Ntakihe wiikurumica wa Yesu wuulalyeerani

1. Isiyani inaavirikaniha apoovu a Yehova naale aneehimya ukhala makristau?

ITTHU imoca inaavirikaniha apoovu a Yehova naale aniihimya ukhala makristau, ukhanle wiikurumicaa ulalyeera. (Titu 2:14) Masi ikwaha cikhwaawe pooti uhinicivela ulalyeera. Atthunaka nyuuva nnawiicoona khampa ciicoonaawe humu mmoca wancivela ulalyeera. Uyo neera: “Unaaphiyaka ukati uhinkicivelaaya ulalyeera.”

2. Kontha isiyani ikwaha cikhwaawe unnirikelaaya ukhala ootteeliya wuulalyeerani?

² Watthunaka nyuuva unawuucivelani uvara nteko nkhwaawe uhiya ulaleelyeera. Kontha isiyani uniirannyaaya commo? Wootakihera, hiiva ninaatekateka ni ulokihaca Isalau Coomwene, ninawaakavihera ale caakhumelenle ihasara ni ninawaalipiha. Uyo ukatyuuyo, hiiva ninaakhitiri woona iparakha ni ciicammo woona wiira wiikurumica wihu uhaana ifayita. Uhiya commo, mapuro khampa ayo akhanle omaana, nwo ninawoona nifento ni unamaana wo mayamunneehu ni ninaakupali wiira nteko unvareehu uhaana ifayita. Masi atthunaka ninaaviriha myaakha cinci nilalyeeraka ncoko mmocaaru awula atthu o uyo ncokooyo khampheela wiiwa citthu cinaalalyeereehu. Ninaakupali wiira ukati unaattameleehu mahuku ookhicera ninaahala utepa waanana masakha. (Mat. 10:22) Isiyani inhala unikavihera uhihiyerera wiikurumica wuulalyeerani?

3. Nineetthuca isiyani ni wiikurumica wa Yesu uhimiye nhina Luka 13:6-9?

³ Hiiva pooti uneetthuceehu wiikurumica wuulalyeerani nattharaka ntakihero na Yesu. Ukati waalalyeeraawe, wiikurumica wawe khawaalolovacile. Khweeliini, uyo aneekurumica urwaa wuulalyeerani. (Nsome Luka 13:6-9.) Ntakihero nuulumilyaawe, Yesu aholattaniha nteko woolalyeera ni nlopwana nowacera mwiri co uva. Uyo nlopwanooyo, naaviriha mwaakha miraru awaceraka nnyo mirinnyo masi woohiima. Inanna imocaaru, Yesu ahoviriha myaakha miraru alalyeeraka ayuuta masi akhwaawe ayo khayaatthuna umwiiwelela. Unookhalaru commo, khampa nlopwana ahaahiyerenre uwacera miri co uva hataa ciheemaka, Yesu khaahiyerenre waalalyeera atthu ni khaalolovacile ni ntekwaawe woolalyeera. Uhiya commo, uyo aheekurumica wiira akavihere atthu akhwaawe wiiwa ihapari comaana.

4. Citthuni cese cinhaleehu woopela mwaha nintakihero na Yesu?

⁴ Nhina ula mwahoola, ninaahala woona mananna Yesu eekurumicilyaawe wuulalyeerani venci-venci myeeri 6 cookhicera nari va watuninyani va. (Luka 10:1.) Wiitthuca citthu Yesu ceetthucihaawe ni utthara ntakihero nawe unaahala unikavihera uhihiya wiikurumica. Vano, ninaahala woopela mwaha citthu cese ninlamuliyeehu wiitthucera nintakihero na Yesu: (1) Uyo anvaresesa itthu yaapheelaawe Yehova, (2) ancuwela inatiri co mbiibiliyani, (3) aanonkhuluvela Yehova ni (4) anwehera nimananna omaana nteko woolalyeera.

UYO ANVARESESA ITTHU YAAPHEELAAWE YEHOVA

5. Manannani Yesu thoonyenryaawe wiira anvaresesa upanka itthu impheelaawe Nluku?

⁵ Yesu aneekurumica ulalyeera ihapari comaana kontha anaacuwela wiira phiitthu Yehova yaapheelaawe wiira apanke. (Luka 4:43) Yesu oonela ukhala nteko wofayita cinene ulalyeera. Mpaka myeeri 6 cookhicera caahalannyaawe va watuninyani va, uyo khaahiyerenre weetta mmasittatti ni mmaaliteeya wiira awiittthucihe atthu. (Luka 13:22) Yesu ciicammo ahaatthenkaca atthu akhwaawe wiira alalyeere ihapari comaana khampa caalalyeeraawe.—Luka 10:1.

6. Manannani nteko woolalyeera unvaranacaaya nimiteko cikhwaawe? (Nwehe ciicammo ilatarato.)

⁶ Mahukwaala, ulalyeera ihapari comaana ciicammo ukhanle nteko wofayita cinene Yehova ni Yesu ampheelaaya wiira nipanke. (Mat. 24:14; 28:19, 20) Khweeliini, miteko cotheene ninvareehu cinaavaranaca ni nteko woolalyeera. Wootakihera, ninaatekateka Isalau Coomwene wiira ale anaalalyeereehu akhalane nipuro nonswalela Yehova. Uhiya commo, miteko cotheene cinvariya upeteeli cinaakavihera nteko woolalyeera. Hi ninawaakavihera mayamunneehu caakhumelenle ihasara wiira ahokoleele uvara miteko caya co muumweneni venci-venci ulalyeera. Vano noopuwelaka wiira nteko woolalyeera ukhanle nteko wo ifayita cinene Yehova mpheelaawe wiira nipanke, unaanikurumica uhihiya uvara uyo ntekooyo. János, humu mmoca o Hungria, neera: “Mi akinhiya wuupuwela wiira khuuvo nteko nkhwaawe uhinkavihera nteko woolalyeera, uyo ukhanle nteko muulupale hiiva urineehu.”

7. Kontha isiyani Yehova nopheelaawe wiira nihihiye ulalyeera? (1 Timotiyu 2:3, 4)

⁷ Hiiva pooti ununcerereehu wiikurumica wihu wuulalyeerani naaweheraka atthu khampa Yehova cinaaweheraawe. Uyo nopheela wiira atthu otheene yiiwe ihapari comaana wiira yoopwe. (Nsome 1 Timotiyu 2:3, 4.b) Phimaana, uyo naanikavihera mananna oolalyeera nnyo ihapari comaana nnyo. Wootakihera, ibroxura Mwaafente atthu ni mwaapanke eetthuci inaanivaha malakihero o mananna oopacera uwoopana mwaha atthu nimananihaka upheela waasomiha Ibiibiliya. Hataa ukhalaka wiira atthwaayo khantthuna unswalela Yehova nna co, ayo pooti atthunaka ulakela unswalela Yehova uhinaphiya wiimaleloni wo masakha ookhicera. Vano itthu inuulumeehu nnaco pooti waakavihera wahoolo, masi iyo itthwiiyo inhala ukhitirya naahihiyeke ulalyeera.

UYO ANCUWELA SANA-SAANA INATIRI CO MBIIBILIYANI

8. Manannani ucuwela inatiri wankavihenryaaya Yesu uvarela nteko ratta ukati waarinaawe?

⁸ Yesu ancuwela mananna inatiri co mbiibiliyani caahalaaya wiirannya. Wootakihera, uyo ancuwela wiira ntekwaawe waahala umaliha myaaka miraru ni myeeri 6. (Dan. 9:26, 27) Ciicammo uyo ancuwela ukatini ni inannani caahalaawe ukhwa. (Luka 18:31-34) Phimaana, uyo anvarela nteko ukatyaawe ni mananna omaana wiira eekurumice ulalyeera ihapari comaana.

9. Kontha isiyani wiiweeha inatiri co mbiibiliyani cinhalaaya unikavihera wiikurumica wuulalyeerani?

⁹ Wiiweeha inatiri co mbiibiliyani cinaanikavihera uhihiya ulalyeera. Kontha ninaacuwela wiira unaahala uphiya ukati unhalaaya umalamalihiya ula ulumwenkuula. Khampa ninoneehu citthu cineerannya ntuniyani, moopuwelelo apinaatamu cinaathoonyera wiira cineera ciirannyaaka inatiri co mbiibiliyani cinooluma wiikhiceroni mahuku. Ciicammo ikuverenu yuulupale yo ntuniyani motheene aneehaniya anglo Americana ni Rusia nnkhayi nilapo cikhwaawe caankavihera ciicammo cinaathoonyera wiira mwene ooculu ilapo ni oohitto anaarwaa waana ikhotto wiikhiceroni mahuku. (Dan. 11:40) Ni ninawoona wiira inyaa co ttontto muulupale nulumiya nlivuruni ya Daniele 2:43-45, inaaciya ikuvernu yuulupale ineehaniya anglo americana. Hi ninaakupali wiira umwene wa Nluku unaahala umalamaliha ikuvernu ca apinaatamu. Nnyo inatirinnyo cinawoonihera wiira ninkhala ukati wookhicera nihaana uhihiyerera ulalyeera ihapari comaana wowaakuvyaaca.

10. Manannani inatiri co mbiibiliyani cinnikurumicaaya?

¹⁰ Inatiri co mbiibiliyani ciicammo cinawuuluma ihapari comaana cinhala wiirannya uhoolo cinlamuliyeehu waahimeerya atthu enci. Carrie, arokorihu amoca ankavihera u República Dominicana, aneera: “Kuupuwelaka citthu comaana Yehova khuluvelihilyaawe coohoolo, unaakikurumica upheela waahimeerya atthu akhwaawe nnyo citthunnyo. Mahukwaala, atthu anawaanana masakha menci oovirikana. Ni unawoonannya wiira ayo anaapheela ucuwela inatiri ca Yehova.” Uhiya commo, inatiri co mbiibiliyani cinaanoonihera wiira Yehova naakavihera ntekwaawe. Leila nokhala u Hungria neera: iveerusu ya Isaiya 11: 6-9 inaakuupusera wiira khula ntthu pooti umpankaawe marukunuso akaviheriyaka ni Yehova. Phimaana, mi kinaapheela cinene waahimeerya atthu otheene ihapari comaana hataa ukhalaka wiira ayo khampheela wiiwa ihapari comaana.” Vano Christopher nokhala u Zâmbia, neera: “Markus 13:10 neera wiira ihapari comaana cinaalalyeeriya ntuniyani motheene. Iyo ikhanle itthu yomaana inhala unikavihera wiirannyeeha iyo inatiriiyo. Vano nyuuva? Inatirini inhala wuukurumicani uhihiya ulalyeera?

UYO AANONKHULUVELA YEHOVA

11. Kontha isiyani Yesu waalamuliyaawe unkhuluvela Yehova wiira hihiyerere ulalyeera? (Luka 12:49, 53)

¹¹ Yesu ankhuluvela wiira Yehova anhala unkavihera uhihiyerera ulalyeera. Hataa ukhalaka wiira Yesu anuuluma nimananna ohisima ni ancuwela mananna oopheela wuuluma, uyo ancuwela wiira ihapari comaana canhala ukumihera uthanyanaciya. (Nsome Luka 12:49, 53.) Nlattu woolalyeera, ahooleli ottiini yahopheela umwiiva ikwaha cinci. (Joau 8:59; 10:31, 39) Hataa ukhalaka commo, Yesu ancuwela wiira Yehova ari ni uyova. Yesu enre co: “Mi akiri veekha apaapa akirumile ari wamoca ni miiva. Ayo khankihiya veekha kontha ukati wotheene kimpanka inaacivela.”—Joau 8:16, 29.

12. Manannani Yesu aatthenkacilyaawe attharyaawe wiira ahihiye ulalyeera hataa yaananaka uthanyiya?

¹² Yesu ahowuupusera attharyaawe wiira ayo yahaana ukhuluvela ukaviheriya ni Yehova. Ikwaha cinci uyo ahaakhuluveliha wiira Yehova anhala waakavihera hataa alupatthiyaka. (Mat. 10:18-20; Luka 12:11, 12) Ciicammo ahaalepela wiira ahaana akhalaka oowalaala. (Mat. 10:16; Luka 10:3) Ahowiirela wiira khanlamuliya unkhanyereriha ntthu utthara ihapari comaana. (Luka 10:10, 11) Ni ahowiirela wiira pooti waahalaaya utthawa yalupatthiyaka. (Mat. 10:23) Nlattu wowiikurumica ni wonkhuluvela Yehova, Yesu khomolanihaciya khula ikwaha.—Joau 11:53, 54.

13. Kontha isiyani nyuuva nnolamuliyeenyu ukhuluvela wiira Yehova naahala wuukavihera?

¹³ Mahukwaala, hiiva ciicammo ninaapheela ukaviheriya ni Yehova wiira nihihiye ulalyeera hataa nilupatthiyaka. (Apoka. 12:17) Kontha isiyani nnolamuliyeenyu ukupali wiira Yehova nawuukaviherani? Nlattu wo nivekelo na Yesu niri nhina ivangeeliyu ya Joau ikapiitulu 17. Nhina iyo ikapiitulu iyo, Yesu ahonlompa Yehova alepelaka wiira aawacere maapostolwaawe aakhulaka mavekelwaaya. Ilivuru yo miteko inawoonihera mananna Yehova aakavihenryaawe maapostolu ulalyeera woohihiyerera hataa yalupatthiyaka. Nno nivekelonno, Yesu ahonlepela Yehova wiira akavihere ale yaahala ulakela utthara ile yaahalaaya waalalyeera attharyaawe wuuhelani nhina nyuuva. Yehova khanhiya waakhula nno nivekelonno mahukwaala. Uyo naahala wuukaviherani khampa caakavihenryaawe maapostolu.—Joau 17:11, 15, 20.

14. Kontha isiyani uhinhaleehu uhiya ulalyeera hataa uwakatti woorikarikaca? (Nwehe ciicammo ilatarato.)

¹⁴ Ukati unviraaya waattamelaka wiikhiceroni ila ituninyeela, ulalyeera ihapari comaana niikurumicaka unaavira watepaka urika. Masi Yesu hokhuluveliha wiira ninaahala ukaviheriya. (Luka 21:12-15) Khampa Yesu naattharyaawe, hiiva khaninaakhanyereriha atthu ulakela utthuna awula mena ihapari comaana. Hataa mapuro ale miteko cihu cinkhottihiyaaya, mayamunneehu khanhiya ulalyeera kontha anankhuluvela Yehova kahi ikuru caya. Khampa Yehova caalipihilyaawe aswalyaawe okhalayi, uyo ciicammo naanivaha ikuru wiira nilalyeere ni niirannyeehe itthu impheelaawe. (2 Tim. 4:17) Vano, munkhuluvele Yehova ni uyo naahala wuukaviherani uhihiyerera wiikurumica wuulalyeerani.

UYO ANWEHERA NIMANANNA OMAANA NTEKO WOOLALYEERA

15. Nincuwela cani wiira Yesu anwehera ratta nteko woolalyeera?

¹⁵ Yesu anwehera nimananna omaana nteko woolalyeera. Iyo yahonkavihera ukhala ootteeliya ni uhihiya wiikurumica ulalyeera. Wootakihera, uvira waya mwaakha mmoca alalyeeraka, Yesu ahoona wiira atthu enci yaanaapheela wiiwa ihapari comaana, mpaka uyo ahaalattaniha ayo atthwaayo niimatta irina icoolya coottokottheene ni cinlamuliya uhephiya. (Joau 4:35) Masi uvira waya mwaakha mmoca, uyo ahowiirela eetthucyaawe co: “Icoolya coopheela uhephiya khweeliini khacimala.” (Mat. 9:37, 38) Ni nuuwakatyaaya, uyo ahowiirela co: “Icoolya coopheela uhephiya khweeliini khacimala, vano, mwaalepele aneene imatta wiira awaavye ananteko oopheela uhepha mmattani waya.” (Luka 10:2) Yesu ankupali wiira atthu enci yampheela wiiwa ihapari comaana ni uyo ahokhala ootteeliya cinene nlattu wowoona iyo.—Luka 10:21.

16. Manannani matakihero a Yesu caakavihenryaaya attharyaawe uwehera ratta nteko woolalyeera? (Luka 13:18-21) (Nwehe ciicammo ilatarato.)

¹⁶ Wiira aakavihere attharyaawe uhihiya wiikurumica, Yesu ahoonihera mananna ihapari caalalyeeraaya caahalaaya umwareela. Wiira awoonihere, uyo ahovarela nteko matakihero meeli. (Nsome Luka 13:18-21.) Ntakihero nimoca, Yesu ahuuluma itthaka yankaani wiira oonihere mananna ihapari comaana caahalaaya wuunuwa nimananna otikinihaca ni khiivo yaahala uhiiha nwo wunnuwannwo. Muntakiheroni nikhwaawe, uyo ahooluma ifermentu wiira oonihere mananna caahalaaya umwareela ni caahalaaya waakavihera ale yaahala utthuna weettela nnyo ihaparinnyo hataa uviraka ukati mwinci. Naayo manannaayo, Yesu ahaathoonyihera attharyaawe wiira ihapari comaana caalalyeeraaya caanaahala waakavihera atthu enci.

17. Kontha isiyani nihinlamuliyeehu uhiyerera uwehera ratta nteko woolalyeera?

¹⁷ Hi khaninhiya wiikurumica wuulalyeerani nuupuwelaka mananna ihapari comaana cinaakaviheraaya atthu imiliyau cene ntuninyani motheene. Myaakha cotheene, atthu imiliyau cene anawoona Nuupuwelelo no nookhwa a Yesu Kristu ni ninawaasomiha Ibiibiliya. Ni enci anaapattisiya ni anaakhala nkhayi ni hi wuulalyeerani ihapari comaana. Hiiva khanincuwela atthu akavi anhala utthuna ihapari comaana, masi itthu incuweleehu ukhalaka wiira Yehova neera aathukumanihaka atthu enci wiira awoopole mmasakhani moolupale. (Apoka. 7:9, 14) Yehova khanle mwaneene imatta, naacuwela wiira ahaavo atthu enci anhala utthuna ihapari comaana. Phimaana, pooti uniikurumiceehu ulalyeera ihapari comaana.

18. Inannani nimpheeleehu wiira atthu anicuwele?

¹⁸ Itthu imoca yaawiiriha ucuwela ukhala atthari a Yesu waari wiikurumica wuulalyeerani. Wootakihera, maapostolu yanlalyeera yalipaka nrima ni yatteeliyaka mpaka atthu waacuwelenlyaaya wiira ayo ari ni Yesu. (Mite. 4:13) Mahukwaala, atthu yanoonaka nalalyeeraka, nimpheela wiira ayo atthwaayo akupali wiira hiiva ninontakiha Yesu.