MWAHA WOOSOMIYA 30
NCIPO 97 Masu a Muluku Anninikhaliherya Okhala Akumi
Niireke pooti uhinhiyerereehu wiitthucera ikhweeli coopacera neetthucileehu mbiibiliyani?
“Phimaana, akinhiya uwuupuserani nnya citthunnya, hataa ukhalaka wiira nyuuva nnaacuwela ni nholipa nkweelini.”—2 PET. 1:12.
ITTHU INHALEEHU WIITTHUCA
Nhina ula mwahoola, ninaahala wiitthuca manannani ikhweeli coopacera ciitthucileehu mbiibiliyani cinhalaaya unikavihera.
1. Manannani ikhweeli coopacera mwiitthucileenyu cirukunusilyaaya makhalelweenyu?
IKHWEELI coopacera ciitthucileehu mbiibiliyani cihorukunusa makhalelweehu. Wootakihera, ukati mwiitthucileenyu wiira ncina na Nluku nikhanle Yehova nyuuva mwahopacera umpatthanana. (Isai. 42:8) Wiitthuca winyu itthu ineerannya ntthu akhwaaka, nhohiya ukhala niiwasiwaasi muupuwelaka wiira amuciinyu akhwile anaahuva. (Ekles. 9:10) Ni wiitthuca winyu wiira ituninya inaahala ukhala ipeephoni, nhohiya ukhala niiwasiwaasi ni mananna cinhalaaya ukhala ukumiinyu wahoolo. Ni nnaakupali wiira khannohala ukhala myaakha 70 awula 80 paahi nuukhwa, masi nnohala ukhala mpaka.—Isaa. 37:29; 90:10.
2. Kontha isiyani uneereehu wiira hataa makristau ookhomaala nhina mminepani pooti cinaakaviheraaya ikhweeli coopacera co mbiibiliyani? (2 Peturu 1:12, 13)
2 Hi khaninhiya uphwanyera ifayita ikhweeli coopacera ciitthucileehu. Nhina iwarakha yo nayeeli, apostolu Peturu ahowantikhela makristau yaari “oolipa nhina mminepani”. (Nsome 2 Peturu 1:12, 13.a) Ukhala wiira ule ukatyuule yahaavo atthu yeetthuciha citthu cowoothiya ni yaapanka citthu cootakhala yaamananiha umalamaliha uswali weekhweeli. (2 Pet. 2:1-3) Peturu apheela waalipiha mayamunna wiira aakavihere waanana woopopihaciya. Vano ahowuupusera citthu coopacera ceetthucilyaaya, nnyo citthunnyo cahaakavihera ukhala ookhuluvelyaa mpaka waakhwilyaaya.
3. Ntakiheroni ninnikavihera woona wiira ikhweeli coopacera co mbiibiliyani cinawaakavihera mpaka makristau ookhomaala nhina mminepani?
3 Hataa ukhalaka wiira ninaavira myaakha cinci ninswalelaka Yehova, hiiva nanlelo pooti uneetthucereehu ikhweeli coopacera neetthucileehu mbiibiliyani. Muupuwele co, mwiitthucihi mmoca oocuwela waapyaaca nkhayi nuule nomwiitthucihaawe, atthunaka ayo anaavarela nteko ingretiyenti cimocaaru wiira acivihace iyoolyaaya. Masi ukati unvirihaaya avarelaka nteko nnyo ingretiyentinnyo, unankavihera mwiitthucihi uvarela nteko nimananna makhwaawe wiira atepe uciviha iyoolyaawe. Inanna imocaaru, ukhuma nenne nimpattisiyeehu unawoonannyaa wiira makhalelweehu ni mirintti cinkhalaneehu cinaavira citepaka wuncereryaana. Masi wuupuwela ikhweeli coopacera niitthucileehu cinaanikavihera mahukwaala. Vano nttwee noone ikhweeli tthaaru neetthucileehu mbiibiliyani ni isiyani makristau ookhomaala inlamuliyaaya wiitthuca.
YEHOVA KHANLE MUMPI
4. Ucuwela wiira Yehova khanle mumpi, ukikavihenre cani?
4 Hi ninaacuwela wiira ituninya ni citthu cotheene cinooneehu cumpiye ni ncuwelaci okuru. Ibiibiliya ineera “ule umpile citthu cotheene khanle Nluku.” (Mabere. 3:4) Masi hiiva pooti uniitthucereehu citthu cinci ni ila ikhweeli yoopacereela. Nlattu woonumpa Yehova naanicuwela sana-sana. Uyo ciicammo naakhala niiwasiwaasi ni naacuwela isiyani ikhanle yomaana para hiiva. Vano ucuwela wiira Yehova khanle mumpi uhorukunusa makhalelweehu ni nihoonelela wiira ukumiihu uhaana ifayita.
5. Ikhweelini co mbiibiliyani cinnikavihera ukhala owiiyeviha? (Isaiya 45:9-12)
5 Ucuwela wiira Yehova khanle mumpi ciicammo unaanikavihera ukhala owiiyeviha. Wootakihera, ikwaha imoca Jó aheelattaniha naatthu akhwaawe. Wiira ankavihere, Yehova ahomuupusera wiira uyo ari Mpattusi okuru cotheene. (Jó 38:1-4) Niitthu Yehova amuupusenryaawe Jó ahoona wiira citthu cotheene Yehova cimpankaawe cikhanle coohipahuwa. Ooniheraka wiira apinaatamu khaarina ukhulupale umpwaha Nluku, porofeeta Isaiya hantikha co: “Niireke wiira uloko unaamwiirela ule nopanka myaapu, ‘Isiyani impanka?’”—Nsome Isaiya 45:9-12.b
6. Ukatini unreeraaya wuupuwelela ucuwelaca ni ikuru ca Mpattusi? (Nwehe ciicammo ilatarato.)
6 Ukati nkristau untepaawe ukhala oocuwelaca, uyo pooti upacera wiikhuluvela uhiya utotha malakihero o mbiibiliyani. (Jó 37:23, 24) Yiirannyaaka iyo, ikhanle itthu yomaana nkristau weemela ni wuupuwela mananna ucuwelaca ni ikuru ca Mpattusi cikhanlyaaya coohilikananiya. (Isai. 40:22; 55:8, 9) Ni ayo manannaayo, ucuwela wiira Yehova phikhanle Mpattusi unaahala unkavihera uhihiyerera ukhala ntthu owiiyeviha ni ucuweleeha wiira moopuwelelo a Yehova phitepile ukhalana ifayita uvikana moopuwelelwaawe.
Isiyani inhala unikavihera uwehera saana mananna cinoopuweleehu? (Nwehe iparaagarafu 6)g
7. Isiyani yaapankilyaaya anuunu Raela wiira atthune malakihero ophiyaaru?
7 Wuupuwela wiira Yehova khanle mumpi uhonkavihera Raela nokhala u Eslovania, utthuna malakihero ophiyaaru o mumphwinkoni. Uyo neera: “Ikwaha cikhwaawe wankirikela utthara malakihero yaavahaaya mayamunna anhoolela mphwinko. Wootakihera mi kahoona ihapari yo mphwinko wo mahumu unhoolela nummeru 8 yo 2023. Hataa ukhalaka commo, ikwaha yoopacera kamoonnyaaka munna orori apankaka mwaha, kahokhala oosanka. Vano mi kahonlompa Yehova wiira akikavihere utthuna ayo marukunuswaayo. Nlattu woocuwela wiira Yehova khanle Mpattusi o citthu cotheene, Raela hoona wiira Yehova naacuwela weettihera mphwinkwaawe nimananna omaana. Niireke wiira nyuuva ciicammo unawuurikani utthara malakihero? Itthu yooreera upanka ukhanle wiiyeviha ni ukumiha ukati wiira muupuwele ikuru ca mumpi.—Aroo. 11:33-36.
NLUKU KHANKUMIHERA UHUVA
8. Kontha isiyani yaaryaaya itthu yomaana wiitthuca wiira Nluku khankumihera uhuva?
8 Kontha isiyani Nluku naahiya ukhumelelaka uhuva? Nlattu woohicuwela waakhuliya waya nna nikohonna, atthu enci ananviruwela Nluku ni khankupali wiira uyo haavo. (Miru. 19:3) Nyuuva nheetthuca wiira uhuva unkhumelela nlattu wo itampi, kahi wiira Yehova hinwaana. (Ekles. 8:9) Ciicammo nheetthuca wiira uvilela wa Yehova unaawiiriha atthu imiliyau cene uncuwela ni woonenela mananna uyo cinhalaawe umaliha uhuva mpaka. (2 Pet. 3:9, 15) Nnya ikhweelinnya cihoomaalihani nyuuva ni ciholipihaca upatthaniinyu ni Yehova.
9. Ukatini wooreera wuupuwela itthu immwiiriha Yehova uhiya ukhumelelaka uhuva?
9 Hi ninaacuwela wiira ninlamuliya ukhala oovilela ninwehereraka Yehova umalamaliha uhuva. Masi ukati hiiva awula amuciihu unaananaaya masakha, pooti wuupuwela wiira Yehova naapica umaliha. (Habak. 1:2, 3) Ciirannyaaka nnya citthunnya ikhanle itthu yomaana wuupuwela itthu immwiiriha uhiyerera ukhumelelaka uhuva.c (Isaa. 34:19) Ni ciicammo hiiva pooti wanoopuweleleehu itthu Yehova inaapheelelaawe apinaatamu wiira amalihe uhuva.
10. Isiyani inaakavihera anuunu Anne uhikhala ooriipiya nrima cinene nlattu wookhweliya anumwanaya?
10 Ucuwela ikhweeli nhina uhuva pooti unikavihera uvilela. Anuunu amoca aneehaniya Anne ankhala u Mayotte aneera: “Myaakha vakaani civinre kihokhweliya naamaama, ni iyo ihokiriipiha nrima cinene. Masi mi akinhiya utotha wuupuwelela wiira Yehova khankumihera uhuva. Uhiya commo, uyo nawoona ukati woopheela umaliha uhuva ni uwunweleliha atthu otheene. Wuupuwela nnya ikhweelinnya, unaakikavihera ukhalana nnema ninci.”
11. Ucuwela itthu immwiiriha Yehova uhiya ukhumelelaka uhuva unnikavihera cani?
11 Ucuwela kontha isiyani Nluku novilelaawe ni nohiyereraawe uhuva, unaanikavihera uhihiyerera ulalyeera. Apostolu Peturu ahohimya wiira uvilela wa Yehova unaawiiriha atthu enci uttharuwa ni woopwa. Uyo ciicammo hantikha co: “Muupuwela inannani yaatthu nnolamuliyeenyu ukhala, munlamuliya ukhala atthu owaarya ni onswalela Nluku.” (2 Pet. 3:11) Inanna imoca yowoonihera unswalela Nluku ukhanle ulalyeera. Khampa apaapeehu, hi ninawaafenta atthu ni nimpheela wiira atthu otheene aphwanye ukumi woohimala upeephoni. Yehova khanhiya waavaha ukati atthu o ncoko unkhaleenyu wiira answalele ni nyuuva nhaana iparakha yoovara nteko nkhayi ni Nluku ni waakavihera atthu enci wiitthuca citthu cinhala wiirannyaa uhoolo.—1 Akor. 3:9.
HI NINKHALA “MAHUKU OKHICERA”
12. Ucuwela wiira ninkhala “mahuku ookhicera” unaaniiriha ukupaleela isiyani?
12 Ibiibiliya inaahimya mananna apinaatamu yaahalaaya ukhala “wuukhiceroni mahuku.”(2 Tim. 3:1-5) Nawehaka makhalelo apinaatamu, ninawoona wiira inatiri co mbiibiliyani cinawiirannya. Ucuwela iyo ikhweeliiyo, unaanikavihera ukhuluvela nuulumo na Nluku.—2 Tim. 3:13-15.
13. Nuupuwelaka ntakihero naahimilyaawe Yesu nhina Luka 12:15-21, isiyani ninlamuliyeehu wiikoha?
13 Ucuwela wiira ninkhala mahuku ookhicera unaanikavihera ukhala atthu oohiitthaala. Nhina Luka 12:15-21d Yesu ahohimya ntakihero wiira aniitthucihe kontha isiyani ninlamuliyeehu uhoolelihera citthu comaana. (Nsome). Kontha isiyani nlopwana thaciri eehaninyaawe Nlolo? Kahi nlattu wo citthu caarinaawe, masi nlattu woohoolelihera citthu cootakhala. Uyo ahothotokanihaca mihakhu cawe, uhiya uthotokanihaca mihakhu uhoolo wa Nluku. Kontha isiyani upanka iyo ikhanlyaaya itampi Yuulupale? Nluku ahomwiirela co: “Ula uhiyuula weeva unaahala ukhwa.” Isiyani nno ntakiheronno ninniitthucihaaya? Unhaleela ukati vakaani wiira umalamalihiye ula ulumwenkuula. Phimaana, ninlamuliya wiikoha co: Kiireke mipika kiihelenlyaaka cinawoonihera wiira kintthu oohiitthaala? Mipikani kinaakurumicaaka asaanaaka ukhalana? Mi kinaavarela nteko ikuru caka, ukatyaaka wiira kithotokanihace mihakhu co ila ituninyeela uhiya uthotokanihaca mihakhu wiirimu?’
14. Kontha isiyani unaareera wuupuwela citthu cinoonihera wiira niri mahuku ookhicera ni ntakihero na Miki ninoonihera cani iyo?
14 Wuupuwelela wiira ninkhala mahuku ookhicera pooti urukunusa makhalelweehu. Iyo phiitthu yaawiirannyenle anuunu aneehaniya Miki. Ayo aneera: “Umalihawaka usoma, mi kaapheela ukhala namasomasoma onama. Iyo phiitthu yaapheelaaka. Ni ciicammo kahaana mpika wookhala namakavihera o mapuro ampheeliya anamalalyeera. Masi asipatthannyaaka yahokiirela wiira kaalamuliya uwehacera wakhala wiira kanhala ukhitiri uvaresesa miteko coomiili ni yahokuupusera wiira upeephoni kinaahala ukhala mpaka kisomasomaka khula inama kimpheelaaka. Vano mi kaholakela upanka ikuurusu yaahala ucisa ukati vakaani. Ni ala manannaala, mi kahokhitiri uvaresesa nteko weepiyoneeru owiicaaverya. Ni nuuwakatyaaya, mi kahorwaa ukavihera ncoko waapheeliya anamalalyeera we Equador.” Mahukwaala, anuunu Miki nkhayi naawannyaya ankavihera khampa mootoli osirikwiitu iyo ilapweeyo.
15. Manannani ntakihero na Tiyaku ninooniheraaya wiira khaninlamuliya uhiya waalalyeera atthu? (Nwehe ciicammo ilatarato.)
15 Wuupuwela wiira niri mahuku ookhicera unaanikavihera ulalyeera woohiitthaala hataa ukhalaka wiira atthu akhwaawe khantthuna wiiwa. Ikhweeli ukhalaka wiira atthu anawaakakhaniha makhalelwaaya. Moone itthu yaamwiirannyeenle Tiyaku nhimaawe Yesu. Uyo ahomoona Yesu uunuwaka, akhalaka Mesiya ni mwiitthucihi hinlikananiya. Hataa ukhalaka commo, cahovira myaakha cinci Tiyaku hinaaya ukhala ntthari a Yesu. Vano wunwelelihiya wawe Yesu, Tiyaku ahokhala ntthari eekurumica cinene.e (Joau 7:5; Akalas. 2:9) Phimaana, nhoocye waahimerya amuciinyu ni atthu ankhala ncokweenyu ahinaaya woonihera upheela wiitthuca ikhweeli. Atthunaka itthu nnaahimeeryeenyu nna coo, pooti waakavihera uhoolo awula ukati unhalaaya upacera masakha moolupale.f
Isiyani inhala unikavihera uhihiya waalalyeera amuciihu ahinonswalela Yehova? (Nwehe iparaagarafu 15)h
NHIHIYERERE UVAHA IFAYITA IKHWEELI YEHOVA CINWUUPUSERAAWENI
16. Manannani icoolya co mminepani cintthenkaciya cinookaviheraayani? (Nwehe ciicammo Ikwaaturu ineera “nvarele nteko ikhweeli co mbiibiliyani wiira mwaakavihere akhwiinyu.”)
16 Icoolya co mminepani cinaakheleehu cintthenkaciya wiira caakavihere atthu ahincuwela citthu cinci co mbiibiliyani. Wootakihera, myaha cuulupale cimpankiya umikutthaanoni co wiimaleloni isumana, irevista cinkawiya wuulalyeerani ni ividiyu cikhwaawe cimphwanyannya nhina jw.org cipankiye wiira caakavihere ale ahikhanle masaahiti a Yehova. Hataa ukhalaka commo, nnyo icoolya co mminepani ca Yehova nnyo cinaanikavihera. Nnyo cinaanikavihera wuncerera upatthaniihu, ulipihaca ukhuluvela wihu Ibiibiliya ni cinaanikavihera ukhala eetthucihi omaana.—Isaa. 19:7.
17. Ukatini unreeraaya weemela ni wuupuwela ikhweeli coopacera co mbiibiliyani?
17 Hi nikhanle masaahiti a Yehova, unaanitteela nrima naakhelaka malakihero ophiyaaru. Masi ciicammo ninaatepa uvaha ifayita cinene ikhweeli coopacera ciniirihile wiitthuca ikhweeli. Wakhalaka wiira hiiva unaanirika uhiya weettela moopuwelelweehu wiira nitthare malakihero o mumphwinkoni, ninlamuliya wuupuwela wiira Mpattusi o citthu cotheene phinhoolela mphwinko. Nakhalaka wiira hiiva awula mmuciihu naaviriha itafaawuti, ikhanle itthu yomaana wuupuwela kontha isiyani Mpattusi nohiyereraawe ukhumelelaka uhuva. Nathanlaka mananna ooviriha ukatiihu awula citthu coohala uthuma-thuma, ninlamuliya ukhala atthu oohiitthaala ni wuupuwela wiira ninkhala mahuku ookhicera. Wuupuwela iyo inanneeyo iyoolya yoominepani Yehova nonivahaawe inaahala unikavihera ukhala atthu oolipa nhina mminepani ni unikurumica ukhala atthu ootepa ukhala oocuwelaca.
NCIPO 95 Nthuko unaavira watepaka woonnya
a 2 Peturu 1:12 Iyo itthwiiyo phinkiiriha miiva ikwaha cotheene uwuupuserani nnya citthunnya, hataa ukhala wiira nyuuva nnaacuwela ni nri oolipa nhina ikhweeli ciitthucileenyu. 13 Masi, nanlelo kinarina ila irutthwiila, kinoona ukhala itthu yomaana uwuupuserani nhina ikano cinoovahaakani.
b Isaiya 45:9 Hotakhaliya ule nonnyakulihanana Mumpyaawe; niireke avarakacaka uloko woohinikula, hataa ukhalaka wiira vathi va ahaavo makula! Uloko unaamwiirela ule maayoopanka iyoopwe co: “Umpanka isiyani vaa?” Awula niireke wiira ile impankiya pooti uwiirela: “Weeva khurina matata?” 10 Hotakhaliya ule nowiirela athumwaane: “Isiyani impheeleenyu ukhumeleliha?” Ni nowiirela athiyana: “Nnoyara isiyani?” 11 Yehova, khanle Owaarya o Isarayeli ni ule wumpileni, neera co: “Kiireke wiira nyuuva nnopheela ukikohakoha citthu ciirannyeele ni nnopheela ukivaha malamulo nhina asaanaaka ni citthu cipankilyaaka nimatataaka? 12 Mi kihompa ituniya ni watuniyani va kihomumpa pinaatamu wiira akhale. Kihaatala irimu ni matataaka ni kinawaavaha malakihero anakhotto otheene o wiirimu.”
c Nwehe mwaha uneera “Por que todo o sofrimento acabará em breve?”, nhina irevista A Sentinela o 15 o Maio 2007 ipaagina 21 ni 25.
d Luka 12:15 Vano, Yesu ahowiirela atthu otheene: “Ratta, ni nhiitthaale, wiira nnyeme ukhala atthu ookhalana ikhwilu, kontha hataa ukhalaka wiira ntthu haana mihakhu cinci, khankhalana ukumi nlattu wo citthu cirinaawe.” 16 Vano, Yesu aahaahimyeera nlattanihero nimoca, eeraka: “Nlopwana mmoca thaciri, aahoruwerya venci. 17 Vano, uyo nlopwanooyo ahopacera wuupuwela, eeraka: ‘Akirina nipuro noosunka icoolya caka, kinhala upankani?’ 18 Uyo aheera: ‘Kinaahala ukwanyulaca makhupi otheene kirinaakaayo ni kinaahala uteka moolupale oovikana ala, kinaahala uhela icoolya cotheene kiruwenryaaka nimihakhu caka cotheene,’ 19 ni kinaahala wiiciirela: Weeva uhaana citthu cinci cinhala utosera myaakha cinci. Umumuleke, ulyeeke, uwuryeke ni wiilaweke.’ 20 Masi Nluku ahomwiirela: ‘Nlolo, ula uhiyuula unaahala ukhwa, vano tipani nohala uhalana mihakhu caa?’ 21 Iyo phiitthu immwiirannyeela ntthu khanle thaciri ni citthu cowatuninyani, masi hikhanle thaciri wamiithoni wa Nluku.”
f Nwehe mwaha uneera “Isiyani hiiva nincuweleehu mananna Yehova cinhalaawe waahukhumu atthu?” Nhina Ukhalenla o Maio 2024 ipaagina 8-13.
g ILATARATO: Humu mmoca naahimya moonelwaawe, masi mahumu makhwaawyaayo kankupaleela. Nuuwakatyaaya, naaweha wiirimu woocara itthonttwa ni nawuupuwela ikuru ni ucuwelaca wa Mpattusi. Uyo naacuwelela wiira itthu Yehova inoopuwelaawe phitepile ukhala ifayita uvikana moopuwelelwaawe.
h ILATARATO: Ukati umpankaaya usoma wo veekha, anuunu amoca anaawehacera citthu cinoonihera wiira ninkhala mahuku ookhicera. Iyo inaawiiriha waalikarela anuunwaaya ni waalalyeera.