Ntata na Yehova khaninakhala nookhuvyaa cinene

1. Manannani Moceesi oonihenryaawe wiira aanonkhuluvela Yehova ukati waakumihaawe asarayeli Wiciipitu?

ILIVURU yo Maberewu inaawuuluma atthu enci yaamwaamini Yehova. Nhina ayo atthwaayo, khanle Moceesi aarina waamini woolipa. (Mabere. 3:2-5; 11:23-25) Uyo ahoonihera waamini ukati waakumihilyaawe a Sarayeli Wiciipitu. Moceesi khaahiyerenre wiira Farawoo ni naanakhottwaawe anhihe waakumiha. Ankhuluvelaka Yehova, uyo aahahoolela apoovu arwaaka u Mar Vermelho ni nuuwakatyaaya arwaaka umwaakoni. (Mabere. 11:27-29) Asarayeli enci yaahoohiya ukhuluvela wiira Yehova aanhala waawacera, masi Moceesi khaahiyerenre unkhuluvela Nlukwaawe. Waamini wa Moceesi wahocaalihiya kontha Yehova aahaavaha Asarayeli iyoolya ni maaci wiira akhale akumi.a—Nkw. 15:22-25; Isaa. 78:23-25.

2. Kontha isiyani Yehova ankohilyaawe Moceesi co: “Unoona wiira ntata naka miiva Yehova nikhanle nookhuvyaa cinene?” (Manummeru 11:21-23)

² Hataa ukhalaka wiira Moceesi ahaana waamini woolipa, uvira waya mwaakha mmoca Yehova naakumihile Asarayeli Wiciipitu, Moceesi aahopacera wiikoha wakhala wiira Yehova anhala waavaha iyoolya khampa caahimenryaawe. Moceesi khaakhitiri wuupuwela mananna Yehova caahalaawe waavaha iyoolya atthu oophiyaka 600.000 alopwana, athiyana ni asaana yaari umwaakoni wahaari iyoolya. Yehova aahomwaakhula Moceesi ankohaka: “Unoona wiira ntata naka miiva Yehova nikhanle nookhuvyaa cinene?” (Nsome Manummeru 11:21-23.b) Nuulumo “ntata na Yehova” unaaciya nnepa woowarya wa Nluku awula ikuru cinvarelaawe nteko wiira apanke itthu impheelaawe. Nimoolumacero makhwaawe Yehova ankoha Moceesi co: ‘Weeva unoona wiira miiva akinhala upanka ile itthu ilakenlyaaka upanka?’

3. Kontha isiyani ntakihero na Moceesi ni naasarayeli nikhanlyaaya nofayita?

³ Nyuuva nhopaca ukhala niiwasiwaasi wakhala wiira Yehova naahala wuuwacerani nyuuva awula amuciinyu? Wakhala wiira nyuuva nhopaca wiikoha awula mena, nikoho Yehova nankohilyaawe Moceesi ninaahala wuukaviherani. Nhina ula mwahoola, ninaahala woona itthu yankhumelenle Moceesi ni Asarayeli yahaakhuluvela wiira Yehova anhala waawacera. Ni ninaahala woona iveerusu cikhwaawe co mbiibiliyani cinhala ulipihaca ukhuluvela wihu wiira Yehova naahala unikavihera woohihiyerera.

MWIITTHUCE NINTAKIHERO NA MOCEESI NI NAASARAYELI

4. Isiyani yaakhumelenle ukati asarayeli waaryaaya muuthakoni?

⁴ Kontha isiyani asarayeli enci yaapacenryaaya waanyihacera wakhala wiira Yehova anhala waawacera? Asarayeli naale yaatakaneenle yahaari asarayeli, yaahokhala ukati mwinci yeettaka muuthakoni woohiyoolya. (Nkw. 12:38; Deut. 8:15) Ale yahaari Asarayeli yahoocyaa ulya manaa ni iyo phiitthu yaawiirannyenle Asarayeli enci yaatakaneenle naale yaattekutta. (Manu. 11:4-6) Apoovu yaahopacera waanukhela inama ni icoolya cikhwaawe caalyaaya anari Wiciipitu. Nlattu woottekutta, Moceesi ahopacera wuupuwela wiira ahaana aavyaka inama, masi uyo khaacuwela nipuro noohala uphwanya.—Manu. 11:13, 14.

5-6. Manannani asarayeli yaatakihilyaaya ale yahaari asarayeli ni isiyani ineetthuceehu?

⁵ Ukhala wiira ale yahaari asarayeli yaari atthu oohisukhuru nicitthu Yehova aapankenlyaawe, asarayeli ciicammo yaahopacera wuupuwela toko ayo atthwaayo. Iyo pooti uniirannyeela hiiva ciicammo, venci-venci wakhalaka wiira ninkhala naatthu ahinoonihera usukhuru citthu Yehova cipankilyaawe. Iyo atthunaka ineerannya wakhalaka wiira ninaapacera wuupuwela citthu caarineehu khalayi awula woonela nttima atthu akhwaawe. Masi ninaakhala ootteeliya neetthucaka usukhuru nicitthu cirineehu.

⁶ Asarayeli yaalamuliya wuupuwela itthu Yehova yaakhuluvelihilyaawe waavaha yaphiyaka ilapo yaakhuluvelihiyaaya. Yehova aahala waapankela iyo anaphiile nwo uhiya yeettaka muuthakoni. Inanna imocaaru, uhiya ukhala nuupuwelaka citthu cirineehu mahukwaala, nihaana uweheeha citthu Yehova cinikhuluvelihalyaawe univaha upeephoni. Uhiya commo, ikhanle itthu yofayita wuupuwela iveerusu co mbiibiliyani cinhala unikavihera wuncerera unkhuluvela wihu Yehova.

7. Nlattuni ninlamuliyeehu ukupali wiira ntata na Yehova khaninakhala nookhuvyaa cinene?

⁷ Kontha isiyani Yehova ankohilyaawe Moceesi wiira ntata naka miiva Yehova khaninakhala “nookhuvyaa cinene”? Atthunaka Yehova aapheela unkavihera Moceesi wuupuwela mananna caahalaaya unkavihera mapuro menci, uhiya paahi ikuru cirinaaya ntata na Yehova. Uhiya commo, hataa ukhalaka wiira asarayeli yaari muuthakoni woohiyoolya, Yehova anhala ukhitiri upanka itthu wiira aavahe inama yowaattosera. “Ni moonwaawe wokuru ni wowookwa”, Yehova aahoonihera ikuru cawe. (Isaa. 136:11, 12) Phimaana, pooti wankupaliihu wiira ntata na Yehova ninaahala unikavihera hataa naananaka masakhani.—Isaa. 138:6, 7.

8. Itampini atthu enci yaavanryaaya muuthakoni ni manannani ninhaleehu unyema upanka ciicammo mahukwaala? (Nwehe ciicammo ilatarato.)

⁸ Yehova aahopanka khampa caakhuluvelihalyaawe ni aahaavaha ayuurwe enci. Masi asarayeli khayansukhunru Yehova niitthu yaapankilyaawe. Uhiya commo, encyaayo yaahokhala anakhwilu ni yaahoviriha mahuku meeli yaavaraka ayuurwe paahi. Yehova ahaaviruwela ale yaari “anakhwilu” ni ahaattarusa. (Manu. 11:31-34) Nno ntakiheronno, ninaawoonihera wiira khaninlamuliya upheela ukhalana citthu cinci. Hataa nakhalaka atthu oopuha awula oohuva, nihaana wiikurumica uthukumaniha “mihakhu wiirimu.” Wiira nipanke iyo, ninlamuliya ulipihaca upatthaniihu ni Yehova ni Yesu. (Mat. 6:19, 20; Luka 16:9) Naapanka commo, Yehova naahala univaha yotheene impheeleehu.

9. Isiyani inlamuliyeehu ukupali?

⁹ Mahukwaala, Yehova ciicammo nawookola moonwaawe wiira aakavihere apoovwaawe. Masi, iyo khinthoonyera wiira khunhala unithwaa nsurukhu awula iyoolya.c Masi nihaana ukupali wiira Yehova khanla uninyanyala. Uyo naahala univaha ikuru cimpheeleehu wiira nikhitiri waanana khula masakha anhala unikhumelela. Nihaana ukhuluvela wiira Yehova naahala wookola moonwaawe ni unikavihera nicitthu cinnithwaa. Nttwee noone citthu piili cinlamuliyeehu woonihera unkhuluvela Yehova; (1) naananaka uthwennya nsurukhu ni (2) nuupuwelaka mananna cinhaleehu ukhala uhoolo.

UTHWENNYA NSURUKHU

10. Citthuni cinhala uniiriha uhuva?

¹⁰ Ukati untepeehu waattamela wuukhiceroni ila ituniyeela, masakha menci anaahala ukhumelela nlattu wokhotto, ihasara, iretta coohipica umwareela ni isiyaasa. Nnya citthunnya pooti uniiriha utepaca uhuva, uhaleela uvara nteko awula uhaleela citthu cirineehu ni mpanka uniiriha uhiya inupa cihu wiira nithamele ncoko nkhwaawe. Wiira nkhitiri uhihiyerera waawacera amuciinyu, isiyani inhala wuukaviherani ulakela itthu yoohala upanka wiira moonihere ukhuluvela ntata na Yehova?

11. Isiyani inhala unikavihera waanana uthwennya? (Luka 12:29-31)

¹¹ Itthu yoopacera inlamuliyeenyu upanka ni inhala wuukaviherani cinene ukhanle unhimeerya Yehova iwasiwaasi cinyu cootheene. (Miru. 16:3) Nlepele ucuwelaca wiira nlakele nimananna omaana itthu yoohala upanka ni nhitepe ‘ukhala niiwasiwaasi.’ (Nsome Luka 12:29-31.) Nhihiyerere ulompa wiira nkhitiri ukhala ootteeliya nicitthu cirineenyu. (1 Tim. 6:7, 8) Ntothe mmalivuruni wihu wiira ncuwele itthu yoohala upanka ukati wo waanana uthwennya nsurukhu. Nsayitini jw.org cihaavo myaha cinci ni ividiyu cinooluma nnyo myahannyo ni caakavihenre atthu enci.

12. Makohoni anhala unkavihera ntthu ulakela nimananna omaana inhala waakavihera amucyaawe?

¹² Atthu akhwaawe, anaalakela uthamela ncoko woottalivana ni waamucyaaya wiira aphwanye nteko. Masi, akhwaawe ahoonenela wiira iyo ikhanle itthu yoohinamaana. Nhinaaya utthuna uvara nteko, muupuwele mananna cinhaleenyu wiilihera nhina mminepani, uhiya paahi wuupuwela nsurukhu unhaleenyu waakhela. (Luka 14:28) Mwiikohe co: ‘Isiyani inhala wiirannya watthokoni waka kakhalaka uttayi? Kiireke kinaahala urwaa ukhitiri woona mikutthaano khula isumana, urwaa wuulalyeerani ni ukhala nkhayi nimayamunna?’ Wakhala wiira nhaana asaana, unaareera wiikoha co: ‘Manannani kinhalaaka waawacera asaanaaka “kawiitthucihaka myaha ca Yehova” kakhalaka uttayi naayo?’ (Efesu. 6:4) Nlakele itthu yoohala upanka mwavarelaka nteko mananna Yehova cinoopuwelaawe ni uhiya mananna cinoopuwelaaya amuciinyu ni asipatthaniinyu ahinhisima Ibiibiliya.d Tony, nookhala u Ásia, aholattuliya uvara nteko ilapo cinci aahalaawe uliviya nsurukhu mwinci. Masi ulompa wawe nhina uyo mwahooyo ni wuulumana wawe amwaarawe, uyo aholakela uhitthuna uvara nnyo mitekonnyo ni wiikurumice upanka marukunuso wiira akhitiri ukhala paahi ninsurukhu waarinaawe. Ilelo, uyo neera: “Mi kahaana iparakha yowaakavihera atthu enci uncuwela Yehova ni asaaneehu cinawaacivela cinene ikhweeli. Vano, amucyaaka aheetthuca wiira nattharaka moolumo amphwanyannya nhina Matewus 6:33. Yehova khanhiya uniwacera.”

WUUPUWELA MANANNA CINHALEEHU UKHALA UHOOLO

13. Citthuni cinlamuliyeehu upanka nna co wiira nikhitiri itthu yoohala wiilihera nuuluvalaka?

¹³ Unkhuluvela wihu Yehova ciicammo pooti uttehattehiya nuupuwelaka mananna ukumiihu cinhalaaya ukhala nuuluvalaka. Ibiibiliya inaanikurumica uvara nteko wiira nikhitiri itthu yoohala wiilihera uhoolo. (Miru. 6:6-11) Phimaana, unaareera usunka nsurukhu wakhitiryaaka, kontha uyo unaahala unikavihera. (Ekles. 7:12) Masi khaninlamuliya uhiyerera wiira nsurukhu ikhale itthu yofayita cinene muukumini wihu.

14. Manannani Maberewu 13:5 cinnikaviheraaya uhikhala niiwasiwaasi mananna cinhalaaya ukhala ukumiihu uhoolo?

¹⁴ Yesu hohimya ntakihero nimoca wiira oonihera mananna cinkhanlyaaya itthu yootakhala waavyaavya ukhalana mihakhu, uhiya ukhala “thaciri uhoolo wa Nluku.” (Luka 12:16-21) Khaavo nocuwela mananna cinhalaaya ukhala ukumiihu uhoolo. (Miru. 23:4, 5; Tiya. 4:13-15) Ukhala wiira nikhanle atthari a Kristu, hiiva ninawaanana masakha menci: uyo enre wiira nihaana natthunaka uhiya citthu cootheene wiira nikhale attharyaawe. (Luka 14:33.) Iyo phiitthu yaapankilyaaya makristau o iseekulu yoopacera o Yuuta. Ayo khayaahiyerenre ukhala ootteeliya hataa yahaleelaka citthu caarinaaya. (Mabere. 10:34) Inanna imocaaru, mahukwaala, mayamunneehu enci ahohaleela uvara miteko ni ahohaleela citthu caya nlattu woohiikelakeliha isiyaasa. (Apoka. 13:16, 17) Isiyani yaakavihenre ayo mayamunnaayo? Ayo anawoonihera ukhuluvela cinene inatiri ya Yehova ineera: “Akinhala wuuhiyani ni akinhala wuunyanyalani.” (Nsome Maberewu 13:5.e) Phimaana, ninaapanka yotheene wiira nikhitiri itthu yoohala ulya uhoolo, masi nihaana ukhuluvela wiira Yehova naahala uniwacera yanikhumelelaka itthu yahaaweherereehu.

15. Manannani ayari akhanle makristau anlamuliyaaya waawehera asaanaaya? (Nwehe ciicammo ilatarato.)

¹⁵ Mapuro makhwaawe, anamathelana anaapheela waakhalana asaana venci-venci wiira akaviheriye yuuluvalaka vale. Masi Ibiibiliya, ineetthuciha wiira ayari phinlamuliya waawacera asaanaaya. (2 Akor. 12:14) Khweeliini, ayari atthunaka anaapheela ukaviheriya naasaanaaya yuuluvalaka vale ni asaana enci unawaatteela nrima yapankaka iyo itthwiiyo. (1 Tim. 5:4) Masi ayari anonkhuluvela Yehova, anaacuwela wiira utteeliya weekhweeli khunakhala paahi ukhalana asaana wiira yaakavihere yuuluvalaka, masi asaanaaya answalele Yehova.—3 Jo. 4.

16. Manannani ayari cinhalaaya waakavihera asaanaaya ucuwela mananna oohala ukhitiri wiilihera uhoolo? (Efesu 4:28)

¹⁶ Nvahe ntakihero ni moonihere asaaneenyu wiira nyuuva nnankhuluvela Yehova ukati woowiitthuciha mananna owiilihera. Moonihere mananna ikhanlyaaya itthu yofayita wiitthuca uvara nteko ikhumelo inamwane. (Miru. 29:21; nsome Efesu 4:28.f) Uhiya commo, mwaakurumice uhihiyerera weetta ucikolani wiira asome. Ikhanle itthu yomaana utotha-totha wiira mphwanye ikano co mbiibiliyani ni waakavihera asaaneenyu ulakela nimananna oocuwelaca itthu yoohala upanka nhina icikola. Iyo inaahala waakavihera asaaneenyu ukhitiri wiilihera ni ukhalana ukati woolalyeera, atthunaka mpaka ukhala piyoneeru.

17. Isiyani inlamuliyeehu ukupali?

¹⁷ Aswali ookhuluvelya a Yehova anaakupali wiira uyo haana ikuru ni naapheela waakavihera. Ukati untepeehu waattamela wuukhiceroni ila ituniya yoohinamaaneela, hiiva ninaahala upheela cinene unkhuluvela Yehova. Hataa anikhumelelaka masakhani, nihaana nakupaliki wiira Yehova naahala uvarela nteko ikuru cawe wiira aniwacere. Hi ninaakupali wiira ntata nokuru na Yehova ni moonwaawe wowookwa khunakhala wookhuvyaa cinene wiira anikavihere.