Nyuuva nhaana waamini?

Wiira nintteelihe nrima Yehova, nihaana ukhala waamini. Masi, Ibiibiliya ineera wiira “waamini khunakhala waatthu otheene.” (2 Atesal. 3:2) Apostolu Paulu uhimya wawe ala moolumwaala, uyo aaca, ‘atthu ootakhala nrima’ awula ale yaamomolanihaca. Masi, itthu yuulumilyaawe aacaka waamini ciicammo unawaaca atthu akhwaawe. Ciicammo atthu akhwaawe khankupali wiira Nluku ompale citthu cotheene haawo. (Aroo. 1:20) Akhwaawe aneera wiira waamini itthu uhaana ukhala muulupale. Masi, iyo khintosa paahi wiira nintteelihe nrima Yehova, khweeliini, iyo inthoonyera wiira khunakhala waamini weekhweeli.

Hi nihaana ukupali wiira Yehova haavo ni uyo nawaacaaliha ale anoonihera umwaamini woolipa. (Mabere. 11:6) Waamini ikhanle ikhalelo ciicammo mpanka mphantte wonhokorokho woominepani. Wiira ikhalane nnepa woowarya, nihaana ulompa ninlepelaka Yehova wiira anivahe nnepaawe woowarya. (Luka 11:9, 10, 13) Inanna ikhwaawe yowaakhela nnepa woowarya wa Yehova ukhanle usoma nuulumo nawe Ibiibiliya. Ni ciicammo ikhanle itthu yofayita wuupuwelela itthu insomeehu ni weettela ile ineetthuceehu. Ayo manannaayo, hi pooti waakhela nnepa woowarya wa Yehova, unhala unikavihera ukhalana waamini unhala untteeliha nrima Yehova.