“Mwafentanaka, atthu otheene anaahala ucuwela wiira nyuuva nkhale attharyaaka”

1. Isiyani inoonaaya atthu enci ampaceriha woona mikutthaano? (Nwehe ciicammo ilatarato.)

NWUUPUWELE anamathelana ampaceriha woona mikutthaano usalau yo Umwene. Ayo anaakhala ootikhinihiya nlattu wo mananna yaakheleliyaaya ni anawoona ufentaniya wanlokoni. Yaturuwelaka uwannyaya, athiyanaayo anaawiirela awannyaya co: “Nnaacuwela, Masaahiti a Yehova akhanle atthu ooreera nrima.”

2. Nlattuni atthu akiina ahiilyaaya unswalela Yehova?

² Nifento nirivo nhina apoovu a Yehova khweeliini nikhanle nomaana. Masi Masaahiti a Yehova akhanle atthu oopahuwa. (1 Jo. 1:8) Ukati ninaacuweleehu saana mayamunna o wanlokoni, khunhala unirikela woona citthu cinvonyaaya. (Aroo. 3:23) Wooripiha nrima, atthu akiina anaahiya upahuwa wo mayamunna waahiihaka unswalela Yehova.

3. Isiyani innithoonya wiira nikhanle atthari a Kristu eekhweeli? (Nwehe Joau 13:34, 35.)

³ Nwehe-tho murwaaya ula mwahoola. (Nsome Joau 13:34, 35.b) Isiyani innithoonya wiira nikhanle atthari a Kristu eekhweeli? Ukhanle ufentana, kahi uhivonya. Nyuuva nhokhiri woona wiira Yesu khenre: “Mwafentanaka, nyuuva nnahala ucuwela wiira nkhanle attharyaaka”? Masi uyo enre: “Mwafentanaka, atthu otheene anaahala ucuwela wiira nyuuva nkhanle attharyaaka.” Naayo manannaayo, Yesu aahimya wiira khaanakhala attharyaawe paahi yaahala ucuwela wiira wanlokoni nihaavo nifento neekhweeli. Atthu ahikhanle o wanlokoni yanhala ukhitiri woona iyo itthwiiyo.

4. Isiyani atthunaka atthu akiina aneekohaaya nhina ukhala nkristau eekhweeli?

⁴ Ale ahikhanle Masaahiti a Yehova atthunaka anawiikoha co: ‘Manannani nifento ninooniheraaya wiira ntthuuyo khanle ntthari a Yesu? Manannani Yesu aawoonihenryaawe nifento maapostolu? Ni manannani ilelo ninhaleehu ukhitiri untakiha Yesu?’ Masaahiti a Yehova ahaana yoopuwelaka ayo makohwaayo. Napankaka commo, khunhala unirikela uthonyiherana nifento, venci-venci napheelaka uvilela upahuwa waakhwiihu.—Efesu 5:2.

KONTHA ISIYANI WANEEREEHU WIIRA NIFENTO NINANHIMYA NTTHARI A YESU EEKHWEELI?

5. Isiyani anhimyaaya moolumo a Yesu nhina Joau 15:12, 13.

⁵ Yesu aheera wiira attharyaawe yanhala ufentana nimananna omaana (Nsome Joau 15:12, 13.c) Moone nrumo Yesu aavahilyaawe: “Nfentane, khampa miiva cufentalyaakani.” Iyo maanaaya wiira cani? Maanaaya wiira Yesu ahaahimerya atthariyaawe wiira yaafente akhunanaya uvikana cineefentaaya. Ayo yahaana yakhalaka owitthenkaceene ni mpaka waamini ukhwa wiira awoopole akhwaaya.d

6. Manannani nuulumo na Nluku ninooniheraaya wiira nifento ikhanle itthu yofayita?

⁶ Ibiiblya ineetthuciha wiira nifento nikhanle nofayita cinene. Atthu enci cinawaacivela nnya iveerusunnya: “Nluku khanle nifento.” (1 Jo. 4:8) “Unfente nkhunana toko cineefenta.” (Mat. 22:39) “Nifento ninaakhuneela matampi menci.” (1 Pet. 4:8) “Nifento khanimmala.” (1 Akor. 13:8) Nnyo iveerusunnyo ni cikhwaawe cinawoonihera wiira ikhanle itthu yofayita cinene woonihera iyo ikhalelweeyo.

7. Kontha isiyani Sotwani khaahala ukhitiri uwiitthuciha atthu ufentana ni uwaataaniha?

⁷ Atthu enci anawiikoha co: ‘Masi unkhitirya cani ucuwelela ittiini yeekhweeli? Ittiini cotheene cineera wiira cineetthuciha ikhweeli, masi cineetthuciha citthu coovirikana cimuulumaka Nluku.’ Sotwani nawiiriha ukhumelela ittiini cinci coohikhweeli. Nlattu wo iyo, atthu khancuwela yootthara. Masi Sotwani khaahala ukhitiri waathukumaniha atthu oovirikana ankhala ilapo coovirikana wiira aapankihe amuci o ntuninyani motheene anfentana. Yehova paahi phinkhitiri upanka iyo. Ni khintikiniha, kontha nifento neekhweeli ninweela wa Yehova—paahi ale arina nnepa wowarya ni arina ucaalihiya wa Yehova, phinkhalana nifento neekhweeli. (1 Jo. 4:7) Khuntikhiniha Yesu wenryaawe wiira nifento ninawaahimya phaapani akhanle makristau eekhweeli.

8-9. Manannani atthu enci cineeconaaya yoonaka nifento ninthonyiheranaaya Masaahiti a Yehova?

⁸ Khampa Yesu caahimilyaawe, atthu enci ilelo anaakhitiri waacuwelela makristau eekhweeli nlattu wo nifento anooniheranaaya. Wootakihera, munna mmoca neehaniya Ian nawuupuwela itthu yanvare nrima ikwaha yoopacera waarweelyaawe ukonkereesuni. Iyo ikonkereeswiiyo yaapankiye nipuro yaattamananne uwannyawe ni nno naari nipuro nimocaaru onnyaawe attikhiyaka mphira myeeri vakaani uttuli. Uyo heera: “Makhalelwaayo yaari ovirikana. Masaahiti a Yehova yaari atthu ohisima, yanwara saana ni asaanaaya yaari owiiwanannya. Uhiya cotheene nnyo, ayo yaanoonnya wiira yahaana nnema wanrimani waya—ni mi kampheela ukhalana nno nnemanno. Akinoopuwela hataa itthu nhina mwaha caataphuleliye, masi wiiwanana wo Masahiti a Yehova uhohala mmuru waka.”e Itthu yonnyaawe Ian inaavaranaca ni nifento neekhweeli ninthonyiheraneehu. Ni naafentaka mayamunna ni asinuunwiihu, ninawaawacera niihisima ni unamaana.

⁹ Munna mmoca neehaniya John yaahonkhumela itthu imocaaru ukati waapacenryaawe woona mikutthaano usalau yo Umwene. Uyo heera: “Mi kahotikhinaca wiiwanana . . . waatthu otheene—yaakhala khampa atthu owaarya. Nifento naya neekhweeli nahokiiriha wuupuwela wiira kihophwanya ittiini yeekhweeli.”f Nnyo ihantisinyo ni cikhwaawe cinawoonihera wiira aswali a Yehova akhanle makristau eekhweeli.

10. Ukatini hiiva ninlamuliyeehu woonihera wiira ninawaafenta mayamunna? (Nwehe ciicammo niwehero.)

¹⁰ Toko noonileehu wuupaceroni ula mwahoola, wanlokoni khaavo ntthu oohipahuwa. Ikwaha cikhwaawe mayamunneehu anaahala wuuluma ni upanka citthu cinhala uninyoonyiha.g (Tiya. 3:2) Yakhumelelaka iyo, pooti wanwoonihereehu nifento nhina mananna ninhaleehu uwuulumana. Itthu inhala wuukaviherani upanka iyo ukhanle usoma ntakihero na Yesu.—Joau 13:15.

MANANNANI YESU CAATHOONYIHENRYAAWE WIIRA AANAWAAFENTA MAAPOSTOLU?

11. Ikhaleloni yootakhala yoonihenryaaya mapostolu Tiyaku ni Joau? (Nwehe ciicammo ilatarato.)

¹¹ Yesu khaaweherera wiira attharyaawe akhale atthu ohipahuwa. Uhiya commo, Yesu aanawaakavihera wiira akhitiri utthema upahuwa waya ni answalele Yehova toko cimpheelaawe. Ikwaha imoca, maapostolu meeli Tiyaku ni Joau, yahaalepela anumwanaya wiira amuulumane Yesu ni amwiirele wiira mwanaya mmoca akhale moono wonlopwana ni nkiinooyo akhale moono wonthiyana mumweneni. (Mat. 20:20, 21) Itthu yaapankilyaaya Tiyaku ni Joau yoonihenre wiicoona ni ayo yaapheela wiira avahiye ifayita cinene waapwaha akhunanaya.—Miru. 16:18.

12. Niireke Tiyaku ni Joau paahi phaathoonyihenre ikhalelo yoohiloka? Ntaphulele.

¹² Tiyaku ni Joau khayaari veekha yoonihenre makhalelo oohiloka ule ukatyuule. Moone itthu yaapankilyaaya mapostolu akiinaayo ucuwela waya: “Maapostolu 10 akiinaayo khayaacivenle itthu yaapankilyaaya eelyaayo.” (Mat. 20:24) Unaakhitirya wuupuwela mananna caanyakulihannyaaya ayo maapostolwaayo. Atthunaka ayo yahooluma co: “Nneeconaca ukhala apani wiira nlepelace wonkoma nipuro nofayita muumweneni? Nyuuvaca khanvaracile nteko veekha ni Yesu. Ni hi unaaniphwanela uttitthimihiya!” Hataa ikhumelelaka isiyani, ule ukatyuule maapostolu yaholiyala ifayita yoothoonyiherana nifento ni unamaana.

13. Manannani Yesu caavilenlyaawe upahuwa wo maapostolu? (Nwehe Matewus 20:25-28.)

¹³ Manannani Yesu caavilenlyaawe iyo itthwiiyo? Uyo khaawooceele. Uyo khenre wiira anhala uwaavya mapostolu akiina, atthu oreera nrima, atthu owiiyeviha ni oofentana. Uhiya commo, Yesu ahowoopana mwaha namanle, kontha ancuwela wiira maapostolu yampheela upanka itthu yomaana. (Nsome Matewus 20:25-28.h) Iyo khayaari ikwaha yoopacera ni yoomalela maapostolu yaanyakulihannyaaya yapheelaka umoona pani rina ifayita venci. Waahookhalaru commo, Yesu ahowoonihera unamaana aawaaceraka saana.—Mark. 9:34; Luka 22:24.

14. Mapostolu yoonuwenle ikhapilani?

¹⁴ Khweeliini, Yesu ancuwela ikhapila caya ni mananna maapostolu yoonuwilyaaya. (Joau 2:24, 25) Ayo yoonuwenle mapuro ahooleli ottiini yeetthucihaaya wiira ntthu nokhalana ifayita alemelihiyaka ncoko unkhalaawe. (Mat. 23:6; moone ciicammo ividiyu Primeiros assentos na sinagoga, niwehero no Matewus 23:6 nhina Ibiiblya de Estudo.) Aholeli ottiini ya ayuuta ciicammo yeecona ukhalana ifayita waapwaha akhwaaya.i (Luka 18:9-12) Yesu ancuwela wiira nnyo citthunyo canhala uwiiriha attharyaawe upheela ulemelihiya waapwaha akhwaaya. (Miru. 19:11) Yesu ancuwela wiira attharyaawe yanhala upanka citthu coohiloka ni anaavilela. Uyo ancuwela wiira attharyaawe yahaana nrima womaana. Phimaana, ankumiha ukati wiira awiitthucihe ukhala atthu owiiyeviha ni wooniherana nifento, uhiya upheela ukhala ofayita waapwaha akhwaaya.

NINHALA UNTAKIHA CANI YESU?

15. Isiyani nineetthucereehu itthu yankhumelenle Tiyaku ni Joau?

¹⁵ Hi pooti wiitthucera itthu yankhumelenle Tiyaku ni Joau. Ulepela wiira avahiye mapuro moolupale muumweneni wa Nluku, yaari itthu yootakhala. Maapostolu akinaayo ciicammo yahopanka itthu yoonanara, kontha ayo yaahohiya wiira mwahooyo waakawanihe. Masi Yesu ahaawacera saana ni ahaafenta maapostolu otheene. Isiyani ineetthuceehu? Hataa akhunanihu yanitthekelaka, itthu yofayita cinene ukhanle wuupuwela mananna hiiva ninhaleehu waakhula. Isiyani inhala unikavihera waakhula ratta? Munneehu anitthekelaka, pooti waneekoheehu co: ‘Kontha isiyani itthu ikipankilyaawe ihokinyoonyiha venci? Kiireke iyo itthwiiyo inoonihera wiira miiva kihaana kirehereryaka itthu muukumini waka? Kiireke wiira uyo munnooyo ahaavo masakha anaananaawe? Hataa miiva kikhalanaka isariya yoopheela unyoonyiya, kiireke pooti wammooniheraaka nifento wiira kinlevelele?’ Naawaceraka ratta akhunanihu, ninawoonihera wiira nikhanle atthari eekhweeli a Kristu.

16. Isiyani-tho inniitthucihaaya ntakihero na Yesu?

¹⁶ Ntakihero na Yesu ciicammo ninaanoonihera ifayita irinaaya umananiha uwiiweeha mayamunna. (Miru. 20:5) Khweeliini, Yesu aanawoona mirima. Hiiva khaninkhitiri woona. Masi pooti wankhaleehu atthu oopisa nrima, nivilelaka upahuwa wo mayamunneehu. (Efesu 4:1, 2; 1 Pet. 3:8) Itthu inhala unikavihera upanka iyo ukhanle waacuwela saana mayamunneehu.

17. Manannani mootoli osirikwiitu caaphwanyenryaawe ifayitas waavya uncuwela munna o wanlokoni?

¹⁷ Mootoli osirikwiitu mmoca novara nteko u África Oriental naamuupuwela munna mmoca aakhala khampa oorika waatananiya. Uyo neera: “Uhiya unhuluwa munnooyo, mi kaholakela uncuwela saana.” Nlattu woopanka commo, uyo ahoonelela wiira itthu yaamwiiriha munnooyo urika waatananiya yaari mananna coonuwihiyaawe. Ni iyo itthwiiyo phaamwiiriha ukhala toko khaawacera saana akhunanawe. Uyo mootoli osirikwiituuyo heera-tho co: “Ukati waacuwenlyaaka wiira uyo munnooyo waanonrikela venci urukunusa makhalelwaawe wiira aatanace saana naakhunanawe ni ukati waacuwenlyaaka marukunuso moolupale yaapankilyaawe, mi kahopacera untikhinaca. Mi nuuyo nahokhala apatthani omaana.” Ni khweeli, napankaka yotheene inkhitiriihu wiira naacuwele ratta mayamunneehu ni nicuwele mananna cineecoonaaya, khunhala unirika waafenta.

18. Makohoni ninlamuliyeehu wiipanka noonaka wiira munna mmoca honiveeha? (Nwehe Miruku 26:20.)

¹⁸ Ikwaha cikhwaawe, hiiva ninaahala woona wiira ninaapheela umuulumana munna niveehile wiira nimalihace mwahooyo. Masi nhinarwaa umuulumana, unaareera wiikoha co: ‘Kiireke wiira miiva kihocuwelela saana itthu ikhumelenle?’ (Miru. 18:13) ‘Kiireke wiira pankile imweeni?’ (Ekles. 7:20) ‘Kiireke wiira kihotoko upanka itthu yoolikana toko iyo?’ (Ekles. 7:21, 22) ‘Kamoopanaka mwaha uyo ntthuuyo, itthu inrwaaka umananiha umaliha, kiireke akinhala utepihaca?’ (Nsome Miruku 26:20.j) Mwakumihaka ukati wiira muupuwele ala makohwaala, unawoonannya wiira nnaahala wuupuwela upanka itthu yomaana, ukhala nanifento ni uliyala mwahooyo.

19. Isiyani nyuuva ilakenleenyu upanka?

¹⁹ Masaahiti a Yehova anawoonihera wiira akhanle atthari eekhweeli a Yesu, kontha anaafentana. Ni khula ntthu noonihera wiira khanle ntthari a Yesu aafentaka mayamunnaawe, unookhalaru wiira nikhanle oopahuwa. Napankaka commo, atthu akiina pooti woona wiira hiiva nikhanle atthu ampanka mphantte wottiini yeekhweeli ni ciicammo anaahala upheela unswalela Nlukwiihu, Yehova. Phimaana, niholakela uhihiyerera uthoonyera nifento ninnithoonya wiira nikhanle makristau eekhweeli.