MWAHA WOOSOMIYA 21
NCIPO 107 Yehova-Ntakihero noohipahuwa no nifento
Nnohala umphwanya cani ntthu oohala unthela awula wuuthelani?
“Tipani nohala ukhitiri umphwanya nthiyana ankhili? Nthiyana commo haana ifayita cinene uvikana mihakhu.”—MIRU. 31:10.
ITTHU INHALEEHU WIITTHUCA
Ninaahala woopela mwaha ikano cinhala unkavihera nkristau umphwanya ntthu oohala unthela. Ciicammo, ninaahala woona mananna mayamunna o wanlokoni cinlamuliyaaya waakavihera ale ahithenle ni ahitheliye ampheela uthela awula utheliya.
1-2. a) Isiyani makristau inlamuliyaaya wuupuwela ahinaaya wancera umoopana mwaha ntthu wiira anthele awula aathele? b) Weeriyaka ‘umoopana mwaha ntthu wiira muncuwele’ nhinaaya unthela awula wuuthelani inaaciya isiyani? (Nwehe “Nuulumo nootaphuleliya.”)
NYUUVA nnawuupuwela uthela awula utheliya? Hi ninaacuwela wiira hataa ntthu nhithelaka wala nhitheliyaka, uyo pooti ukhala ootteeliya. Hataa ukhalaka commo, ahaavo makristau menci, amiravo ni hataa oolupale cinene ampheela uthela awula utheliya. Masi, unawoonannya wiira nhinaaya wancera umoopana mwaha ntthu wiira munthele, nyuuva nhaana mwiitthenkacaka. Mananna owiitthenkaca akhanle ulipihaca upatthaniinyu ni Yehova, wiicuwela saana mwaaneeneenyu ni atthunaka usunka nsurukhu.a (1 Akor. 7:36) Mweetthenkacaka saana, nyuuva nnaahala ukhala itthoko yomaana ni ukhala wuutteelakani nrima naamwaarinyu awula naawannyu.
2 Masi, pooti ukhalaka wiira unawuurikani umphwanya ntthu oohala unthela awula wuuthelani. (Miru. 31:10) Ni hataa ukhalaka wiira nhokhitiri umphwanya ntthuuyo, nyuuva pooti wuurikani wancera umoopana mwaha wiira muncuwele saana ni wahoolo nthelanace.b Nhina ula mwahoola, ninaahala woona isiyani inhala waakavihera mayamunna ni mayanuunu umphwanya ntthu oohala unthela awula waathela. Ciicammo, ninaahala woona manannani mayamunna akiina wanlokoni cinhalaaya waakavihera ale ampheela uthela awula utheliya.
UMPHWANYA NTTHU OOHALA UNTHELA AWULA WUUTHELANI
3. Isiyani nkristau inlamuliyaawe wuupuwela wakhalaka wiira nomwaavya ntthu oohala unthela?
3 Nhinaaya wancera umoopana ntthu mwaha wiira munthele awula ootheleni, nyuuva nhaana mpaceraka ucuwela nthiyanani awula nlopwanani nompheeleenyu wiira munthele awula ootheleni. Mwahipankeke commo, nyuuva nnaahala unhaleela ni unviriiha nthiyana awula nlopwana omaana. Awula nnaahala uthelanaca nintthu hikhanle ule mwampheeleenyu. Hi ninaacuwela wiira khaninlamuliya wancera umoopana mwaha ntthu hinaaya upattisiya wiira wahoolo ninthele awula anithele. (1 Akor. 7:39) Masi ciicammo, kahi wiira khula ntthu oopattisiya nohaleenyu umoona naahala ureera ukhala amwaarinyu awula awannyu. Phimaana, mwiikohe co: ‘Isiyani impheelaaka upanka muukumini waka? Makhaleloni ofayita mi anwehereraaka wiira oonihere ule nohala ukhala amwaaraka ni awannyaka? Kiireke makhalelo anwehereraaka wiira ntthuuyo oonihere akhanle osariya?’
4. Isiyani mayamunna ni mayanuunu enci inlompakaaya?
4 Wakhala wiira nnopheela uthela awula utheliya, nyuuva khweeliini nhonlompa Yehova munhimeryaka iyo itthwiiyo. (Afili. 4:6) Ninaacuwela wiira Yehova khaneera wiira naahala uwaaveryani nthiyana awula nlopwana. Masi uyo naawacera itthu inniira ni nimpheeleehu. Uyo naahala wuukaviherani umphwanya ntthu oohala unthela awula wuuthelani. Phimaana, nhihiyerere unlompa Yehova munhimeryaka mananna cineecooneenyu ni citthu cimpheeleenyu. (Isaa. 62:8) Munlepele Yehova wiira ookavihereni uweherera ni oovaheni ucuwelaca. (Tiya. 1:5) Munna mmoca nthupa nokhala u Estados Unidos neehaniya Johnc hohimya itthu inlompakaawe. Uyo enre: “Mi kinanhimerya Yehova makhaleloni ampheelaaka wiira akhalane ntthu nohalaaka unthela. Mi kinanlepela wiira akikavihere umphwanya nthiyana omaana ni ciicammo wiira kikhalane makhalelo anhala ukikavihera ukhala ntheli omaana.” Nuunu nkiina nokhala u Sri Lanka neehaniya Tanya heera: “Ukati unontothaaka ntthu oohala ukithela, mi kinanlepela Yehova wiira akikavihere uhihiya umwiiwelela ni ukhala ukitteelaka nrima.” Hataa moonaka wiira unaavira ukati mwinci ni nanlelo khannaaya umphwanya ntthu oohala unthela awula wuuthelani, Yehova hokhuluveliha wiira khanhala uhiya wuuvahani citthu cinoothwaani, wuufentani ni wuuwacerani.—Isaa. 55:22.
5. Ukatini atthunaka makristau unhalaaya ukhitiri uncuwela ntthu nonfenta Yehova oohala unthela awula waathela? (1 Akorintu 15:58) (Nwehe ciicammo ilatarato.)
5 Ibiibiliya ineera wiira nihaana ‘niikurumicaka uvara cinene nteko wa Apwiiya.’ (Nsome 1 Akorintu 15:58.d) Mweekurumicaka uvara cinene nteko wa Yehova ni uviriha ukati nnari nimayamunna ni nimayanuunu, nyuuva nnaahala ukhalana apatthani omaana. Masi ciicammo, uyo unkhala ukati wowaacuwela mayamunna nthupa ni mayaNrokorihu nthupaampheela uvara cinene nteko wa Yehova toko nyuuva. Mweekurumicaka upanka inkhitiriinyu wiira muntteelihe nrima Yehova, unaahala wuutteelani nrima venci.
I Mwaahihiyerereke uvara nteko wa Yehova ni uviriha ukati mwinci nkhayi nimayamunna ovirikana, khweeliini nyuuva nnaahala waacuwela atthu akhwaawe ampheela utheliya awula uthela (Nwehe iparaagarafu 5)
6. Isiyani makristau ihinlamuliyaaya uliyala ukati wontotha ntthu wiira anthele awula aathele?
6 Masi, ratta! Nhihiyerere iyo itthwiiyo ikhalaka yofayita cinene muukumini winyu. (Afili. 1:10) Ntthu khamphwanya utteeliya nrima weekhweeli nlattu wnthupa awula nlattu woothela. Itthu innitteeliha nrima ukhanle ukhalana upatthani womaana ni Yehova. (Mat. 5:3) Nhinaaya uthela awula utheliya, nyuuva nnaakhalana ukati wompankela Yehova citthu cinci. (1 Akor. 7:32, 33) Phimaana, nvarele nteko saana ukatiinyu. Anuunwiihu amoca ankhala u Estados Unidos aneehaniya Jessica atheliye yahaleelaka vakaani upiiha myaakha 40. Ayo aheera: “Kihinaaya utheliya, mi kaheekurumica uvara cinene nteko woolalyeera. Upanka commo, wahokikavihera ukhala ukitteelaka nrima hataa kihimphwanyaka ntthu oohala ukithela.”
MUNWEHEEHE NTTHUUYO
7. Kontha isiyani unaareera upaca unweheeha ntthuuyo nhinaaya unhimerya wiira nnaaciveliya nuuyo? (Miruku 13:16)
7 Vano wakhalaka wiira nhomoona ntthu owuucivelani, niireke wiira nhaana nrwaaka umuulumana ni unhimerya wiira nnaaciveliya nuuyo? Ibiibiliya ineera wiira ntthu ankhili nawuupuwela hinaaya upanka itthu. (Nsome Miruku 13:16.e) Phimaana, unaareera upacera unweheeha ntthuuyo ni uweherera nhinaaya umoonihera wiira nnampheela. Munna mmoca neehaniya Andrew nokhala u Holanda heera: “Weeva pooti wancera uciveliya nintthu, masi woohipica, uyo ntthuuyo pooti uhuucivela-tho. Phimaana, wawehereraka unweheehaka ntthuuyo vakaani-vakaani, khunhala waakuvela wancera umoopana mwaha wiira wahoolo nthelanace.” Ciicammo, nyuuva mwanweheehaka ntthuuyo saana, pooti woonelela wiira uyo kahi phi ntthu nompheeleenyu wiira akhale amwaarinyu awula awannyu.
8. Nkristau nohala unweheeha cani ntthu noopuwelacaawe unthela? (Nwehe ciicammo ilatarato.)
8 Masi nnohala unweheeha cani ntthu uyova woohicuwelela? Nyuuva pooti unweheeha umikutthaanoni awula uyo ntthuuyo akhalaka nipuro nithukumanneenyu ni mayamunna awula mayanuunu wiira nthukathuke. Uyo unkhala ukati unlamuliyeenyu unweha ntthuuyo meettelwaawe, wakhala wiira haana upatthani woolipa ni Yehova ni makhalelwaawe. Mwiikohe co: ‘Asimpwanaawe phaapani? Myahani cinoopaawe akhalaka naasimpwanaawe?’ (Luka 6:45) ‘Mipika cawe ni mipika caka miiva cinaavirikana?’ Pooti uwuulumana mahumu o wanlokoni nawe uyo ntthuuyo awula pooti umuulumana nkristau nkiina ookhomaala noncuwela saana ntthuuyo. (Miru. 20:18) Ciicammo, pooti waalepela atthu akhwaawe anoncuwela wiira yuuhimeryeni meettelwaawe ntthuuyo. (Ruti 2:11) Ukati wonweheeha ntthuuyo, nhiliyale wiira khawaahala ureera untthara-tthara mapuro otheene anviraawe wiira moone citthu cotheene cimpankaawe. Mmoonihere ihisima ntthuuyo ni nhiliyale wiira khula ntthu haana isiiri cawe.
Nhinaaya unhimerya ntthuuyo wiira nyuuva nampheela, mpacere uweheeha saana, masi woohimonihera wiira nyuuva nnampheela (Nwehe iparaagarafu 7-8)
9. Nhinaaya unhimerya ntthuuyo wiira nnaaciveliya nuuyo, isiyani inlamuliyeenyu ucuweleeha?
9 Vano, nnohala ukhala munweheehaka ntthuuyo mpaka yaakhani? Awula, ukatini unlamuliyeenyu urwaa umuulumana ni unhimerya wiira nnaaciveliya nuuyo? Mwaakuvelaka urwaa umuulumana, khawaahala ureera, kontha nnohala woonihera wiira muntthu naakuvela upanka khula itthu inoopuwelaawe. (Miru. 29:20) Masi ciicammo, mwapicapicaka, vano ntthuuyo acuwelaka wiira nnaaciveliya nuuyo, nnohala woonihera wiira muntthu hincuwela ulakela itthu impheelaawe. (Ekles. 11:4) Wiira munhimerye ntthuuyo wiira nnaaciveliya nuuyo, nyuuva khannolamuliya uweherera ucuweleeha sana-saana wiira uyo phi ntthu nohaleenyu unthela awula nohala wuuthelani. Masi itthu yuulupale cinene ukhanle nyuuva wiitthenkaca ni ucuwela wiira uyo ntthuuyo haana makhalelo nnoweherereenyu wiira akhalane amwaarinyu awula awannyu.
10. Isiyani inlamuliyeenyu upanka wakhalaka wiira haavo ntthu nociveliya ninyuuva, masi nyuuva khoocivenleni uyo ntthuuyo?
10 Vano wakhalaka wiira haavo ntthu nomooneenyu wiira naaciveliya ninyuuva, isiyani inlamuliyeenyu upanka? Wakhala wiira nyuuva khannopheela uthelanaca nuuyo ntthuuyo, nhipanke nanka itthu inhala umoonihera wiira nnampheela. Khawaahala ureera umwiiriha ntthuuyo wuupuwela wiira nyuuva nnaaciveliya nuuyo, masi khweeliini nhipheelaka unthela awula utheliya nuuyo.—1 Akor. 10:24; Efesu 4:25.
11. Wakhalaka wiira nnopheela umwaaverya ntthu nthiyana awula nlopwana, isiyani inlamuliyeenyu wuupuwela?
11 Mapuro makiina, ntthu apheelaka uthela, asithumwaane awula asimucyaawe phinlamuliya umwaaverya nthiyana awula nlopwana. Ilapo cikiina, asimucyaawe ntthuuyo awula asimpwanaawe anaamwaavya nthiyana awula nlopwana ni anawaakumaniha ooyeeli wiira yoope mwaha ni yoone wakhala wiira anaaphwanelana. Mwalepeliyaka umwaaverya ntthu nthiyana awula nlopwana, mpacere wuupuwela nthiyanani awula nlopwanani nompheelaawe ule oolepenleni. Mwamphwanyaka ntthuuyo, mmananihe ucuwela meettelwaawe ni venci-venci, wakhala wiira haana upatthani woolipa ni Yehova. Itthu yofayita cinene ukhanle umphwanya ntthu rina upatthani womaana ni Yehova, kahi ntthu rina nsurukhu mwinci awula somale cinene. Masi ciicammo, nhiliyale wiira munna nhala uthelooyo ni nuunu nohala utheliyooyo phinlamuliya ulakela wakhala wiira naahala untthuna uyo ntthuuyo awula mena.—Akalas. 6:5.
WANCERA UMOOPANA MWAHA NTTHUUYO WIIRA MUNCUWELE
12. Nnohala unhimerya cani ntthu wiira nyuuva nnaaciveliya nuuyo?
12 Nnohala upacera cani unhimerya ntthu wiira nawuucivelani ni nnopheela wancera umuulumana wiira muncuwele ni wahoolo munthele awula ootheleni?f Nyuuva pooti unleehanana ntthuuyo wiira nnopheela umuulumana nipuro ninvira-vira atthu awula ntelefooneni. Waphiyaka ukati woomuulumana, munhimerye sana-saana itthu impheeleenyu. (1 Akor. 14:9) Ntthuuyo apheelaka ukati wiira oopuwele hinaaya uwaakhulani, ntthune unweherera. (Miru. 15:28) Ni ntthuuyo ookhottakani, nhinviruwele. Uyo haana isariya yonthanla ntthu nompheelaawe.
13. Isiyani inlamuliyeenyu upanka ntthu oohimeryakani wiira hociveliya ninyuuva? (Akolosu 4:6)
13 Vano ntthu awiirelakani wiira naaciveliya ninyuuva, isiyani inlamuliyeenyu upanka? Khweeliini, uyo ntthuuyo hoolipa nrima cinene wiira oophiyeereni ni oohimeryeni iyo itthwiiyo. Phimaana, mmwaakhule saana ni niihisima. (Nsome Akolosu 4:6.g) Wakhalaka wiira nyuuva nnopheela ukati wiira muupuwele nhinaaya umwaakhula, munhimerye. Masi nhivirihe mahuku menci nhinaaya umwaakhula. (Miru. 13:12) Wakhalaka wiira nyuuva khoocivenleni uyo ntthuuyo, munhimerye sana-saana woohinkhuwa-khuwa. Moone manannani munna mmoca neehaniya Hans, nokhala u Áustria, caamwaakhunlyaawe nuunu mmoca anhimeerale wiira aanaaciveliya nuuyo. Uyo heera: “Mi kahonhimerya woohinkhuwa-khuwa, masi niihisima. Mi akaapicile umwaakhula kontha akaapheela umwiiriha wuupuwela wiira kahotthuna. Hataa phimaana, mi ciicammo kaanawiikurumica wiira kihipanke nanka itthu yaahala umwiiriha wuupuwela wiira mi kanciveliya nuuyo.” Masi, wakhalaka wiira nyuuva ciicammo nnaaciveliya nuuyo ntthuuyo munhimerye. Ciicammo munhimerye mananna cimpheeleenyu wiira nkhalakhale ukati unhaleenyu uviriha ncuwelanaka. Citthu cinweherereenyu wiira ntthuuyo apanke pooti uvirikana ni citthu uyova cinwehereraawe wiira nyuuva mpanke, nlattu woovirikana mapuro khula ntthu oonuwenlyaawe ni nlattu wo citthu cikiina.
MANANNANI MAYAMUNNA ANLAMULIYAAYA WAAKAVIHERA ALE AHITHENLE NI AHITHELIYE?
14. Ninhala waakavihera cani ale ahinaaya uthela awula utheliya nhina citthu cinoolumeehu?
14 Ninhala waakavihera cani mayamunna ampheela uthela ni mayanuunu ampheela utheliya? Inanna imoca yowaakavihera ukhanle wiivaraca nhina citthu cinoolumeehu. (Efesu 4:29) Ninlamuliya wiikoha co: ‘Kinawuulumaka citthu coohiloka wiira kaathukane ale ampheela uthela? Kamoonaka munna nthupa ni Nrokorihu nthupayoopaka mwaha, kinawuupuwelaka wiira ayo anaacivelana?’ (1 Tim. 5:13) Ciicammo, hi khanimpheela wiira ale ahithenle wala ahitheliye yuupuwele wiira ahaana yathelaka awula utheliya wiira akhale saana. Munna Hans, romoliye nhina ula mwahoola, heera: “Mayamunna akiina anawiiraka co: ‘Munna, nyuuva nhoonuwa, vano nhinthelelani?’ Ayo moolumacerwaayo pooti uwiiriha ale ahinaaya uthela awula utheliya wuupuwela wiira ahaana yathelaka awula yatheliyaka.” Uhiya uwuulumela commo, phataari waavya mananna owaattottopela ayo mayamunnaayo!—1 Atesal. 5:11.
15. a) Nihinaaya unkavihera nkristau umphwanya ntthu oohala unthela, isiyani inlamuliyeehu wuupuwela? (Arooma 15:2) b) Isiyani yuulumiye nvidiyuni itepale wuucivelani? (Nwehe ciicammo ilatarato.)
15 Vano wakhalaka wiira haavo munna ni nuunu anwooneenyu wiira anaaphwanelana wiira athelane, isiyani inlamuliyeenyu upanka? Ibiibiliya ineera wiira nihaana niwaceraka citthu cinoopuwelaaya akhwiihu. (Nsome Arooma 15:2.h) Mayamunna ni mayanuunu enci khunaacivela waavyeriya ntthu oohala unthela awula waathela ni hi nihaana naahisimaka ni waahiya ulakela mwaaneennyaaya. (2 Atesal. 3:11) Khweeli ahaavo anlepela ukaviheriya umphwanya ntthu, masi hi khaninlamuliya wiikelakeliha wakhalaka wiira ntthuuyo khanilepenle umwaaverya nthiyana awula nlopwana.i (Miru. 3:27) Mayamunna ni mayanuunu akiina khunaacivela uwaaneliya ntthuuyo ni wiireliya wiira ula muncuweleke. Arokorihu amoca aneehaniya Lydia ankhala u Alemanha aheera: “Wapheelaka waakavihera atthu eeli wiira acuwelane ni atthunaka wahoolo athelane, pooti waalattula ooyeeli nkhayi niikhurupu yo mayamunna enci ni ayo anaahala ucuwelana.”
Ikhurupu imoca yo mayamunna, ale athupa awula nthupa ahaana iparakha yoncuwela ntthu (Nwehe iparaagarafu 15)
16. Isiyani mayamunna nthupa ni mayaNrokorihu nthupainlamuliyaaya wuupuwela?
16 Otheene cihu—athupa awula atthu oothela—hi pooti ukhala unitteelaka nrima! (Isaa. 128:1) Phimaana, wakhala wiira nyuuva nnopheela uthela masi nanlelo khannaaya umphwanya ntthu, nhihiye wiikurumica uvara nteko wa Yehova. Anuunu amoca ankhala u Macau aneehaniya Sin Yi aheera: “Noopuwelaka ukati unhaleehu ukhala upeephoni nkhayi naamwaarihu awula naawannyihu, ninawoona wiira ukati unkhaleehu nihinathela awula nihinatheliya ukhanle vakaani cinene. Phimaana, phataari uvarela nteko saana uyo ukatyuuyo.” Vano wakhalaka wiira nyuuva nhokhitiri umphwanya ntthu oohala unthela awula wuuthelani? Nhina mwaha unttharana nuula, ninaahala woona mananna omoopana mwaha ntthuuyo wiira muncuwele nhinaaya uthelana ni mananna cinhalaaya wuukaviherani ulakela upanka itthu yomaana.
NCIPO 137 Athiyana Oowaamini, Arokora MaKristau
a Mwapheelaka ucuwela wakhala wiira nheetthenkaca ni nholikana wiira nthele, nsome mwaha “Os Jovens Perguntam — estou preparado para me casar?” nsayitini jw.org.
b NUULUMO NOOTAPHULELIYA: Nhina ula mwahoola ni mwaha unttharana nuula, weeriyaka ucuwelana awula umoopana mwaha ntthu wiira muncuwele unaaciya ukati atthu eeli ampheela uthelana unvirihaaya yacuwelanaka wiira athelane. Uyo ukatyuuyo umpacera ooyeeli waya yahimeryanaka wiira anaacivelana ni ummalela yathelanaka awula yalakelaka uhithelana.
c Macina makhwaawe ahaakakhanihiya.
d 1 Akorintu 15:58 Phimaana asuulupalyaaka oofentiya, nkhale oolipa, oohittikhinyaa, ni ntepeke uvara cinene nteko wa Apwiiya, ncuwelaka wiira nteko mwinci unaavareleenyu Apwiiya khunakhala wo mahala
e Miruku 13:16 Ntthu ankhili nawuupuwela ooniheraka ucuwelaca, masi nlolo nawoonihera ulolwaawe.
f Mapuro makhwaawe, munnooyo phimpacera umphiyeera nuunuuyo ni unhimerya wiira naaciveliya nuuyo. Masi khinakhala itthu yoonanara nuunuuyo umphiyeera munna ni unhimerya iyo itthwiiyo. (Ruti 3:1-13) Mwapheela ucuwela-tho, nsome ula mwahoola: “Os Jovens Perguntam . . . Como contar-lhe tudo o que sinto por ele?”, nhina irevista Despertai! 22 yo Outubro yo 2004.
g Akolosu 4:6 Moolumweenyu ahaana ukati wotheene yakhalaka oocivela, oolukiya ni maakha, wiira ncuwele inanna yoohala umwaakhula khula ntthu
h Arooma 15:2 Khula ntthu ancivelihe nkhunanawe ampankelaka itthu yomaana, wiira anlipihe.
i Moone ividiyu Ayo anawiikurumica waamini, ni anaatthema—Athupa nhina jw.org.