MWAHA WOOSOMIYA 34
Mwiikurumice wiira ‘nhihiye weettela ikhweeli’
“Khiivo itthu ikhwaawe intepa ukitteeliha nrima uvikana ila: wiiwa wiira asaanaaka khanhiya weettela ikhweeli.”—3 JO. 4.
NCIPO 111 Citthu cinnitteeliha nrima
NINHALA WIITTHUCANI?a
1. Kontha isiyani unaareera uwoopana mwaha mayamunneehu nihimyeeranaka mananna ciitthucileehu “ikhweeli”?
“NYUUVA mwiitthucile cani ikhweeli?” Pooti ukhalaka wiira ikwaha cinci, nyuuva nhaakhula nno nikohonno. Iyo atthunaka phi itthu yoopacera ineeweenyu mwancuwelaka mphiyaaruni Saahiti a Yehova nkhunaninyu. Unaareera ucuwela mananna munneehu ciitthucilyaawe ikhweeli ca Yehova. Ciicammo, unaanicivela waahimyeera akhunanihu mananna hiiva ciitthucileehu ikhweeli. (Aroo. 1:11) Uwoopana mayamunneehu nnyo myahannyo unaanuupusera ifayita irinaaya ikhweeli ineetteleehu. Ciicammo, unaanikavihera utepa ulakela uhihiya weettela ikhweeli, awula uhihiya wiikurumica untteeliha nrima Yehova.—3 Jo. 4.
2. Ninhala wiitthucani nhina ula mwahoola?
2 Nhina ula mwahoola, ninaahala woona citthu cinniiriha unicivela ikhweeli. Ciicammo, ninaahala woona manannani ninlamuliyeehu uthoonyera wiira inaanicivela ikhweeli. Ula mwahoola unaahala unikavihera utepa unsukhuru Yehova nlattu woonithanla wiira niitthuce ikhweeli. (Joau 6:44) Ciicammo, ula mwahoola unaahala unikurumica wiira nipheele uwiitthuciha akhunanihu ikhweeli ca Nluku.
KONTHA ISIYANI INAANICIVELA “IKHWEELI”
3. Itthuni yuulupale inniiriha unicivela ikhweeli?
3 Cihaavo citthu cinci cinniiriha unicivela ikhweeli. Masi itthu yuulupale ukhanle hiiva unfenta Yehova, ule inonkhumakhuma ikhweeli. Mbiiblyani, hi ninawoona wiira Yehova khanakhala paahi Mumpiihu Nakuru-Cotheene, masi uyo ciicammo khanle Apaapeehu annifenta ni anniwacera sana-saana otheene cihu. (1 Pet. 5:7) Hi ninaacuwela wiira Yehova khanle “Nluku okiriri ni oothunku, oovilela ni oomwinciva nifento nookhuluvelya ni ikhweeli.” (Nkw. 34:6) Ciicammo, Yehova inancivela isariya. (Isai. 61:8) Yehova anoonaka nihuvaka, uyo unanwerya nrima cinene ni noona upica uphiya ukati unhalaawe umaliha uhuva wotheene. (Jer. 29:11) Hiiva ciicammo ninoona upica uphiya ukati unhalaaya wiirannya iyo itthwiiyo! Nnya phi citthu cinniiriha unfenta venci Yehova!
Ikhweeli co mbiiblyani cinkhala khampa . . . Nankura
Khampa nankura cinlipihaawe ikalawa wiira ihipinttuliye niiphyoo, nweherero unttonkaciya mbiiblyani urineehu unaanikavihera ulipa yaniphwanyaka masakha. Ikhweeli co mbiiblyani ciicammo cinaanikurumica waahimyeera akhunanihu iparakha comaana cinweherereehu uhoolo (Nwehe iparaagarafu 4-7)
4-5. Kontha isiyani apostolu Paulu holattaniha nwehererweehu ni nankura?
4 Isiyani-tho inniiriha unicivela ikhweeli? Ikhweeli inaanivaha nweherero woohoolo. Ni uyo nwehererooyo unaanikavihera cinene muukumini wihu. Moone isiyani apostolu Paulu ilattanihenryaawe uyo nwehererooyo. Uyo enre co: “Nihaana ula nwehereroola toko nankura nolipiha irooho, ookhuluvelya ni oolipa.” (Mabere. 6:19) Toko nankura cinlipihaawe ikalawa wiira ihipinttuliye niiphyoo, nweherero wo mbiiblyani urineehu unaanilipiha yanikhumelelaka masakha.
5 Apostolu Paulu ooluma nweherero wo makristau oothanliya anweherera urwaa ukhala wiirimu. Masi moolumwaawe ciicammo anwaaca makristau anweherera urwaa ukhala wapeephoni watuninyani mpaka. (Joau 3:16) Khweeliini, nweherero otheene cihu urineehu wookhalana ukumi woohimala unaanikavihera ukhalana ukumi womaana.
6-7. Wiitthuca ikhweeli nhina citthu cinhala wiirannya uhoolo waakavihenre cani arokorihu Yvonne?
6 Muupuwele itthu yaawiirannyenle arokorihu aneehaniya Yvonne. Ayo khayiitthucile ikhweeli co mbiiblyani ikhumelo inamwannyaaya ni waaryaaya mwanhima, yaanawoova cinene ukhwa. Ihaavo ikwaha yaasomilyaaya itthu ihinliyalaaya mpaka nna co. Itthu yaasomilyaaya yeera co: “Uhaavo ukati uhinhalaaya ukhala-tho meelo.” Ayo arokorihwaayo ciicammo ahooluma yiiraka co: “Mi akaarupa ikhove nlattu wo ayo moolumwaayo ni kaakhala uhiyu wotheene kuupuwelaka isiyani yaahala ukiirannyeela uhoolo. Mi kaanoopuwelaka co: ‘Ukumi khunlamuliya ukhala commo! Nlattuni uryaaka mmo ntuninyanimmo?’ Mi akaapheela ukhwa!”
7 Nuuwakatyaaya, arokorihu Yvonne anari mwaarusi, yahaacuwela Masaahiti a Yehova. Ayo yinre co: “Mi kahancera ukupali wiira kanhala ukhalana ukumi woohimala wapeephoni watuninyani.” Wiitthuca iyo ikhweeliiyo waakavihenre cani arokorihu? Ayo aheera co: “Ilelo, mi akinkhala uhiyu nteru woohirupa kuupuwelaka isiyani inhala ukiirannyeela wahoolo awula nlattu wo woova ukhwa.” Arokorihu Yvonne ahaana isariya yo waacivela ikhweeli ni wo waacivela uvara nteko woolalya ihapari comaana ni waahimyeera akhunanaya nweherero woohoolo urinaaya.—1 Tim. 4:16.
Ikhweeli co mbiiblyani cinkhala khampa . . . Nhakhu
Unswalela Yehova nnaco ni uweherera unswalela nihooleliyaka nuumwene wa Nluku unkhala nhakhu muulupale. Phataari wiikurumica uleva citthu cotheene wiira nihihaleele uyo nhakhuuyo (Nwehe iparaagarafu 8-11)
8-9. a) Nlopwana Yesu aamuulumilyaawe munlattaniheroni nawe aapankile isiyani ukati woonelenlyaawe nhakhu? b) Woonela winyu, ikhweeli yo mbiiblyani irina ifayitani?
8 Ihapari comaana co Umwene wa Nluku ciicammo cinaapanka mphantte nhina ikhweeli co mbiiblyani. Yesu holattaniha ikhweeli co Umwene wa Nluku ninhakhu woovithiya. Nhina Matewus 13:44, Yesu heera: “Umwene wo wiirimu unlattanaca ninhakhu uvithiye mmattani woonelenlyaawe nlopwana mmoca ni waavithilyaawe nipuro nikhwaawe. Untteelaka nrima, uyo nlopwanooyo ahorwaa utumiha citthu cotheene caarinaawe ni ahothuma iyo imatteeyo.” Unawoonannya wiira uyo nlopwanooyo khaatotha uyo nhakhuuyo, masi aahoophwanya paahi. Woonelela wawe, ahaamini uleva citthu cotheene caarinaawe wiira uyo nhakhuuyo ukhale wawawe. Uyo ahotumiha citthu cotheene caarinaawe wiira athume imatta yoonelenlyaawe uyo nhakhuuyo. Kontha isiyani? Kontha aanaacuwela wiira uyo nhakhuuyo wahaana ifayita cinene. Uyo aanaacuwela wiira pooti waahaleelaawe citthu cotheene nlattu wo uyo nhakhuuyo.
9 Khweeliini, nyuuva ciicammo nnawoona ukhalana ifayita ikhweeli ineetteleehu. Hi ninaacuwela wiira ntuninyani khiivo itthu inlikanana utteeliya unkhalaneehu nlattu wonswalela Yehova nna co ni inlikanana nweherero urineehu woohoolo wookhalana ukumi woohimala nihooleliyaka nuumwene wa Nluku. Ukhalana upatthani ni Yehova ikhanle iparakha inniiriha waamini uleva citthu cikhwaawe cotheene. Ucuwela wiira ‘ninantteeliha nrima ratta-raatta’ Yehova. Phi itthu intepa unitteeliha nrima!—Akol. 1:10.
10-11. Nlattuni munna Michael waapankilyaawe marukunuso moolupale muukumini wawe?
10 Mayamunneehu enci aholeva citthu cuulupale wiira antteelihe nrima Yehova. Ahaavo mayamunna ahiile miteko co nsurukhu mwinci ntuninyani. Akhwaawe, ahohiya ukhala yahooleliheraka utotha mihakhu, ni ahaavo arukunusile venci meettelwaawe ukati wiitthucilyaaya ikhweeli ca Yehova. Iyo phi itthu yaamwiirannyenle munna neehaniya Michael. Uyo munnooyo kheetthucihiye ikhweeli ca Nluku wapuwani waasithumwaane. Ni ukati waaryaawe mmirawo ahancera wiitthuca ikarati. Munna Michael heera co: “Itthu yoonaaka utepa ukhalana ifayita, waari wiikhomaaliha irutthu. Ukati nkhwaawe, mi koopuwela wiira khaavo aahala ukhitiri ukitthema.” Masi ukati munna Michael wancenryaawe usomihiya Ibiiblya, aheetthuca mananna Yehova cinweheraawe inttewo. (Isaa. 11:5) Munna Michael howuuluma anamathelana yansomiha Ibiiblya eeraka co: “Ayo khayaakiirenle wiira mi kahaana kihiyaka ikarati, masi yaakiitthucihile ikhweeli co mbiiblyani.”
11 Ukati munna Michael weetthucaawe ikhweeli co mbiiblyani, uyo aanaavira atepaka unfenta Yehova. Itthu imoca yanvare nrima, waari wiitthuca mananna Yehova cinwoonelaawe ikiriri atthu anonswalela. Nuuwakatyaaya, munna Michael ahoona wiira uyo ahaana alakelaka itthu yuulupale muukumini wawe. Uyo enre co: “Mi kaanaacuwela wiira uhiya ikarati yaari itthu yoorika cinene upanka muukumini waka. Masi kaanaapheela cinene untteeliha nrima Yehova, ni kaanaacuwela wiira phataari waamini uhiya khula itthu wiira kinswalele uyova.” Munna Michael aanaacuwela wiira ikhweeli yo mbiiblyani ihaana ifayita cinene. Phimaana, ahopanka marukunuso moolupale muukumini wawe.—Tiya. 1:25.
Ikhweeli co mbiiblyani cinkhala khampa . . . Nthuko
Nthuko unaanikavihera woona iphiro nakhalaka nipuro nooripela. Inanna imocaaru, Nuulumo na Nluku ninaanikavihera ulakela upanka citthu comaana ntuninyani yoohinamaana ni inhooleliya ni Sotwani inkhaleehu (Nwehe iparaagarafu 12-13)
12-13. Ikhweeli co mbiiblyani caakavihenre cani arokorihu Mayli?
12 Ibiiblya inaalattaniha ikhweeli ca Nluku ninthuko ummwaleela nipuro nooripela. Nno nlattaniheronno ninaanikavihera woona wiira ikhweeli ineetteleehu ihaana ifayita cinene. (Isaa. 119:105; Efesu 5:8) Arokorihu aneehaniya Mayli ankhala u Azerbaijão, anaasukhurweela cinene nlattu wo mananna Nuulumo na Nluku cimmwaleelaaya ukumyaaya. Ayo arokorihwaayo yuunuwenle watthokoni ceetteliya ittiini coovirikana. Athumwanaya yaari amaka ni anumwanaya yeettela ittiini ya ayuuta. Arokorihu Mayli aheera co: “Ukhuma nenne nokhalayi, mi kinaamwaamini Nluku, masi cihaavo citthu caakirikarika. Mi kaanawiikoha co: ‘Nlattuni Nluku wumpilyaawe apinaatamu? Nlattuni ntthu nohuvaawe cinene ni wahoolo urwaa upahiya umootthooni?’ Atthu yaakiirelaka wiira ukhanle utthuna wa mwaneene Nluku. Phimaana, mi kaanawiikoha co: ‘Nluku khweeliini phinkumiherera uhuva wotheene urivo? Nluku unancivela uwoona atthu yahuvaka?’”
13 Arokorihu Mayli khayaahiile utotha waakhuliya waya makoho yaarinaaya. Nuuwakatyaaya, ayo yahancera usomihiya Ibiiblya ni yahokhala Saahiti a Yehova. Ayo aheera co: “Mananna Ibiiblya caakhunlyaaya makoho yaarinaaka ahorukunusa cinene ukumyaaka ni ahokikavihera ukhala ninnema.” Khampa arokorihu Mayli, hiiva ninanttottopela Yehova, ule ‘niihanne wapiphini waariihu wiira nikhale wanthukoni wawe wootepa woonnya.’—1 Pet. 2:9.
14. Isiyani inhala unikavihera utepa unicivela ikhweeli? (Nwehe ciicammo ikwaaturu “Malattanihero makhwaawe.”)
14 Ayo akhanle matakihero anoonihera wiira ikhweeli ya Nluku ihaana ifayita cinene. Nyuuva atthunaka nnaakhitiri wuupuwela matakihero makhwaawe. Nnoonela cani ukati unsomeenyu Ibiiblya veekha utotha wuupuwela citthu cikhwaawe cinwiirihani wuucivelani ikhweeli ineetteleehu? Yanicivelaka cinene ikhweeli, ninaathoonyera iyo itthwiiyo nimeettelweehu.
NINTHOONYERA CANI WIIRA INAANICIVELA IKHWEELI?
15. Hiiva ninthoonyera cani wiira inaanicivela ikhweeli?
15 Hiiva ninthoonyera wiira inaanicivela ikhweeli, nasomaka woohihiyerera Ibiiblya ni ilivuru cintthenkaciya mumphwinkoni wihu. Nineera commo kontha hataa ukhalaka wiira niitthucile ikhweeli khalayi awula mphiyaaruni, otheene cihu cihaavo citthu cinlamuliyeehu wiitthuca. Irevista Ukhalenla yaapaceriye wantikhiya yaheera wiira ikhweeli inkhala khampa ifoloori yooreera iri wamalasini menci. Wiira ntthu aphwanye iyo ifolooriiyo, haana eekurumicaka utotha cinene. Masi ntthu khanlamuliya ukhala aweheehaka iyo ifoloori imoceeyo paahi. Uyo haana atothaka ifoloori cikhwaawe. Ninaacuwela wiira usoma unaarika, masi phataari wiikurumica usoma wiira noonelele ikhweeli cinci.
16. Manannani nyuuva cinsomeenyu Ibiiblya? (Nwehe Miruku 2:4-6.)
16 Atthu akhwaawe khunaacivela usoma, masi Yehova naanilattula wiira nihihiyerere utotha ikhweeli cuulupale co mbiiblyani. (Nsome Miruku 2:4-6.b) Neekurumicaka utotha nnyo ikhweelinnyo, ninaahala uphwanya ifayita. Munna mmoca neehaniya Corey enre wiira ukati woosoma Ibiiblya, uyo naamananiha uweheeha sana-saana khula iveerusu insomaawe. Uyo enre co: “Mi kinaasoma mawehero otheene, kinaatotha nnye cineehaniye referências cruzadas cotheene ni kinaatotha ucuwela itthu isomalyaaka maanaaya isiyani . . . Nlattu woopanka commo, mi kinaaphwanyera ifayita cinene usoma waka Ibiiblya.” Hataa ukhalaka wiira nyuuva nnosoma naala manannaala awula nimananna makhwaawe, otheene cihu ninthoonyera wiira ninawoona ukhalana ifayita ikhweeli nakumihaka ukati ni neekurumicaka wiira nisome Ibiiblya.—Isaa. 1:1-3.
17. Weettela ikhweeli maanaaya isiyani? (Nwehe Tiyaku 1:25.)
17 Usoma ikhweeli co mbiiblyani inkhala itthu yofayita, masi usoma paahi khuntosa. Nihaana ciicammo neekurumicaka weettela ikhweeli, awula weettela muukumini wihu citthu cineetthuceehu mbiiblyani. Napankaka commo phinhaleehu ukhitiri ukhala unitteelaka nrima. (Nsome Tiyaku 1:25.c) Masi ninhala ucuwela cani wiira khweeliini ninneettela citthu cineetthuceehu mbiiblyani? Munna mmoca hovaha nruku eeraka wiira nihaana niwehaka citthuni cinkhitiriihu weettela ni citthuni cihineetteleehu cinlamuliyeehu wiikurumica weettela. Apostolu Paulu heera co: “Hataa ukhalaka wiira nihothoonyera wiira ninnorwaa uhoolo, niikurumice wiira nihihiye weetta iyo iphirweeyo.”—Afili. 3:16.
18. Nlattuni nineekurumiceehu wiira ‘nihihiye weettela ikhweeli’?
18 Nyuuva nheemela wiira muupuwele mananna cimphwanyeenyu ifayita nlattu woohihiya weettela ikhweeli? Hiiva nihaana ukumi womaana. Uhiya commo, ninaakhitiri untteeliha nrima Yehova ni waatteeliha nrima mayamunneehu. (Miru. 27:11; 3 Jo. 4) Khweeliini, nihaana isariya yookhala inicivelaka cinene ni neettelaka ikhweeli.
NCIPO 144 Pensa nas Bênçãos de Jeová
a Ikwaha cinci, hiiva neeraka “ikhweeli” ninaaca citthu cinkupaliihu ni meettelweehu eekristau. Hataa ukhalaka wiira nikhanle Masaahiti a Yehova mphiyaaruni awula khalayi, unaahala ureera otheene cihu wuupuseriya citthu cinniiriha unicivela weettela ikhweeli. Wuupuwela nnyo citthunnyo unaahala unikavihera utepa ulakela uhihiya untteeliha nrima Yehova.
b Miruku 2:4 Weekurumicaka utotha nnya citthunnya khampa iparaata ni waahihiyeke utotha khampa mihakhu cofayita coovithya; 5 unaahala ucuwela isiyani ikhanle umoova Yehova ni unaahala ukhitiri ukhalana ucuwelaca wa Nluku. 6 Kontha Yehova phimphwanyiha ucuwelaca; wamalakuni wawe unankhumakhuma ucuwelaca ni ankhili.
c Tiyaku 1:25 Masi ule nosoma ratta-raatta nlamulo noohipahuwa nimphwanyiha utaphuwa, ni novaresesa nno nlamulonno, khankhala toko ule neewa ni naakuva uliyala itthu yiiwalyaawe, masi nokhala ntthu novarela nteko; ni uyo naahala ukhala ootteeliya niitthu impankaawe.