MWAHA WOOSOMIYA 15
NCIPO 30 Muluku Aka, Moopoli Aka, ni Tiithi Aka
“Ukhalana upatthani woolipa ni Yehova ikhanle itthu yomaana!”
“Masi miiva umwaattamela Nluku ikhanle itthu yootepa ukicivela.”—ISAA. 73:28.
ITTHU INHALEEHU WIITTHUCA
Nhina ula mwahoola, ninaahala woona manannani ninhaleehu ulipihaca upatthaniihu ni Yehova ni kontha isiyani ikhanlyaaya itthu yomaana.
1-2. a) Wiira nikhalane upatthani woolipa nintthu, isiyani inlamuliyeehu upanka? b) Isiyani inhaleehu woona nhina ula mwahoola?
MMUUPUWELE mpatthaniinyu nnoncuweleenyu sana-saana. Muncuwenle manannani? Khweeliini, unawoonannya wiira mwaahoviriha ukati mwinci munthukanaka, mwahopacera ucuwela masakha yaananaawe ni mwahoonelela citthu cinoncivela ni cihinoncivela. Nyuuva mwahoona wiira uyo mpatthaniinyuuyo, haana makhalelo omaana ni nnopheeleenyu utakiha. Ni nuuwakatyaaya, nyuuva mwahopacera unfenta cinene uyo mpatthaniinyuuyo.
2 Wiira nkhalane upatthani woolipa nintthu, nyuuva nnolamuliya uviriha ukati mwinci ni wiikurumica. Iyo phiitthu hiiva inlamuliyeehu upanka wiira nikhale apatthani a Yehova. Nhina ula mwahoola, ninaahala woona manannani ninhaleehu ukhalana upatthani woolipa ni Nluku ni kontha isiyani ikhanlyaaya itthu yomaana. Masi itthu yoopacera, ninaahala woona kontha isiyani ikhanlyaaya itthu yomaana umwaattamela sana-saana mpatthaniihu, Yehova.
3. Kontha isiyani nihaana wuupuwela mananna ikhanlyaaya itthu yomaana umwaattamela Yehova? Nhimye ntakihero.
3 Ikhanle itthu yofayita weemela ni wuupuwela mananna ikhanlyaaya itthu yomaana umphiyeera Yehova. Iyo inaahala unikurumica uhihiyerera ukhala apatthannyaawe. (Isaa. 63:6-8) Wootakihera, atthu otheene anaacuwela wiira ikhanle itthu yomaana ukhalana ukumi womaana nalyaaka iyoolya yoociva, natthawatthawaka, narupaka cinene ni nawuryaka maaci menci. Masi wiira atthu akhwaawe apanke nnyo citthunnyo, anoona urihakaca ukati mwinci ni anaahiya upanka citthu caahala waakavihera ukhalana ukumi womaana. Masi itthu impheeleehu, ukhanle wuupuwela iparakha cinhaleehu waakhela. Napankaka commo, unaahala unikurumica upanka citthu cinhala unikavihera ukhalana ukumi womaana. Inanna imocaaru, hi ninaacuwela wiira ukhala apatthani Yehova ikhanle itthu yomaana. Masi nuupuwelaka iparakha cinhaleehu ukhalana, unaahala unikurumica uhihiyerera umwaattamela mpatthaniihu Yehova.—Isaa. 119:27-30.
4. Isiyani nasaalimu ihimilyaawe nhina Isaalimu 73:28?
4 Nsome Isaalimu 73:28.a Nasaalimuuyo antikhile Isaalimu 73 aari nlevita aathanliye wiira avare nteko wo wiipeepa ntempulu wa Yehova. Unawoonannya wiira uyo ahoviriha myaakha cinci answalelaka Yehova. Hataa ukhalaka commo, uyo anoopuwela mananna ikhanlyaaya itthu yofayita ni ciicammo waakavihera atthu akhwaawe wuupuwela mananna ikhanlyaaya itthu yomaana “umwaattamela Nluku.” Iparakhani cinhaleehu waakhela napankaka commo?
“UKHALA APATTHANI A NLUKU UNAANIPHWANYIHA UTTEELIYA”
5. a) Kontha isiyani atthunaka ninlamuliyeehu wiira ukhala apatthani a Yehova unaaniphwanyiha utteeliya? b) Nhimye citthu cinoonihera manannani ucuwelaca wa Yehova unnikhikiceraaya. (Miruku 2:6-16)
5 Nakhalanaka upatthani woolipa ni Yehova, hiiva ninaakhala ootteeliya. (Isaa. 65:4) Hiiva pooti waneereehu iyo nlattu wo citthu cinci. Wootakihera, nasomaka Ibiibiliya, ninawoona isiyani Yehova innihimeryaawe ni neettelaka, hiiva ninaakhala oocuwelaca. Nwo ucuwelaca nwo, unaanikhikicera ni unaanikavihera unyema uvara itampi cuulupale. (Nsome Miruku 2:6-16.b) Phimaana, Ibiibiliya ineeraaya co: “Ootteeliya khanle nlopwana nophwanya ucuwelaca ni nlopwana owiiweeha.”—Miru. 3:13.
6. Kontha isiyani nasaalimu wanriipilyaaya nrima?
6 Hataa apatthani a Yehova anaakhala ooriipiya nrima ikwaha cikhwaawe. Namantikha Isaalimu 73 wahopacera unriipa nrima ukati waahiyerenryaawe moopuwelelo oohiloka amuunuwacaka wanrimani wawe. Uyo ahokhala oorusiya ni ahaakhalela nttima atthu yaapanka citthu cootakhala kontha oopuwela wiira atthu ahinonkhuluvela Nluku anaakhala saana muukumini waya. Nasaalimu ahomalihera ni moopuwelelwaawe oohiloka eeraka: “Atthu ootakhala nrima ni aneecuunuwiha phinpuha, phinkhala saana ni khanhuva cinene”. (Isaa. 73:3-7, 12) Uyo wahonriipa nrima nlattu wo iyo. Ikwaha imoca, uyo ahopacera wiikoha waakhala wiira wiikurumica wawe unswalela Yehova yaari itthu yomaana awula mena. Hiiva atthunaka pooti upacera ukhalana moopuwelelo khampa ayo ni mpaka wuuluma co: “Khweeliini, kireerihile nrimaaka mahala ni kirapihile matataaka kihipankaka itthu yootakhala mahala.”—Isaa. 73:13.
7. Isiyani inlamuliyeehu upanka waniriipaka nrima? (Nwehe ciicammo ilatarato.)
7 Hataa ukhalaka wiira wahonriipa nrima, nasaalimu ahorukunusa moopuwelelwaawe. Uyo ‘ahorwaa utempulu wowaarya wa Nluku’ ni nwo Yehova ahonkavihera urukunusa moopuwelelwaawe. (Isaa. 73:17-19) Mahukwaala, Yehova khanle mpatthaniihu omaana naacuwela ukati hiiva unniriipaaya nrima. Nalepelaka malakiherwaawe ni natthunaka ukaviheriya nuuyo ni wanlokoni, hiiva ninaakhalana ikuru yowaanana uriipiya nrima unkhalaneehu. Ni waniriipaka nrima nihicuwelaka itthu yoohala upanka, Yehova naahala unimaaliha ni unikavihera.—Isaa. 94:19.c
Nlevita antikhile Isaalimu 73, eettaka arwaaka “utempulu wowaarya wa Nluku” (Nwehe iparaagarafu 7)
“UKHALA APATTHANI A NLUKU UNAANIPHWANYIHA NIWEHERERO
8. Nhimye iparakha piili cimphwanyeehu nlattu wookhala apatthani a Nluku.
8 Ukhala apatthani a Nluku ikhanle itthu yomaana. Iyo inaanikavihera inanna piili. Yoopacera, ukhala apatthani a Nluku unaaniphwanyiha ukumi womaana. Yonayeeli, unaanivaha niweherero nookhuluvelya noohoolo. (Jer. 29:11) Ninaahala woopela mwaha nhina nnyo iparakha piilinnyo.
9. Kontha isiyani ukhala apatthani a Yehova unniphwanyihaaya ukumi womaana?
9 Atthu enci mahukwaala, aneera wiira Nluku khaavo. Nlattu wo iyo, ayo anoopuwela wiira ukumi khurina ifayita, nuuwakatyaaya, apinaatamu khanhala ukhala-tho. Masi ukhala mpatthani a Yehova uhonikavihera woona wiira ukumi uhaana ifayita. Usoma Ibiibiliya, uhonikavihera ucuwela wiira Nluku “haavo ni nawaatthuvela ale anontotha niikuru caya cotheene.” (Mabere. 11:6) Uhiya commo, Yehova numpile nimananna onswalela uyova, napankaka commo, hiiva ninaakhala ootteeliya muukumini wihu.—Deut. 10:12, 13
10. Khampa cinthoonyeraaya Isaalimu 37:29, isiyani Yehova yaakhuluvelihilyaawe ale anonkhuluvela?
10 Mahukwaala, atthu enci khaarina niweherero noohoolo. Ayo anoopuwela wiira ukumi ukhanle paahi, uvara nteko, uthela, waayara asaana ni usunka nsurukhu wiira yiirannyaaka itthu. Nluku khampanka mphantte muukumini waya. Masi niweherero na aswali a Yehova ninkhuma wa Yehova. (Isaa. 25:3-5; 1 Tim. 6:17) Hi ninaakhuluvela wiira Yehova khanle mpatthaniihu ni ninaakupali wiira uyo naahala wiirannyeeha citthu cotheene cikhuluvelihilyaawe. Hi ninaaweherera cinene citthu cotheene comaana cinhala wiirannya upeephoni ni venci-venci unswalela Yehova woohihiyerera.—Nsome Isaalimu 37:29.d
11. Iparakhani cikhwaawe cimphwanyeehu nlattu wookhala apatthani Yehova?
11 Ukhala apatthani a Nluku unaaniphwanyiha iparakha cinci. Wootakihera, naavaraka itampi nooniheraka uttharuwa Yehova honikhuluveliha unilevelela. (Isai. 1:18) Naayo manannaayo, hi ninaakhitiri ukhalana moopuwelelo omaana ni woohuupuwela-tho itampi civanreehu khalayi. (Isaa. 32:1-5) Uhiya commo, nihaana iparakha yuulupale yonhiya Yehova ootteeliya. (Miru. 23:15) Khweeliini, hiiva ninaakhitiri wuupuwela iparakha cinci cirineehu nlattu wookhala apatthani a Nluku. Masi manannani ninhaleehu uhihiyerera umwaattamela Yehova?
NHIHIYERERE ‘UMWAATTAMELA NLUKU’
12. Isiyani nyuuva ipankileenyu wiira nkhale apatthani a Nluku?
12 Waakhala wiira nkhanle ikristau oopattisiya, nyuuva nheekurumica upanka citthu cinci wiira nkhale mpatthani a Yehova. Nyuuva nheetthuca ikhweeli cimmuuluma Yehova ni Yesu, nhottharuwa itampi nvanreenyu khalayi, nhomwaamini Nluku ni nheekurumica uvara miteko cawe. Masi wiira nikhalane upatthani woolipa ni Nluku, ninlamuliya uhihiyerera upanka nnyo citthunnyo.—Akol. 2:6.
13. Nhimye citthu tthaaru cinnikavihera uhihiyerera umwaattamela Yehova.
13 Isiyani inhala unikavihera uhihiyerera umwaattamela Yehova? (1) Ninlamuliya uhihiyerera usoma Ibiibiliya. Masi itthu impheeleehu kahi paahi wiitthuca citthu cuulupale cimmuuluma Nluku. Ninlamuliya umananiha wiitthuca mananna Yehova noopuwelaawe ni isiyani uyo impheelaawe wiira nipanke ni manannani ninhaleehu weettela muukumini wihu. (Efesu 5:15-17) (2) Ninlamuliya ulipihaca umwaamini wihu Yehova nuupuwelaka mananna uyo noonihenryaawe nifento. (3) Ninlamuliya uhihiyerera unyema upanka citthu cinhala unriipiha nrima Yehova ni ciicammo uhiya waapatthanana ale ampanka nnyo citthunnyo.—Isaa. 1:1; 101:3.
14. Isiyani inlamuliyeehu upanka khula mahuku wiira nintteelihe nrima Yehova? (1 Akorintu 10:31) (Nwehe ciicammo ilatarato.)
14 Nsome 1 Akorintu 10:31.e Ikhanle itthu yofayita wiikurumica upanka citthu cinhala untteeliha nrima Yehova. Iyo kahi paahi urwaa wuulalyeerani awula umikutthaanoni, masi ciicammo unaahela nhina citthu cimpankeehu khula mahuku. Wootakihera, nakhalaka atthu ookhuluvelya wo citthu cotheene ni naameelaka citthu cirineehu atthu akhwaawe, ninanhiya Yehova ootteeliya. (2 Akor. 8:21; 9:7) Uyo ciicammo, noopheela wiira hiiva noonihere uhisima itthuvo inivahilyaawe, ikhanle ukumi. Hi ninamphiyeerya ule nivahile ukumi nalyaaka ni nawuryaka ni mananna omaana ni naawaceraka saana ukumiihu nimananna makhwaawe. Khula wiikurumica umpankeehu wiira nintteelihe nrima Yehova, hataa cikhalaka citthu cooyevaca, nifento nihu nuuyova ninaatepa ulipa.—Luka 16:10.
Ala akhanle mananna ontteeliha nrima Yehova: weettiha saana ipaasikeeri, moota awula ikaaro, utthawatthawa, ulya icoolya cowaapennya saana ni ukhala ntthu oovaha (Nwehe iparaagarafu 14)
15. Manannani ninhaleehu waawacera akhunanihu?
15 Yehova nawoonihera unamaana ale aneettela isariya ni ahineettela isariya. (Mat. 5:45) Iyo phiitthu inwehereraawe wiira hiiva ciicammo nipanke. Wootakihera, hiiva khaninwuuluma pusya atthu ni ninaawoonihera unamaana atthu otheene.” (Titu 3:2) Phimaana, hataa ukhalaka wiira ntthuuyo khanonkupali Yehova, hiiva khanineecoona ukhala atthu oocuwelaca uvikana ntthuuyo. (2 Tim. 2:23-25) Nakhalaka atthu ooreera nrima ni naawaceraka atthwaayo nimananna omaana, hiiva ninaamwaattamela cinene Nlukwiihu, Yehova.
NLIPIHACE ‘UPATTHANIINYU NI NLUKU’ HATAA NVARAKA ITAMPI
16. Manannani namantikha Isaalimu 73 eeconnyaawe nlattu wotampi caavanryaawe?
16 Nlattu wotampi civanreehu khalayi, ikwaha cikhwaawe atthunaka hiiva pooti upacera wuupuwela wiira khunniphwanela ukhala apatthani a Yehova. Namantikha Isaalimu 73 ahopacera ukhalana ayo moopuwelelwaayo. Uyo enre: “Inyaa caka caahanle utherekuwa ni vakaani-vakaani kaahanle uwuluwa.” (Isaa. 73:2) Uyo ciicammo ahokupali eeraka, “mi wahokiriipa nrima ni kaari nlolo khampa mwannama oohuupuwela uhoolo wa.” (Isaa. 73:21, 22) Atthunaka uyo oopuwela wiira nlattu wotampi caavanryaawe khalayi, khawamphwanela wooniheriya nifento ni Yehova.
17. a) Isiyani nasaalimu yaapankilyaawe ukati waananaawe masakha oorika muukumini wawe? b) Isiyani immwiitthucereehu? (Nwehe ciicammo ilatarato.)
17 Wakhala wiira uyo nasaalimuuyo oopuwela wiira khaalamuliya ukhala-tho mpatthani a Yehova, ayo moopuwelelwaayo yaahovira woohipica. Ukati woorika waavirihalyaawe, waakhala khampa uyo aahoona ifayita urinaaya umphiyeera Yehova. Ni mpaka uyo aheera co: “Nna va akinhiya ukhala ni weeva, uhovarelela ntata naka nonlopwana unaakeettiha niikano caa ni wahoolo unaahala ukiphwanyiha uttitthima.” (Isaa. 73:23, 24) Nalolova caka ni waniriipaka nrima, hiiva nihaana waavyaavya ukaviheriya ni Yehova. Uyo khanle ‘mwala woolipa.’ (Isaa. 73:26; 94:18) Hataa ukhalaka wiira hiiva ninanriipiha nrima ukati nkhwaawe, hiiva pooti wanturuweleehu ukhala mpatthannyaawe kontha hiiva ninaacuwela wiira uyo ri “owiitthenkaceene wiira anikavihere.” (Isaa. 86:5) Navirihaka ukati wo masakha oorika muukumini wihu, ninlamuliya uhihiyerera umwaattamela Yehova.—Isaa. 103:13, 14.
Nalolova caka nhina mminepa, nihaana umwaattamela Yehova neekurumicaka uvara miteko co mminepani (Nwehe iparaagarafu 17)
“NILIPIHACE UPATTHANIIHU NI YEHOVA” WOOHIHIYERERA
18. Nlattuni ninlamuliyeehu uhihiyerera ulipihaca upatthaniihu ni Yehova mpaka?
18 Hiiva pooti ulipihaca upatthaniihu ni Yehova woohihiyerera. Ni ninaacuwela wiira Ibiibiliya inaawuuluma iphiro ni ucuwelaca wa Yehova wiira ‘khumala.’ (Aroo. 11:33) Phimaana, hiiva khaninhala uhiyerera wiitthuca myaha ca Yehova.
19. Isiyani Isaalimu innikhuluvelihaaya?
19 Isaalimu 79:13 ineera: “Hi nikhanle apoovwiinyu ni ikhontwaa cinyu ninawuusukhurweelani mpaka ni ninawuuttottopelani mpaka.” Mwaahihiyerereke umwaattamela Nluku, nyuuva ciicammo pooti wankupaliinyu wiira nnaahala ukhitiri ulipihaca upatthaniinyu ni Nluku ni naahala ucaalihiya nimananna yahaaweherereenyu. Khampa uyo nasaalimuuyo, nyuuva pooti waneereenyu: “Nluku khanle mwalaaka ni moopolyaaka mpaka.”—Isaa. 73:26.
NCIPO 32 Rwaani wa Yehova!
a Isaalimu 73:28 Masi miiva umwaattamela Nluku ikhanle itthu yootepa ukicivela. Kihaakhaliha mwiikitthwaaka Apwiiya Akhulupale Yehova, wiira kilalye miteko caya cotheene.
b Miruku 2:6 Kontha Yehova phimphwanyiha ucuwelaca; wamalakuni wawe unankhumakhuma ucuwelaca ni ankhili. 7 Uyo nawaavaha ucuwelaca ale aneettela isariya; khanle nkhikicero naale anoonihera imaani. 8 Uyo naakhikicera iphiro ca nasariya ni naasunka mittala caale anonvaresesa. 9 Coo, unaahala ucuwela itthu yomaana, yosariya ni yooreera, nttala womaana wotheene. 10 Ucuwelaca woophwanyaka wanrimaniwaa ni ucuwela woocivela vale waroohoniwaa, 11 Moopuwelelo anaahala wuusunka ni ankhili anaahala wuukhikicera, 12 Wiira awoopole mphironi yoohiloka, caatthu anooluma citthu coohinamaana, 13 Ale anhiya weetta iphiro co wookwa aneetta iphiro cooripela, 14 Caale antteeliya nrima nlattu woopanka itthu yootakhala ni cinaacivela citthu cootakhala. 15 Ale antthara iphiro coohinamaana, ni iphiro caya cikhanle cowootha. 16 Ucuwelaca unaahala umoopola nthiyana ootakhala nrima, nthiyana mpanka citthu coohinamaana ni nooluma moolumo oocivaciva.
c Ale anviriha ukati mwinci yakhalaka niiwasiwaasi, yacukulacaka awula waariipaka nrima, atthunaka pooti wantothaaya ukaviheriya. Wiira ncuwele-tho nhina uyo mwahooyo, nwehe irevista A Sentinela N.° 1 2023.
d Isaalimu 37:29 Ale aneettela isariya phinhala ukhala watuninyani ni ankookhala mpaka.
e 1 Akorintu 10:31 Phimaana, nnaalya, nnaawurya, awula nnopanka itthu ikhwaawe, nhaana upanka citthu cotheene wiira munttitthimihe Nluku.