Nhipice unkavihera ntthu noonihera uncivela ihapari comaana

1. Manannani atthunaka atthu akhwaawe anhalaaya woonela ihapari cinaalalyeereehu? (Miteko 13:47, 48; 16:14, 15)

UKATI wo makristau oopacera atthu enci yaanaatepa waacivela ikhweeli yarwaaka unkutthaanoni. (Nsome Miteko 13:47, 48; 16:14, 15.) Mahukwaala atthu enci anaakhala otteeliya yeewaka ihapari comaana ikwaha yoopacera. Wuupaceroni atthu akhwaawe pooti uhaacivela ihapari comaana, masi nuuwakatyaaya, ayo pooti utthukula nrimaaya wiira yiiwe ihapari comaana. Ninlamuliya upanka isiyani naaphwanyaka atthu cinaacivela wiiwa ihapari comaana?

2. Kontha isiyani ninlattaliheehu nteko wo waapanka eetthuci ni nteko wa namalima?

² Nteko wowaapanka eetthuci unaalikanaca ni nteko wa namalima. Ukati noonaawe wiira uhaavo mwiri urina mihokorokho coottokotta haana arwaaka urukulaca woohipica. Ciicammo khanlamuliya uhiyerera ulima ni uwacera miri cikhwaawe cihinaaya wiima. Inanna imocaaru, namphwanyaka ntthu noonihera uncivela ihapari comaana khaninlamuliya upica unkavihera wiira akhale ntthari a Kristu. Masi ciicammo khaninlamuliya uhiyerera waakavihera ale unaarikela ucuwela ifayita irinaaya ile ineetthucaaya. (Joau 4:35, 36) Nakhitiriki ucuwelela wakhala wiira ntthuuyo cinancivela ihapari comaana awula mena, khunrika woonenela inanna coonkavihera. Nhina ula mwahoola ninaahala woona isiyani inlamuliyeehu upanka woomoopana mwaha ntthu ikwaha yoopacera wiira ninkavihere. Ciicammo ninaahala wiitthuca mananna owaakavihera wiira ehihiyerere wuunuwa nhina mminepani.

NINHALA UNKAVIHERA CANI NTTHU CINNCIVELE IHAPARI COMAANA

3. Isiyani inlamuliyeehu upanka namphwanyaka ntthu incivenle ikhweeli ukati unlalyeereehu? (1 Akorintu 9:26)

³ Namphwanyaka ntthu wuulalyeerani noonihera uncivela ihapari comaana, khaninlamuliya upica unkavihera wiitthuca myaha ca Yehova ni umpatthanana. Phimaana, namoopanaka mwaha ntthu ikwaha yoopacera ninlamuliya unlattula usoma Ibiibiliya ni woona mikutthaano.—Nsome 1 Akorintu 9:26.

4. Nhimye itthu yiirannyeele yantthu aapheela usoma Ibiibiliya woohipicapica.

⁴ Mwancere usomiha Ibiibiliya. Atthu akhwaawe ninaaphwanyeehu wuulalyeerani khampica utthuna usomihiya Ibiibiliya. Wootakihera, nihuku nimoca mwanthiyana mmoca o Canada ahaaphwanya miyanuunu yaalalyeera niikariinyu ni ahowyaa iliivuru Mphwanye Utteeliya Uhimmala! Vano anuunu yahomwiirela wiira uyo pooti waahalaawe usomihiya Ibiibiliya mahala ivareliyaka nteko iliivuru yaakusilyaawe. Uyo mwanthiyanooyo wahoncivela ni yahovahana manummeru o telefooni. Ucoocilo waya nne nihukunne, uyo ahowinviyarela imensaage anuunu akohaka nihukuni yaahalaaya unsomana. Vano anuunwaayo unkoha waya wiira unoonela cani ukhala isaapatu awula itominku uyo ahaakhula co: “Nnoonela cani meelo, miiva kinaahala ukhalana ukati.” Vano ayo yahopacera unsomana usawaya ni yeeyo isumaneeyo uyo ahopacera woona mikutthaano woohihiyerera.

5. Ikwaha cikhwaawe, isiyani inlamuliyeehu upanka nihinapacera unsomiha ntthu Ibiibiliya? (Nwehe ciicammo ilatarato.)

⁵ Khweeliini, kahi atthu otheene anoopuwela inanna imocaaru khampa ule nthiyanoole ni utthuna usomihiya Ibiibiliya woohipicapica. Ikwaha cikhwaawe, thi hi ninlamuliya uwiiriha utthuna usomihiya Ibiibiliya, ninhala upanka iyo nawuulumanaka myaha cinaacivela. Wakhalaka wiira ninaakhalana moopuwelelo omaana ni uhihiyerera waawacera, pooti ukhitiri unsomiha ntthu Ibiibiliya woohipicapica. Isiyani inlamuliyeehu wuuluma wonlepela ntthu unsomiha Ibiibiliya? Hi nihaakoha nno nikohonno mayamunna ni mayanuunu apacenre unsomiha ntthu Ibiibiliya. Nttwee noone citthu cihimilyaaya.

6. Isiyani inlamuliyeehu unhimeerya ntthuuyo apheelaka wiira nituruwele-tho umoopana mwaha?

⁶ Ayo mayamunnaayo aheera wiira mapuro makhwaawe moolumaka usoma wo Ibiibiliya unaareera uheera “usoma”, “usomiha Ibiibiliya” awula “kinaahala wuusomiha weeva”. Uhiya commo, ayo mayamunnaayo ahoonenela wiira moolumo ooreera wuuluma akhanle “woopa mwaha” awula “wiiweeha Ibiibiliya.” Wiira uyo ntthuuyo hihiyerere usoma Ibiibiliya nyuuva pooti umwiirela co: “Ikhanle itthu yootikhiniha woona Ibiibiliya yaakhulaka makoho ofayita cinene o muukumini wihu” awula “Ibiibiliya khinakhala iliivuru yo ittiini iyo inaaniitthuciha mananna ookhala saana khula mahuku”. Ciicammo, nyuuva khamunhala uviriha ukati mwinci nsomaka, nhina wo minuutu 10 awula 15 paahi nnaahala wiitthuca citthu cinhala wuukaviherani muukumini winyu. Wiira nhinttuttuse, unaareera uhivarela nteko moolumo “uhilova” awula “isumana cootheene”.

7. Manannani atthu akhwaawe yoonenenlyaaya wiira anaatepa wiitthuca ikhweeli? (1 Akorintu 14:23-25)

⁷ Munlattule woona mikutthaano. Ukati wa apostolu Paulu, atthu akhwaawe yaahonenela wiira yantepa wiitthuca ikhweeli co mbiibiliyani yarwaaka umikutthaanoni. (Nsome 1 Akorintu 14:23-25.) Iyo phiitthu ineerannya mahukwaala. Anamasoma Ibiibiliya enci, anaatepa wuunuwa nhina mminepani yapaceraka woona mikutthaano. Ukatini womaana ninlamuliyeehu unlattula ntthu urwaa woona mikutthaano? Nhina ilivuru Mphwanye Utteeliya Uhimmala mpantta 10, nihaavo nlattulo. Masi nyuuva khannolamuliya unsomiha mpaka uyo mpanttooyo wiira munlattule ntthuuyo. Ukati umpacereenyu umoopana mwaha, nyuuva pooti unonlattuleenyu woona mikutthaano co wuumaleloni isumana. Uhiya commo, atthunaka nyuuva pooti unhimerya mwaha unhala wuulumiya yooyo nkutthaanooyo awula ipontu cofayita cinhala woopeliya mwaha nhina irevista Ukhalenla.

8. Isiyani inlamuliyeehu wuuluma nanlattulaka ntthu wiira awoone nkutthaano? (Isaiya 54:13)

⁸ Nanlattulaka ntthu oonihenre uncivela ihapari comaana, ninlamuliya unhimerya mananna mikutthaano cihu cinvirikanaaya ni ittiini cikhwaawe. Namasoma Ibiibiliya mmoca onne ikwaha yoopacera usomiya wo irevista Ukhalenla, ahaakoha co anuunu anonsomiha Ibiibiliya: “Amunna yaahoolela usomiya wo irevista Ukhalenla, anaacuwela macina atthu otheene?” Vano anuunu yahomwaakhula yeeraka, khampa vaavale nincuweleehu macina amuciihu, hiiva ninawiikurumica ucuwela macina o mayamunneehu ni mayanuunwiihu. Namasoma Ibiibiliya aheera wiira kahi iyo itthwiiyo khayeeranya ukereeca wawe. Itthu ikhwaawe inlamuliyeehu waahimerya, ikhanle itthu inniiriha uthukumana. (Nsome Isaiya 54:13.a) Hiiva ninthukumana wiira ninswalele Yehova, niitthuce itthu impheelaawe ni nilipihane. (Mabere. 2:12; 10:24, 25) Phimaana, mikutthaano cihu, ciri cootthenkaciya wiira niitthuce itthu, kahi uttharatthara ileema. (1 Akor. 14:40) Usalau yo Umwene, nikhanle nipuro noosomasomiya, phimaana, cihaavo iluusu coopharela saana. Hiiva khanineekelakeliha isiyaasa ni ciicammo khaninoopela mwaha moopuwelelo aatthu. Itthu inhala unkavihera namasoma Ibiibiliya, ukhanle umoonihera ividiyu ineera Inkhumelela Isiyani Usalau yo Umwene? Napankaka commo, uyo naahala urwaa umikutthaanoni acuwelaka itthu inhalaawe urwaa woona.

9-10. Isiyani inlamuliyeehu unhimerya ntthu nopheela woona nkutthaano? (Nwehe ciicammo ilatarato.)

⁹ Atthu akhwaawe, khantthuna awula anawoova urwaa woona mikutthaano, kontha aneera wiira yarwaaka anhala ukhala Saahiti a Yehova. Vano nyuuva pooti unkavihera ntthuuyo munhimeryaka wiira hiiva khaninonkhanyereriha ntthu wuuluma awula upanka itthu mmikutthaanoni wihu. Ciicammo khaninonkhanyereriha ntthu ukhala Saahiti a Yehova. Amuci otheene anaalattuliya woona mikutthaano ni waahela nhina asaana. Umikutthaanoni wihu, asaana anookoma nkhayi naasithumwanaya ni ansoma nkhayi. Naayo manannaayo, ayari anaacuwela asaanaaya mapuro aryaaya ni itthu ineetthucaaya. (Deut. 31:12) Nwo khunlepeliya nsurukhu awula khinvirihiya iphace wiira khula ntthu ahele nsurukhu. Kontha hiiva nintthara ikano ya Yesu, ineera: “Nyuuva nvahiyee mahala ni ciicammo nvaheke mahala.” (Mat. 10:8) Ciicammo, nyuuva pooti unhimerya ntthuuyo wiira pooti uhinwaraawe ikuwo co nsurukhu mwinci. Kontha Nluku khanweheeha citthu cinwareehu, masi noweheeha nrimeehu.—1 Sam. 16:7.

¹⁰ Ntthuuyo arwaaka umikutthaanoni, mpanke yotheene inkhitiriinyu wiira ntthuuyo akhale ootaphuwa. Muncuwelihe mahumu ni mayamunna makhwaawe. Akhalaka ootaphuwa, uyo pooti uncivela woona-tho mikutthaano ikwaha cikhwaawe. Wakhalaka wiira ntthuuyo kharina Ibiibiliya, munkavihere nvarelaka nteko Ibiibiliyeenyu. Uhiya commo, mmoonihere mananna nyuuva cinkumihereenyu ifayita mwaha untaphuleliya.

NNOHALA UNKAVIHERA CANI NTTHU NOPACERA USOMA IBIIBILIYA?

11. Manannani nyuuva nnohaleenyu woonihera wiira nnaahisima nihuku ni iwoora lakenlyaawe nanamasoma Ibiibiliya?

¹¹ Wonsomiha ntthu Ibiibiliya, isiyani inlamuliyeenyu wuupuwela? Nrwee mwansomihe ntthuuyo nihuku nopheelaawe ni iwoora impheelaawe. Wootakihera, wakhala wiira hoohimeryani iwoora yoopheela unsomana, nhivirikanihe, hataa ukhalaka wiira atthu o ncokweenyu aholamalela uvirikaniha ukati. Uhiya commo, inkhala itthu yomaana nihuku noopacera unsomana woohipicapica. Anamalalyeera akhwaawe, ahohimya wiira inkhala itthu yomaana unsomiha ukati vakaani, hataa apheelaka-tho. Mwiivarace wiira nhuulumace cinene. Munhiye namasoma Ibiibiliya wuuluma.—Miru. 10:19.

12. Isiyani inlamuliyeehu ulakela napaceraka unsomiha ntthu Ibiibiliya?

¹² Ikhumelo ukati nnopacereenyu unsomiha Ibiibiliya, nhaana ulakela unkavihera uncuwela ni unfenta Yehova ni Yesu. Inanna imoca yoopanka iyo, ukhanle uhoonihera ucuwelaca winyu, masi, woonihera itthu inhimyaaya Ibiibiliya. (Mite. 10:25, 26) Apostolu Paulu ahoonihera ntakihero nomaana. Ukati waawiitthucihaawe atthu, uyo ammuuluma cinene Yesu, aawile watuniyani wiira anikavihere uncuwela ni unfenta Yehova. (1 Akor. 2:1, 2) Uhiya commo, Paulu anaakavihera atthari ophiyaaru utepa ukhalana makhalelo o mminepani anlattanihiya niiwooru, iparaata ni maluku makhwaawe ofayita. (1 Akor. 3:11-15) Ayo makhalelwaayo, anaahela nhina waamini, ucuwelaca, wuupuwela saana ni umoova Yehova. (Isaa. 19:9, 10; Miru. 3:13-15; 1 Pet. 1:7) Ntakihe mananna Paulu eetthucihaawe ni mwaakavihere anamasoma Ibiibiliya ulipihaca waamini waya ni ukhalana upatthani woolipa ni Yehova.—2 Akor. 1:24.

13. Manannani ninhaleehu woonihera uvilela ni owiiwanannyaa ukati wonkavihera namasoma Ibiibiliya? (2 Akorintu 10:4, 5) (Nwehe ciicammo ilatarato.)

¹³ Woosomiha Ibiibiliya, ntthare ntakihero na Yesu mooniheraka uvilela ni unviriyana saana. Nnyeme umpanka makoho yaahala umwiiriha namasoma Ibiibiliya uhiicoona saana. Wakhalaka wiira nihaavo nipuro nihinkupalyaawe, nhihiyerere unsomiha. Munsomihe miphantte cikhwaawe ni nuuwakatyaaya, pooti wanhokoleleenyu-tho woopela mwaha nenno nipuro nihinkupalyaawenno. Uhiya unkhanyereriha namasoma Ibiibiliya wiira akupali itthu ineetthucaawe, nhiye wiira ikhweeli invare nrimaawe. (Joau 16:12; Akol. 2:6, 7) Ibiibiliya inaalattaniha citthu cowoothiya cineetthucihiya ni mwaako woolipa, hiiva nimmananiheehu upwesakaca (Nsome 2 Akorintu 10:4, 5.) Vano, ukati nimmananiheehu umalamaliha citthu cinaaminnyaawe, ninlamuliya unkavihera unkhuluvela Yehova ni umpanka ntthawelelo nawe.—Isaa. 91:9.

MUNHALA UNKAVIHERA CANI NTTHU NOPACERA WOONA MIKUTTHAANO

14. Manannani ninhaleehu waawacera ale ampaceriha woona mikutthaano?

¹⁴ Yehova, nopheela wiira naawacereke saana atthu otheene, nihiweheehaka citthu cirinaaya, ilapo inkhumaaya ni ikhapilaaya. (Tiya. 2:1-4, 9) Vano ninhala woonihera cani wiira ninawaafenta ale ampaceriha woona mikutthaano?

15-16. Manannani ninhaleehu waakavihera ale ampaceriha woona mikutthaano wiicoona saana?

¹⁵ Atthu akhwaawe anwa woona mikutthaano, kontha ampheela ucuwela itthu ineerannya awula atthunaka anoolattuliya ni munna o nloko nikhwaawe. Mwamoonaka ntthu ophiyaaru unkutthaanoni, mmoopane mwaha ni munkharipulele nkutthaanooyo, masi, mwiivarace wiira utteeliya winyu nrima uhimoonihace ihaaya. Munkharipulele nipuro nnookomeenyu ni mmoonihere iveerusu co mbiibiliyani cinhala usomiya ni irevista, awula mmwaavyere irevistaawe. Uhiya commo, nwehawehe ucuwela mananna cineecoonaawe. Nlopwana mmoca awile wootola Usalau yo Umwene, ahomwiirela munna amwaakhelenle wiira kheecoona saana nlattu wo ikuwo caawanryaawe. Uyo munnooyo amwaakhelenlyooyo, ahonkavihera wiicoona saana, anhimeryaka wiira hiiva Masaahiti a Yehova khanivirikanne naatthu akhwaawe. Uvira waya ukati, uyo nlopwanooyo ahopattisiya ni khanliyala mananna caakhuliyaawe nuule munnoole. Namuulumanaka ntthu wile woona mikutthaano ikwaha yoopacera, nihaana nimooniheraka wiira ninannwacera, masi woohiikelakeliha nhina wo citthu co muukumini wawe.—1 Pet. 4:15.

¹⁶ Ihaavo inanna ikhwaawe yowaakavihera ale ampaceriha woona mikutthaano. Ukati nnopeenyu myaha, nnokomentariinyu ni nnopankeenyu miphantte cinyu, mwawuulumaka atthu ahinonswalela Yehova, nwuulume niihisima. Nnyeme wuuluma citthu cinhala umwiiriha ntthuuyo wiicoona uveehiya ni upanka citthu cinhala umwiiriha ntthuuyo uhincivela-tho woona mikutthaano. (Titu 2:8; 3:2) Wootakihera, khaninlamuliya wuuluma pusya citthu cinkupalyaaya atthu ottiini cikhwaawe. (2 Akor. 6:3) Mayamunna antaphulela myaha, anlamuliya utepa unnyema iyo itthwiiyo. Ciicammo ayo mayamunnaayo, anawoonihera waahisima cinene ale alattuliye woona mikutthaano etaphulelaka moolumo ahineewehaaya saana atthu ampaceriha woona mikutthaano.

17. Isiyani inlamuliyeehu upanka naaphwanyaka atthu ampheela woopwa ni uphwanya ukumi woohimala?

¹⁷ Khula mahuku anvira, nteko wo waapanka eetthuci unaavira watepaka ukhala nteko woovariya wo waakuvyaaca. Ni hiiva khaninhala uhiyerera waaphwanya atthu “ampheela woopwa ni uphwanya ukumi woohimala.” (Mite. 13:48) Yeerannyaaka commo, khaninlamuliya woovelela waalattula atthu wiira nipacere waasomiha Ibiibiliya ni woona mikutthaano cihu. Napankaka commo, ninaahala waakavihera atthu upacera weetta ‘iparapaara inrweeha muukumini.’—Mat. 7:14.