuro ninkhalaaya. Iyo ikhanle itthu yomaana. Masi wakhalaka wiira hiiva ninthoonyera unamaana nlattu paahi wootthara ikhapila yo nipuro ninkhaleehu, khaninthoonyera unamaana weekhweeli unkhuma wa Nluku.—Nwehe ciicammo Miteko 28:2.

Unamaana unkhuma wa Nluku ukhanle ikhalelo yo nhokorokho wo nnepa wowaarya wa Nluku. (Akalas. 5:22, 23) Wiira nithoonyere unamaana weekhweeli unkhuma wa Nluku, nihaana nihiyaka nnepa wowaarya urukunusaka moopuwelweehu ni citthu cimpankeehu. Napankaka commo, ninantakiha Yehova ni Yesu. Ni hiiva makristau ninawaawacera akhunanihu. Phimaana, itthu inniiriha uthoonyera unamaana ukhanle unfenta Yehova ni waafenta akhunanihu. Ala manannaala, ninaathoonyihera unamaana weekhweeli unkhuma wanrimani wihu ni unoncivela Nluku.

TIPANI NOLAMULIYEEHU UNTHOONYIHERA UNAMAANA?

Khunnirikela unthoonyihera unamaana ntthu noncuweleehu awula ntthu pacale unithoonyihera unamaana. (2 Sam. 2:6) Wootakihera, hiiva pooti umpankela nkhunanihu itthu wiira ninsukhuru nlattu uyova woonikavihera. (Akol. 3:15) Vano wakhalaka wiira haavo ntthu nomooneehu wiira khunomphwanela hiiva unthoonyihera unamaana, isiyani inlamuliyeehu wuupuwela?

Muupuwele ila itthwiila: Yehova naanivaha ntakihero nomaana nhina waathoonyihera unamaana atthu hataa uhaaphwanelaka. Mbiiblyani, hiiva ninawiitthuca wiira ikhanle itthu yofayita wiikurumica wiira hiiva nithoonyihere iyo ikhalelweeyo. Nhina Cowantikhiya Cowaarya niiluuka ikereeku, nuulumo “unamaana woonironya” ninaaromoliya ikwaha cinci. Nluku khweeliini khanle namaana!

Yehova nawaathoonyihera unamaana atthu enci aavahaka citthu cimpheelaaya wiira akhale nuukumi. (Mat. 5:45) Hataa hiiva nihinaaya wiitthuca ikhweeli co mbiiblyani ni uncuwela Yehova, uyo aanaanithoonyihera unamaanaawe. (Efesu 2:4, 5, 8) Wootakihera, uyo hovaha ukumi wa Mwanawe wiira awoopole atthu otheene. Apostolu Paulu enre wiira Nluku vahile ukumi wa Yesu “nlattu wo nifento noohiniphwanela noonihenryaawe.” (Efesu 1:7) Ciicammo, Yehova nanlelo naanihoolela ni naaniitthuciha hataa ikwaha cinci nivonyaka ni nivaraka matampi. Malakihero Yehova annivahaawe nnuulumoni nawe ankhala khampa “ipula immicera vakaani-vakaani malasi.” (Deut. 32:2) Khweeliini, hi khaninhala ukhitiri unliva Yehova nlattu wo unamaana unnithoonyiheraawe. Ni wahaari unamaana wa Yehova, hi khanaahala uweherera ukhalana ukumi woohimala wahoolo.—Nwehe ciicammo 1 Peturu 1:13.

Khweeliini, unamaana wa Yehova ikhanle ikhalelo yomaana impheeleehu hiiva ciicammo uthoonyera. Phimaana, uhiya ukhala naathanlaka atthu owaathoonyihera unamaana, nihaana niikurumicaka untakiha Yehova ni uthoonyihera unamaana ukati wotheene muukumini wihu.(1 Atesal. 5:15) Naathoonyiheraka unamaana atthu otheene, hiiva ninaahala waakavihera khampa mooro cinnikaviheraaya uhiyu wooririya. Unamaana wihu unaahala waamaaliha amuciihu, mayamunneehu o wanlokoni, atthu anaasomaneehu awula anaavaraneehu nteko ni aattamananiihu.

Muupuwele mananna moolumweenyu ni citthu cimpankeenyu coothoonyera unamaana cinhalaaya waapanka ratta amuciinyu ni mayamunneenyu o wanlokoni. Nyuuva pooti unkavihera munna o wanlokoni utthukaca iluwannyaawe, ulimalimaca wapuwani wawe awula upanka nteko nkhwaawe. Ni mwamphanyaka ntthu wuulalyeerani sankale, nnoonela cani unkavihera?

Otheene cihu, nintakihe Yehova ni nithoonyere nhina citthu cinoolumeehu ni cimpankeehu wiira ninaweettela “nlamulo no unamaana.”