Khaniri veekha

1-2. a) Kontha isiyani nineereehu wiira khaninaanana masakha veekheehu? b) Isiyani inhaleehu woona nhina ula mwahoola?

NAANANAKA masakha oorika, atthunaka ninawiicoonaka khampa niri veekha nkalawani yankaani ni wariyari ipahari woovuka iphyoo cinene. Masi, hi khaninaanana ayo masakhaayo veekha. Apaapeehu owiirimu, anawoona uriipiya wihu nrima ni anaalakela unikavihera. Yehova naakhuluveliha eeraka: “Mi kinaahala wuukavihera.”—Isai. 41:10.

² Nhina ula mwahoola, ninaahala woona manannani Yehova nonikaviheraawe (1) anihoolelaka, (2) anivahaka citthu cimpheeleehu, (3) anikhikiceraka ni (4) animaalihaka. Yehova naakhuluveliha wiira hataa naananaka marikarikoni muukumini wihu, uyo khanhala uninyanyala. Uyo khanhala unihiya veekha. Phimaana, khaniri veekha.

YEHOVA NAANIHOOLELA

3-4. Manannani Yehova cinneettiheraawe? (Isaalimu 48:14)

³ Nsome Isaalimu 48:14.a Yehova khampheela wiira niihoolele veekha cihu. Vano, manannani cinaakaviheraawe apoovwaawe ala mahukwaala? Inanna imoca ukhanle ni moolumo o mbiibiliyani. (Isaa. 119:105) Nlattu wo nuulumo nawe Ibiibiliya Yehova naanikavihera ulakela upanka citthu comaana ni ukhalana makhalelo anhala uniphwanyiha utteeliya weekhweeli nenna co ni ukumi woohimala wahoolo.b Wootakihera, Yehova naaniitthuciha wiira nihaana nihiyaka usunkelana nruukwa, upanka citthu comaana ukati wotheene ni waafenta akhwiihu ninrimeehu wotheene. (Isaa. 37:8; Mabere. 13:18; 1 Pet. 1:22) Nattharaka nnyo ikano comaanannyo, ninaakhala ayari omaana, ntheli awula nantheliya omaana ni mpatthani omaana.

⁴ Uhiya commo, Yehova hohela nnuulumoni wawe ihantisi caatthu yaananne masakha oolikanaca naayo annikhumelela.c (1 Akor. 10:13; Tiya. 5:17) Nasomaka nnyo ihantisinnyo ni neettelaka muukumini wihu, cinaahala unikavihera inanna piili. Yoopacera, ninaakhitiri woona wiira khaniri veekha, atthu akhwaawe yahaanana masakha khampa ninaananeehu masi yahokhitiri utthema.(1 Pet. 5:9) Ni yonayeeli, ninawiitthuca waanana masakheehu.—Aroo. 15:4.

5. Thaapani Yehova naavarelaawe nteko wiira aneettihere?

⁵ Yehova ciicammo nawaavarela nteko mayamunna ni miyanuunu wiira aneettihere. Wootakihera, mamootoli o isirikwiitu anawootola maloko woohipicapica wiira anilipihe. Myaha cimpankaaya cinaalipihaca waamini wihu ni cinaanikavihera uhihiya ukhala owiiwanana. (Mite. 15:40–16:5) Mahumu o wanlokoni ciicammo anankavihera khula namalalyeera. (1 Pet. 5:2, 3) Ayari anaawiitthuciha asaanaaya ni anawaakavihera wuupuwela sana ni ukhalana makhalelo omaana. (Miru. 22:6) Ni mayaanuunu okhomaala mminepani anawaakavihera miyanuunu amirawo awooniheraka ntakihero nomaana, waavaha ikano comaana ni waalipiha.—Titu 2:3-5.

6. Isiyani inlamuliyeehu upanka wiira malakihero a Yehova anikavihere?

⁶ Yehova heekurumica wiira anivahe malakihero ampheeleehu. Vano, ninhala uthoonyera cani wiira ihonicivela itthu ipankilyaawe? Miruku 3:5, 6 neera: “Unkhuluvele Yehova ni nrimaa wotheene.” Napankaka commo, “Uyo naahala wookolela iphiro cihu.” Iyo maanaaya wiira naahala unikavihera unyema itafaawuti cinci ni ukhalana ukumi womaana. Ninansukhurweela Yehova nlattu woonivaha ikano cinoonihera wiira naanifenta!—Isaa. 32:8.

YEHOVA NANIKAVIHERA NI CITTHU CIMPHEELEEHU

7. Inannani cikhwaawe Yehova cinnikaviheraawe ni citthu cimpheeleehu? (Afilipo 4:19)

⁷ Nsome Afilipo 4:19.d Uhiya unikavihera nhina mminepani paahi, Yehova naacaaliha wiikurumica wihu wiira nikhalane iyoolya, ikuwo ni nipuro nookhala. (Mat. 6:33; 2 Atesal. 3:12) Khweeliini, hi ninaakhala niiwasiwaasi cinene wiira niphwanye nnyo citthunnyo, masi Yehova naanikurumica uhikhala niiwasiwaasi cinene. (Mat 6:25.) Kontha isiyani? Kontha Apaapeehu Yehova khanhala unihiya nikhalaka oothwennya. (Mat. 6:8; Mabere. 13:5) Pooti unkupaleleehu wiira uyo naahala univaha citthu cimpheeleehu.

8. Isiyani Yehova yampankenlyaawe Davidi?

⁸ Moone mananna Yehova ankavihenryaawe Davidi. Ukati Davidi waavirihaawe masakha nlattu wo woomolanihaciya, Yehova ahonkavihera nkhayi naalopwana yantthara uphwanya citthu caapheelaaya wiira akhale akumi. Oopuwelaka mananna Yehova cankavihenryaawe myaakha cotheene, uyo hantikha eeraka: “Mi kaari mmirawo ni nna co kihooluvala, masi akinapaca umoona nasariya onyanyaliya ni asaanaawe alepelaka iyoolya.” (Isaa. 37:25) Pooti ukhalaka wiira muukumini winyu motheene, nhoona mananna Yehova naakaviheraawe aswalyaawe.

9. Mahukwaala, manannani Yehova naakaviheraawe apoovwaawe yaakhumelelaka ihasara?(Nwehe ciicammo ilatarato.)

⁹ Yehova ciicammo nawaakavihera aswalyaawe yaakhumelelaka masakha. Wootakihera, ukati makristau o iseekulu yoopacera waathweelyaaya iyoolya , makristau o mapuro oovirikana yahovaherera icoolya wiira yaakavihere mayamunnaaya. (Mite. 11:27-30; Aroo. 15:25, 26) Mahukwaala, apoovu a Nluku ciicammo anaakaviherana. Caakhumenlelaka ihasara, Yehova nawaasovenriha aswalyaawe waavaha citthu cinaathwa ale caakhumelenle ihasara, khampa iyoolya, maaci, ikuwo ni mirette. Mphwinko wo mayamunna untekateka, unaalokihaca inupa co mayamunna ni Isalau co Umwene cikwanyulaciye niihasara. Aswali a Yehova woohipica anawaamaaliha ni waakavihera mminepani ale yaakhumelenle ihasara.e

10-11. Isiyani ineetthuceehu niitthu yaamwiirannyeenle Borys?

¹⁰ Yehova ciicammo nawaakavihera ale ahinonswalela. Ni hiiva ciicammo ninaaweha-weha mananna owaakavihera ale ahinonswalela Yehova. (Akalas. 6:10) Napankaka commo, ninaahala waakavihera upheela ucuwela myaha ca Yehova. Moone itthu yaamwiirannyeenle Borys diretor o icikola imoca yo Ucrania. Hataa ukhalaka wiira khaari Saahiti a Yehova, Borys anawaawacera ratta anacikola yaari Masaahiti a Yehova athoonyiheraka unamaana ni ooniheraka uhisima citthu cinkupalyaaya. Ukati Borys waalakenlyaawe utthawa ikhotto ncoko waakhalaawe wiira atthawele ncoko wookhikicerya, mayamunna yahonkavihera. Nuuwakatyaaya, Borys ahoona nkutthaano wo Nuupuwelelo ukhwa wa Yesu. Oopuwelaka itthu yaamwiirannyeenle, Borys neera: “Masaahiti a Yehova yahokiwacera ni ukikavihera. Phimaana, kinawaasukhurweela Masaahiti a Yehova.”

¹¹ Hiiva ciicammo pooti untakiheehu unakiriri waapaapeehu o wiirimu, naathoonyiheraka nifento ale anthwennya, hataa akhalaka mayamunneehu awula mena. (Luka 6:31, 36) Hiiva ninweherera wiira wiikurumica wihu waakavihera atthu upheela uncuwela Yehova ni unswalela. (1 Pet. 2:12) Hataa ahikhalaka Masaahiti a Yehova, ninaahala ukhala otteeliya nlattu wowaakavihera.—Mite. 20:35.

YEHOVA NAANIKHIKICERA

12. Manannani Yehova waakhikicera apoovwaawe otheene? (Isaalimu 91:1, 2, 14)

¹² Nsome Isaalimu 91:1, 2, 14.f Mahukwaala, Yehova naanikhuluveliha unikhikicera nhina mminepani. Uyo khanhala unhiya Sotwani ahiihaka uswali weekhweeli. (Joau 17:15) Ukati wo “masakha moolupale”, Yehova naahala umwiirannyeeha natiryaawe o waakhikicera apoovwaawe, kahi paahi nhina mminepani masi ciicammo irutthwaaya.—Apoka. 7:9, 14.

13. Manannani Yehova nonkhikiceraawe khula ntthu?

¹³ Manannani Yehova nonkhikiceraawe khula ntthu? Nlattu wo nuulumo nawe Ibiibiliya, Yehova nankavihera khula ntthu ucuwela itthu yomaana ni yoohinamaana. (Mabere. 5:14) Neettelaka ikano cimphwanyannya nnuulumoni na Nluku ninaakhala ookhikicerya mminepani ni ciicammo mwiirutthuni wihu. (Isaa. 91:4) Uhiya commo, Yehova nankhikicera khula ntthu nlattu wo nloko. (Isai. 32:1, 2) Nakhalaka naatthu anonfenta Yehova ni aneettela ikano cawe, ninaakhala oolipihiya ni ninaakhala ookhikicerya nhina wo makhalelo oohinamaana.—Miru. 13:20.

14. a) Kontha isiyani Nluku nonihiyaawe navirihaka itafaawuti? b) Isaalimu 9:10 nonikhuluveliha isiyani? (Nwehe ciicammo ilatarato.)

¹⁴ Khalayi, ikwaha cikhwaawe Yehova anaakhikicera apoovwaawe wiira ahikhwe. Masi kahi ikwaha cotheene ampanka commo. Ibiibiliya inhimya wiira itafaawuti pooti unkhumelela khula ntthu ni uwakati uhinwehereraawe. (Ekles. 9:11) Uhiya commo, Yehova aahaahiya aswalyaawe yalupatthiyaka atthunaka mpaka ukhwa apheelaka waakupaliha wiira Sotwani khanle namootha. (Jó 2:4-6; Mat. 23:34) Khampa caawiirannyeenlyaaya nnyo citthunnyo aswali a Yehova khalayi, hiiva ciicammo pooti uniirannyeela. Unookhalaru wiira Yehova khammalamaliha ulupatthiya wihu, pooti unkupaliihu wiira uyo khanhala waanyanyala ale anonfenta.g—Isaa. 9:10.

YEHOVA NAANIMALIHA

15. Manannani ninkhaleehu oomaalihiya nalompaka, nasomaka nuulumo na Nluku ni mayamunneehu? (2 Akorintu 1:3, 4)

¹⁵ Nsome 2 Akorintu 1:3, 4.h Ikwaha cikhwaawe ninaakhala ooriipiya nrima ni niiwasiwaasi. Watthunaka nyuuva nnawaanana marikariko anuuriipihani nrima cinene mpaka wiicoona ukhala veekha. Niireke haavo noona itthu inwiirani? Yehova naawoonani. Uyo kahi paahi nawoona, masi ciicammo uyo “naanimaaliha mmasakhani wihu otheene”. Manannani? Ukati ninonhimeryeehu Yehova ninlompaka, uyo naanivaha “nnema na nawe, ninvikana moopuwelelo otheene.” (Afili. 4:6, 7) Nasomaka moolumo a Yehova mbiibiliyani, ninaakhala oomaalihiya. Ciicammo, nhina nnuulumoni nawe Ibiibiliya, uyo naanithoonyera wiira naanifento, naaniitthuciha ukhala oocuwelaca cinene ni naanivaha niweherero. Yehova ciicammo nanimaaliha ni naanilipiha ukati unkhaleehu nimayamunneehu umikutthaanoni.

16. Isiyani ineetthuceehu ni itthu yaamwiirannyeenle Nata ni Priscila?

¹⁶ Itthu yaamwiirannyeenle Nata ni Priscila o Estados Unido, inawoonihera mananna Yehova novarelaawe nteko Ibiibiliya wiira animaalihe ni anilipihe. Khalayi yaholakela uthamela ncoko yaathwa anamalalyeera o Umwene. Nata heera: “Nahokhuluvela wiira Yehova naahala unikavihera.” Masi uphiya waya nipuro naathanleliyaaya, ayo yaahopacera uwerennya ni uthwennya nsurukhu. Phimaana, ayo yahoturuwela uwaani, masi nanlelo yanthwennya. Nata neera: “Mpaka kaaneekohaka kontha isiyani Nluku hinikavihenryaawe khampa caaweherereehu ni kiireke wiira ihaavo itthu ipankilyaaka yootakhala.” Nuuwakatyaaya, Nata ni Priscila yahoonanela wiira Yehova khaanyanyanle. Nata neera: “Ule ukati woorikoole Ibiibiliya yahokhala toko mpatthani oocuwelaca ni aanivaha malakihero. Uweheeha mananna Yehova cinikavihenryaawe ule ukati wo masakhoole, uhiya uweheeha masakha yaanikhumelela uhonikavihera wiitthenkaca wiira naanane masakha oohoolo.”

17. Manannani anuunu aneehaniya Helga yaamaalihiyaaya? (Nwehe ciicammo ilatarato.)

¹⁷ Mayamunna ni mayanuunu ciicammo pooti unikavihera. Manannani? Moone itthu yaawiirannyeenle anuunu Helga ankhala o Hungria. Ayo ahoviriha mwaakha cinci yaananaka itafaawuti coovirikana caawiiriha wiicoona uhikhalana ifayita. Yuupuwelaka uyo ukatyuuyo, ayo anawoona mananna Yehova caamaalihilyaawe aavarelaka nteko mayamunna. Ayo aneera: “Yehova ankikavihera ukati woocyaaka nlattu wo nteko waavaraaka, woonwacera mwanaka aawerennya ni miteko cikhwaawe. Cihovira myaakha 30, masi Yehova khahiile wiirannyeeha inatiryaawe yookilipiha. Ikwaha cinci, uyo naakilipiha avarelaka nteko ikomentaariyu coovara nrima co mayamunna. Ikwaha cinci kaanaakhela imensagem, iwarakha awula uttottopeliya ni mayamunna uwakati waapheelaaka.”

18. Ninhala waamaaliha cani akhwiihu?

¹⁸ Nihaana iparakha yontakiha Nluku naamaalihaka akhwiihu. Manannani? Hiiva nihaana nooniheraka waavilela, waamaalihaka ni naakaviheraka nicitthu cinkhalaneehu. (Miru. 3:27) Ninawiikurumica waamaaliha atthu otheene anhuva waahela nhina ale ahiri Masaahiti a Yehova. Wakhalaka wiira amwaattamananiihu anooriipiya nrima awula anaawerennya, hiiva nihaana urwaa waathotola. Ni naphiyaka ninawaaviriyana ni ninawaalipiha ni muulumo o mbiibiliyani. Nantakihaka Yehova “Nluku o mamaalihero otheene”, ninaahala ukhitiri waalipiha ni waakavihera waanana masakha mayamunneehu, masi ciicammo waakavihera ale ahincuwela ikhweeli.—Mat. 5:16.

YEHOVA KHANHALA UNIHIYA VEEKHA

19. Manannani Yehova cinniwaceraawe ni ninhala untakiha cani?

¹⁹ Yehova nawaawacera ale anonswalela. Uyo khanaahiya yaananaka masakha veekha. Khampa nyari nonwaceraawe mwanawe ninifento, Yehova ciicammo nawaawacera aswalyaawe ookhuluvelya. Uyo naaneettihera, naanivaha citthu cimpheeleehu, naanikhikicera ni naanimaaliha. Ninawaatakiha apaapeehu o wiirimu naakaviheraka ni naalipihaka akhwiihu ukati unhuvaaya. Hataa naananaka marikariko ni uriipa nrima, pooti unkupaleeleehu wiira Yehova naanikavihera. Uyo holakela eeraka: “Nhoove kontha mi kiri ni weeva”(Isai. 41:10) Ni uyo natiryuuyo, pooti unkhuluveleehu wiira Yehova khanhala unihiya veekha. Khweeliini hi khaniri veekha.