Ntakihe wiiyeviha wa Yehova

1. Nlattuni uneereenyu wiira Yehova khanle owiiyeviha?

Niire wiira ahooleli o ila ituninyeela akhanle owiiyeviha? Nyuuva mwaahala waakhula mena, masi Yehova, nakuru cootheene, khanle owiiyeviha. (Isaa. 113:5-8) Khaavo nanka ntthu ootepa ukhala owiiyeviha unvikana Yehova. Uyo khaneecoona. Nhina wo ula mwahoola, ninaahala woona inanna cese uyo cinniwaceraawe ni inannani nooniheraawe wiiyeviha.Ciicammo ninaahala woona manannani Yesu notakihaawe wiiyeviha waathumwaane. Woopela mwaha nnyo citthunnyo unaahala unikavihera utepa umpatthanana Yehova ni utakiha wiiyeviha wawe.

YEHOVA NAANIVIRIYANA

2. Nhimyace manannani Isaalimu 62:8 immuulumaaya Yehova? (Nwehe ciicammo yo wakaapani.)

² Atthu owiicoona khampatthananyaa. Kontha isiyani? Kontha atthu owiicoona waacivela waawacera akhunanaya nimananna oohinamaana, kontha ayo aneecoona ukhalana ifayita cinene waavikana akhunanaya. Phimaana, atthu enci anawaasempa. Yehova khanle oovirika naayo atthwaayo. Apaapeehu owiirimu aakhanle owiiyeviha ni ayo anaanilattula waalompa naahimyeraka citthu cootheene cinnirannyeela. (Nsome Isaalimu 62:8.a) Khampa nnyari omaana nonfentaawe mwanawe, Yehova naapheela univiriyana nalompaka; khweeliini uyo hohiya yantikhiyaka mbiibiliyani mavekelo menci. Iyo inoonihera wiira uyo naaphela univiriyana. (Jos. 10:12-14; 1 Sam. 1:10-18) Vano wakhalaka wiira ninawiicoona wiira khunniphwanela umuulumana Yehova nlattu wotampi nivarileehu?

3. Kontha isiyani nyuuva nnolamuliyeenyu ukupaleela wiira Yehova nopheela wiira munlompe khula nihuku?

³ Hiiva pooti unonlompeehu Yehova hataa niicoonaka wiira khunniphwanela. Kontha isiyani nineereehu commo? Nhina ntakihero Yesu nihimilyaawe na mwaana nothama wapuwani, uyo ahonlattaniha Yehova ni nnyari nomoonela uthunku mwanaawe nothama wapuwani ni neecoona uhipankela-tho mpantte imuciiyo. Isiyani athumwaane yaapankilyaaya umoona waya mwanaya ahokolyaaka? Yesu enre wiira, umoona waya ahokolyaaka, ayo yahontthawelela ni yahonkapatta nunpecari. (Luka 15:17-20) Yehova khanle khampa uyo nnyaryuuyo. Ukati neewaawe mavekelo aatthu anriipiya nrima nlattu wotampi civanryaaya awula nlattu wo iwasiwaasi, wiiyeviha wawe unaamwiiriha waaviriyana. (Ucuk. 3:19, 20) Yehova naanoonela uthunku khampa nnyari o muntakiheroni na Yesu; uyo nanikuluveliha unifenta ni unimaaliha. (Isai. 57:15) Manannani Yehova nonitthawelelawe ala mahukwaala? Ikwaha cinci nawaavarela nteko mahumu owanlokoni, mayamunna ni mayanuunu owanlokoni ni asipatthaniihu. (Tiya. 5:14, 15) Yehova nanikavihera naayo manannaayo kontha nopheela wiira nimpatthanane.

4. Manannani Yesu oonihenryaawe wiira ari oohikukurya?

⁴ Yesu nawaatakiha athumwaane. Khampa Yehova khanlyaawe owiiyeviha, Yesu ciicammo nawiiyeviha. Nlattu wowiiyeviha ukati waryaawe watuninyani, atthu enci waanaacivela umwaattamela, ayo yanaakhala ootaphuwa ni khayaamoova umpanka makoho. (Mark. 4:10, 11) Vano ukati wakohilyawe mananna yanweheraaya, ayo khayoovile unhimyeera mananna yanweheraaya. (Mat. 16:13-16) Ni yavaraka itampi, khayoova uhimyaca, kontha yancuwela wiira Yesu aari omaana, oothunku ni oovilela. (Mat. 17:24-27) Nlattu Yesu wowaatakiha athumwaane, attharyaawe khawaarikenle uncuwela Yehova. (Joau 14:9) Ayo yaheetthuca wiira Yehova anaavirikana naahooleli ottiini oohinamaana o ule ukatyuule.

5. Manannani ukhala atthu owiiyeviha unhalaaya unikavihera ukhala owaataana naakhunanihu?

⁵ Neekurumicaka ukhala atthu owiiyeviha ninaakhala atthu oopatthanannya. Naahikhaleke atthu owiiyeviha, ninaahala waakhalela nttima akhunanihu ni upacera wiicoona ukhalana ifayita waapwaha ayova ni uhitthuna waalevelela yanikoseraka. Noopuwelaka ayo manannaayo, ninaahala wancera usempiya naatthu. (Akol. 3:12-14) Mahumu ahaana yeekurumicaka ukhala oopatthanannyaa. Wiira akhitiri, ahaana yeekohaka wakhala wiira khanooviya ni mayamunna ni mayanuunu o wanlokoni. Iyo maanaaya wiira mahumu ahaana yeekurumicaka urwaa woona mikutthaano usalauni yoomwene, uhiya woona anaryeene uwaani nkomputatoreni awula ntelefoneni. Wakhitiryaaka, ahaana yaakhumaka wuulalyeerani nkhayi ni mayamunna ni mayanuunu o wanlokoni. Mahumu yapankaka commo khanhala wooviya ulepeliya waakavihera mayamunna.

YEHOVA KHANAKHALA OOLIPALIPA

6-7. Nvahe ntakihero ninoonihera wiira Yehova nawaaviryana aswalyaawe.

⁶ Atthu owiicoona anawaawacera pusya akhunanaya. Ukhala wiira Yehova khanle owiiyeviha, uyo khanlipalipa hataa akhalaka nkhulupale. Moone itthu yaawiirannyenle anuunwaawe Moceesi yeehaniya Miriam. Ayo nkhayi ni Arawu yahomuuluma pusya Moceesi ni iyo ittwiiyo yaari itthu yoohinamaana, kontha Moceesi ooluma mwancina na Yehova. Phimaana, Yehova ahokhala oorusiya ni ahommpwanyiha makuttula Miriam. Ukati Arawu waarweelyaawe unlepela Moceesi unlevelela, Moceesi ahonlepela Yehova unvoniha Miriam. Isiyani Yehova yaapankilyaawe? Unari wiira Yehova ari ntthu owiicoona, uyo khaahala unvoniha Miriam. Masi iyo khinakhala phiitthu yaapankilyaawe. Nlattu wo wiiyeviha, Yehova ahomwiiwelela Moceesi ni ahonvoniha Miriam.—Manu. 12:1-15.

⁷ Ciicammo ninawoona wiira Yehova khanle owiiyeviha noonaka mananna caakhunlyaawe nivekelo na mwene Ezekiya. Yehova ahonruma porofeeta Isaiya wiira anhimerye mwene Ezekiya wiira anhala ukhwa. Mwene Ezekiya unlaka, ahonlepela Yehova wiira anvonihe. Yehova ahomoonela uthunku mwene Ezekiya. Phimaana, aahomuncerera myaakha 15. (2 Mam. 20:1, 5, 6) Yehova unanwerya nrima awoonaka apinaatamu yahuvaka. Phimaana, ooniheraka wiiyeviha, uyo nawaaviriyana.

8. Matakiheroni anoonihera wiira Yesu khanle oohilipalipa? (Mark 3:1-6)

⁸ Yesu nawaatakiha athumwaane. Ukati waaryaawe watuninyani, Yesu aanawaapankela citthu comaana akhunanawe. Wootakihera, Yesu anaavoniha atthu oowerennya nihuku no Isaapatu, hataa ukhalaka wiira yaari itthu yakhottiihiya naahooleli ottiini. Yesu khaari ntthu ootakhala nrima, phimaana aari ntthu omaana ni oohilipalipa. (Nsome Markus 3:1-6.) Yesu khanhiya uhikhala oolipalipa ala mahukwaala ukati uneettiheraawe nloko. Ukati mayamunna anvaraaya itampi cuulupale, uyo nawaavaha ukati wiira attharuwe.—Apoka. 2:2-5.

9. Isiyani inlamuliyeehu upanka wiira nikhale atthu oohilipalipa? (Nwehe ilatarato.)

⁹ Manannani ninhaleehu untakiha Yehova? Nihaana neekurumicaka wuupuwela khampa cinoopuwelaawe Yehova. (Tiya. 3:17) Ayari anontakiha Yehova khanweherera wiira asaanaaya apanke citthu cihinkhitiryaaya upanka. Yakopi unamphwanela utakihiya. Uyo anaawacera sana-saana asaanaawe. (Uph 33:12-14) Ayari owiiyeviha ni oohilipalipa anaanyema waalattaniha asaanaaya naasaana akhwaawe. Mahumu ciicammo ahaana akhalaka oohilipalipa. Ayo ampanka iyo yaviriyanaka ni yatthunaka moopuwelelo o mahumu makhwaawe yakhalaka wiira khanvirikaniha malamulo o mbiibiliyani. (1 Tim. 3:2, 3) Otheene cihu pooti unaaviriyaneehu akhwiihu ukati unoolumaaya hataa ukhalaka wiira itthu yuulumilyaaya inaavirikana niitthu inoopuweleehu. (Aroo. 14:1) Phimaana, nihaana neekurumicaka woonihera wiira nikhanle oohilipalipa. Uhilipalipa winyu unaahala ucuweliya naatthu otheene.—Afili. 4:5.

YEHOVA KHANLE OOVILELA

10. Manannani Yehova nooniheraawe wiira khanle oopisa nrima?

¹⁰ Atthu owiicoona unawaarika uweherera itthu yakhalaka wiira anaakhuluvelihiya. Nlattu wo wiicoona waya, unawaarika uvilela. Woovirikana ni Yehova, uyo naakhitiri uvilela. Wootakihera, ukati wa Nowee, Yehova ahohimya wiira aanaahala waaweherera myaakha 120 hinaaya waakwanyulaca atthu ootakhala nrima. (Upha. 6:3) Phimaana, Nowee ahaana ukati woopheela waalaka asaanaawe ni uteka ikalawa. Nuuwakatyaaya, nlayikha nahoonihera uvilela ukati Aparahaamu waakohakohaawe ukwanyulaciya wo isittatti yo Sotoma ni u Komora. Ninari nlayikha nowiicoona, nanhala umwiirela co: unwa cani ukikohakohaka? Masi nno nlayikhanno nahonvilela Aparahaamu.—Upha. 18:20-33.

11. Toko cinhimyaaya 2 Peturu 3:9, kontha isiyani Yehova nonivilelaawe ala mahukwaala?

¹¹ Mahukwaala, Yehova ciicammo nawoonihera wiiyeviha ni uvilela. Uyo noweherera ukati ulakenlyaawe wiira amalamalihe masakha otheene. Masi kontha isiyani Yehova mpisaawe nrima? Kontha uyo “khampheela wiira atankanyiye ntthu, masi nopheela wiira atthu otheene attharuwe.” (Nsome 2 Peturu 3:9.) Niireke uvilela wa Yehova ukhanle wo mahala? Mena. Nlattu wo nwo uvilelanwo, atthu imiliyawu cene anampatthanana. Uvilela wa Yehova unaahala umala. Woohipica, Yehova naahala waamalamaliha atthu otheene oohinamaana.—Mabere. 2:3.

12. Manannani Yesu notakihaawe upisa nrima waathumwaane?

¹² Yesu naatakiha uvilela wa Yehova. Uyo homoona Sotwani amootheryaka Yehova ni aswalyaawe. (Upha. 3:4, 5; Jó 1:11; Apoka. 12:10) Yesu ahohuva cinene ni ahowoona atthu enci ahuvaka. Woohitikhinaca, uyo unaancivela utankanya miteko ca Sotwani. (1 Joau 3:8) Isiyani inonkavihera Yesu uvilela ukati unonwehereraawe Yehova ulakela ukati unlamuliyaawe ukwanyulaca miteko ca Sotwani? Itthu inonkavihera ukhanle wiiyeviha. Uyo naacuwela wiira Yehova phinomphwanela ulakela ukati woophela umalamaliha miteko ca Sotwani—Mite. 1:7.

13. Manannani Yesu avilenlyaawe attharyaawe?

¹³ Ukati waaryaawe watuninyani Yesu anoonihera waavilela attharyaawe. Wootakihera, ukati waanyakulihanaaya apheelaka uncuwela tipani ari muulupale eriyaryaaya, Yesu khaanyoonyiye; uyo anaavilela. (Luka 9:46; 22:24-27) Uyo anaakhuluvela wiira, nuuwakatyaaya, ayo yanhala upanka marukunuso. Nyuuva nhopaca uvonyaniha itthu imocaaru ikwaha cinci? Wohitikhinaca, nyuuva nnaasukhurweela nlattu wookhalana mwene owiiyeviha ni nuuvilelani.

14. Isiyani inhala unikavihera ukhala atthu oopisa nrima?

¹⁴ Ninhala untakiha cani Yehova? Napheelaka wuupuwela ni upanka citthu phanka Yehova, ninlamuliya untakiha Yesu. (1 Akor. 2:16) Manannani ninhaleehu untakiha Yesu? Inanna imoca ukhanle usoma ivangeeliyu. Vano, namalihaka usoma, nihaana ukumiha ukati wiira nuupuwelacere ni unlompa Yehova wiira anikavihere utakiha wiiyeviha wa Yesu. Ukati untakiheehu wiiyeviha wa Yesu, ninaahala utepa untakiha Yehova nikhalaka atthu owaavilela akhunanihu.—Mat. 18:26-30, 35.

YEHOVA NAWAAWACERA ATTHU OWIIYEVIHA

15. Nvahe ntakihero ninthoonyeera wiiraYehova nawaafenta atthu owiiyeviha. (Isaalimu 138:6)

¹⁵ Nsome Isaalimu 138:6.b Muupuwele co: Yehova, nkhulupale u ntuniyani motheene, nawaavaha ifayita ale anaawacera akhunanaya. Moone matakihero atthu akhwaawe owiiyeviha Yehova awacenryaawe sana khalayi. Atthunaka hiiva khaninaacuwela saana, masi Yehova heeriha wantikhiya macinaaya mbiibiliyani. Yehova ahomwiiriha Moocesi wantikha ncina naathiyana amoca aneehaniya Debora. Ayo yahoviriha myaakha 125 avaraka nteko watthokoni wa Isaaki ni, nuuwakatyaaya, yahovara nteko watthokoni wa Yakopi. Hataa ukhalaka wiira khanoolumiya cinene ala athiyana okhuluvelyaala, Yehova ahomwiiriha Moocesi wantikha ihantisyaaya. (Upha. 24:59; 35:8) Nuuwakatyaaya, Yehova ahonthanla makampuci mmirawo eehaniya Davidi wiira akhale mwene o Isarayeli. (2 Sam. 22:1, 36) Uvira waya ukati vakaani Yesu nayariye, Yehova ahaavaha iparakha amakampuci yoocuwela wiira, u Pelee, ahoyariya Mesiya. (Luka 2:8-11) Ni ukati Yusufu ni Maria wancisilyaaya Yesu utempulu, Yehova ahonvaha iparakha Simeau ni Ana yoomona Yesu naryeene mwaana. (Luka 2:25-30, 36-38) Khweeliini, hataa ukhalaka wiira Yehova khanle nkhulupale, uyo nawaavaha iparakha atthu owiiyeviha.

16. Manannani Yesu notakihaawe unamaana waathumwaane?

¹⁶ Yesu nawaatakiha athumwaane. Khampa athumwaane, Yesu anaawacera atthu yaathanyinya naatthu akhwaawe. Uyo anawiitthuciha atthu owiiyeviha ikhweeli co umwene wa Nluku. (Mite. 4:13; Mat. 11:25) Ciicammo, uyo anaawacera atthu yaawerennya. Nlattu wowaapanka commo, ayo atthwaayo yanawiicona ufentiya ni uwaceriya. (Luka 5:13) Uhiyu woomalela Yesu hinaaya ukhwa, uyo aheekhaliha nanteko arapihaka inyaa caattharyaawe. (Joau 13:5) Hinaaya urwaa wiirimu, ahaavaha iparakha attharyaawe, unihela nhina hiiva, yoovara nteko wo ifayita cinene: waakavihera atthu akhwaawe uphwanya ukumi woohimala.—Mat. 28:19, 20.

17. Manannani nnohaleenyu waahisima akhunaninyu? (Nwehe ciicammo ilatarato.)

¹⁷ Ninhala untakiha cani Yehova? Ukati unlalyeereenyu, mwaawacere ni mwaahisime atthu otheene. Nihaana uwoonihera nifento ni ihisima atthu otheene hataa ukhalaka wiira nihaana mirintti awula cihaavo citthu cinkhitiriihu upanka ayo cihinkhitiryaaya. (Afili. 2:3) Yehova naakhala otteeliya naawaceraka akhunanihu ninifento ni niihisima.—Aroo. 12:10; Sof. 3:12.

18. Kontha isiyani nnopheeleenyu utakiha wiiyeviha wa Yehova?

¹⁸ Neekurumicaka utakiha wiiyeviha waathumwanihu o wiirimu ninaahala ukhala atthu oopatthanannya, oohilipalipa ni oovilela. Ni ciicammo ninaahala waafenta ni waahisima akhwiihu khampa Yehova. Nhiliyale wiira, mwiikurumicaka utakiha wiiyeviha wa Nluku, nnaahala ukhalana ifayita uhoolo wawe.—Isai. 43:4.