MWAHA WOOSOMIYA 37
NCIPO 114 “Nvilele”
Mananna owaanana uwaceriya woohisariya
“Uyo ahoweherera uwaceriya niisariya, masi aawaceriye woohisariya.”—ISAI. 5:7.
ITTHU INHALEEHU WIITTHUCA
Nhina ula mwahoola, ninaahala wiitthuca isiyani Yesu yaapankilyaawe ukati waawonnyaawe atthu akhwaawe yawaceriyaka woohisariya ni manannani ninhaleehu untakiha.
1-2. Manannani atthu enci aneecoonaaya yawaceriyaka woohisariya ni isiyani inhaleehu woona nhina ula mwahoola?
MAHUKWAALA, atthu enci anaawaceriya woohisariya. Atthunaka anwaceriya commo, nlattu woovirikana ikhapila, uhuva, mananna ciryaaya ni citthu cikhwaawe. Akhwaawe anwaceriya ayo manannaayo, kontha ahooleli ookuvernu ni ale anvara miteko, anwehaweha paahi ukhalana mihakhu. Woona atthu yawaceriyaka naayo manannaayo, pooti uniriipiha nrima hiiva ni ciicammo ale ninafenteehu.
2 Khanintikhinaca wiira atthu enci anaakhala oonyonyinya nlattu wowaceraninnya woohisariya unoonannya mahukwaala. Otheene cihu, nimpheela ukhala ituniya inhaleehu wiicoona ukhala ookhikicerya ni uwaceriya nimananna osariya. Atthu enci anawiikelakeliha mmasiyaasani, ayo anaapanka manifestação ni anawaakavihera ahooleli onsiyaasani ankhuluveliha uwaana isariya. Phimaana, khampa makristau, hi niheetthucihiya uhipanka mphantte wo ntuniyani ni uweherera Umwene wa Nluku unhala uwaana isariya. (Joau 17:16) Masi hataa ukhalaka commo, hiiva unaaniriipa nrima ni ninaarusiya nawoonaka atthu yawaceriyaka woohisariya. Vano, yiirannyaka iyo itthwiiyo, ninlamuliya wiikoha co: ‘Isiyani inlamuliyaaka upanka? Kiireke ihaavo itthu inlamuliyaaka upanka nhina uwaceriya woohisariya ninna coo?’ Wiira naakhule ala makohwaala, nttwee noone tokooni mananna Yehova ni Yesu cinoonelaaya uwaceriya woohisariya.
YEHOVA NI YESU WAARUSA ATTHU ANWACERANA WOOHISARIYA
3. Kontha isiyani ninnviruweehu nlattu woowaceriya woohisariya? (Isai 5:7)
3 Ibiibiliya inaanihimerya kontha isiyani ninrusiyeehu nawaceriyaka woohisariya. Iyo ineera wiira Yehova, numpile nimakhalelwaawe ni uyo inancivela isariya.” (Isaa. 33:5; Upha. 1:26) Yehova khanoopuwela woohisariya ni khampheela wiira ntthu oopuwele nimananna oohisariya! (Deut. 32:3, 4; Mik. 6:8; Zakar. 7:9) Wootakihera, Yehova aheewa ukhuwela wo asarayeli ukati waawaceriyaaya woohisariya naasarayeli akhwaaya. (Nsome Isaiya 5:7.a) Yehova aahattarusa ale yaheewelela Nlamulo nawe ni yaawacera akhunanaya woohisariya.—Isai. 5:5, 13.
4. Manannani Yesu neecoonaawe amoonaka ntthu ahuvihiyaka? (Nwehe ciicammo ilatarato.)
4 Khampa Yehova, Yesu uncivela isariya ni unrusa atthu anwacerana woohisariya. Naryeene va watuniyani vaa, Yesu ahomoona nlopwana mmoca namakuttula. Uyo ahomoonela ikiriri ni ahonvoniha. Masi ahooleli ottiini ukati wonnyaaya wiira aahovonihiya, ayo yahorusiya. Ukhala wiira yaatthara nlamulo no sabado, phimaana, khayaapheela unkavihera uyo nlopwanooyo. Vano, manannani Yesu eeconnyaawe nhina moopuwelelwaaya ayo atthwaayo? Khweeliini, “uyo waahonriipa nrima cinene.”—Mark. 3:1-6.
Ukati wa Yesu, ahooleli ottiini yaanaahuviha atthu, masi Yesu aanaafenta ni aanaakavihera (Nwehe iparaagarafu 4)
5. Kontha isiyani khaninnlamuliya uviruwa cinene nawaceriyaka woohisariya?
5 Ukhala wiira Yehova ni Yesu waarusa atthu anwacerana woohisariya, khinakhala itthu yootakhala hiiva wiicoona ciicammo. (Efesu 4:26) Masi ninlamuliya wiivaraca nawaceriyaka woohisariya ni khaninlamuliya wuupuwela wiira, ninaahala ukhitiri umalamaliha uhuva. Khweeliini, urusiya cinene, pooti unipanka pusya ni uniphwanyiha iretta. (Isaa. 37:1, 8; Tiya. 1:20) Vano isiyani inlamuliyeehu upanka nawaceriyaka woohisariya? Hiiva pooti waniitthucereehu cinene ntakihero na Yesu.
ISIYANI YESU YAAPANKILYAAWE UKATI WAAWONNYAAWE ATTHU AKHWAAWE YAWACERIYAKA WOOHISARIYA?
6. Manannani atthu yaawaceriyaaya woohisariya ukati Yesu waaryaawe watuniyani? (Nwehe ciicammo ilatarato.)
6 Ukati waaryaawe watuniyani, Yesu ahowoona atthu enci yawaceriyaka woohisariya. Uyo hoona mananna atthu yaahuvihiyaaya naahooleli ottiini. (Mat. 23:2-4) Uyo ciicammo, ancuwela sana-saana kontha isiyani ahooleli ookuvernu oorooma, yaawaceraaya atthu nimananna oohinamaana. Ni ayuuta enci, yaaneekelakeliha mmasiyaasani, akhwaawe khampa Azeloti yampheela waana wiira amalamalihe iyo itthwiiyo. Phimaana, Yesu khaakavihenre ayo anasiyasaayo. Ukati waacuwenlyaawe wiira atthwaayo yaapheela unthanla wiira akhale umwene, Yesu ahokhotta.—Joau 6:15.
Yesu awelaka umwaakoni veekha. Ni atthu enci anari vathi waya uyo mwaakooyo. (Nwehe iparaagarafu 6)
7-8. Kontha isiyani Yesu waahaamananihilyaawe umalamalihiya uwaceraniya woohisariya ukati waaryaawe watuniyani? (Joau 18:36)
7 Ukati waryaawe watuniyani, Yesu keekelakelihile nsiyaasani wiira amalamalihe uwaweraniya woohisariya. Kontha isiyani? Kontha uyo ancuwela wiira apinaatamu khaarina ihakhi wiira yiilamulele mwaaneennyaaya. (Isaa. 146:3; Jer. 10:23) Ayo ciicammo khanhala ukhitiri umalamaliha citthu cotheene cinwaana uhuva. Ituniya inhooleliya ni Sotwani, Tiyapu nlayikha nimoca ninkurumica uwaceraninnya woohisariya. (Joau 8:44; Efesu 2:2) Ni upahuwa, ciicammo unaawiiriha apinaatamu uhikhitiri wuupuwela niisariya ukati nkhwaawe.—Ekles. 7:20.
8 Yesu ancuwela wiira Umwene wa Nluku paahi, phinhala ukhitiri umalamaliha citthu cotheene cinwaana uhuva. Nlattu wo iyo, uyo anvarela nteko ukati, ikuru wiira aalalyeere atthu ihapari comaana Coomwene wa Nluku.” (Luka 8:1) Naayo manannaayo, uyo anaamaliha ale yonla nlattu woohuva ni woohuvihiya. (Mat. 5:6; Luka 18:7, 8) Phimaana, iyo itthwiiyo inhala ukhitirya, kahi nlattu wosiyaasa, masi nlattu wo Umwene wo wiirimu, wa Nluku uhimpankela mphantte wo ila ituniyeela.”—Nsome Joau 18:36.
MUNTAKIHE YESU MWAWACERIYAKA WOOHISARIYA
9. Isiyani inookupalihani wiira Umwene wa Nluku paahi phinhala umalamaliha masakha otheene?
9 Mahukwaala, hiiva ninawoona uwaceraniya woohisariya uvirikana ukati wa Yesu. Masi ntthu unkumiherera uwaceraniya woohisariya, nanlelo khanle Sotwani ni atthu otheene ale antakiha makhalelwaawe. (2 Tim. 3:1-5, 13; Apoka. 12:12) Khampa Yesu, hi ninaacuwela wiira Umwene wa Nluku paahi, phinhala umalamaliha citthu cotheene cinwaana uhuva. Ukhala wiira hi ninkavihera uyo Umwenyooyo, khanineekelakeliha isiyaasa ni khanimpanka manifestação wiira naakavihere ale ankhuluveliha uwaana nnema. Nttwee noone itthu yawiirannyenle anuunu amoca aneehaniya Stacy.b Ahinaaya wiitthuca ikhweeli, anuunu Stacy yampankela mphantte waanasiyaasa. Masi ayo yahopacera wiikoha isiyani yaapankaaya. Ayo aneera: “Kipankakoono manifestação miiva kaneekohaka, kiireke kimpanka itthu yomaana? Vano upacera waka ukavihera Umwene wa Nluku, kihoonenela wiira kimpanka mphantte womaana. Kihocuwela wiira Yehova naahala umalamaliha uhuva ni masakhala otheene nimananna osariya.”—Isaa. 72:1, 4.
10. Manannani nihimmananiheehu urukunusa malamulo a Yesu amphwanyannya nhina Matewus 5:43-48? (Nwehe ciicammo ilatarato.)
10 Atthu enci anaapanka manifestação wiira amalamalihe uwaceraniya woohisariya. Masi iyo khinakhala itthu Yesu iniitthucihilyaawe wiira nipanke. (Efesu 4:31) Amunna amoca aneehaniya Jeffrey, aneera: “Mi kinaacuwela wiira manifestação onnema, wahoolo pooti ukhala okhirini. Phimaana, Yesu niitthucihile wiira nihaana waawacera atthu otheene ninifento, hataa ale annilupattha. (Nsome Matewus 5:43-48.) Khampa makristau, hi ninaapanka yotheene inkhitiriihu wiira ninyeme upanka itthu inhala uvirikaniha malamulo Yesu anivahilyaawe.
Ninlamuliya ulipa nrima wiira nihiikelakelihe isiyaasa co ila ituniyeeya (Nwehe iparaagarafu 10)
11. Kontha isiyani atthunaka ikwaha cikhwaawe unhalaaya unirikela untakiha Yesu?
11 Hataa nicuwela wiira Umwene wa Nluku paasi phinhala umalamaliha uhuva ni citthu cotheene cinwaana masakha, hiiva pooti wannirikelaaya untakiha Yesu. Moone itthu waawiirannyenle anuunu Janiya yaawaceriye woohinamaana nlattu wokhapilaaya. Ayo aneera: “Mi kaahorusiya cinene. Ni ciicammo mi wahokiriipa nrima ni kaapheela wiira ayo atthwaayo attarusiye. Vano mi kahoopuwela ukavihera ikhurupu imoca yaamananiha umalamaliha uthanyanaciya, ni kooniha wiira citthunnyo canhala ukhala saana.” Nuuwakatyaaya anuunu Janiya yaahoonelelea wiira yahaana upanka marukunuso. Ayo aneera “Mi kaanoopuwela ni mananna oohinamaana phanka ayo atthwaayo,“uhiya unkhuluvela Yehova miiva kahopacera waakhuluvela ayo atthwaayo ni ukupali itthu yaahimyaaya. Vano, mi kaholakela uhiya upankela mphantte wo ayo atthwaayo.” Hataa ukhalaka wiira ninaarusiya nlattu woohiwaceriya niisariya awula nlattu woomoona ntthu awaceriyaka woohisariya, ninlamuliya wiivaraca ni uhipankela mphantte wo ula ulumwenkuula.—Joau 15:19.
12. Kontha isiyani ninlamuliyeehu uweheeha ratta citthu cinsomeehu, cinooneehu awula cineeweehu?
12 Isiyani inhala unikavihera wiivaraca naviruwaka nlattu woowaceriya woohisariya? Itthu imoca inhala unikavihera ukhanle, uweheeha saana citthu cinsomeehu, cinooneehu awula cineeweehu. Ihantisi cikhwaawe cinkhumela munterneetini, cinkhala ihantisi cinwiiriha atthu enci uviruwa ni uwaanana ahooleli okuvernu. Ikwaha cinci, atthu anhimyahimya citthu ciirannyeele, anhimya paahi citthu cinoopuwelaaya, uhiya itthu yiirannyeele. Hataa ukhalaka wiira ikhanle ihapari wokhweeli, hiiva khaninlamuliya uviruwa wiira nimalamalihe itthu yiirannyeele awula itthu insomeehu. Khweeliini, navirihaka ukati mwinci nasomaka awula niviriyanaka nnyo ihaparinnyo, pooti wanniirihaaya, urusiya, ulolovaca ni ciicammo uniriipiha nrima (Miru. 24:10) Uhiya commo, hiiva pooti wanhiyeehu uhoolelihera Umwene wa Nluku nipuro noopacera muukuni wihu ni uliyala wiira Umwene wa Nluku paahi phinhala umalamaliha citthu cotheene cinwaana uhuva.
13. Manannani uhihiyerera upanka usoma Ibiibiliya woveekha unhalaaya unikavihera ukhalana moopuwelelo omaana nawaceriyaka woohisariya?
13 Nasomaka Ibiibiliya khula mahuku, ni nuupuwelaka itthu insomeehu, unaahala unikavihera ucuwela itthu inlamuliyeehu upanka nawaceriyaka woohisariya awula namoonaka ntthu awaceriyaka woohisariya. Anuunu amoca aneehaniya Alia, yahoriipiya nrima ukati waawoonaaya atthu yaakhala ncokwaaya yawaceriyaka woohisariya. Ayo yaahorusiya cinene kontha atthu yaapanka citthu coohinamaana khayaattarusiya. Ayo aneera: “Mi kahaana kunkomaka ni wiikoha co, ‘Kiireke wiira Yehova khweeliini naahala umalamaliha ala masakhaala?’ Uyo waari ukati miiva waasomilyaaka iliivuru ya Jó 34:22-29. Nnyo iveerusunnyo caahokuupusera wiira Yehova nawoona citthu cotheene cineerannya, ni phinhala umalamaliha masakha otheene.” Nawehereraka Umwene wa Nluku umalamaliha masakha otheene, hiiva ninlamuliya waanana uwaceriya woohisariya nenna co. Manannani?
ISIYANI INLAMULIYEEHU UPANKA NAWEHERERAKA UMWENE WA NLUKU UMALAMALIHA MASAKHA OTHEENE
14. Isiyani inlamuliyeehu upanka nna co wiira nihiikelakelihe isiyaasa? (Akolosu 3:10, 11)
14 Hiiva khaninhala ukhitiri umalamaliha uwaceraniya woohisariya, masi pooti wankhitiriihu waawacera akhunanihu ni mananna omaana. Khampa niitthucileehu, hiiva ninantakiha Yesu nawooniheraka nifento atthu otheene. Nno nifentonno ninaanikurumica waawacera atthu otheene niihisima, ni mpaka ale anniwacera pusya. (Mat. 7:12; Aroo. 12:17) Yehova unantteela nrima anoonaka naawacera atthu otheene nimananna omaana ni niisariya.—Nsome Akolosu 3:10, 11.c
15. Manannani ninhaleehu waakavihera atthu nawiitthucihaka itthu Ibiibiliya ineetthucihaaya?
15 Itthu yooreera upanka nawaceriyaka woohisariya, ukhanle waahimyeera akhunanihu ikhweeli co mbiibiliyani. Kontha isiyani nineereehu commo? Kontha “ucuwelaca wa Yehova” pooti urukunusa makhalelo antthu ooviruwa, nakhirini ni ukhala ntthu omaana ni onnema. (Isai. 11:6, 7, 9) Hinaaya wiitthuca ikhweeli, Jemal ahotakaneela ikhurupu imoca yo atthu ootakhala nrima yaana wiira amalamalihe uthanyanaciya. Uyo neera: “Nyuuva khannolamuliya urukunusa makhalelo antthu niikhirini. Mi akirukunusile makhalelwaaka nlattu woowaceriya niikhirini, masi kirukunusile makhalelwaaka niikhweeli co mbiibiliyani ceetthucilyaaka. Itthu Jemal yiitthucilyaawe ihonkurumica upanka marukunuso. Naakaviheraka atthu akhwaawe ucuwela myaha co mbiibiliyani, pooti waakavihera uhiya upanka citthu caahala waapanka pusya akhunanaya.
16. Kontha isiyani ninaahimeryeehu atthu akhwaawe Umwene wa Nluku?
16 Khampa Yesu, hiiva ciicammo ninaapheela waakavihera atthu ucuwela wiira Umwene wa Nluku paasi phinhala ukhitiri umalamaliha citthu cotheene cinwaana uhuva. Nno niwehereronno, pooti waalipiha ale anhuvihiya. (Jer. 29:11) Stacy, himiye wiipaceroni neera: “Wiitthuca ikhweeli co mbiibiliyani uhokikavihera waanana uwaceriya woohisariya konnyaaka ni kivirihilyaaka. Yehova naavarela nteko ihapari co mbiibiliyani wiira animaalihe.” Wiira naahimyeere atthu ihapari coolipiha co mbiibiliyani cinooluma umalamalihiya wo citthu cotheene cootakhala cinwaana uhuva, hiiva ninlamuliya ukhala owiitthenkaceene wiira naalipihe nivarelaka nteko inatiri co mbiibiliyani. Wakhala wiira nyuuva nnaacuwela sana-saana itthu Ibiibiliya nhimyaaya yaacaka uhuva, pooti wankupaliinyu itthu ineetthucihaaya. Vano, nyuuva nnaahala uwiitthuciha atthu akhwaawe ucikolani awula untekoni winyu, kontha isiyani ninhuveehu ni isiyani Yehova inhalaawe upanka wahoolo.d
17. Manannani Yehova nonikaviheraawe nawaceriyaka woohisariya?
17 Hi ninaacuwela wiira khaninnhala uhiyerera uhuva, nikhalaka ila ituniya inhooleliya ni Sotwaniila, masi hiiva pooti wanweherereehu uphiya ukati womaana, kontha Yehova hokhuluveliha “unikavihera nenna co.” (Joau 12:31) Avarelaka nteko nuulumo nawe, Yehova naahimya nlattuni ninhuveehu ni ciicammo mananna cineecoonaawe anoonaka nihuvaka. (Isaa. 34:17-19) Nlattu wo Mwaamwanawe, Yehova naaniitthuciha itthu yoohala upanka nawaceriyaka woohisariya ni mananna umwennyaawe unhalaaya umalamaliha citthu cotheene cinwaana uhuva. (2 Pet. 3:13) Ninlamuliya uhihiyerera upanka yotheene inkhitiriihu wiira nilalyeere ihapari comaana co uyo umwennyooyo nawehereraka uphiya ukati “ituniya inhalaaya ucara isariya.”—Isai. 9:7.
NCIPO 158 “Niweherere!”
a Isaiya 5:7 Kontha imatta ya Yehova aanakhotto ikhanle inupa yaasarayeli; Alopwana o Yuta yaari miri cancivela, uyo aaweherera isariya, masi khayaarivo isariya; aaweherera makhalelo omaana, masi waamakela wunliya nlattu wo masakha.
b Macina makhwaawe ahaakakhanihiya.
c Akolosu 3:10 ni mwiiwarihe meettelo ophiyaaru anrehereriya nuucuwela ikhweeli, wiira akhaleke khampa mwaneene Nluku cumpilyaawe. 11 Nna co khaavo nthanyiya, akhale Kereeku awula nyuuta, owuula awula oohuula, mmalaponi, oohisilimu, ipottha awula ntthu oohikhala ipottha, masi Kristu phiri cotheene ni ri wamoca naatthu otheene.
d Nwehe ciicammo mphantte woomalela A nhina ipontu 24-27 nhina ibrochura Mwaafente atthu ni — Mwaapanke eetthuci.