MWAHA WOOSOMIYA 47
NCIPO 38 Yehova Onimoovahani Ikuru
‘ Nyuuva nhaana ifayita’!
“ Weeva uhaana ifayita venci cinene.”—DAN. 9:23.
ITTHU INHALEEHU WIITTHUCA
Nhina ula mwahoola ninaahala woona manannani ninhaleehu waakavihera atthu aneecoona uhikhalana ifayita ni uwoonihera mananna arinaaya ifayita uhoolo wa Yehova.
1-2. Isiyani inhala unikavihera wiicoona ukhalana ifayita uhoolo wa Yehova?
UNOOKHALARU wiira Yehova nawaavaha ifayita aswalyaawe otheene, ahaavo aswalyaawe ahineecoona ukhalana ifayita. Watthunaka aneecoona ayo manannaayo nlattu woowaceriya pusya. Nyuuva nhopaca wiicoona uhikhalana ifayita? Wakhala wiira nnaakhula iyee, isiyani inhala wuukaviherani ukupali wiira Yehova nawuuwacerani?
2 Itthu imoca inhala wuukaviherani, ukhanle usoma ihantisi co mbiibiliyani cinoonihera mananna Yehova nopheelaawe wiira atthwaayo awaceriye. Yesu anaahisima atthu otheene ni anaawacera nimananna omaana. Nlattu woopanka commo, uyo naathumwaane ahoonihera wiira anawaavaha ifayita atthu owiiyeviha ahineecoona ukhalana ifayita. (Joau 5:19; Mabere. 1:3) Nhina ula mwahoola ninaahala woona: (1) Manannani Yesu aakavihenryaawe atthu ucuwela wiira ahaana ifayita ni (2) manannani ninhaleehu ukupali wiira Yehova naanivaha ifayita.—Ageu 2:7.
MANANNANI YESU AKAVIHENRYAAWE ATTHU UCUWELA WIIRA AHAANA IFAYITA
3. Manannani Yesu caaweheraawe atthu yaapheela umwiiwelela u Kalileya?
3 Ukati Yesu walalyeeraawe u Kalileya, atthu enci yaahoowa nipuro naaryaawe wiira yiiwe itthu yeetthucihaawe ni avonihiye iretta caya. Yesu aheera: “Kontha yaanwaceriya pusya ni yankakheliya uno nuuno khampa ikhontwaa coohimakampuci.” (Mat. 9:36) Ahooleli ottiini khayaawacera ratta ayo atthwaayo ni mpaka yahowiihana atthu olaphakaciya.” (Joau 7:47-49) Yesu ahaawacera ayo atthwaayo nuunamaana mpaka ankumiha ukati wiira awiitthucihe ni aavonihe iretta caya. (Mat. 9:35) Uhiya paahi waawacera ale atthwaale uyo ahaatthenkaca atthari wiira alalyeere ihapari comaana. Ni ahowiirela yaavoniheke atthu iretta caaweryaa.—Mat. 10:5-8.
4. Ni neetthuca isiyani ni mananna Yesu caawacerawe atthu yaathanyinya?
4 Waawacera wawe saana ale atthwaale Yehova ni Yesu ahoonihera wiira anawaawacera atthu yahiicoona ukhalana ifayita. Wakhala wiira nyuuva nnanswalela Yehova masi nnawaanyihacera wakhala wiira Yehova nawuufentani, muupuwele mananna Yesu caawacenryaawe atthu yahiicoona ukhalana ifayita masi yaapheela unviriyana. Upanka iyo itthwiiyo unaahala wuukaviherani nyuuva wiicoona ukhalana ifayita uhoolo wa Yehova.
5. Isiyani incuweleehu naathiyana yaacuwenlyaawe Yesu u Kalileya?
5 Uhiya uwiitthuciha paahi atthu, Yesu ciicammo ananwacera khula ntthu. Wootakihera, ukati waalalyeeraawe u Kalileya Yesu ahaacuwela athiyana amoca yaavirihile myaakha 12 yaaweryaaka iretta yookhuma iphome. (Mark. 5:25) Nlattu wo iretta yaarinaaya, ayo yaari oohiirya uhoolo ni khula ntthu ahala waakwanya ciicammo ahala ukhala oohiirya. Ayo khayaalamuliya uphiya mapuro caapankiya ifesta asarayeli yaalamalenlyaaya upanka kontha yaari oohiirya. (Lev. 15:19, 25) Wohaanyihacera ayo athiyanaayo yahohuva cinene.—Mark. 5:26.
6. Isiyani yaapankilyaaya athiyana yaacuwenlyaawe Yesu u Kalileya wiira avonihiye?
6 Ala athiyanaale yaanaapheela uvonihiya ni Yesu. Masi khayeenre urwaa woono numwaattamela Yesu. Kontha isiyani? Kontha yaanoona ihaaya nlattu wo iretta yaawerya. Awula watthunaka yaanoova woomoliya ni Yesu nlattu wookela iriyari yaatthu anaryeene oohiirya. Phimaana ayo yaaakwannyile ikuwaawe paahi kontha yanancuwela wiira yakwanyaru ikuwaawe paasi yaanhala uvona. (Mark. 5:27, 28) Nlattu wookhalana waamini woolipa ayo athiyanaayo yahovona. Vano Yesu ahokoha tipani ankwanyile ni ayo yahohimyaca itthu yaapankilyaaya. Manannani Yesu aatafitilyaawe?
7. Manannani Yesu caawacenryaawe athiyana yaawerennya cinene? (Markus 5:34)
7 Yesu ahaawacera ayo athiyanaayo awooniheraka unamaana ni ihisima. Uyo ahoona wiira ayo yaanawoova. (Mark. 5:33) Ucuwela wawe iretta yaawerya uyo ahaamaaliha ni mpaka aheerela “mwanaka” nuulumo ninoonihera wiira anaawacera ninrimaawe wootheene. (Nsome Markus 5:34.) Iyo yaari ikwaha yoopacera Yesu wawiihannaawe athiyana “mwanaka” watthunaka eerenle commo nlattu wowoova. Manannani ayo athiyanaayo yecoonilyaaya ukati waamwiiwilyaaya Yesu oolumaka ayo manannaayo? Wohitikhinaca ayo yahokhala otteeliya kontha Yesu ahaawacera nimananna omaana. Unari wiira uyo khamaalihile ayo pooti waahalaaya uvona iretteeyo, masi yaanhala ukhala ni masukhuli. Uhiya commo, Yesu ahaakavihera ayo athiyanaayo woona wiira yahaana ifayita uhoolo wa Yehova.
8. Marikarikoni anuunu amoca o Brasil yaananaaya?
8 Mahukwaala, aswali a Nluku akhwaawe anaavirihaka masakha muukumini waya mpaka wiicoona uhikhalana ifayita. Anuunu amoca o Brasil aneehaniya Mariaa ari Pionera owiicaaverya, ayariye woohimetto ciicammo wohimoono wonthiyana. Ayo aneera: “Nlattu woopahuwa waka miiva kanaatarawaciya, kaanaavahiya macina ootakhala ucikolani ni amucyaaka yanaakithanya.”
9. Isiyani yaakavihenre anuunu Maria wiicoona ukhalana ifayita uhoolo wa Yehova?
9 Manannani anuunu Maria cikaviheriyaaya? Ukhala waya Saahiti a Yehova, mayamunna ni mayanuunu o wanlokoni waya yahaakavihera wiicoona phanka Yehova caaweheraawe. Ayo aneera: “Kinawaasukhuru mayaamunna ni mayaanuunu ahihiyerennre ukiwacera. Ni ciicammo kinaansukhuru Yehova ninrimaaka wootheene nlattu wookivaha amucyaaka o mminepani.” Mayamunna ni mayanuunu yahaakavihera anuunu Maria wiicoona ukhalana ifayita uhoolo wa Yehova.
10. Isiyani yaamwiirannyela Maria Madalena ni inannani ciicoonaawe nlattu wo iyo ittwiiyo? (Nwehe ciicammo ilatarato.)
10 Moone mananna Yesu caakavihenryaawe athiyana yeehaniya Maria Madalena. Ayo yahaana maciini 7! (Luka 8:2) Ikwaha cikhwaawe yaanttittimmwa awula yancimmwa nlattu wo maciini yaarinaaya ni iyo itthwiiyo yaanaawiiriha atthu waasempa, ayo yanoova cinene watthunaka yuupuwelaka wiira khaavo ahala waakavihera. Yesu ahoomola maciini yaahuviha ni ayo yahokhala attharyaawe. Yesu aakavihenre cani ayo athiyanaayo wiicoona ukhalana ifayita wamiithoni wa Yehova?
Manannani Yesu ankhuluvelihilyaawe Maria Madalena wiira haana ifayita uhoolo wa Yehova? (Nwehe iparaagarafu 10-11)
11. Manannani Yesu ca monihenryawe Maria Madalena wiira ahaana ifayita uhoolo wa Nluku? (Nwehe ciicammo ilatarato.)
11 Yesu ahaalattula athiyana Maria Madalena unveleela mapuro waaviraawe alalyeeraka.b Ni nlattu wookhala nkhayi ni Yesu ayo yahaana iparakha yowiiwa citthu ceettucihaawe. Nihuku Yesu nunwelelihiyaawe ahowoonanana. Ni ayo yaari ntthari oopacera Yesu awuulumannyaawe ukati wunwelelihiyaawe. Yesu ahoonihera ayo athiyanaayo nimananna otheene wiira yahaana ifayita wamiithoni wa Yehova!—Joau 20:11-18.
12. Isiyani yaawiiriha anuunu Lídia wiicoona wiira khunaaphwanela ufentiya?
12 Khampa Maria, mahukwaala ciicammo ahaavo atthu ankhala ooriipiya nrima nlattu wootanyiiya. Anuunu amoca nkhala u Espanha aneehaniya Lídia anaahimya wiira: “Kihinaaya uyariya amaama yahopheela ukumiha irukulwiiyo.” Anaryeene mwanhima yanawaceriya pusya naanumwanaya yavariihiyaka miteko coorika cinene ni ayo anaahimya yiiraka: “Ikhumelo mwaakha kiyaryeelaka akifentiye naamaama. Mi kaanawiikurumica wiira kifentiye naayo, masi khayoona hataa vakaani wiikurumica waka.” Mi kahooriipiya nrima cinene mpaka kaheera wiira akimphwanela ufentiya na atthu otheene kontha amaama yaankiirela wiira miiva kintthu ootakhala nrima.
13. Isiyani yaakavihenre anuunu Lídia wiicoona wiira haana ifayita uhoolo wa Yehova?
13 Wiitthuca waya ikhweeli anuunu Lídia, ayo yanawiikurumica upanka uswali woveekha ni ulompa woohihiyerera ciicammo yanawuulumeliyaka moolumo oolipiha ni mayanuunu ni mayamunna. Ayo yanawiicoona ufentiya nlattu wookaviheriya yaanawoona wiira ayo ahaana ifayita wamiithoni wa Yehova. Ayo aneera: “Awannyaka anaakiirelaka mahuku otheene moolumo toko amwaaraka kinawufentani. Mi kinaakupali wiira kinafentiya, masi ayo unawaacivela ukupusera makhalelwaaka omaana. Ciicammo apatthannyaaka akhwaawe anaapankaka iyo ittwiiyo ni anaakiirelaka wiira kihaana ifayita cinene wamiithoni wa Yehova.
NINHALA WIIWEHERA CANI KHAMPA YEHOVA CINNIWEHERAAWE
14. Manannani 1 Samuweli 16:7 cinnikaviheraawe wiiwehera khampa Yehova cinniweheraawe? (Nwehe ciicammo ikwaaturu “Kontha isiyani Yehova noonelaawe ukhalana ifayita apoovwaawe?”)
14 Nhiliyale wiira Yehova khanooweherani khampa apinaatamu cinooweheraayani. (Nsome 1 Samuweli 16:7c.) Uyo khanweha mananna ciriinyu mwiirutthuni winyu, nsurukhu nrineenyu ni mananna cisomileenyu. (Isai. 55:8, 9) Phimaana uhiya wiiwehera khampa apinaatamu cinooweheraaweni, mwiiiwehere khampa Yehova cinooweheraaweni. Nyuuva pooti usoma ihantisi co mbiibiliyani cinoonihera atthu yaheecoona ukhalana ifayita khampa Eliyasi, Nowemi ni Ana masi Yehova avahaawe ifayita. Ciicammo nyuuva pooti unantikheenyu citthu ciwiirannyeenleni cinoonihera wiira Yehova nawuuwacerani. Uhiya commo nyuuva pooti usoma myaha cimphwanyannya mmalivuruni wihu cinuuluma mananna owiiwehera saana.d
15. Kontha isiyani Yehova waamoonaawe Daniele ukhala ntthu o fayita cinene? (Daniele 9:23)
15 Nhiliyale wiira nlattu wookhala ookhuluvelya wa Yehova, nyuuva nhaana ifayita uhoolo wawe. Ikwaha imoca narineene watthunaka myaakha 90 Daniele ahokhala owoocyaaca ni oriipiya nrima. (Dan. 9:20, 21) Manannani Yehova canlipihilyaawe? Uyo ahoruma nlayikha Kapriyeeli wiira namuupusere Daniele wiira uyo ahaana ifayita cinene ni ulompa wawe waheewiya. (Nsome Daniele 9:23.e) Kontha isiyani Daniele ahaana ifayita uhoolo wa Yehova? Kontha ahaana makhalelo omaana ni yaanoncivela isariya. (Ezek. 14:14) Yehova henle mbiibiliyani iyo ihantisiiyo wiira enilipihe. (Aroo. 15:4) Yehova ciicammo nawiiwa ulompa winyu ni nawuuvahani ifayita nlattu wonfenta ni wowiikurumica winyu unvarela nteko.—Mik. 6:8; Mabere. 6:10.
16. Isiyani inhala wuukaviherani unwehera Yehova khampa nnyari onifento?
16 Munwehere Yehova khampa nyari noofentani. Uyo nopheela wuukaviherani kahi woonenela citthu cinvonyeenyu. (Isaa. 130:3; Mat. 7:11; Luka 12:6, 7) Wuupuwelacera iyo inawaakavihacera atthu enci wancera wiiwehera nimananna omaana. Moone itthu yaawiiranyeenle anuunu Michelle o Espanha avirihile myaakha cinci ahiicoonaka ukhalana ifayita nlattu woowaceriya pusya naawannyaya. Ayo aneera: “Khula ikwaha kineecoonaaka uhikhalana ifayita, kinawiimananiha umuupuwela Yehova akiteesaka khampa mwaamwanawe ni akifentaka ni akikhikiceraka.” (Isaa. 28:9) Anuunu amoca aneehaniya Lauren ankhala u Africa do Sul, aneera: “Ukhala wiira Yehova hokithanla ninifento wiira kinswalele ni khakihiile veekha nhina wo myaakha cootheene nnya, vano khweeliini uyo naakoona ukhalana ifayita.”—Ose. 11:4.
17. Nnohala ukupaleela cani wiira Yehova naawaminini? (Isaalimu 5:12) (Nwehe ciicammo ilatarato.)
17 Nkupali wiira Yehova naawaaminini. (Nsome Isaalimu 5:12.f) Davidi aholattaniha waaminiya ni Yehova ni nikhikicero nuulupale ninaakhikicera atthu osariya. Ucuwela wiira nyuuva nnawaaminiya ni nnaakaviheriya ni Yehova, khannohala waanyihacera wakhala wiira Yehova nawuuvahani ifayita awula mena. Vano nyuuva munhala ucuwela cani wiira Yehova naawaaminini? Khampa noonileehu, mbiibiliyani Yehova naanihimerya mananna cinniweheraawe. Uhiya commo, uyo nawaavarela nteko mahumu mayamunna o wanlokoni ni asipatthaniihu para anuupusere wiira nihaana ifayita uhoolo wawe. Manannani cinlamuliyeenyu waakhula atthu akhwaawe yawuupuserakani wiira nhaana ifayita?
Nhiliyale wiira ukupaliya ni Yehova unaanikavihera wiiwehera saana? (Nwehe iparaagarafu 17)
18. Kontha isiyani nnolamuliyeenyu ukupaleela uttottopeliya naakhunaninyu?
18 Atthu akhwaawe anoocuwelani ni anoofentani, yoohimeryakani mananna cinooweheraayani, nhoonihe toko wiira aanawootha. Nhiliyale wiira Yehova pooti waavarela nteko ayo wiira yuuhimeryeni wiira uyo naawaaminini. Michelle himiye, neera: “Vakaani-vakaani kineera kikupaleelaka moolumo owoonihera nifento aatthu akhwaawe. Unaakirikela ukupali citthu atthu akhwaawe cinuulumaaya akaacaka, masi Yehova nopheela wiira kikupali.” Mahumu ciicammo ahaakavihera anuunu Michelle wiicoona ufentiya ni Yehova. Nna co ayo ankavihera khampa Piyoneera ni namakavihera o Upeteli.
19. Kontha isiyani nnolamuliyeenyu ukupali wiira nhaana ifayita wamiithoni wa Yehova?
19 Yesu naanuupusera wiira nihaana ifayita uhoolo waathumwanihu owiirimu. (Luka 12:24) Phimaana, pooti unkupaleeleehu wiira Yehova nonoonela ukhala atthu ofayita cinene. Khaninlamuliya uliyala iyo itthwiiyo! Ni mwiikurumice waakavihera atthu akhwaawe woona wiira ahaana ifayita uhoolo wa Nluku!
NCIPO 139 Yehova Onimootthuvelani
a Macina makiina ahaakakhanihiya
b Maria Madalena ampanka mphantte ikhurupu yaathiyana yaapanka mikwaha nkhayi ni Yesu. Ayo athiyanaayo yaavarela nteko nsurukhwaaya wiira athume citthu cootheene caahala unkavihera Yesu nkhayi naattharyaawe.—Mat. 27:55, 56; Luka 8:1-3.
c 1 Samuweli 16:7 Masi Yehova ahomwiirela Samuweli: “Uhimoone ureera uwiitho awula urekama, kontha mi kihonkhotta. Kontha Nluku khanoona khampa ntthu cinoonaawe; ntthu noweha ikhove, masi Yehova noweha itthu iri wanrimani.”
d Wootakihera, nyuuva pooti usoma ikapiitulu 24 yo ilivuru Achegue-se a Jeová ni ciicammo usoma itextu myaha co mbiibiliyani nhina ilivuru Princípios Bíblicos para a Vida Cristã nipuro nineera “Dúvidas; sentimentos negativos.”
e Daniele 9:23 Ukati weeva wanceryaa ulompa, ihoohimya ihapari ni miiva kiwaale wuuhimyera iyo ihapariiyo, kontha weeva ukhanle ntthu ofayita cinene. Phimaana, uwacere uyo mwahooyo ni wiiweehe iwooni.
f Isaalimu 5:12 Kontha nyuuva Pwiiya Yehova nnaahala waacaaliha atthu aneettela isariya; nyuuva nnaahala uwoona ukhala atthu omaana ni waakhikicera.