1925—Myaakha 100 uttuli

ILE YAAWEHERERAAYA KHAYEERANNYEELE

Anamasoma o Ibiibiliya yoopuwela wiira ituniya yaanhala ukhala ipeephoni ukhumelo mwaakha wo 1925. Kontha isiyani yuupuwelaaya commo? Munna Albert Schroeder aapankela mphantte ikhurupu yo Mphwinko wo Mahumu Unhoolela, aheera: “Noopuwela wiira, mwaakha wo 1925 makristau otheene oothanliya yaanhala urwaa wiirimu wiira yaahoolele muumweneni wa Nluku ni alopwana okhuluvelya okhalayi khampa Aparahaamu, Davidi ni akhwaawe yanhala wunwelelihiya wiira akhale ahooleli o umwene wa Nluku va watuninyani va. Masi uhiirannya waya iyo itthwiiyo mayamunna makhwaawe yahovololaca.— Miru. 13:12.

Waanookhalaru commo, anamasoma Ibiibiliya enci khayaahiyerenre uvara nteko woolalyeera. Ciicammo wahoonannyaa wiira ayo yahaana nrintti wo waalalyeera ihapari comaana atthu akhwaawe. Wootakihera nttwee noone mananna ayo yaavarenlyaaya nteko iraatiyu wiira yaalalyeere ikhweeli atthu enci.

WINCIVA WO MAPURO WAAPWANNYAAYA IRAATIYU CIHU

Nlattu woonikhumela saana iraatiyu WBBR mwaakha wo 1924, anamasoma Ibiibiliya yahoteka-tho nipuro nikhwaawe waattamela Chicago ncoko wo Illinois. Ncinanaya iyo iraatiywiiyo yaari WORD. Ralph Leffler, nlopwana kavihenre ukati waatekiyaaya iyo iraatiywiiyo neera: “Mahuku waaririyaaya uhiyu iraatiywiihu WORD yanawiiwiya uttayi. Wootakihera, amuci amoca yaakhala ikiloomeeturu 5 mil ni nipuro naaryaaya iraatiyu, yahokhitiri wiiwa ihapari coopacera cuulumiye nhina iyo iraatiywiiyo. Nuuwakatyaaya ayo amucaayo yahantikha iwarakha yooniheraka usukhuru myaha coolumiya nhina ile iraatiywiile caalipiha.

Yuulumaka ifayitaaya ile iraatiywiile, irevista Torre de Vigia yo yoopacera yo Dezembro mwaakha wo 1925 yaheera: “Imisooreehu yaarina 5 mil watts, yaaneewannyaa mapuro otheene o Estados Unidos, toko o Cuba urwaaka mphantte woovatti ilapo ni uculu waya ilapo wo Alasca. Atthu enci yaari ahineetthuca ikhweeli yahokhala otteeliya ni yampheela wiitthuca-tho citthu ceetthucaaya nhina iyo iraatiywiiyo.”

Uyo ukatyuuyo o Canada anamasoma Ibiibiliya yeera itepaka wiikurumica wiira avarelenteko iraatiyu ukati woolalyeera. Vano mphwinko wa Yehova waahothuma ni waaholokihaca nipuro nooniya ividiyu Saskatoon ncoko wo Saskatchewan yeehaniya imisoora yo CHUC.

Nlattu wo iyo iraatiywiiyo atthu enci yaakhala isittatti cankaani co uyo ncokooyo yahokhalana iparakha yoowiiwa ihapari comaana ikwaha yoopacera. Wootakihera, Athiyana amoca yeehaniya Graham yaakhala isittatti yoottayi yaheewa iporokaraama yo nraatiyuni ni nuuwakatyaaya yahantikha iwarakha ni yahoveleeliha ilepelaka irevista co Masahita a Yehova. Amunna George Naish aneera: iwarakhaaya ayo athiyanaayo yaari yinci ni yaaneewanyaa sanasaana. Mpaka nahoveleeliha iliivuru yo miteko cihu yeehaniya Estudos das Escrituras. Uvira waya ukati vakaani ayo athiyanaayo yahancera ulalya ihapari coomwene mapuro makhwaawe.

WIIWEEHA WO NAANANO

Irevista ukhalenla yo 1 yo Março 1925 yahaana muru weera “Nascimento da nação.” Kontha isiyani uyo mwahooyo waaryaaya wofayita? Uvira waya ukati vakaani anamasoma Ibiibiliya yaakupali wiira Sotwani ahaana mphwinkwaawe wo malayikha ootakhala wiirimu ni va watuninyani va ciicammo ahaana waahela nhina anattiini cowootha, ananakoso ni anasiyaasa. Ni nhina iyo irevisteeyo Mphwinko wo Mahumu Unhoolela wahaakavihera woona wiira Yehova ciicammo ahaana mphwinko awe ni uyo khunvaranaca ni uri woovirikana ni mphwinko wa Sotwani. (Mat. 24:45) Uhiya commo ipottha yookhuluvelya ni yankhili yahohimyaca wiira Umwene wa Nluku wahancera ulamulela ukhumelo mwaakha wo 1914, Sotwani nkhayi nimaciinnyaawe ahovonyeriya watuniyani ni khayaakhitinri-tho uhokoleela wiirimu.— Apoka. 12:7-9.

Atthu akhwaawe wahaarikela wiiweha iyo itthwiiyo. Masi ukhala wiira ipottha yankhili yancuwela wiira iyo itthwiiyo pooti yaahalaaya wiiranya, ayo yahantikha yeeraka: “Wakhala wiira haavo hinkupali citthu cantikhiye nhina ila irevisteela, hihiye ukhalana nrima womaana, ninanlepela waaweherera Apwiiya namaanle.”

Colportor (mahukwala uneeriya Piyoneeru) mmoca neehaniya Tom Eyre o Grã-Bretanha ahohimya mananna anamasoma Ibiibiliya ceeconnyaaya usoma waya iyo irevisteeyo: “Mayamunna yahokhala otteeliya ni mananna yaataphuleliyaaya Apokalipise ikapiitulu 12. Ukati waacuwenleehu wiira umwene wa Nluku wahotthenkaciya wiirimu, nihokhala oolipihiya wiira nalalyeere umwene wa Nluku. Khweeliini iyo yahokikurumica uleva ukatiihu wiira naakavihere atthu. Khweeliini, iyo yahonikavihera uvara cinene nteko woolalyeera ni yahonikavihera woona mananna Yehova ettihaawe apoovwaawe wiira awiitthucihe citthu cootikhiniha caahala wiirannya uhoolo.”

NRINTTI URINEEHU WOOLALYA MYAHA CA YEHOVA

Mahukwaala, Masaahiti a Yehova anaacuwela sanasana moolumo ari nhina Isaiya 43:10 aneera: “Nyuuva nkhanle masaahityaaka” neera Yehova, “iyee, aswalyaaka kuuthanlilyaakani.” Vano uhinaphiya mwaakha wo 1925 moolumo ari nhina Isaiya 43:10 yaari ahinaaya uvareliya nteko nhina iliivuru cihu. Masi vano yaapheela wancera uvareliya nteko. Ikhumelo mwaakha wo 1925 moolumo amphwanyannya nhina Isaiya 43:10 ni 12 yahoopeliya mwaha nhina miphantte 11 yo irevista Ukhalenla.

Mwaakha wo 1925, wiikhiceroni wo mweeri Agosto anamasoma Ibiibiliya, o Estados Unidos, yahothukumana wiira yoone ikonkereesu yaapankiye u Indianapolis, Indiana. Nhina iyo iporokaraameeyo, munna Rutherford ahowaakhelela anamaviriyana otheene eeraka: “Niwile ila ikonkereeswiila wiira nilipihiye naapwiya ni naayo manannaayo, ninaahala uturuwela mapuro ni micoko cinlalyeehu ninaarina ikuru conaanaano ni ukhala oolikaneene wiira nivahe usaahiti.” Ikonkereeswiiyo yahoviriha mahuku 8 ni atthu otheene yaawile woona iyo ikonkereeswiiyo, yahokurumiciya wiira avarele nteko ukatyaaya para ulalyaa ihapari ca Yehova.

Isaapatu nihuku 29 mweeri wa Agosto, amunna Rutherford yahooluma mwaha waarina muru weera: “Uma chamada a acção.” Nhina uyo mwahooyo, ayo yahottonkaca ifayita urinaaya nteko woolalyeera, yeeraka: “Yehova naweerela apoovwaawe, nyuuva nkhanle masaahityaaka . . . ni miiva Nlukwiinyu. Ni uyo nawaavaha malakihero wohaakhuwa ni arunyaka eeraka: “Kihaavaha nthoonyero apoovwaaka, khiivo-tho ikhurupu watuniyani invaha nthoonyero ahikhanle apoovwaawe. Ale arina nnepa waapwiya ni phimaana neehanaawe masaahityaaka.”— Isai. 43:12; 62:10.

Amunna Rutherford umaliha waya wuuluma mwahooyo, yahosoma iwarakha yaarina muru uneera: “Mensangem de esperança.” Atthu otheene yeewa ule nkutthaanoole yahaamini ni nrimaaya wotheene ihapari caahimya wiira Umwene wa Nluku paahi phiri niweherero ninhala unikavihera uphwanya iparakha, toko nnema, uweherera, ukumi womaana, utaphuwa ni utteeliya woohimala. Usomiya waya iyo iwarakheeyo, vano yahopankiya ifolyetu yaataphuleliye ni iluuka cinci, ni yahokaweliya atthu oophiyaka 40 imiliyawucene.

Anamasoma Ibiibiliya yahopica vakaani ni cahovira myaakha vakaani wiira acise ncina nineera Masaahiti a Yehova. Masi nanlelo, ayo yancuwela nteko waavahaceriyaaya woolalya ihapari ca Yehova.

UKHURUMICIYA NI UTHOTOLIYA ATTHU YOONIHENRE WAACIVELA IKHWEELI

Ukati yaatepaaya winciva atthu yaasoma Ibiibiliya ntuniyani motheene, ciicammo wahenciva ukurumiciya wiira yathotoliye atthu yoonihenre waacivela ihapari comaana. Umala waya ikampanya yookawiya ifolyetu yaarina muru uneera, Mensagem de Esperança,a Iboletim yahovaha malakihero yeera: “Nturuwele ni mwaathotole ale ahalanne Ifolyetu irina muru uneera Mensagem de Esperança.”

Iboletim yo Janeiro yo 1925, yahonttonkaca namasoma Ibiibiliya mmoca aakhala isittatti yo Palano, ncoko wo Texas, yeeraka co: “Nihokhala ootikhinihiya woona wihu micoko cithotoliye ikwaha cinci citepaka ukhala comaana uvikana micoko conaanaano. Isittatti yankaani yo ncoko unkhaleehu, ihothotoliya ikwaha 5 nhina myaakha 10. Mwamphiyaaruni, anuunu Hendrix ni amaama yahoturuwela uthotola ile isittattiile ni yahokawa ilivuru uvikana ikwaha cotheene.”

Piyoneeru mmoca o Panamá hantikha eeraka: “Atthu enci yakoomonle mmawannyaya yahorukunusa makhalelwaaya ukati katuruwenlyaaka waathotola nkwaha wonayeeli ni woneeraru. Nteko mwinci kaavanryaaka ule mwaakhoole, kaaheekurumica uturuwela waathotola atthu kaawoopannyaaka mwaha khalayi ni citthu cikiirannyenle atthu akhwaawe cinawaacivela.”

MAWEHERERO OHOOLO

Iwarakha yo mwaakha yo Colportor, acuweliya ukhala mapiyoneeru, munna Rutherford aahothikilela nteko waavariye ule mwaakhoole ni ahohimya nteko waala uvariya uhoolo. Uyo aaheera co: “Khalayi, mayamunna yahaana iparakha yo waalipiha atthu yaari ooriipiya nrima. Uvara uyo ntekooyo, waahaavaha utteeliya nrima. Mwaakha unwooyo, mayamunna anaahala ukhalana iparakha cinci wiira avahe usaahiti nhina myaha ca Nluku ni Umwenyaawe ni naahala waavaha nthoonyero apoovwaawe. Vano atthu otheene, nihihiye umwiipela ni unttitthimiha Nluku ni Mwene.”

Wuumaleloni mwaakha wo 1925, mayamunna yaahopanka iporokaraama wiira yuncerere Ipeteli yo Brooklyn. Mwaakha wo 1926, phaahalaaya wancera nteko wootekatekiya Mphwinko wa Yehova waahalaaya upanka.