Nvarele nteko citthu cowumpiya wiira nwiitthucihe asaaneenyu makhalelo a Yehova

1. Isiyani ayari inaapheelelaaya asaanaaya?

AYARI, khweeliini nyuuva nnaapheela venci wiira asaaneenyu ancuwele Yehova ni anfente. Masi Yehova khanoonnya. Vano manannani nyuuva nnohaleenyu waakavihera asaaneenyu ucuwela wiira Yehova khanle ntthu riwo ni wiira unaakhitirya umpatthanana?—Tiya. 4:8.

2. Manannani ayari anhalaaya waakavihera asaanaaya ucuwela makhalelo aa Yehova?

² Mananna ofayita oopheela waakavihera asaaneenyu uncuwela Yehova ukhanle waasomana Ibiiblya. (2 Tim. 3:14-17) Masi Ibiiblya inawuuluma itthu ikiina inhala waakavihera asaaniinyu uncuwela Yehova. Nlivuruni yo Miruku, nnyari mmoca naamuupusera mwanawe wiira hiliyale makhalelo a Yehova anoonnya nhina citthu cowumpiya. (Miru. 3:19-21) Nttwee noone manannani ayari anhalaaya uvarela nteko citthu cowumpiya wiira yaakavihere asaanaaya utepa ucuwela makhalelo a Yehova.

MANANNA OOVARELA NTEKO CITTHU COWUMPIYA WIIRA NNWIITTHUCIHE ASAANEENYU

3. Manannani ayari anlamuliyaaya waakavihera asaanaaya wuncerera ucuwela waya makhalelo a Yehova?

³ Ibiiblya ineera wiira makhalelo oohoonnya a Nluku “anawooniya ukhuma ukati wumpiyaaya ituninya, kontha anawiithoonnyera ncitthuni cumpiye.” (Aroo. 1:20) Ikwaha cinci, ayari unawaacivela uviriha ukati anari nkhayi naasaanaaya nipuro nooreeraca. Uyo ukatyuuyo, anawaahimerya mananna cinvaranacaaya makhalelo a Yehova ni citthu cumpalyaawe. Nttwee noone vano mananna ayari anlamuliyaaya untakiha Yesu.

4. Manannani Yesu waavarenlyaawe nteko citthu cowumpiya wiira awiitthucihe attharyaawe? (Nwehe Luka 12:24, 27-30.)

⁴ Moone mananna Yesu aavarenlyaawe nteko citthu cowumpiya wiira awiitthucihe attharyaawe. Ikwaha imoca, uyo ahowiirela wiira yaaweheehe anakhuku ni ithutu co mmattani. (Nsome Luka 12:24, 27-30.b) Yesu pooti wanromolaawe mwannama nkiina awula mwiiri nkiina, masi uyo aaromonle ithutu ni anakhuku, kontha attharyaawe yancuwela saana nnyo citthunnyo. Atthunaka uyo ukatyuuyo attharyaawe yaanaawoona anakhuku yavavaka ni yaanawoona ithutu nipuro naaryaaya. Unaakhitirya umuupuwela Yesu athoonyaka nnyo citthunyo ukati woolumaawe. Ni isiyani Yesu yaapankilyaawe uromola wawe ayo matakiherwaayo? Uyo ahowiitthuciha itthu yofayita nhina uvaha ni unamaana waathumwanihu o wiirimu. Yehova naahala waavaha iyoolya ni waawariha aswalyaawe ookhuluvelya, khampa cipankilyaawe naanakhuku ni ithutu co mmattani.

5. Citthuni cowumpiya ayari anlamuliyaaya uvarela nteko wiira awiitthucihe asaanaaya makhalelo a Yehova?

⁵ Ayari, mwapheelaka uwiitthuciha asaaneenyu, manannani unohaleenyu untakiha Yesu? Pooti woopela mwaha itthu imoca inoocivelani nhina citthu cowumpiya, atthuna mwannama awula mwiri. Woopanka iyo nhimye mananna inooniheraaya ikhalelo ya Yehova iyo itthwiiyo. Pooti unkoha mwaninyu mwannamani awula mwirini untepa uncivela. Moopelaka mwaha itthu imoca inoncivela, khunhala unrikela wiiweeha ukati nnohaleenyu unhimerya mananna iyo itthwiiyo inooniheraaya makhalelo a Yehova.

6. Isiyani nineetthucereehu ntakihero na anumwaane Christopher?

⁶ Niireke wiira ayari ahaana yavirihaka ukati mwinci yaavyaavyaka uncuwela mwannama awula mwiri ahinawuulumana asaanaaya wiira awiitthucihe makhalelo a Yehova? Mena. Yesu khaakhanle ahimyacaka citthu cinci, toko anakhuku anlya cani ni ithutu cinonnuwa cani. Khweeliini, asaaneenyu pooti upheela wiitthuca nnyo citthunnyo nhina citthu cumpilyaawe Yehova. Masi ikwaha cinci, waahimerya awula waakoha ikwaha imoca pahi unaatosa wiira yiiweehe itthu nnopheeleenyu uwiitthuciha. Muuna mmoca neehaniya Christopher nawuupuwela ukati waaryaawe mwanhima. Uyo heera: “Amaama yaanawoopela mwaha citthu coohirikarika wiira mi ni asinyeenyaaka nitepe uvaha ifayita citthu cowumpiya. Wootakihera, naviraka nipuro niryaaya mwaako, ayo yaneera: ‘Mooneke mananna cunnuwilyaaya nnya myaakonnya; nnyo cikhanle comaana! Yehova ciicammo khanle omaana, kannokupali?’ Awula narwaaka upahari ayo yeera: ‘Mooneke ikuru irinaaya ala mawimpyaala! Ikhanle itthu yootikhiniha mananna Yehova khanlyaawe Nakuru.’” Christopher heera: “Citthu ayo yoolumaaya caari coohirikarika, masi canniiriha wuupuwela.”

7. Manannani nnohaleenyu uwiitthuciha asaaneenyu utikhinaca citthu cowumpiya?

⁷ Ukati asaaneenyu unviraaya yoonuwaka, nyuuva pooti uwiitthuciha wiira aweheehe citthu cowumpiya mwaaneennyaaya ni yiitthuce ikhalelo ya Yehova. Wootakihera, nyuuva pooti uthanla itthu umoca nhina citthu cowumpiya ni waakoha asaaneenyu co: “Ila itthwiila inwiitthuciha isiyani nhina makhalelo a Yehova?” Nyuuva pooti wuutikhinihani ni wuutteelani nrima mweewaka itthu mwaninyu inoopuwelaawe.—Mat. 21:16.

UKATINI NYUUVA NNOLAMULIYEENYU UVARELA NTEKO CITTHU COWUMPIYA WIIRA NWIITTHUCIHE ASAANEENYU?

8. Isiyani ayari asarayeli yaapankaaya ukati weettakacaaya mparapaarani

⁸ Ayari asarayeli yahaana yawiitthucihaka asaanaaya malamulo a Yehova ukati weettakacaaya “mparapaarani”. (Deut. 11:19) Ilapo yo Isarayeli cahaavo iparapaara cinci ni khawaarika waaphwannya asinnama ni ithutu. Ukati waaviraaya yapankaka ikwaha naamucyaaya, ayo yanwiitthuciha asaanaaya citthu cumpilyaawe Yehova. Nyuuva ayari ciicammo pooti uwiitthuciha asaaneenyu ukati nneettakaceenyu nvarelaka nteko citthu umpilyaawe Yehova. Moone citthu ayari akhwaawe cimpankaaya.

9. Ntakihero na Punitha ni na Katya ninwiitthucihani isiyani?

⁹ Ayari amoca aneehaniya Punitha, ankhala isittatti yuulupale yo Índia, aneera: “Amuciihu akiina ankhala waaliteeya. Narwaaka uwootola, ninaavarela nteko uyo ukatyuuyo wiira niwiitthucihe asaaneehu citthu comaana cumpilyaawe Yehova. Mi kinaakhitiri woona wiira asaanaaka anaatepa uvaha ifayita citthu cumpilyaawe Yehova yakhalaka uttayi nuusittatti yuulupale unkhalaaya atthu enci.” Unaarikarika anamwane uliyala ukati unvirihaaya anari nasithumwanaya mapuro oreeraca wincivile citthu cumpilyaawe Yehova. Katya, anuunwiihu o Moldávia aneera: “Citthu cihinliyalaaka ikhumelo inamwannyaaka ukhanle ukati kaavirihaaka kinari naasithumwanaka uttayi nuusittatti. Mi kinawaasukhuru asithumwanaka nlattu wookiitthuciha ikhumelo kaaryaaka mwanhima. Ayo ahokiitthuciha uweheeha citthu cumpilyaawe Yehova ni ukhitiri uncuwela saana nlattu wo citthu cumpilyaawe.”

10. Isiyani ayari inlamuliyaaya upanka wakhalaka wiira unawaarikela ukuma nsittatti? (Nwehe ikwaaturu “Ikaruma cinhala waakavihera ayari.”)

¹⁰ Vano wakhalaka wiira nyuuva ni amuciinyu unawuurikelani upanka ikwaha yuulupale? Munna mmoca nokhala u Índia neehaniya Amol, heera: “Nipuro kinkhalaaka, nihaana nivaraka nteko iwoora cinci, ni ukhuma nsittatti wiira nipanke ikwaha yuulupale unaarika. Uhookhalaru commo, hi pooti woona citthu cumpilyaawe Yehova ni wuuluma makhalelwaawe ninari uparki awula uculu iprediyu.” Atthunaka, ncoko unkhaleenyu nihaavo nipuro nnolamuliyeenyu umoonihera mwaninyu citthu cowumpiya. (Isaa. 104:24) Atthunaka nnaahala uphwanya inuni, asunku, miri ni citthu cikhwaawe. Karina, o Alemanha, heera: “Amaama cinawaacivela iflore ni ukati waaryaaka mwanhima ikwaha cotheene naarweehu weettakaca, ayo yankooniheraka iflore caacivela.” Nyuuva ayari pooti uvarela nteko ividiyu awula irevista co mumphwinkoni cinooluma citthu cowumpiya wiira nwiitthucihe asaaneenyu. Hataa nyuuva nkhalaka vayi, pooti waakavihera asaaneenyu uweheeha citthu cumpilyaawe Yehova. Nttwee noone vano makhalelo a Yehova anlamuliyeenyu uwiitthuciha asaaneenyu ukati anweheehaaya citthu cumpilyaawe.

“MAKHALELO AHINOONNYA” A YEHOVA ‘ANAWIITHOONYIHERA’

11. Isiyani ayari anlamuliyaaya upanka wiira yaakavihere asaanaaya ucuwelela mananna Yehova cinnithoonyiheraawe nifento?

¹¹ Wiira mwaakavihere asaaneenyu ucuweleeha nifento na Yehova, nyuuva pooti uwoonihera asinnama mananna cinaawaceraaya asaanaaya. (Mat. 23:37) Nyuuva ciicammo, pooti uwoonihera citthu coovirikana Yehova cumpilyaawe wiira anitteelihe nrima. Karina romoliye, heera: “Ukati waakhumaaka naamaama nirwaaka weettakaca, ayo yankiirela neemele wiira niweheehe mananna iflore caaryaaya cooreera cinene, ni woona mananna citthu cooreera cinooniheraaya unifenta wawe Yehova Nluku. Mpaka ilelo, miiva kinaweemela uweheeha iflore coovirikana ni cokore cinci. Iyo inaakipankiha wuupuwela mananna Yehova cinnifentaawe.”

12. Manannani ayari anlamuliyaaya waakavihera asaanaaya woona wiira Yehova khanle namacuwelaca? (Nwehe Isaalimu 139:14.) (Nwehe ciicammo ilatarato.)

¹² Mwaakavihere asaaneenyu woona mananna Yehova cikhanlyaawe namacuwelaca. Yehova khanle namacuwelaca unipwaha hiiva. (Aroo. 11:33) Wootakihera, nyuuva pooti waahimerya mananna maaci cineeraaya woowela nculu, yarwaaka ukhala mahutte ni mananna ayo mahuttyaayo cineetaaya sana-saana yarwaaka mapuro makhwaawe. (Jó 38:36, 37) Nyuuva ciicammo, pooti waahimerya mananna Yehova cipankilyaawe saana irutthwiihu. (Nsome Isaalimu 139:14.c) Moone itthu yaapankilyaawe nnyari mmoca neehaniya Vladimir. Uyo heera: “Uhaavo nkwaha mmoca mwanihu waamorannyaawe ipaasikeeri nuwiirakaliha. Uvira waya mahuku vakaani, uyo ahovona. Mi naamwaaraka nahonhimerya wiira Yehova umpile irutthwiihu nimananna inkhitiryaaya wiivoniha veekha. Hi nahonhimerya wiira iyo itthwiiyo khinkumelela nlattu wo citthu apinaatamu cimpankaaya. Wootakihera, ikaaro khineelokihaca veekha yaapankaka asitente. Iyo yaahonkavihera mwanihu ucuweleeha ucuwelaca wa Yehova ni mananna umpilyaawe ukumi.”

13. Manannani ayari anhalaaya waakavihera asaanaaya ucuwelela mananna Yehova cikhanlyaawe nakuru? (Nwehe Isaiya 40:26.)

¹³ Nhina Isaiya 40:26, (Nsomed) Yehova naanilattula wiira niwehe wiirimu ni nuupuwele ikuru yootikhiniha Yehova rinaawe inonkhitiriha weesa khula itthu nipuro naya. Nyuuva ciicammo pooti waasovenriha asaaneenyu wiira awehe wiirimu ni akumihe ukati wiira yuupuwele itthu inoonaaya. Moone itthu anuunwiihu amoca o Taiwan, aneehaniya Tingting, anawuupuwela ukati waaryaaya mwaana. Ayo aheera: “Ikwaha imoca, amaama yahokikusa wiira neettakaca utakhwani ni naahala urupa wonwo. Ukhala wiira kaari uttayi niiluusu coosittatti, kaahokhitiri woona itthonttwa uhiyu. Uyo waari ukati waakhanyererihiyaaka upanka citthu coohiloka naatthu yaasomanaaka ucikolani ni mi akaacuwela wakhala wiira kanhala uswalela Yehova sana-saana. Amaama yaahovarela nteko ule ukatyuule wiira akikavihere wuupuwela ikuru cotheene cirinaawe Yehova varenlyaawe nteko wiira apanke itthonttwa cotheene, ni yahokupusera wiira uyo ciicammo, naahala uvarela nteko nnyo ikurunyo wiira akikavihere uvilela masakha kaarinaaka. Ile ikwaheele, woona waka citthu cowumpiya, mi kaaturuwile kinalakenlyeene ulipihaca upatthannyaaka ni Yehova ni unswalela mpaka.”

14. Manannani ayari cinlamuliyaaya uvarela nteko citthu cowumpiya wiira yaakavihere asaanaaya woona wiira Yehova khanle Nluku ootteeliya?

¹⁴ Citthu cumpilyaawe Yehova cinawoonihera wiira uyo khanle Nluku ootteeliya ni unoncivela unoona nitteeliyaka ni nithyaaka. Masiyentista enci ahoonenela wiira asinnama unawaacivela uthweela, toko ihopa ni ciicammo inuni. (Jó 40:20) Nyuuva nhopaca umoona mwaaninyu unanttenle nrima anweheehaka mwannama athweelaka? Atthunaka uyo naamoona paakha athweelihaka boola mwankaani awula asaana o mwalapwa yalumaka nnyaru nankhunanaya. Ikwaha ikhwaawe nnohaleenyu umoona mwaninyu athyaaka nlattu wo wowoona nnyo citthunnyo, mmuupusere wiira Yehova kanle Nluku ootteeliya.—1 Tim. 1:11.

NTIKHINACE CITTHU CUMPILYAAWE YEHOVA WAMOCA NAAMUCIINYU

15. Isiyani inhala waakavihera ayari ucuwela itthu inoopuwelaaya asaanaaya? (Nwehe Miruku 20:5.) (Nwehe ciicammo ilatarato.)

¹⁵ Ikwaha cikhwaawe, ayari pooti waarikela uwoopana mwaha asaanaaya. Atthunaka ayo ahaana yaavyaka ukati wiira ahimyace itthu inoopuwelaaya. (Nsome Miruku 20:5.e) Ayari akiina, ahoonenela wiira waakusa asaanaaya nipuro nooreraca toko utakhwani, pooti waakavihera. Kontha isiyani? Kontha unkhala ukati ayari ni ciicammo asaanaya ukhalaaya ootteeliya woohuupuwela citthu coohiloka. Nnyari mmoca o Taiwan, neehaniya Masahiko heera co: “kavirihaka ukati naamwaaraka wamoca ni asaanaaka nirwaaka weettakaca mapuro oreera toko mmamyako awula upahari, ikwaha cinci anaakhala saana, phimaana khunrika uwoopana mwaha ni ucuwela itthu inuupuwelaaya.” Katya, romoliye heera: “Ikwaha cinci katuruwaka ucikola, amaama yankikusaka uparki yaatamananneehu. Waakhala ukati waakitteela nrima ni khawaakirikela wahimerya citthu cakikhumelela ucikola awula citthu caakikhaliha ni iwasiwaasi.”

16. Manannani amuci unhalaaya uvarela nteko citthu cumpilyaawe Yehova wiira athweele ni akhale saana?

¹⁶ Amuci yakumihaka ukati wiira atikhinace citthu cowumpiya, otheene anaakhala saana ni unawaacivela. Iyo inawaalipiha ni inaawaataaniha. Toko Ibiiblya cineera, “uhaavo ukati wootya” ni “uhaavo ukati wootuphatupha.” (Ekles. 3:1, 4, niwehero.) Yehova hompa mapuro ooreeraca waatuninyani wiira nitthawe, nirampele, nithweele ni nipanke citthu cinnicivela. Amuci enci unawaacivela uviriha ukati nkhayi mmaaliteeya, mmamyaakoni ni upahari. Asaana akiina unawaacivela utthawa tthawa, uthweela uparki ni uwoona asinnama awula urampela mmoolokoni, muntthiyani awula mpahari. Uhaavo ukati mwinci woopheela woona mapuro oreera ni citthu cinci Yehova umpilyaawe!

17. Kontha isiyani ayari anlamuliyaaya waakavihera asaanaaya utikhina ni uvarela nteko citthu umpilyaawe Yehova?

¹⁷ Upeephoni, ayari ni asaana anaahala uvarela nteko citthu umpilyaawe Yehova ni mananna yaaryaaya ahinavarela. Nwo khaninhala uwoova asinnama ni ayo khanhala unoova. (Isai. 11:6-9) Ninaahala ukhalana ukati wotheene wiira nitikhinace ni nilawe citthu umpilyaawe Yehova. (Isaa. 22:26) Masi, ikhanle itthu yofayita cinene ayari waakurumica asaanaaya utikhinaca cowumpiya ukhuma nenna co. Woovarela nteko citthu cowumpiya wiira awiitthucihe asaanaaya ucuwelaca wa Yehova, atthunaka ayo anaahala unrumeleliha mwene Davidi enre co: “Oo Yehova, miteko caa khacinlikananiya.”—Isaa. 86:8.