Niireke isukuhuulu awula ifesta cotheene cinancivela Nluku?

Yehova nopheela wiira nikhaleke ootteeliya ni nikhalaneke uwakati woothuka. Masi niireke isukuhuulu cotheene cinancivela? Nhina uyo mwahooyo, manannani cinlamuliyeehu uthoonyihera wiira ninanfenta Yehova?

1. Kontha isiyani isukuhuulu cinci khacinoncivela Yehova?

Atthunaka nyuuva nnaahala utikhinihiya nlattu woocuwela wiira isukuhuulu cinci khacinvaranaca nicitthu cineetthucihaaya Ibiiblya ni cinvaranaca niittiini yowootha. Ciicammo, atthunaka nnyo isukuhuulunnyo cinvaranaca nuukhwiri awula ile ineeriyakeele wiira nnepa khunkhwa. Isukuhuulu cikiina cinvaranaca nicitthu cowoothiya ni ile ineeriyakeele Nluku naamwantikhelela ntthu khula itthu inlamuliya umwiirannyeela. (Isaiya 65:11) Yehova nowiirela ale anonswalela co: “Nkhume iriyaryaaya ni mwaanyeme . . . ni nhiye ukafyakafya citthu coohiirya.”—2 Akorintu 6:17;a moone niwehero.

2. Yehova nokhala cani oonaka ceettiyaka isukuhuulu cinaattittimiha cinene apinaatamu?

Yehova naanihimyeera wiira ‘nihaakhuluvele apinaatamu.’ (Nsome Jeremiya 17:5.) Cihaavo isukuhuulu cikumihereriye wiira attottopeliye atthu, toko anatoropa awula ahooleli. Ni isukuhuulu cikiina cikumihereriye wiira cittottopeliye ilapo awula ncoko unkhalaawe ntthuuyo. (1 Joau 5:21) Ni cikiina cinvaranaca niisiyaasa awula myaha co ncoko. Woonela winyu, Yehova aahala ukhala cani nanonne neettaka isukuhuulu inonttitthimiha ntthu awula miphwinko cinaakurumica atthu upanka citthu cihinoncivela uyova?

3. Citthuni cineeriha isukuhuulu ukhala yoohiloka?

Ibiiblya inawaateeliha ‘uhapaliya, weetta isukuhuulu coohiloka ni uwurya venci.’ (1 Peturu 4:3) Isukuhuulu cikiina, atthu enci anaapanka citthu coohiloka ni urupihana woohiloka. Wiira nikhale apatthani a Yehova, hi nihaana ninyemaka ayo meettelo oohinamaanaayo.

MUNCERERE WIITTHUCA WINYU

4. Nnyeme isukuhuulu cinonrusa Yehova

Nsome Efesu 5:10, ni mwamalihaka usoma, moopele mwaha ala makohwaala:

• Nihinaaya ulakela wakhala wiira unaareera urwaa usukuhuuluni awula mena, isiyani inlamuliyeehu waavyaavya ucuwela?

• Isukuhuuluni cimpankesiya cinene ncoko unkhaleenyu?

• Woonela winyu, nnyo isukuhuulunnyo cinancivela Yehova?

Wootakihera, niireke nhopaca wiikoha wakhala wiira Nluku cinancivela isukuhuulu cimpankiya co nihuku ntthu niyariyaawe? Ibiiblya khimmuuluma nanka nswali mmoca a Yehova aapacile upanka isukuhuulu nihuku naapiiheraawe myaakha. Masi inooluma isukuhuulu piili co nihuku ntthu nopiiheraawe myaakha caapankiye naalopwana eeli yahanswalela Yehova. Nsome Uphattuwaca 40:20-22 ni Matewus 14:6-10. Mwamalihaka usoma, moopele mwaha ala makohwaala:

• Atthu eeli aromoliye nhina nnya iveerusu cisomileehunnya, itthuni yootakhala yaapankilyaaya nihuku neettaaya isukuhuulu?

• Toko cinthoonyeraaya nnyo iveerusunnyo, Yehova noonela cani isukuhuulu yo nihuku ntthu nopiiheraawe myaakha?

Masi atthunaka nyuuva nnawiikohaka co: ‘Kiireke Yehova unanrusa akoonaka kipankaka isukuhuulu yo nihuku kimpiiheraaka mwaakha awula isukuhuulu ikiina ihinvaranaca niitthu ineetthucihaaya Ibiiblya?’ Nsome Nkwaha 32:1-8. Mwamalihaka usoma, moone IVIDIYU ni moopele mwaha ala makohwaala:

IVIDIYU: Isukuhuulu cinonrusa Nluku (5:07)

• Kontha isiyani unaareera ucuweleeha citthu cinoncivela Yehova?

• Ninhala ukhitiri cani ucuwelela citthu cinoncivela Yehova?

Isiyani inhala unikavihera ucuwelela isukuhuulu cinonrusa Nluku?

• Niireke iyo isukuhuulwiiyo inaavaranaca nimeetthucihero anvirikaniha itthu inhimyaaya Ibiiblya? Ntothe ucuwela mananna cipacapacilyaaya weettiya iyo isukuhuulwiiyo.

• Niireke iyo isukuhuulwiiyo inanttitthimiha cinene pinaatamu, mphwinko awula ilapo? Hi ninonttitthimiha cinene Yehova uvikana citthu cotheene ni ninaakupali wiira uyo naahala umalamaliha citthu cootakhala ntuninyani motheene.

• Citthuni cimpankaaya atthu naphiyaka nno nihukunno? Cinaavaranaca niitthu inhimyaaya Ibiiblya wiira phiri itthu yomaana? Nihaana nikhalanaka meettelo omaana ni unyema citthu coohinamaana.

5. Mwaakavihere atthu ucuwela itthu ilakenleenyu

IVIDIYU: Nthoonyere ihisima woohimyaca itthu inkupaliinyu (2:01)

Nsome Matewus 7:12, ni mwamalihaka usoma, moopele mwaha ala makohwaala:

• Toko cinthoonyiheraaya ila iveeruswiila, niireke nyuuva nhaana mwaakhanyererihaka asimuciinyu uheetta isukuhuulu?

• Manannani cinlamuliyeenyu waathoonyera asimuciinyu wiira hataa nyuuva nheettaka isukuhuulu wamoca naayo, khanhiile waafenta?

6. Yehova nopheela wiira nikhaleke ootteeliya

Yehova nopheela wiira nithukathukeke naamuciihu ni naasipatthaniihu. Nsome Eklesyaste 8:15, ni mwamalihaka usoma, moopele mwaha nna nikohonna:

• Ila iveeruswiila manannani cinthoonyiheraaya wiira Yehova nopheela nikhaleke ootteeliya?

Yehova nopheela wiira apoovwaawe aviriheke ukati yathukathukaka ni anari nkhayi. Moone IVIDIYU wiira ncuwele mananna iyo itthwiiyo cineerannyaaya ukati umpankeehu ikonkereesu cuulupale.

IVIDIYU: Uwaakhelela mayamunna mmakonkereesuni cuulupale (5:40)

Nsome Akalasiya 6:10, ni mwamalihaka usoma, moopele mwaha ala makohwaala:

• Niireke nihaana neettaka isukuhuulu cineetta akhunanihu wiira naapankele citthu comaana?

• Isiyani yaahala wuutteelihani nrima? Unvaha itthu ntthu nlattu wosukuhuulu awula nlattu wootthuna imwaneeneenyu?

• Masaahiti a Yehova enci anaatthenkacaka isukuhuulu ni anawaavahaka asaanaaya citthu woohiweherera uphiya nihuku nimpankiya isukuhuulu yo ntuninyani. Wakhala wiira nyuuva nhaana asaana, citthuni comaana caahala ureera waapankela?

UTHIKILELA

Yehova nopheela wiira niviriheke ukati nithukaka naasimuciihu ni asipatthaniihu. Masi ciicammo uyo nopheela wiira niheette isukuhuulu cinonrusa.

Wuupuwela

• Nihinaaya ulakela weetta isukuhuulu, makohoni anhala unikavihera ucuwela wakhala wiira iyo isukuhuulwiiyo inancivela Yehova awula mena?

• Manannani cinlamuliyeehu waakavihera asimuciihu ni asipatthaniihu ucuwela kontha isiyani khanineetta isukuhuulu cikhwaawe?

• Nincuwela cani wiira Yehova nopheela wiira nikhale ootteeliya ni nithukathuke?
  Kimalihile usoma ula mpanttoola nihuku:

MWAPHEELAKA UCUWELA CITTHU CIKIINA

Moone isukuhuulu cihineettaaya makristau.

“Masaahiti a Yehova cihaavo isukuhuulu cihineettaaya?” (Mwaha umphwanyannya nsayitini jw.org)

Moone citthu 4 cinnikupaliha wiira weetta isukuhuulu yo nihuku nimpiiheraawe ntthu myaakha unanrusa Yehova.

“Niireke Masaahiti a Yehova khaneetta isukuhuulu yo nihuku nimpiiheraawe ntthu myaakha?” (Mwaha umphwanyannya nsayitini jw.org)

Moone mananna anamwane anonfenta Yehova cinlamuliyaaya untteeliha nrima yakhumaka ifeeriya.

Yehova naawoona ukhalana ifayita (11:35)

Makristau imiliyau cene aholakela uhimweetta Natali. Anoonela cani iyo itthu ilakenlyaayeeyo?

“Ayo ahophwanya itthu yomaana” (Ukhalenla, 1 yo Dezembro yo 2012)