MWAHA WOOSOMIYA 27
NCIPO 79 Nwiixuttihe Awo Okhala Oolipa Murima
Mwaakavihere ale anaasomiheenyu Ibiibiliya utepa unfenta Yehova
“Nlipihace waamini winyu. . . nkhalane ikuru.”—1 AKOR. 16:13.
ITTHU INHALEEHU WIITTHUCA
Nhina ula mwahoola, ninaahala woona manannani ninhaleehu waakavihera ale anaasomiheehu Ibiibiliya ukhalana waamini ni ulipa nrima wiira ahihiye unswalela Yehova.
1-2. a) Kontha isiyani anamasoma o Ibiibiliya akhwaawe unaarikelaaya ulakela unswalela Yehova? b) Isiyani inhaleehu woona nhina ula mwahoola?
CIHAAVO citthu cuukhalihani niiwasiwaasi ukati muupuweleenyu ukhala Saahiti a Yehova? Watthunaka mwaanawoova urukunuweliya naasipattaniinyu, atthu anaavaraneenyu nteko awula amuciinyu. Awula watthunaka mooniha wiira khamwaahala ukhitiri weettela muukumini winyu ikano ca Nluku. Wakhala wiira cihowiiraneelani, khweeliini nnaahala ukhitiri waakavihera ale anaasomiheenyu Ibiibiliya waanana masukhuli phanka ayo ni ulakela unswalela Yehova mpaka.
2 Yesu naacuwela wiira iyo inanna yowooveeyo pooti unhiiha ntthu wuunuwa nhina mminepani. (Mat. 13:20-22) Uyo khaahiyerenre waakavihera ale waarikela untthara. Uyo ahaakavihera attharyaawe (1) woonelela itthu inwiiriha uhuunuwa nhina mminepani, (2) utepa unfenta Yehova, (3) ucuwela uhela nipuro noopacera itthu yo ifayita ni (4) waanana itafaawuti caya. Ninhala untakiha cani Yesu ukati wonsomiha ntthu ilivuru Mphwanye Utteeliya Uhimmala!, itthenkaciye wiira inkavihere namasoma ucuwela waakihera ikhweeli?
MUNKAVIHERE NAMASOMA IBIIBILIYA WOONELELA CITTHU CIMMWIIRIHA UHUUNUWA MMINEPANI
3. Isiyani yanrikihela Nikodemu ukhala ntthari a Yesu?
3 Nikodemu, ari nhooleli ayuuta, wahonrikela cinene ukhala ntthari a Yesu. Cinavinreene myeeri 6 Yesu nancenre ntekwaawe woolalyeera, Nikodemu phaakupaleenlyaawe wiira Yesu aari nrumiya a Nluku. (Joau 3:1, 2) Vano, Nikodemu aholakela umwiihana Yesu uhiyu, kontha “anaawoova Ayuuta.”(Joau 7:13; 12:42) Atthunaka Nikodemu anoova woomoliya nteko nlattu wookhala ntthari a Yesu.a
4. Manannani Yesu ankavihenryaawe Nikodemu ucuwelela itthu Nluku yaapheelaawe wiira apanke?
4 Nikodemu anaacuwela sana-saana malamulo, masi aampheela ukaviheriya ucuwela itthu Yehova yaapheelaawe wiira apanke. Manannani Yesu ankavihenryaawe? Uyo ahovarela nteko ukatyaawe wiira ankavihere Nikodemu uhiyu. Ni Yesu ahonhimerya woohinkhuwa-khuwa itthu yaalamuliyaawe upanka wiira akhale nttharyaawe. Uyo enre co: “Uttharuwe matampyaa, upattisiye nimaaci ni umwaamini mwaana a Nluku.”—Joau 3:5, 14-21.
5. Ninhala unkavihera cani namasoma Ibiibiliya ucuwelela itthu immwiiriha uhuunuwa mminepani?
5 Hataa ukhalaka wiira namasomihiya ibiibiliyooyo nawiiweeha rattaraatta, uyo naahala upheela ukaviheriya ucuwela itthu immwiiriha uhuunuwa nhina mminepani. Nteko unvaraawe awula woomolanihaciya naamucyaawe pooti umwiiriha uhipheela urweehela uhoolo citthu co mminepani. Phimaana, nkhale oolikaneene wiira munkavihere ule nonsomiheenyu Ibiibiliya. Nyuuva pooti unlattula wiira mwanlyaane awula uviriha ukati nkhayi ni uyo. Mwapankaka citthu nkhayi ni uyo, atthunaka nnaahala ukhitiri woonelela itthu immwiira. Munsovenrihe namasoma Ibiibiliya upanka marukunuso, kahi nlattu woopheela wuucivelihani, masi nlattu wonfenta Yehova.
6. Manannani munhaleenyu unkavihera namasoma Ibiibiliya ulipa nrima ni ulakela unswalela Yehova? (1 Akorintu 16:13)
6 Namasoma Ibiibiliya akhuluvelaka wiira Yehova naahala unkavihera ukhitiri weettela ikano co mbiibiliyani, naahala ukhalana ikuru wiira eettele ile ineetthucaawe. (Nsome 1 Akorintu 16:13.b) Ntekweenyu unaalattanaca nuukhala prusoore. Muupuwele ukati mwaasomeenyu. Prusooreni oocivelani? Atthunaka aari prusoore ookavihenreni wiicoona wiira nyuuva nnaakhitiri upanka itthu. Inanna imocaaru, namasomiha Ibiibiliya omaana khansomiha paahi citthu cinoncivela Nluku ni cihinoncivela. Uyo ciicammo naankhuluveliha ule nonsomihaawe Ibiibiliya wiira, akaviheriyaka ni Yehova, uyo naahala ukhitiri upanka marukunuso muukumini wawe. Munhala ukhitiri cani upanka commo?
MUNKAVIHERE NAMASOMA IBIIBILIYA UNFENTA CINENE YEHOVA
7. Manannani Yesu aakavihenryaawe ale yanviriyana utepa unfenta Yehova?
7 Yesu anaacuwela wiira unfenta Nluku waanhala uwiiriha attharyaawe weettela ile yeetthucaaya. Uyo aneetthuciha attharyaawe citthu caahala waakavihera wuunuwiha nifento naarinaaya Naathumwanaya o wiirimu. Wootakihera, uyo ahonlattaniha Yehova ni nyari naavaha citthu comaana asaanaawe. (Mat. 7:9-11) Pooti ukhalaka wiira atthu akhwaawe yanviriyana Yesu khayaafentiye ni miyaapaapaaya. Vano, muupuwele mananna ciiconnyaaya ukati Yesu waahimyacilyaawe ntakihero no nyari oothunku nomwaakhelela mwanawe ahaatthunile umwiiwelela. Ayo yaanoona unakiriri Yehova urinaawe naapinaatamu.—Luka 15:20-24.
8. Manannani munhaleenyu unkavihera namasoma Ibiibiliya ulipihaca upatthannyaawe ni Yehova?
8 Nyuuva ciicammo pooti unkavihera namasoma Ibiibiliya wuncerera nifento nawe ni Yehova, ukati unhimyeeheenyu makhalelo omaana a Nluku. Khula mphantte unhaleenyu unsomiha, munkavihere ucuwelela mananna uyo mwahooyo unvaranacaaya ni nifento na Yehova. Ukati wowoopela mwaha woopoliya, munkavihere woona wiira nwo woopoliyanwo unanhela nhina uyova. (Aroo. 5:8; 1 Joau 4:10) Namasomihiya Ibiibiliya oonaka wiira Yehova nanfenta, unfenta wawe Yehova unaatepa ulipa.—Akalas. 2:20.
9. Isiyani yankavihenre Michael upanka marukunuso muukumini wawe?
9 Moone itthu yaamwiirannyeenle Michael, o Indonésia. Uyo unuwihiye mwiikhweelini, masi nanlelo aari hinaaya upattisiya. Ukati waarinaawe myaakha 18, ahorwa uvara nteko wo weettiha ikaaro ilapo ikhwaawe. Nuuwakatyaaya, ahothela, masi ahaahiya amucyaawe wiira avare ntekwaawe ilapo ikhwaawe. Vano, amwaarawe ni mwaamwanawe mwanthiyana yahancera usoma Ibiibiliya ni yaaneettela citthu ceetthucaaya. Ukati anumwaane waakhwilyaaya, Michael aholakela uturuwa wiira aawacere athumwaane. Ciicammo, ahotthuna usomihiya Ibiibiliya. Ukati waasomihiyaawe mphantte 27 wo ilivuru “Mphwanye Utteeliya Uhimmala!”, nipuro nineera “Muncerere wiitthuca winyu”, nno nipuronno nahonvara nrima cinene Michael. Ukati wuupuwelaawe mananna Yehova caaryaawe ooriipiya nrima ukati waamonnyaawe mwanawe ahuvihiyaka, Michael ahancera wunla. Uyo ahosukhuru cinene woopoliya ni wahoolo ahopattisiya.
MUNKAVIHERE NAMASOMA IBIIBILIYA UNVARESESA YEHOVA
10. Manannani Yesu aakavihenryaawe attharyaawe upanka marukunuso wiira atepe unvarela nteko Yehova? (Luka 5:5-11) (Nwehe ciicammo ilatarato.)
10 Atthari oopacera a Yesu khawaarikenle uncuwelela wiira Yesu ari Mesiya aleeheriye, masi yampheela ukaviheriya woona wiira ulalyeera unaapankela mphantte unswalela Yehova. Peturu ni Anteree yaari atthari a Yesu ikhumelo nenne nokhalayi. (Mat. 4:18, 19) Ayo yaananvaresesa nakoswaaya oomenca ihopa, watthunaka yaarica nkhayi ni Tiyaku ciicammo ni Joau. (Mark 1:16-20) Ukati Peturu ni Anteree “waahiilyaaya umenca ihopa”, atthunaka yaahophwanya inanna ikhwaawe yowaalihera amucyaaya, masi woohihiya untthara Yesu. Isiyani yaawiirihile upanka marukunuso? Luka ikapiitulu 5 inawoonihera wiira Yesu ahopanka mwiiriirya waawiirihile ukhuluvela wiira Yehova anhala waawacera.—Nsome Luka 5:5-11.c
Isiyani ineetthuceehu ni mananna Yesu aakavihenryaawe attharyaawe upanka marukunuso muukumini waya? (Nwehe iparaagarafu 10)e
11. Ninhala uvarela cani nteko citthu ciniirannyenle wiira nilipihace waamini wa namasoma Ibiibiliya?
11 Hiiva khaninhala ukhitiri upanka mitikhiniho phanka Yesu, masi pooti unonhimyereehu namasoma Ibiibiliya citthu cinwiirannyeela atthu akhwaawe, cinoonihera wiira Yehova nawaakavihera ale anonswalela. Wootakihera, nyuuva nnawuupuwela mananna Yehova cookavihenryaaweni ukati mwancenreenyu woona mikutthaano? Atthunaka mwahaana nwuulumanaka apatarawiinyu mpheelaka waahimerya wiira khamunhala uvara nteko uhiyu, kontha nnopheela urwaa unkutthaanoni. Wonhimerya namasoma Ibiibiliya citthu ciwiirannyeenleni, muntaphulele mananna waamini winyu ukhanlyaaya woolipihiya ukati mooneenyu wiira Yehova anawuukaviherani nhina citthu caalakeleenyu nlattu woweesa nipuro noopacera unswalela.
12. a) Kontha isiyani ninlamuliyeehu waalattula mayamunna makhwaawe ukati unonsomiheehu namasoma Ibiibiliya? b) Munhala uvarela nteko cani Ividiyu wiira munsomihe nimananna omaana namasoma Ibiibiliya? Nhimye ntakihero.
12 Namasoma Ibiibiliya ciicammo unaahala uncivela wiiwa mananna makristau makhwaawe cirukunusilyaaya makhalelwaaya wiira yeese nipuro nopacera unswalela Yehova. Phimaana, mwaalattule mayamunna akhwaawe ukati unonsomiheenyu. Mwaalepele wiira anhimerye ule nnonsomiheenyu mananna yiitthucilyaaya ikhweeli ni apankile isiyani wiira yeese nipuro noopacera unswalela Yehova. Ciicammo nkumihe ukati wiira mmoonihere ividiyu co ilivuru “Mphwanye Utteeliya Uhimmala!”, mphantte uneera “Muncerere wiitthuca winyu”. Wootakihera, ukati woowoopela mwaha mphantte 37, nyuuva pooti uhimya itthu ineetthuceehu niividiyu ineera “Yehova khanhala uhiyerera unikavihera uphwanya citthu cinnithwaa.”
MUNKAVIHERE NAMASOMA IBIIBILIYA WAANANA MASAKHA
13. Manannani Yesu atthenkacilyaawe attharyaawe wiira yaanane ulupatthiya?
13 Yesu ahaahimerya ikwaha cinci attharyaawe wiira yanhala woomolanihaciya mpaka naasimucyaaya. (Mat. 5:11; 10:22, 36) Nahanle vakaani wiiviya, Yesu ahaahimerya attharyaawe wiira pooti waahalaaya wiiviya nlattu wonswalela Yehova. (Mat. 24:9; Joau 15:20; 16:2) Uyo ahaasovenriha ukhala oowehaweha wuulalyeerani. Wootakihera, uyo ahaasovenriha uhiwaakhulaca atthu oopheela waanyakulihanana ni uwehera ratta citthu cinuulumaaya ni cimpankaaya wiira ahihiyerere ulalyeera.
14. Ninhala unkavihera cani namasoma Ibiibiliya wiira aanane ulupatthiya? (2 Timotiyu 3:12)
14 Hiiva pooti unaakavihereehu ale anaasomaneehu Ibiibiliya wiitthenkaca wiira yaanane uthanyiya, naahimeeryaka citthu cinhalaaya uwuulumana asipatthannyaaya, atthu anaavaranaaya nteko ni amucyaaya. (Nsome 2 Timotiyu 3:12.d) Atthu anaavaranaaya nteko atthunaka pooti waathyaa nlattu woweettela ikano co mbiibiliyani. Akhwaawe watthunaka pooti wuuluma pusya citthu cineetthucihaaya Ibiibiliya. Naatthenkacaka ihinaaya uwiirannyeela itthu, anaahala ulipa yattehattehiyaka.
15. Isiyani inhala unkavihera namasoma Ibiibiliya waanana ulupatthiya naamuci?
15 Wakhala wiira ntthu nnonsomiheenyu Ibiibiliya naalupatthiya naamucyaawe, munkavihere wuupuwela kontha isiyani amucyaawe anonlupatthaaya nlattu woosoma Ibiibiliya ni Masaahiti a Yehova. Atthunaka amucyaawe anoopuwela wiira Masaahiti a Yehova aneetthuciha citthu cowoothiya awula akhanlee atthu oohinamaana. Hataa Yesu ciicammo anaanana ulupatthiya, ukhala wiira amucyaawe khawaacivela itthu yaapankaawe. (Mark. 3:21; Joau 7:5) Mmwiitthucihe ntthu nnonsomiheenyu Ibiibiliya uvilela ni uhihiyerera woopana mwaha amucyaawe ni atthu akhwaawe.
16. Ninhala unkavihera cani namasoma Ibiibiliya wuuluma citthu cinkupalyaawe nimananna omaana?
16 Wakhalaka wiira amucyaawe anaapheela ucuwela itthu ineetthucaawe, ikhanle itthu yomaana namasoma Ibiibiliya uhaahimerya citthu cotheene ikwaha imoca. Apankaka commo, naahala waakavihera upheela unviriyana saana, uhiya waanyoonyiha ni mpaka uhipheela ucuwela-tho citthu cinkupalyaawe. Phimaana, munkurumice ntthu nnonsomiheenyu Ibiibiliya wuuluma citthu cinkupalyaawe nimananna omaana ni anhala unkavihera ukhitiri wuulumana-tho nkwaha nkhwaawe. (Akol. 4:6) Atthunaka pooti waahalaawe waalattula amucyaawe uweha myaha cikhwaawe nsayitini wihu jw.org. Iyo yanhala wiiriha waacuwela Masaahiti a Yehova phaapani ni ulakela isiyani yaahalaaya wiitthuca.
17. Munhala unkavihera cani namasoma Ibiibiliya ukhitiri waanana citthu cowoothiya cinwuuluma Masaahiti a Yehova? (Nwehe ciicammo ilatarato.)
17 Nyuuva pooti uvarela nteko mphantte uneera “Perguntas Frequentes” wiira munkavihere namasoma Ibiibiliya ucuwela waakhula nimananna omaana makoho anhalaawe ukohiya naamucyaawe awula naatthu naavaranaawe nteko. (2 Tim. 2:24, 25) Uhiya commo, nvarele nteko mphantte uneera “Atthu akiina aneera” nliivuru Mphwanye Utteeliya Uhimmala! Munkurumice namasoma Ibiibiliya wiitthenkaca mananna owaahimerya atthu citthu cinkupalyaawe. Nhihiye unkavihera uphwanya mananna omaana wiira aahimeerye itthu inkupalyaawe. Ayo manannaayo, anaahala unkavihera namasoma Ibiibiliya waahimerya atthu akhwaawe citthu cinaaminnyaawe.
Munkurumice namasoma Ibiibiliya wuuluma citthu cinkupalyaawe. (Nwehe iparaagarafu 17)f
18. Munhala unsovenriha cani namasoma Ibiibiliya wuuluma citthu cinkupalyaawe wuulalyaani? (Matewus 10:27)
18 Yesu ahaaruma eetthucyaawe waalalyeera ihapari comaana atthu otheene. (Nsome Matewus 10:27.) Wakhalaka wiira namasoma Ibiibiliya naapacera ulalyeera nkhayi ni mayamunna, nawoona ukaviheriya ni Yehova ni nawiitthuca unkhuluvela. Manannani nyuuva nnohaleenyu unkavihera namasoma Ibiibiliya upanka commo? Yahimiyaka wanlokoni ikampanya yoolalyeeriya, munkavihere namasoma Ibiibiliya ucuwela isiyani inlamuliyaawe upanka wiira akhanle namalalyeera. Munhimerye kontha isiyani mayamunna menci anoonaaya uhirika upacera ulalyeera ukati wokampaanya. Itthu ikhwaawe, atthunaka naavahiya upanka mphantte umikutthaanoni ceeriyari isumana. Ukati unhalaawe utthenkaca mwahooyo, uyo naahala wiitthuca wuuluma itthu inkupalyaawe alipaka nrima.
MMOONIHERE NAMASOMA IBIIBILIYA WIIRA NYUUVA NNAAKUPALI WIIRA UYO NAAPHEELA UNTTEELIHA NRIMA YEHOVA
19. Manannani Yesu oonihenryaawe wiira aanaakhuluvela attharyaawe ni ninhala untakiha cani?
19 Hinaaya urwaa wiirimu, Yesu aahowiirela eetthucyaawe wiira wanihukuni aanhala uturuwela-tho ukhala nkhayi naayo. Ayo khayaacuwela wiira Yesu apheela waahimerya wiira ayo yaanhala urwaa ukhala nkhayi nuuyo wiirimu. Uhiya commo, uyo aweheeha paahi ukhuluvelya waya, uhiya makoho yaakhalanaaya nlattu woohiiweeha. (Joau 14:1-5, 8) Uyo ancuwela wiira eetthucyaawe yaalamuliya uviriha ukati wiira acuwele citthu cikhwaawe, khampa niweherero no wiirimu. (Joau 16:12) Khampa Yesu, hiiva ciicammo pooti wanaathoonyereehu anamasoma Ibiibiliya wiira ninaacuwela wiira anaapheela untteeliha nrima Yehova.
Namasoma Ibiibiliya ahipicapiceke waahimeerya atthu citthu cinkupalyaawe, unkhuluvela wawe Yehova unaatepa wuunuwa.
20. Manannani anuunu amoca o Malawi yoonihenryaaya wiira yanankhuluvela namasomaaya Ibiibiliya?
20 Nihaana ukupali wiira namasoma Ibiibiliya naapheela upanka itthu yomaana. Nwehe itthu yaawiiranyeenle anuunu amoca ankhala u Malawi, aneehaniya Chifundo. Ayo yahopacera unsomana Ibiibiliya nthiyana mmoca neehaniya Alinafe, aari nkatolika, yavarelaka nteko iliivuru Mphwanye Utteeliya Uhimmala! Umalihiya waya usomiya mphantte 14, anuunu Chifundo yahonkoha Alinafe isiyani yoonelaawe waaswalela attontto. Alinafe wahontteela nrima nlattu wonikoho ni ahaakhula co: “Iyo ikhanle itthu inlakelaawe khula ntthu!” Anuunu Chifundo yahopacera wuupuwela wiira yaalamuliya weemelela usoma Ibiibiliya na Alinafe. Masi, yooniheraka uvilela, ayo khayaahiile unsomana ni yanaaweherera wiira nuuwakatyaaya, aanhala wiiweeha saana mwahooyo. Uvira waya myeeri, anuunu Chifundo yahonkoha-tho, eettaka mphantte 34: “Manannani usoma winyu Ibiibiliya ni uncuwela winyu Nluku eekhweeli, Yehova, cuukavihenryaayani?” Anuunu Chifundo anaahimya mananna Alinafe caakhunlyaawe. Ayo aneera: “Uyo ahohimya ipontu cinci cofayita. Nhina nnyo ipontunnya, uyo aheera wiira Masaahiti a Yehova khampanka citthu Ibiibiliya cinkhottiihaaya.” Nuuwakatyaaya, uyo ahohiya waaswalela attontto ni ahopattisiya.
21. Ninhala unkurumica cani namasoma o Ibiibiliya ulakela unswalela Yehova?
21 Hataa ukhalaka wiira Yehova ‘phinoonuwiha’, hi nihaana nrintti wowaakavihera anamasoma Ibiibiliya urwaa uhoolo. (1 Akor. 3:7) Upanka yotheene inkhitiriihu, uhiya paahi umwiitthuciha itthu Nluku impheelaawe wiira apanke. Hiiva ninlamuliya waakavihera ulipihaca nifento nirinaaya ni Yehova. Ciicammo ninawaakavihera ulipihaca nifento naya ni Yehova, yahooleliheraka citthu co mminepani muukumini waya motheene. Ni ninaawiitthuciha unkhuluvela Yehova yaananaka masakha. Naattottopelaka unkhuluvela waya Yehova, ninawaakavihera ciicammo uhihiya weettela malakihero a Yehova muukumini waya ni ukhala atthu oolipa nhina mminepani.
NCIPO 55 Muhiwoove, Atthu Awo!
a Cinavinreene myaakha miili Nikodemu nuulumaniyeene ni Yesu, uyo nanlelo aari nkhulupale o itiripunaali ya ayuuta. (Joau 7:45-52) Ireferenciya imoca inaahimya wiira Nikodemu akhanle ntthari Yesu nakhwileene.—Joau 19:38-40.
b 1 Akorintiyu 16:13 Nhiitthaale, nkhalane waamini woolipa ni nkhale okuru.
c Luka 5:5 Simau ahomwaakhula, eeraka: “Mwiitthucihi, nihovara nteko uhiyu wotheene, masi khaniphwanyale itthu, masi ukhala wiira nhohimya kinaattikhela matthavyaayo.” 6 Vano, uttikhela waya matthavyaayo, yahovara ihopa cinci mpaka matthavi yahopacera waanyuwaca. 7 Vano, yahowiihanaca atthu yaavaranaaya nteko yaari ikalawa ikhwaawe, wiira yaakavihe ni ayo yahowa, yahocariha ikalawa caya mpaka cahopacera uttittha mmaacini. 8 Vano, Simau Peturu, woona wawe ile itthwiile, ahokhoroma uhoolo wa Yesu, ni aheera: “Ncuse va Pwiiya, ukhala wiira miiva kinamatampi.” 9 Kontha uyo naatthu yaari nkhayi nuuyo, yahokhala ootikhinihiya nlattu wohopa cinci yaavanryaaya, 10 ni iyo itthwiiyo yahowiirannyeela Tiyaku ni Joau, asaana a Sepeteu, aavaranaawe nteko Simau. Masi Yesu ahomwiirela Simau: “Uhoove ukhuma nenna co ni mpaka wahoolo nnhala waavariha atthu.” 11 Vano, yahokusa ikalawannyo ni yahokumihera vate ni yahohiya citthu cotheene ni yahontthara.
d 2 Timotiyu 3:12 Khweeliini, atthu otheene ale ampheela ukhala yanswalelaka Nluku, wamoca ni Yesu Kristu, ciicammo anaahala ulupatthiya.
e ILATARATO YO: Peturu nkhayi naakhunanawe anaahiya nteko woomenca ihopa wiira antthare Yesu.
f ILATARATO: Anuunu amoca anantthenkaca namasoma Ibiibiliya wiira akhitiri wuuluma citthu cinkupalyaawe.