MPANTTA 09
Ulompa unaalipihaca upatthaniinyu ni Nluku
Ihotoko uwiirannyeelani itthu yaawiirihileni nyuuva upheela uvahiya ikano yomaana? Nhaana makoho yuucivenleni ucuwela mananna cinaakhuliyaaya? Nnaapheela umaalihiya ni ukaviheriya? Mwampheela wiicoona umpatthanana Yehova? Ulompa pooti wuukaviherani nhina citthu cotheene nnya. Masi Nluku nopheela wiira nilompeke inannani? Niireke Nluku naaviriyana ulompa waatthu otheene? Isiyani inlamuliyeenyu upanka wiira Nluku aviriyane ulompa winyu? Nttwee noone.
1. Tipani nlamuliyeehu unlompa ni isiyani inlamuliyeehu ulepela ukati woolompa?
Yesu heetthuciha wiira nihaana naalompaka Apaapeehu o wiirimu paasi. Ni iyo phi itthu yaapankaawe. Uyo enre: “Vano, nhaana nlompaka co: ‘Apaapeehu, nri wiirimu . . . ’” (Matewus 6:9) Nanlompaka Yehova, upatthaniihu nuuyova unaalipa venci cinene.
Hi pooti unlompa Nluku ninhimyeraka khula itthu. Masi Nluku nohala waakhula ulompa wihu, wakhalaka wiira itthu inlompeehu inaavaranaca ni ile inoncivela. “Pooti unlepela impheeleehu yotheene, yakhalaru ile intthunaawe [nimoolumacero makhwaawe, ile inoncivela Nluku].” (1 Joau 5:14) Yesu heetthuciha citthu cinlamuliyeehu uromola ukati woolompa. (Nsome Matewus 6:9-13.) Uhiya paasi ulompa ninhimyeraka Nluku itthu inniira, ciicammo nihaana ninsukhurweelaka citthu cinnipankelaawe ni unlepela wiira aakavihere akhunanihu.
2. Manannani cinlamuliyeehu ulompa?
Ukati woolompa, nihaana noolumaka itthu iri wanrimani wihu. Phimaana Ibiiblya inaanikurumica unhimyera Nluku itthu “irineehu wanrimani.” (Isaalimu 62:8) Hi pooti ulompa nikumiheraka ncu vate awula mena, khula nipuro ni khula ukati. Ciicammo, hiiva pooti ulompa ninonkomile, ninakhoromile awula nineemenle. Itthu yuulupale ukhanle unhisima Yehova ukati woolompa.
3. Manannani Nluku cinaakhulaawe ulompa wihu?
Uyo naakhula ni mananna oovirikana. Wootakihera, mbiiblyani ninaaphwanya waakhuliya wo makoho ankhalaneehu. Usoma Nuulumo na Nluku ‘unamphwanyiha ankhili ntthu hincuwela.’ (Isaalimu 19:7; nsome Tiyaku 1:5.) Ciicammo, Yehova pooti unikavihera uhitepa ukhala niiwasiwaasi ukati unaananeehu masakha. Ukati umpheeleehu ukaviheriya, uyo pooti wanaarumaawe atthu anonswalela wiira anikavihere.
MUNCERERE WIITTHUCA WINYU
Moone isiyani inlamuliyeenyu upanka wiira Nluku ooviriyaneni ukati unlompeenyu nhimyaka itthu iri wanrimani winyu. Ciicammo moone manannani ulompa cinhalaaya wuukaviherani.
4. Isiyani inlamuliyeehu upanka wiira Nluku aviriyane ulompa wihu?
Citthuni cimmwiiriha Nluku uviriyana ulompa wihu? Moone IVIDIYU.
Yehova nopheela wiira ninlompeke uyova. Nsome Isaalimu 65:2, ni mwamalihaka usoma, moopele mwaha ala makohwaala:
Moonelweenyu, niireke wiira “Namwiiwelela ulompiya” nopheela wiira nyuuva munlompeke uyova? Kontha isiyani nneereenyu commo?
Wiira Nluku eewe ulompa wihu, nihaana nipankaka citthu cinoncivela. Nsome Mikeya 3:4 ni 1 Peturu 3:12. Mwamalihaka usoma, moopele mwaha nna nikohonna:
Isiyani inhala unikupaliha wiira nanlompaka Yehova naaniviriyana?
Yakhumelelaka ikhotto, ikhurupu coopiili cinwana cinaalompaka wiira cittheme. Moonelweenyu, niireke Nluku nawaakhula ayo mavekelwaayo?
5. Ukati woolompa nihaana nuulumaka itthu iri wanrimani wihu
Ahaavo atthu yiitthucihiye wiira ukati woolompa ahaana yuulumaka moolumo mamocaaru khula ikwaha. Masi niireke wiira Nluku phimpheelaawe commo? Nsome Matewus 6:7, ni mwamalihaka usoma, moopele mwaha nna nikohonna:
Isiyani nyuuva nnolamuliyeenyu upanka wiira nhaakulelihace uromola ‘citthu cimocaaru khula ikwaha’ nnolompeenyu?
Nnoonela cani khula nihuku wuupuwela iparakha imoca yuuvahilyaaweni Yehova, ni unsukhurweela iyo iparakheeyo? Mwapankaka commo khula nihuku wasumanani, nnaahala woona wiira ukati waalompeenyu, nhokhitiri uromola citthu 7 coovirikana woohaakulelihaca moolumo mamocaaru.
Nyari unancivela wakhalaka wiira mwanawe nanhimyera itthu irinaawe wanrimani. Inanna imocaaru, Yehova unancivela nalompaka nanhimyeraka itthu irineehu wanrimani.
6. Ulompa ikhanle itthuvo inivahilyaawe mwaneene Nluku
Manannani ulompa cinnikaviheraaya, venci-venci naananaka masakha? Moone IVIDIYU.
Ibiiblya ineera wiira ulompa pooti unikavihera ukhala woohimasukhuli. Nsome Afilipo 4:6, 7, ni mwamalihaka usoma, moopele mwaha ala makohwaala:
Ulompa khunhala umalamaliha khula masakha anhala wuukhumelelani. Masi manannani cinhalaaya wuukaviherani?
Citthuni coocivenleni ulepela awula usukhuru munlompaka Nluku?
Mwaanaacuwela?
Nuulumo “Amem” maanaaya wiira “ikhale yeeyo” awula “phi ciicammo” ikhumelo yokhalayi nno nuulumonno ninawuulumiya wuumaleloni nivekelo.—1 Ikoronika 16:36.
7. Ntthenkace ukati woolompa
Ikwaha ikhwaawe, ninaakhalaka ni miteko cinci mpaka uliyala ulompa. Niireke Yesu Kristu anvaha ifayita ulompa? Nsome Matewus 14:23 ni Markus 1:35. Mwamalihaka usoma, moopele mwaha ala makohwaala:
Isiyani Yesu yaapankaawe wiira akhalane ukati woolompa?
Isiyani nyuuva nnolamuliyeenyu upanka wiira nkhalane ukati woolompa?
ATTHU AKIINA ANEERA: “Ulompa unkhala urihakaca ukati wo mahala, kontha khaavo noviriyana; unawaaca paasi umwiiriha ntthuuyo wiicoona ukhala saana.”
Nneereliye commo, mwaahala wiira cani?
UTHIKILELA
Ulompa ninhimyeraka Yehova itthu irineehu wanrimani unaanikavihera umpatthanana uyova, uhikhala nimasukhuli ni unaanivahaka ikuru wiira nipanke citthu cinoncivela Yehova.
Wuupuwela
Tipani nolamuliyeehu unlompa?
Manannani ninlamuliyeehu ulompa?
Manannani ulompa cinnikaviheraaya?
MWAPHEELAKA UCUWELA CITTHU CIKIINA
Mphwanye waakhuliya wo makoho ampankaaya atthu enci nhina ulompa.
“Citthu 7 cinlamuliyeenyu ucuwela nhina ulompa” (Ukhalenla, 1 yo Outubro yo 2010)
Mwiitthuce kontha isiyani urinaaya ifayita ulompa ni mananna cinlamuliyeenyu urehelela mavekelweenyu.
“Kiireke kihaana kilompaka?” (Mwaha umphwanyannya nsayitini jw.org)
Kontha isiyani nihaana nilompaka? Moone Itthu ineetthucihaaya Ibiiblya nhina uyo mwahooyo.
“Kiireke kihaana kaaswalelaka attakattifu?” (Mwaha umphwanyannya nsayitini jw.org)
Nhina ila ividiyu yoncipweela, moone wakhala wiira ukati ni nipuro ninlompeehu cihaana ifayita cinene.