MWAHA WOOSOMIYA 31
NCIPO 111 Citthu cinnitteeliha nrima
Nyuuva nheetthuca mananna ookhala ootteeliya?
“Kiheetthuca ukhala ootteeliya hataa kikhalaka ni mananna oovirikana.”—AFILI. 4:11.
ITTHU INHALEEHU WIITTHUCA
Nhina ula mwahoola, ninaahala wiitthuca mananna oophwanya utteeliya cinene wakhalaka wiira ninawoonihera ukhala atthu oosukhuru, owiiyeviha ni uhihiyerera wuupuwela citthu Yehova cikhuluvelihilyaawe upanka uhoolo.
1. Utteeliya maanaaya isiyani ni isiyani ihimphwanyiha utteeliya?
NYUUVA nnaatteeliya niitthu irineenyu? Atthu akhwaawe anaatteeliya nrima nicitthu cirinaaya, kontha anaavaha ifayita citthu comaana Yehova aavahilyaawe. Ayo khanriipiya nrima nlattu wo itthu ihirinaaya, uhiya commo, anaakhala ootteeliya ni ninnema. Phimaana, hataa nikhalaka ootteeliya nicitthu cirineehu, iyo khinthoonyera wiira khaninhala ukhala niiwasiwaasi muukumini wihu. Wootakihera, nkristau ciicammo naatotha ukati wiira alalyeere. (Aroo. 12:1; 1 Tim. 3:1) Hataa ukhalaka commo, uyo nkristauuyo khanhiya ukhala ootteeliya hataa ntekwaawe woolalyeera uhinkhumelaka saana.
2. Kontha isiyani ikhanlyaaya itthu yowoopiha ukhala atthu ooriipiya nrima?
2 Wakhalaka wiira khanintteeliya nicitthu cirineehu, hiiva pooti upacera ulakela itthu yoohala upanka nimananna oohinamaana. Wootakihera, ale ahintteeliya ni citthu cirinaaya, anaavara nteko cinene ni mpaka uhikhitiri ukhalana ukati woohala umumula. Wooriipiha nrima, mpaka makristau makhwaawe ahennya nsurukhu ni citthu cikhwaawe caapheelaaya. Ayo atthunaka yuupuwela co: ‘Ila yaalamuliya ukhala yaawaka. Mi kinlamuliya ukhalana ila kontha akimala waavyaavya ukati mwinci awula kinaacisa ula nsurukhuula ni kinaahala uliva ukati nkhwaawe.’ Masi wo khula inanna yo winnya khinoncivela Yehova. (Miru. 30:9) Atthu akhwaawe ahohiya unswalela Yehova nlattu woohivahaceriya mirintti mumphwinkoni wa Yehova. (Akalas. 6:9) Kontha isiyani nswali a Yehova aahalaawe wuupuwela commo? Itthu immwiiriha, atthunaka pooti ukhalaka wiira ntthuuyo hohiya ukhala ootteeliya ni citthu cirinaawe.
3. Isiyani ineetthuceehu nhina Afilipo 4:11, 12?
3 Otheene cihu pooti wankhaleehu ootteeliya. Apostolu Paulu hantikha co: “Kiheetthuca ukhala ootteeliya hataa kikhalaka ni mananna oovirikana.” (Nsome Afilipo 4:11, 12.a) Apostolu Paulu antikhile ala moolumwaala natthukiye. Hataa ukhalaka commo, uyo khaahiile ukhala ootteeliya. Uyo aheetthuca itthu yaamwiirihile ukhala ootteeliya. Neekurumicaka wiira nikhale ootteeliya, moolumo apostolu Paulu ni itthu yaamwiirannyenle pooti unikavihera ukhala atthu ootteeliya. Khaninlamuliya uweherera wiira makhalelweehu oovirikana anaahala veekhaayaru uniphwanyiha utteeliya. Uhiya commo, ninlamuliya wiitthuca ukhala atthu ootteeliya. Manannani? Nhina ula mwahoola, ninaahala woona isiyani inhala unikavihera ukhala atthu ootteeliya.
UKHALA ATTHU OOSUKHURU
4. Ukhala atthu oosukhuru unikavihera cani ukhala ootteeliya? (1 Atesalonika 5:18)
4 Ntthu noonihera usukhuru naakhala ootteeliya. (Nsome 1 Atesalonika 5:18.b) Wootakihera, nooniheraka usukhuru ni citthu cirineehu khanintepa ukhala niiwasiwaasi natothaka citthu cimpheeleehu, masi cihirineehu. Nansukhuruku Yehova nlattu woparakha cirineehu nna coo, unaanikavihera upanka yotheene inkhitiriihu wiira nirweehele uhoolo nrintti unvahaceriyeehu uvara, uhiya wuupuwela mananna ookhitiri waakhela nrintti nkhwaawe woovirikana. Phimaana, uyo honihimeerya Nnuulumoni wawe Ibiibiliya wiira nihaana nakhalaka atthu oosukhuru ukati woolompa. Usukhuru ciicammo unaanikavihera ukhalana nnema na Nluku ninvikana moopuwelweehu.—Afili. 4:6, 7.
5. Kontha isiyani asarayeli yaalamuliyaaya usukhuru? (Nwehe ciicammo ilatarato.)
5 Muupuwele itthu yaawiirannyenle asarayeli. Ikwaha cinci, ayo yaanonttokutta Yehova, kontha yaapheela ulya icoolya caalyaaya anari Wiciipitu. (Manu. 11:4-6) Khweeliini, ukumyaaya waari woorikarika ukati weettaaya muuthakoni. Isiyani yaahala waakavihera ukhala ootteeliya? Ayo yaalamuliya wuupuwela citthu Yehova caapankenlyaawe ni usukhurweela. Ciicammo yaalamuliya wuupuwela wiira ukati waapankiyaaya ipottha ni waahuvihiyaaya cinene Wiciipitu, Yehova ahaawanela ihukhumu 10 atthu o Wiciipitu ni ahowoopola asarayeli. Vano asarayeli, utthukuliya waya u Wiciipitu, Yehova ahaakavihera ukusakaca iparaatha, iwooru ni ikuwo. (Nkw. 12:35, 36) Ukati asarayeli woomolalihiyaaya mpaka u Mar Vermelho, Yehova aahopanka miiriirya akawanihaka maacyaayo wiira ayo alapuwe. Ni yeettakoono muuthakoni, Yehova anaavaha iyoolya khula mahuku. Vano, kontha isiyani asarayeli yaattokuttaaya nlattu wo yoolya? Asarayeli khayaatteeliya kontha khayaasukhuru, hataa ukhalaka wiira Yehova anaavaha iyoolya yo waatosera.
Kontha isiyani asarayeli yahaatteeliyaaya? (Nwehe iparaagarafu 5)
6. Isiyani inhala unikavihera ukhala atthu oosukhuru?
6 Vano nyuuva, isiyani inhala wuukaviherani ukhala oosukhuru? Yoopacera, ukhanle ukumiha ukati khula mahuku wiira muupuwele citthu comaana nyuuva cinoocivelani awula cinwiirihani ukhala ootteeliya. Nyuuva pooti wantikha citthu piili awula tthaaru cinlamuliyeenyu usukhuru. (Ucuk. 3:22, 23) Yonayeeli, nthoonyere usukhuru. Nlakele waasukhuru akhunaninyu nhina citthu cuupankenlyaayani, masi venci-venci, munsukhuru Yehova khula mahuku. (Isaa. 75:1) Yoneeraru, mwaathanle apatthani ankhitiri usukhuru. Usukhuru ikhanle itthu ineetthuceraniya khampa ciicammo uhisukhuru. Phimaana, wakhalaka wiira asipatthaniihu anaathoonyera usukhuru, hiiva ciicammo ninaahala waatakiha. (Deut. 1:26-28; 2 Tim. 3:1, 2, 5) Nooniheraka usukhuru, hi khanintepa ukhala niiwasiwaasi natothaka citthu cimpheeleehu, masi cihirineehu.
7. Manannani usukhuru waakavihenryaaya anuunu Aci?
7 Moone itthu yaawiirannyenle anuunu amoca ankhala u Indonesia aneehaniya Aci. Ayo aneera: “Ukati wo reetta yo COVID-19, mi kahopacera ulattaniha makhalelwaaka ni makhalelo o mayamunna. Nlattu wo iyo, mi akaakhala ootteeliya.” (Akalas. 6:4) Isiyani yaakikavihenre upanka marukunuso? Ayo aneera: “Mi kahopacera wuupuwela sana-saana citthu comaana Yehova caakivahaawe khula mahuku ni ciicammo wuupuwela citthu comaana cirinaaka nlattu woopanka mphantte wo mphwinko wa Nluku. Vano, kihonsukhuru Yehova nlattu wo citthu cotheene cikivahilyaawe. Nlattu wo iyo, mi kihokhalana utteeliya weekhweeli.” Wakhala wiira nyuuva khannokhala ootteeliya nlattu wo makhalelweenyu, nyuuva pooti upanka itthu imocaaru apankilyaaya anuunu Aci wiira nkhale ootteeliya.
NKHALE NTTHU OWIIYEVIHA
8. Isiyani yaamwiirannyenle Baruki?
8 Sekeretaariyu mmoca ankavihera porofeeta Jeremiya, eehaniya Baruki, ikwaha imoca hopaca ukhala ooriipiya nrima nlattu wo makhalelwaawe. Baruki ahovahaceriya nrintti woorika cinene. Uyo ahaana unkavihera Jeremiya waahimerya asarayeli yahoonihera usukhuru itthu yaahala uwiirannyeela nlattu woohiya umwiiwelela Yehova. Masi uhiya uweheeha itthu Yehova yanrumilyaawe wiira apanke, Baruki ahopacera wiicuupuwela uyova ni itthu yaapheelaawe upanka. Nlattu wa porofeeta Jeremiya, Yehova aahomwiirela co Baruki: “Unawiiwehawehera citthu cuulupale. Uhiye uwehaweha nnyo citthunnyo.” (Jer. 45:3-5) Nimoolumacero makhwaawe, Yehova aamwiirela co: “Utteeliye nicitthu cirina nna coo.” Baruki ahotthuna ulakiya ni Yehova ni ahoturuwela ukhala mpatthannyaawe.
9. Khampa cinthoonyeraaya 1 Akorintu 4:6, 7, manannani wiiyeviha unhalaaya unikavihera uvaresesa mirintti cinvahiyeehu? (Nwehe ciicammo ilatarato.)
9 Ikwaha cikhwaawe, nswali a Yehova pooti wuupuwela wiira haana isariya yoovahiya nrintti. Pooti ukhalaka wiira uyo noopuwela commo, kontha haana ucuwelaca, hovara nteko mwinci awula pacenre unswalela Yehova nenne nokhalayi. Isiyani yaahala unkavihera uyo nswalyuuyo uhikhalana ayo moopuwelelwaayo? Uyo nolamuliya wuupuwela moolumo apostolu Paulu amphwanyannya nhina 1 Akorintu 4:6, 7.c (Nsome.) Iparakha cotheene cinaakheleehu ni ucuwelaca wotheene unkhalaneehu unkhuma wa Yehova. Yehova khannoona ukhalana ifayita paahi hiiva uvikana atthu akhwaawe wiira anivahe nnya citthunnya. Uhiya commo, Yehova nonivaha nnya citthunnya kontha naanifenta ni nlattu wookhala oonamaana.—Aroo. 12:3, 6; Efesu 2:8, 9.
Khula itthuvo nirineehu ikhanle inanna Yehova yoonoonihera unamaana woonironya (Nwehe iparaagarafu 9)f
10. Manannani ninhaleehu ukhala atthu owiiyeviha?
10 Hiiva pooti wankhaleehu atthu owiiyeviha nuupuwelaka ntakihero na Yesu. Moone itthu yiirannyeele uhiyu ukati Yesu waavululacaawe inyaa caattharyaawe. Apostolu Joau hantikha co: “Yesu ancuwela wiira [1] athumwaane ahonvaha citthu cotheene, [2] uyo aakhuma wa Nluku ni [3] aarwaa wa Nluku, . . . ahancera uvululaca inyaa caattharyaawe.” (Joau 13:3-5) Atthunaka Yesu pooti waahalaawe wuupuwela wiira attharyaawe yahaana yanvululacaka inyaa cawe. Masi Yesu khanapaca wuupuwela wiira, nlattu wookhala mwaana a Nluku, haana isariya yookhalana inupa yomaana, nsurukhu mwinci ni ukumi oohirikarika. (Luka 9:58) Yesu aari ntthu owiiyeviha, phimaana ankhala ootteeliya. Uyo khanle ntakihero noohipahuwa ninlamuliyeehu utthara.—Joau 13:15.
11. Manannani wiiyeviha waakavihenryaaya amunna Dinnis ukhala ootteeliya?
11 Amunna amoca aneehaniya Dennis, ankhala u Holanda, aneera wiira anaamananiha utthara wiiyeviha wa Yesu, masi unawaarikela. Ayo aneera: “Ukati ntthu naakhelaawe nrintti miiva umpheelaaka, ikwaha cikhwaawe unaakiriipaka nrima, kontha kinoona wiira mi thimi kaalamuliya waakhela. Yiirannyaaka iyo, miiva kinaasomasoma mwaha unooluma wiiyeviha. Mwaapilikatiivuni JW Library®, kihothanla iveerusu co mbiibiliyani cinooluma wiiyeviha wiira kihiphice nuuphwanya ni usoma. Ciicammo, kihopaxari ntelefooneni waka ividiyu cinooluma wiiyeviha ni akinhiya uviriyana khula mahuku.d Mi kiheetthuca wiira miteko cotheene cinvareehu nimpheela unttitthimiha Yehova, uhiya wiittitthimiha naasineeneehu. Khula ntthu haana nteko wiira avare. Wakhalaka wiira nyuuva khannotteeliya nlattu woohaakhela nrintti mwaapheeleenyu, mmananihe uthoonyera ukhala ntthu owiiyeviha. Mwapankaka commo, nnaahala ulipihaca upatthaniinyu ni Yehova ni ciicammo unaahala wuukaviherani ukhala ootteeliya.—Tiya. 4:6, 8.
MUUPUWELE CITTHU YEHOVA CIKHULUVELIHILYAAWE
12. Niwehereroni noohoolo ninnikavihera ukhala atthu ootteeliya? (Isaiya 65:21-25)
12 Ninaakhala ootteeliya cinene noopuwelaka niweherero Yehova niniikhuluvelihilyaawe. Nhina ilivuru ya Isaiya, Yehova honihimeerya wiira citthu cinci cinniirannyeela uyo naacuwela. Masi uyo ciicammo honikhuluveliha umalamaliha masakha otheene. (Nsome Isaiya 65:21-25.e) Ninaahala ukhalana inupa comaana ni coolipa. Ninaarwaa uvara nteko womaana ni ukhalana iyoolya yinci ni yoociva. Khacinhala uniirannyeela-tho citthu cootakhala. (Isai. 32:17, 18; Ezek. 34:25) Upeephoni, ninaahala urwaa ukhala saana ni ookhikiceryaa.
13. Itafaawutini cinaananeehu nna coo ni manannani wuupuwela niweherero nihu noohoolo ninnikaviheraaya?
13 Kontha isiyani ikhanlyaaya itthu yofayita uhihiyerera wuupuwela niweherero nihu noohoolo? Kontha ninkhala mahuku ookhicera ni otheene cihu ninaaviriha itafaawuti. (2 Tim. 3:1) Yehova naanikavihera uvilela anivahaka malakihero, ikuru ni anikaviheraka nhina citthu cimpheeleehu. (Isaa. 145:14) Uhiya commo, niweherero nirineehu ninaanikavihera waanaana masukhuli. Atthunaka nyuuva nnaavara nteko cinene wiira nthume iyoolya, ikuwo ni nipuro noopheela ukhala amuciinyu. Niireke iyo maanaaya wiira nyuuva nnolamuliya uhihiyerera wiikurumica cinene wiira nkhanle nkumi? Mena vakaani. Yehova holakela wuuvahani ikwaha cinci ile impheeleenyu upeephoni. (Isaa. 9:18; 72:12-14) Atthunaka nyuuva nnawaanana iretta ihinvoninnya awula itthu ikhwaawe. Masi niireke iyo maanaaya wiira nyuuva nnohala ukhala ciicammo mwahuvaka mpaka? Mena vakaani. Iretta ni ukhwaa Nluku naahala umalamaliha upeephoni. (Apoka. 21:3, 4) Nno niwehereronno, ninaanikavihera ukhala ootteeliya ni uhikhala niiwasiwaasi naananaka iretta. Hiiva pooti unkhaleehu ootteeliya naananaka uhiwaceriya niisariya awula ukhweliya, uvilela iretta awula khula itthu inttehatteha waamini wihu. Kontha isiyani? Kontha, hataa naananaka itafaawutini, hi ninaacuwela wiira woohipica cinaahala umala.—2 Akor. 4:17, 18.
14. Ninhala ulipihaca cani niweherero nihu?
14 Ukhala wiira niweherero ninaaniiriha ukhala atthu ootteeliya, manannani ninhaleehu ulipihaca? Khampa vaavale ntthu nolamuliyaawe waawara ookulu wiira oone ratta uhoolo unkelaawe, hiiva ciicammo, ninlamuliya upanka citthu cinhala ulipihaca niweherero nihu ni wuupuwela citthu cinweherereehu uhoolo. Wakhalaka wiira ninawaanana uthwennya, pooti unuupuweleehu mananna cinhalaaya ukhala ukumiihu, upeephoni nipuro nihinhala ukhala nsurukhu ni uhuva. Wakhalaka wiira ninaakhala niiwasiwaasi ni mirintti nihinaayeehu uvahiya, nuupuwele mananna iyo iwasiwaasiiyo inhalaaya umalamalihiya upeephoni ni unhaleehu unswalela Yehova mpaka. (1 Tim. 6:19) Wuupaceroni, pooti unirikela wuupuwelacera citthu cinhala wiirannyaa uhoolo, uhiya wuupuwela citthu cinniirannyeela nna vaa. Nuuwakatyaaya, wuupuwela citthu cinhala wiirannyaa uhoolo, pooti ukhala itthu yoohinirika.
15. Isiyani mwiitthucileenyu niitthu ihimilyaaya anuunu Christa?
15 Muupuwele mananna niweherero naakavihenryaaya anuunu Christa, atheliye naamunna Dinnis, aromoliye iparaagarafu civinre. Ayo aneera: “Mi kihaana iretta inkiiriha uhikhitiri weetta. Nlattu wo iyo iretteeyo, kineetta niikariinyu yomaroota ni kinaaviriha ukati mwinci kinari wakorini. Mahuku otheene kinkhala kiwerennyaka. Ameetiku anwacera irettaaka yahokiirela wiira akinhala uvona. Masi woohipica, mi kahoopuwela wiira ala ameetikwaala khancuwela itthu inhala wiirannyaa uhoolo. Mi kinawuupuwela citthu cinhala wiirannyaa wahoolo ni,, kapankaka commo, mi kinaakhitiri ukhalana nnema no nnepa wo waarya. Mahukwaala, miiva pooti unaananaaka masukhuli o ila ituniyeela, masi kinaahala ukhala ootteeliya upeephoni!”
“KHIIVO ITTHU YOMAANA INAAHALEELA ALE AMMOOVA YEHOVA”
16. Kontha isiyani mwene Davidi wantikhilyaawe wiira ale ammoova Yehova khiivo itthu yomaana inhala waahaleela?
16 Hataa nikhalaka ootteeliya, hiiva ninawaanana itafaawuti. Mwene Davidi ahokhweliya naasaanaawe oophiyaka araru. Ciicammo, uyo aahowaceriya woohisariya ni ahoothererihiya upanka citthu coohinamaana. Ahorukunuweliya naatthu aakhuluvelaawe, aholupatthiya ni ahoviriha myaakha cinci atthawaka. Hataa ukhalaka commo, avirihakoono, nnyo itafaawutinnyo, uyo aheera coo amwaacaka Yehova: “Khiivo inonhaleela ule nomoova.” (Isaa. 34:9, 10) Kontha isiyani uyo wenryaawe commo? Kontha Davidi ancuwela wiira, hataa hinkhikiceraka masakha otheene, Yehova anhala unkavihera ni anhala unwacera. (Isaa. 145:16) Khampa Davidi, hiiva ciicammo pooti wankupaliihu wiira Yehova naahala unikavihera ni uniwacera hataa naananaka masakha.
17. Kontha isiyani nyuuva nlakenleenyu wiitthuca ukhala ntthu ootteeliya?
17 Yehova nopheela wiira hiiva nikhale ootteeliya. (Isaa. 131:1, 2) Phimaana, ninlamuliya wiikurumica upanka yotheene inkhitiriihu wiira nikhale ootteeliya. Wakhala wiira ninaawiikurumica ukhala atthu oosukhuru, owiiyeviha, wuupuwela citthu Yehova cikhuluvelihilyaawe ni ulipihaca niweherero nihu, hiiva pooti waneereehu co: “Iyeeni, mi kiri ootteeliya.”—Isaa. 16:5, 6.
NCIPO 118 “Muncererye Wamini Wahu”
a Afilipo 4:11 Akinooluma commo nlattu woothwennya, kontha kiheetthuca ukhala ootteeliya hataa kikhalaka ni mananna oovirikana. 12 Mi kinaakhitiri ukhala ni citthu vakaani ni kinaakhitiri ukhala ni citthu cinci. Nhina citthu cotheene ni nhina makhalelo otheene, kiheetthuca isiiri yookhala kinarupanle ni kinari niitala, hataa kinarina citthu cinci ni kithwennyaaka.
b 1 Atesalonika 5:18 Nsukhuru citthu cotheene. Iyo phi itthu Nluku inoopheelelannyaawe iriyari wa Yesu Kristu.
c 1 Akorintu 4:6 Mayamunna, mi ni Apolu niheettela nnya citthunnya wiira mphwanyere ifayita, nipheelaka wiira nlattu wontakihero nihu, mweettele ikano ineera: “Nhipanke citthu cihantikhiye,” wiira nhikhale atthu owiithenca, mwanthanlaka mmoca ni mwanthanyaka nkinooyo. 7 Tipani noovirikanihani naakhwiinyu? Khweeliini isiyani nyuuva irineenyu ihaakhenleenyu? Vano, wakhala wiira nhowaakhela citthu cotheene cirineenyu, kontha isiyani nniithenceenyu mwakhalaka khampa khamwaakhenle?
d Wootakihera, moone iporokaraama Yooswali wo Wicisu nsayitini jw.org ineera Jeová cuida dos humildes e O orgulho vem antes da Queda.
e Isaiya 65:21 Ankooteka inupa ni ankookhala mommo; ankoophattya miri co uva ni ulya mihokorokho caya. 22 Khanrwaa uteka ni urwaa ukhala nkina; khanrwaa uphattya ni urwaa ulya nkina. Kontha mahuku aatthwaaka anhala ukhala khampa mahuku omwiri; ni yaathanlalyaaka anaarwa ulawa nteko wo mmatatani waya. 23 Khanhala uvara nteko mwinci mahala, ni hataa khanhala waayara asaana anhala uhuvahuvaca, kontha ayo naasaanaaya akhanle ipyo yoovahiya iparakha ni Yehova. 24 Hataa ahinaaya ulepela, mi kinaahala uwaakhula; ahinaaya umaliha wuulumaca, mi kinaahala waavaha impheelaaya. 25 Mwiici ni ikhontwa yankaani cinaahala ulya nkhayi, kharamu nohala ulya malasi toko imope, ni inwaa inhala ulya itthaya. Khacinhala wooniha yoowerya ni khacinhala uhonona itthu wamwaakoni waka wowaarya wotheene,” neera Yehova.
f ILATARATO: Amunna amoca yalokihacaka ipereetiyu yo mumphwinkoni ni anuunu amoca yiitthucile iluuka inuulumiya nimatata yakohakohiyaka wankutthaanoni muulupale wo Isirikwiitu ni amunna amoca yapankaka mwaha wanlokoni.