MWAHA WOOSOMIYA 36
NCIPO 103 Axitokweene yoovaha ya Yehova
“Nwuulumane mahumu mwapheelaka ukaviheriya”
“Awiihane mahumu o wanlokoni.”—TIYA. 5:14.
ITTHU INHALEEHU WIITTHUCA
Nhina ula mwahoola, ninaahala woona kontha isiyani ikhanlyaaya itthu yo fayita ulepela ukaviheriya ni mahumu napheelaka.
1. Manannani Yehova oonihenryaawe wiira nawaawacera aswalyaawe?
Yehova nawaafenta ale anonswalela ni nawaawacera khampa makampuci cinwaceraawe ikhontwaa cawe. Uyo haathuma ni iphome ya Yesu ni haavahacera mahumu wiira yaawacere (Mite. 20:28) Nluku nopheela wiira awaceriye aswalyaawe ni mananna omaana. Akaviheriyaka ni Yesu Kristu, mahumu anawaamaaliha aswali a Yehova ni anawaakhikicera nhina mminepani.—Isai. 32:1, 2.
2. Phaapani Yehova naakhalelaawe iwasiwaasi venci? (Ezekiyeli 34:15, 16)
2 Yehova naakhala niiwasiwaasi naaswalyaawe venci-venci ale anhuva. Aavarelaka nteko mahumu, uyo nawaakavihera ale anviriha itafaawuti nhina mminepani. (Nsome Ezekiyeli 34:15, 16.a) Phimaana, Yehova nopheela wiira nihaana unlepela unikavihera napheelaka, uhiya paahi unlompa, nopheela wiira naahimeeryeke mahumu o wanlokoni.—Efesu 4:11, 12.
3. Ninhala ukumihera cani ifayita nrintti urinaaya mahumu?
3 Nhina ula mwahoola, ninaahala woona mananna Yehova naavarelaawe nteko mahumu wiira akavihere ale avololacile nhina mminepani. Ciicammo ninaahala woona mananna anhalaaya waakhuliya ala makohwaala: Ukatini ninlamuliyeehu ulepela ukaviheriya ni mahumu? Manannani ayo anhalaaya unikavihera? Nlattuni anhalaaya unikavihera? Hataa nihikhalanaka itafaawuti, ukati anhalaaya waakhuliya ala makohwaala, anaahala unikavihera ukhuluvela wiira nluku naahala woopola ukumiihu.
UKATINI NINLAMULIYEHU WAALEPELA MAHUMU “WIIRA ANIKAVIHERE”?
4. Kontha isiyani nineereehu wiira Tiyaku 5:14-16, 19, 20 naaca iretta yo mminepani? (Nwehe ciicammo ilatarato.)
4 Tiyaku naataphulela mananna Nluku naakaviheraawe aswalyaawe. Uyo nopacera eeraka co: “Haavo nowerennya iriyariinyu? Awiihane mahumu o wanlokoni.” (Nsome Tiyaku 5:14-16, 19, 20.) Moolumo a Tiyaku anawoonihera wiira uyo aaca iretta yo mminepani, khenre wiira ule nowerennya haana anwehawehaka meetiku, masi enre mahumu o wanlokoni. Ni iyo iretteeyo khincuwannya kontha wiira ntthu avone haana uleveleliya matampi. Ikwaha cikhwaawe mananna cinwaceriyaaya iretta yo mminepani, inaalikana mananna inwaceriyaaya iretta wo mwiirutthuni. Kontha hiiva nawerennyaka, ninaarwaa usipitaali waahimeerya a meetiku itthu inniira. Mananna mamocaaru, Hiiva nawerennyaka nhina mminepani ninaawaahimerya mahumu mananna cineecooneehu ni ninaatthara ikano cinnivahaaya cinkhuma mbiibiliyani.
Hiiva nawerennyaka ninaamwaavyaavya meetiku, inanna imocaaru hiiva nawerennyaka nhina mminepani, nihaana waawyavya mahumu (Nwehe ciicammo iparaagarafu 4)
5. Ninhala ucuwela cani wiira upatthaniihu ni Yehova unaalolovaca?
5 Nhina ikapiitulu 5 ya Tiyaku inaanikurumica waawehaweha mahumu neecoonaka wiira khaniri saana nhina mminepani. Inkhala itthu yo fayita nalepelaka ukaviheriya ni mahumu upatthaniihu ni Yehova uhinaaya uhononnya, naahipheeleke ukaviheriya ni mahumu pooti wiithepya wiira upatthaniihu ni Yehova uri saana masi unahononnyeele. (Tiya. 1:22) Iyo itthwiiyo yaahowiirannyeela makristau o Sardes, masi Yesu ahaahimerya wiira meettelwaaya khawancivela Yehova (Apoka. 3:1, 2) Inanna imoca yoopheela ucuwela wakhala wiira niri saana nhina mminepani awula mena, ukhanle ulattaniha mananna nineekumiceehu nnava ni mananna neekurumiceehu khalayi. (Apoka. 2:4, 5) Hiiva pooti wiikoha co: kiireke kinaasomaka Ibiibiliya ni wuupuwelela toko khalayi? ‘Kiireke kinaakumihaka ukati wiira kithenkace mikutthaano? Mananna kineekurumicaaka ulalyeera kiireke uhovololaca? Kiireke kinaaviriha ukati mwinci kuupuwelaka mihakhu ni ifaama? Wakhala wiira ninaakhula iyee, nihaana nicuwelaka wiira upatthaniihu ni Yehova khulipile, vano wakhala wiira unaahala unirika uturuwela umpatthanana Yehova awula nihopanka itthu ninooneehu wiira nihonriipiha nrima Yehova nihaana waavyaavya ukaviheriya ni mahumu.
6. Isiyani inlamuliyaaya upanka ale avanre itampi yuulupale?
6 Khweeliini, itampi cikhwaawe, pooti umwiiriha ntthu ukumihiya wanlokoni wakhalaka wiira khanttharuwa. Wakhalaka wiira nihovara itampi toko iyo nihaana uwuulumana mahumu (1 Akor. 5:11-13) Khula ntthu vanre matampi khanhala ukhitiri ulipihaca upatthannyaawe veekha woohikaviheriya ,ni Yehova “nohala unilevelela matampiihuwakhalaka wiira ninawoonihera wiira nihottharuwa.” (Mite. 26:20) Uttharuwa, unhela nhina uwuulumana mahumu noonaka wiira nihopanka itthu yoohiloka.
7. Tipani-tho nlamuliya ukaviheriya ni mahumu?
7 Mahumu, khanaakavihera paasi atthu avanre matampi moolupale, masi ciicammo anawaakavihera ale ahiri saana nhina mminepani. (Mite. 20:35) Wootakihera, pooti ukhalaka wiira nyuuva nnawaanana moopuwelelo oohinamaana, waanana ayo moopuwelelwaayo pooti ukhalaka itthu yoorikarika. Venci-venci, wakhalaka wiira nhinaaya wiitthuca ikhweeli nyuuva mwanlya citthu coohapala, mwanoona ipornografiya awula mwanrupihana woohiloka nyuuva pooti umuulumana humu nohala wuuvahani ikano comaana cinhala wuukaviherani uhihiya unswalela Yehova woohuuriipani nrima. (Ekles. 4:12) Wakhala wiira nhovololaca mminepani, nlattu wo wuupuwela citthu coohinamaana, mahumu pooti uwuupuserani wiira nyuuva nnaavaha ifayita upatthaniinyu ni Yehova ni nnaanyema wiikhuluvela cinene.—1 Akor. 10:12.
8. Niireke ninlamuliya waahimerya mahumu khula itthu invonyeehu? Ntaphulele.
8 Hiiva pooti wanwuulumaneehu mahumu khula ukati nimpankeehu itthu yoohinamaana. Wootakihera, nyuuva pooti umuulumela itthu woohinamaana munneenyu awula mwanrokorinyu awula nyuuva pooti wuunyoonyihani munnenyu awula nuunwiinyu, yeerannyaaka commo, uhiya urwaa uwuulumana mahumu, pooti ulakela weettela ikano ya Yesu Kristu nrwaaka umuulumana munneenyu awula nuunwiinyu ni unlepela wuulevelelani. (Mat. 5:23, 24) Nyuuva pooti utothatotha myaha cinooluma uvilela, wiivaraca, wiira mweettele wiira wahoolo muupuwele. Masi wakhalaka wiira khannokhitiri ummaliha nanrokottole nrineenyu, nyuuva pooti unlepela humu wiira ookavihereni. Iwarakha apostolu Paulu aawantikhenlyaawe Afilipo ahonlepela munna hinhimyaciya ncinanawe wiira ankavihere Evotia ni Sintiki ummalamaliha nanrokottole yaarinaaya, ciicammo humu owanlokoni wihu pooti upanka itthu imocaaru.— Afili. 4:2, 3.
KONTTHA ISIYANI NINLAMULIYEEHU ULEPELA UKAVIHERIYA NI MAHUMU?
9. Kontha isiyani khaninlamuliya woona ihaaya napheelaka uwuulumana mahumu? (Miruku 28:13)
9 Ninlamuliya ukhalana waamini ni ulipa nrima wiira nilepele ukaviheriya navaraka itampi wuulupale. Awula noonaka wiira nihovololaca nhina mminepani, khaninlamuliya woonela ihaaya uwuulumana mahumu. Kontha isiyani? Nattharaka malakihero a Yehova, nhina ukhalana ukumi wo mminepani ni ukhalana waamini woolipa ninaahala woonihera wiira ninaakhuluvela ikano cawe, uhiya commo ninaahala woonihera wiira ninaapheela ukaviheriya navololacaka. (Isaa. 94:18) Ninhala uleveleliya ni Nluku wakhalaka wiira ninaahimya ni woonihera uttharuwa ninrimeehu wotheene.—Nsome Miruku 28:13.b
10. Isiyani inhala wiirannyaa wakhalaka wiira ninaavitha-vitha itampi cihu?
10 Hiiva ninaaphwanya iparakha cinci naahimeeryaka mahumu itampi cihu. Masi naavithavithaka mahumu itampi nivanreehu, pooti unikhumelela masakha moolupale. Ukati Davidi waamananihilyaawe uvitha itampi yaavanryaawe uyo ahiiphwanyiha masakha nhina mminepani, mmuupuweleloni ni hataa muukumini wawe. (Isaa. 32:3-5) Khampa vaavale nineereehu nawerennyaka nihirwaaka usipitaali iretteeyo initepelaka, ciicammo navirihaka ukati mwinci woohaavya ukaviheriya ni mahumu iretta yo mminepani pooti unitepela. Yehova khampheela wiira iyo itthwiiyo iniirannyeele. Phimaana, naanisovenriha wiira niwuulumane mahumu, alopwana uyo aathanlilyaawe wiira anikavihere ukhalana upatthani womaana nuuyo.—Isai. 1:5, 6, 18.
11. Manannani atthu akhwaawe cinhalaaya waaphwanya masakha yaahihimyeke itampi?
11 Navithaka itampi nipankileehu, pooti uwiiriha atthu akhwaawe uvira itafaawuti. Ni iyo itthwiiyo pooti umwiiriha Yehova ukumiha nnepaawe wowaarya wanlokoni ni mayamunna uhikhalana-tho nnema. (Efesu 4:30) Thimaana, noonaka wiira haavo munna vanre itampi nihaana unsovenriha urwa uwuulumana mahumu. Akhalaka wiira uyo khanrwa uwuulumana, hiiva nihaana urwaa uwuulumana.c Naahipankeke commo, hiiva ciicammo ninantthekela Yehova. (Lev. 5:1) Unfenta wihu Yehova phinhala uniiriha waahimerya mahumu wakhala wiira haavo ntthu vanre itampi. Napankaka commo, ninaahala waakavihera mayamunneehu ni mayanuunwiihu ni ciicammo ninaahala unkavihera munna vanre itampi uhokoleela umpatthanana Yehova.
MANANNANI MAHUMU ANNIKAVIHERAAYA?
12. Manannani mahumu anaakaviheraaya ale avanre itampi?
12 Ibiibiliya inawaakavihera mahumu waakavihera ale alolovacile nhina mminepani. (1 Atesal. 5:14) Wakhalaka wiira nhovara itampi, mahumu anaahala wuukohakohani wiira acuwele mananna cinoopuweleenyu ni cineecooneenyu. (Miru. 20:5) Nyuuva pooti waakavihera mahumu mwaahimeeryaka citthu cootheene woohaakhuwakhuwa hataa ukhalaka wiira unawuurikani nlattu wo ikhapileenyu, makhalelweenyu awula nnawoonela ihaaya uttonkaca itthu ipankileenyu. Nhoove wiira itthu inhaleenyu wuuluma inaahala utepihaca mwahooyo. (Jó 6:3) Uhiya commo, uhinaaya umala mwahooyo mahumu anaahala wuuviriyanani sana-saana ni ucuwela isiyani iwiirihaleni upanka iyo itthwiiyo, ahinaaya wuuvahani ikano comaana co mbiibiliyani. (Miru. 18:13) Mahumu anaacuwela wiira para ukhitiri ukavihera ikhontwaa ya Yehova unaavira ukati mwinci. Phimaana, khammaliha mwahooyo wowaakuvyaaca.
13. Manannani ulompa ni ikano co mbiibiliyani cinhalaaya unikavihera? (Nwehe ciicammo ilatarato.)
13 Mwaahimeeryaka mahumu itthu ipankileenyu, ayo anaahala upanka khula inkitiryaaya wiira yuukavihereni uhiicoona uhikhalana ifayita. Uhiya commo, ayo anaahala ulompa nkhayi ni nyuuva. Ciicammo, nyuuva mwahalaka ulompa Yehova naahala wuuviriyanani ni wuukaviherani ukhalana moopuwelelo omaana. Ntthu aahimeryaka mahumu itthu ipankilyaawe, ayo anaahala “umoottiha makhura mwancina na Yehova.” (Tiya. 5:14-16) Ayo makhuraayo cinaaciya ikhweeli co nnuulumoni na Nluku. Avarelaka nteko Ibiibiliya mahumu anaahala wuumaalihani, wuulipihani ni wuukaviherani ulipihaca upatthaniinyu ni Yehova. (Isai. 57:18) Malakihero o mbiibiliyani mahumu anhalaaya uwuupuserani, anaahala wuukaviherani uhihiyerera upanka citthu comaana. Nkaviheriyaka ni mahumu nyuuva nnaahala wiiwa ncu na Yehova niwiirelakani “Ila hiiphiro inlamuliyeenyu weetta.” —Isai. 30:21.
Mahumu anaavarela nteko Ibiibiliya wiira yamaalihe ni waalipiha atthu anwerennya nhina mminepani (Nwehe iparaagarafu 13-14)
14. Phanka cinhimyaaya Akalasiya 6:1, manannani mahumu cinonkaviheraaya ntthu vanre itampi? (Nwehe ciicammo ilatarato.)
14 Nsome Akalasiya 6:1.d Nkristau apankaka itthu yoohinamaana, uyo naahiya upanka ile impheelaawe Yehova. Upanka itthu yoohinamaana, pooti waaciya ulakela nimananna oohicuwelaca awula uvara itampi yuulupale uhoolo wa Nluku. Ninifento mahumu anaahala umananiha ulokiherera moopuwelelwaawe uyo ntthuuyo yooniheraka unamaana. Nuulumo ulokiherera niiluka iheperewu pooti waaciya ulokiherera nipuro repenyuwilyaawe ntthu. Khampa meetiku oocuwelaca neekurumicaawe wiira alokihere nipuro repenyuwilyaawe ntthu. Mahumu anawiikurumica unkavihera uvona iretta yo mminepani, iyo phiitthu ithanleliyaaya. Ibiibiliya ciicammo inawaakurumica mahumu ukhala owiivaraca. Ukati anonkaviheraaya ntthu weettela ikano co mbiibiliyani mahumu anaacuwela wiira ayo akhanle oopahuwa ni anaavonya. Phimaana, ukati unokaviheraaya ntthuuyo ayo anaahala wiivaraca wiira ahuupuwele wiira khaanvonya unvikana ntthu anonkaviheraaya. Uhiya commo ayo anaahala woonihera wiiyeviha ni uthunku.—1 Pet. 3:8.
15. Isiyani inlamuliyeehu upanka nakhalanaka itafaawuti?
15 Hiiva pooti ninaakhuluveleehu mahumu kontha Yehova heetthuciha wiira khanlamuliya waahimerya atthu akhwaawe citthu co isiri. Uhiya commo ayo aheetthuca uvarela nteko Ibiibiliya uhiya uvarela nteko moopuwelelwaaya. Ciicammo, aheetthuca uhihiyerere unikavihera yaniphwanyaka masakha. (Miru. 11:13; Akal. 6:2) Makhalelwaaya ni ucuwelaca waya unaavirikana, masi pooti nimmulumaneehu kunla humu nhina itthu inniira ni ukhuluvela wiira naahala unikavihera. Khweelini hi khaninhala umuulumana humu niwehawehaka uvahiya ikano innicivela ni impheeleehu. Napankaka commo ninkookhala atthu nimpheela uhimeriya paahi citthu cinnicivela kahi Yehova cimpheelaawe. (2 Tim. 4:3) Naahimeryaka mahumu nhina itthu inniira, ayo pooti unikoha wakhala wiira nihaahimerya atthu akhwaawe nhina uyo mwahooyo ni ikanoni yanvahilyaaya. Ni nlattu woonamaana, ayo pooti ulepela ukavihaceriya nimahumu makhwaawe.—Miru. 13:10.
ITTHU INLAMULIYEEHU UPANKA
16. Nrinttini hiiva nirineehu?
16 Hataa ukhalaka wiira mahumu anaaniwehaweha khampa ikhontwaa ca Nluku, ayo khannihimerya itthu yoohala upanka, khula ntthu haana nrintti wowoonihera muukumini wawe wiira neettela ikano ca Nluku. Nikaviheriyaka ni Yehova ninaahala ukhitiri ukhala okhuluvelyaa. (Aroo. 14:12) Phimaana mahumu khanhala unihimeerya itthu yoohala upanka. Uhiya commo, ayo anaahala uvarela nuulumo na Nluku ikhanle Ibiibiliya, wiira a nihimeerye itthu Yehova inoopuwelaawe ni anaahala unihiya wiira nilakele itthu yoohala upanka mwaasineeneehu. Nuupuwelaceraka ni neettelaka ikano ca Yehova co mbiibiliyani, ninawiitthuca wuupuwela khampa uyo cinoopuwelaawe ni ninaalakela upanka citthu phanka uyo cimpheelaawe.—Mabere. 5:14.
17. Isiyani inlamuliyeehu ulakela ikhumelo nenna va?
17 Ikhanle iparakha yuulupale ukhala ikhontwaa ya Yehova. Uyo honvaherera makampuci muulupale Yesu Kristu wiira avahe ukumyaawe ni wahoolo nikhalane ukumi woohimala. (Joau 10:11) Yehova honivaha mahumu anwacera nloko. Upanka wawe commo heerannyeeha inatiryaawe ineera: “Kinaahala waavaha amakampuci aneettela ikano caka ni ayo anaahala waalihera nuucuwelaca.” (Jer. 3:15) Vano noonaka wiira niri oololovaca nhina mminepani awula oowerennya. Khaninlamuliya woovelela ulepela ukaviheriya ni mahumu. Phimaana nikumihere ifayita iparakha Yehova inivahilyaawe yookhalana mahumu wanlokoni.
NCIPO 31 Neetteke ni Muluku!
a Ezekiel 34:15 “‘“Mi kinaahala uwacera ikhontwaa caka ni mi kimwaneennyaaka kinaahala urwaana wuurupani,” neera Nkhulupale Pwiiya Yehova. 16 “Kinaahala utotha ikhontwaa irimenle, kinaahala uturusa ihapuwale, kinaahala utthukaca nikhwatta naya ile inhala urakala ni kinaahala ulipiha ile inhala woocya, masi kinaahala umalamaliha ikhontwaa yooneneva ni yokuru. Nnya mi kinaahala uhukhumu.”
b Miruku 28:13 Ntthu novitha itampi cawe naahala wona uwerya, Masi ule nohimya ni nohiya uvara itampi naahala wooneliya ikiriri.
c Wakhalaka wiira munna vanre itampi khanrwaa waahimerya mahumu itthu ipankilyaawe, upheela winyu weettela ikano ca Yehova uhaana uwiirihakani urwaa waahimerya ayo mahumwaayo.
d Akalasiya 6:1 Mayamunna, wakhalaka wiira munneehu nawancera upanka itthu yoohiloka, hataa uyo hinaaya ucuwelela, nyuuva nneettiheriya ni nnepa wowaaryava, mmananihe unkavihera uyo munnooyo ahiye upanka iyo itthwiiyo. Masi munkavihere nthoonyeraka unamaana. Ni ratta, wiira ni nyuuva nhipanke itthu yoohinamaana.