Makoho Aanamasoma

“Nuupuweloni” Yehova ninhalaawe uhela wanrimani wowaahooleli ookuverunu mphiyaaruni?

Ihimyaka inanna cinhalaaya upacera wiirannya masakha moolupale, Apokalipise 17:16, 17 ineera: “Inyaka khuumi coonalyaa ni nsene, cinaahala unviruwela nthiyana ooraruwa; cinaahala unhasara ni unhiya woohikuwo, cinaahala unkhuura ni umpaha wa mooroni mpaka ulala. Kontha Nluku hohela wanrimani waya wunlela wiirannyeeha inuupuwelaawe, iyee, wiiraneeha moopuwelwaawe yavahaceraka nsene umwene urinaaya.” Khalayi Iliivuru cihu woottonkaca ceeraka wiira “nuupuwelo” Yehova ninhalaawe uhela wanrimani wo akuvernu ukhanle umalamalihiya wo ittiini cowootha.

Masi uhooneleliya wiira ayo mananna owuupuwelaayo yahaana yaakakhanihiyaka. Kontha “nuupuwelo” Yehova ninhalaawe uhela wanrimani wo akuvernu nikhanle nuupuwelo noohala ayo unvaha “umwene urinaaya nsene”. Wiira niiweehe saana mananna inhalaaya wiirannya ila inatiriila, nttwee nipacere waakhula makoho makiina.

Phaapani anaaciya ampanka mphantte nhina ila inatiriila? “Nthiyana ooraruwa”, neehaniya “Ibabilooniya Yuulupale”, noolumiya nhina inatiri unaaciya mphwinko wo ittiini cowootha. “Nsene ookhwiila” unaaciya mphwinko uneehaniya Nações Unidas. Uyo utthenkaciye mwaakha wo 1919 wiira uwaane ni ulipihere ukhala nnema ntuninyani ni thi mphwinko khalayi weehaniya Liga das Nações. (Apoka. 17:3-5) “Inyaka khuumi” cinaaciya ikuveerunu cotheene co ntuninyani cinonkavihera nsene.

Nthiyana ooraruwa ni nsene ookhwiila anaataana mananni? Nthiyana ooraruwa “onkomile” waculu nsene. Iyo maanaaya wiira uyo nthiyana ooraruwooyo nankavihera ni naamananiha umwiiriha nsene umwiiwelela.

Isiyani inhala umwiirannyeela nthiyana ooraruwa? Unaahala uphiya ukati nsene ni inyaka khuumi unhlaaya “unviruwela nthiyana ooraruwa” mpaka umwaakhaca mihakhu cawe ni umoonihaca ihaaya yawooniheraka atthu otheene uyova ciryaawe. Ayo ciicammo anaahala unhukhumu ni ummalamaliha khampa Yehova cilakenlyaawe. (Apoka. 17:1; 18:8) Ayo manannaayo phinhalaaya umalamalihiya ittiini cowootha cotheene. Masi ihineerannya iyo, Yehova naahala uwiiriha akuvernu o ntuninyani upanka itthu ihinatoko wiirannya nenne ikhalelwaaya apinaatamu watuniyani.

Isiyani Yehova inhalaawe uwiiriha ahooleli ookuverunu upanka? Nluku nohala uwiiriha akuvernu o ntuninyani wiira ‘anvahe ikuru caya ni ulamulela waya nsene [ookhwiila]’, khanle Nações Unidas. (Apoka. 17:13) Muupuwele maanaaya ila itthu ihimiyeela. Niireke wiira akuvernu o ntuninyani anhala ulakela veekha caya unvaha nsene ikuru ni ulamulela waya? Mena! Iyo inatiriiyo inhimya wiira Nluku thinhala uwiiriha akuvernu upheela upanka iyo. (Miru. 21:1; Isai. 44:28.) Ni niireke wiira iyo itthwiiyo inhala wiirannya vakaani-vakaani? Mena! Inhala wiirannya woohipica. Vano nsene naahala uvarela nteko ikuru cinhalaawe uvahiya wiira khampa Yehova cimpheelaawe, ahukhumu ni amalamalihe ittiini cowootha cotheene.

Vano, isiyani inlamuliyeehu uweherera? Nihiweherere wiiwa ihapari cinhala uhimya wiira akuvernu aneera yakaviheraka mphwinko wo Nações Unidas. Masi itthu inlamuliyeehu uweherera thi ila: wowaakuvyaaca wene, Yehova naahala waahela wanrimani waya akuvernu upheela unvahacera nsene ulamulela waya. Yiirannyaaka iyo, hi ninaahala ucuwela wiira uhaattama ukati wo wancera masakha moolupale. Nnava uhinaaya wiirannya iyo, “nihiitthaale ni nihihiyerere wiitthenkaca”, kontha nhina ukati vakaani unhaleela ninaahala woona citthu ciirannyaaka!— 1 Atesal. 5:6.