Manannani ninlamuliyeehu uthoonyihera wiira khaninkelakela myaha co ntuninyani?

Yesu howiirela attharyaawe: ‘Nhipanke mphantte wotuninya.’ (Joau 15:19) Uhipanka mphantte wotuninya unhela nhina uhikhalana ipartiitu ni uhiikelakeliha myaha cokhotto. Masi woohikhuwakhuwa, uhikelakela myaha co ntuninyani ikwaha ikhwaawe unaarika. Hiiva atthunaka pooti utarawaciya nlattu wo iyo itthwiiyo. Manannani ninlamuliyeehu uhiikelakeliha myaha co ntuninyani ni uhihiyerera ukhala ookhuluvelya uhoolo wa Yehova?

1. Makristau anwehera cani ikuvernu ca apinaatamu?

Makristau anaahisima ikuvernu ca apinaatamu. Coo, hi ninaapanka ile Yesu ihimilyaawe. Ciicammo, ‘ninanvaha César citthu ca César.’ Iyo maanaaya wiira hiivano ninaweettela malamulo olapo inkhaleehu, toko uliva nsokho. (Markus 12:17) Ibiiblya ineetthuciha wiira ikuvernu ca apinaatamu cimphwanyannya va watuninyani va kontha Nluku phitthunihile. (Arooma 13:1) Phimaana, hi ninaakupaleela ukhulupale cirinaaya ikuvernu ca apinaatamu. Hi ninaacuwela wiira nnyo ikuvernunnyo khacirina ukhulupale unvikana Nluku. Ni ciicammo ninaacuwela wiira Nluku paahi ni umwennyaawe phinhala ukhitiri umalamaliha masakha anaakhumelela apinaatamu.

2. Manannani cinlamuliyeehu uthoonyihera wiira khaninkelakela myaha co ntuninyani?

Khampa Yesu, hi khanineekelakeliha isiyaasa. Ikwaha imoca, atthu woonilyaaya mwiiriirya waapankilyaawe, ayo yahopheela unkhaliha mwene. Masi uyo ahokhotta. (Joau 6:15) Kontha isiyani? Itthu yoolumilyaawe wahoolo waya inaanikavihera ucuwela: “Umwennyaaka khumpanka mphantte wo ila ituninyeela.” (Joau 18:36) Nlattu wookhala atthari a Yesu, hi ninaathoonyihera uhikelakela myaha co ntuninyani nimananna menci. Wootakihera, hi khaninrwaa ukhottoni. (Nsome Mikeya 4:3.) Ciicammo, khiivo ipartiitu inkavihereehu ni innirusa ni hataa ntthu nopheela uthanliya wiira ahoolele khannirusa. Hi ninaahisimu ilapo inkhaleehu, ncipo no hino nacional ni hataa ipantera, masi khaninswalela nnyo citthunnyo. (1 Joau 5:21) Ala akhanle mananna owoonihera wiira hiivano ninaavaresesa ikuvernu ya Nluku.

MUNCERERE WIITTHUCA WINYU

3. Makristau eekhweeli khankelakela myaha co ntuninyani

Yesu wamoca naattharyaawe khayaakelakela myaha co ntuninyani ni hiiva nihaana naatakihaka. Nsome Arooma 13:1, 5-7 ni 1 Peturu 2:13, 14. Mwamalihaka, moone IVIDIYU ni moopele mwaha ala makohwaala:

IVIDIYU: Makristau eekhweeli khankelakela myaha co ntuninyani—Mphantte 1 (4:28)

• Kontha isiyani nihaana nihisimaka ikuvernu ca apinaatamu?

• Manannani ninhaleehu woonihera wiira ninawiiwelela nnyo ikuvernunnyo?

Yakhumelelaka ikhotto, atthu akhwaawe aneehimya uhikelakela myaha co ntuninyani anaakavihera ikhurupu coopiili cinaana ikhotto. Masi uhikelakela myaha co ntuninyani khweeliini maanaaya isiyani? Nsome Joau 17:16, ni mwamalihaka usoma, moone IVIDIYU ni moopele mwaha nna nikohonna:

IVIDIYU: Makristau eekhweeli khankelakela myaha co ntuninyani—Mphantte 2 (3:11)

• Uhikelakela myaha co ntuninyani maanaaya isiyani?

Vano nipankekeni wakhala wiira ikuvernu ya apinaatamu inaanikhanyereriha upanka itthu invirikaniha nlamulo na Nluku? Nsome Miteko 5:28, 29. Mwamalihaka usoma, moone IVIDIYU ni moopele mwaha ala makohwaala:

IVIDIYU: Makristau eekhweeli khankelakela myaha co ntuninyani—Mphantte 3 (1:18)

• Wakhalaka wiira nihaavo nlamulo na apinaatamu ninvirikaniha nlamulo na Nluku, nlamuloni ninlamuliyeehu wiiwelela?

• Nnawuupuwela citthuni makristau caahalaaya ukhotta upanka aneereliye naakhulupale ookuvernu wiira apanke?

4. Nhikelakele myaha co ntuninyani nhina wo citthu cimpankeenyu ni mananna cinoopuweleenyu

Nsome 1 Joau 5:21. Mwamalihaka, moone IVIDIYU ni moopele mwaha ala makohwaala:

IVIDIYU: Nlattuni makristau eekhweeli anlamuliyaaya ulipa nrima—Wiira ahikelakele isiyaasa (2:49)

• Nvidiyuni yonneehu, kontha isiyani munneehu Ayenge aalakenlyaawe uhikela ipartiitu ni hataa uhiswalela ipantera?

• Nyuuva woonela winyu, uyo aholakela upanka itthu yomaana?

Citthuni-tho caahala utteha ile ilakenleehu yoohikelakela myaha co ntuninyani? Moone IVIDIYU, ni mwamalihaka woona, moopele mwaha ala makohwaala:

IVIDIYU: Citthu cineetthuceehu nrevistani Ukhalenla—Nhihiyerere unyema ukelakela myaha co ila ituninyeela (5:16)

• Wakhalaka wiira ilapo inkhaleehu inaattikha masinttaano niilapo ikhwaawe, manannani cinlamuliyeehu uthoonyihera uhikelakela myaha co ntuninyani?

• Manannani cinlamuliyeehu uthoonyihera uhikelakela myaha co ntuninyani wakhalaka wiira nkhulupale mmoca o ntuninyani holakela itthu inhala unipanka pusya awula inhala uniphwanyiha ifayita?

• Manannani citthu cinwiiweehu atthu ni citthu cineeweehu mmahaparini caahalaaya uhonona ile ilakenleehu yoohikelakela myaha co ntuninyani?

UTHIKILELA

Makristau anawiikurumica cinene wiira ahikelakele myaha co ntuninyani nhina moopuwelelwaaya, citthu cinoolumaaya ni citthu cimpankaaya.

Wuupuwela

• Isiyani inlamuliyeehu uvaha ikuvernu ca apinaatamu?

• Nlattuni nihinlamuliyeehu ukelakela myaha co ntuninyani?

• Citthuni caahala unirikihela uhikelakela myaha co ntuninyani?

MWAPHEELAKA UCUWELA CITTHU CIKIINA

Citthuni atthunaka cinlamuliyeehu upanka wiira nihikelakele myaha co ila ituninyeela?

Yehova khanatoko uninyanyala (3:14)

Isiyani amuci inlamuliyaaya upanka wiira ahale ukhitiri unyema yakhanyererihiyaka ukelakela myaha co ila ituninyeela?

Ukati wotheene nhiikelakelihe myaha co ila ituninyeela (4:25)

Kontha isiyani waakihera ilapo khinakhala itthu inhala umwiiriha ntthu uhitepa uttitthimihiya?

“Nluku khiivo inooceelaawe” (5:19)

Moone manannani nyuuva cinlamuliyeenyu unyema wiikelakeliha myaha co ila ituninyeela ukati woothanla nteko unhaleenyu uvara.

“Khula ntthu nohala ucisa nrinttyaawe” (Ukhalenla, 15 yo Março yo 2006)