Isiyani inhaleenyu uphwanya mwarwaaka mmikutthaanoni cihu?

Atthu enci ahohiya urwaa uswali mmattiinini kontha khaphwanyile umaalihiya untothaaya ni macipwo o makoho arinaaya. Vano, kontha isiyani nnolamuliyeenyu urwaa mmikutthaanoni ceekristau co Masaahiti a Yehova? Nnohala uphwanya isiyani mwarwaaka mmikutthaanoni cihu?

Utteeliya nlattu wookhala iriyari yaatthu oofentana ni oowacerana. Iseekulu yoopacera, makristau yaari mmalokoni oothotokana, ni yaanaapankaka mikutthaano wiira answalele Nluku, asome cowantikhiya cowaarya ni wiira alipihane. (Maberewu 10:24, 25) Nlattu woothukumana naatthu oofentana, ayo yeecoona ukhala iriyari wo apatthani ookhuluvelya — ale akhanle mayamunnaaya omminepani. (2 Atesalonika 1:3; 3 Joau 14) Hiivano nintthara nno ntakiheronno ni ninaatteeliya toko ayo yaatteeliyaaya.

Uphwanya ifayita nlattu wiitthuca inanna yoovarela nteko mattharelelo ombiiblyani. Toko khalayi, mahukwaala ciicammo alopwana, athiyana, asaana anaathukumana wamoca. Eetthucihi ookupaliya, yavarelaka nteko Ibiiblya anaanikavihera ucuwela inanna yoovarela nteko mattharelelo ombiiblyani khula nihuku. (Deuteronomiyu 31:12; Nemiya 8:8) Ale ampheela pooti woonihera waamini waya yiipaka macipo ni yakomentariki mmikutthaanoni.—Maberewu 10:23.

Uphwanya iparakha yoolipihaca waamini urineenyu. Apostolu Paulu ahowiirela mayamunnaawe o Roma: “Kinaapheela uwoonananani cinene . . . wiira nilipihane ni waamini wo khula ntthu urinaawe, waamini waka ni waamini winyu.” (Arooma 1:11, 12) Ukumana ni mayamunneehu mmikutthaanoni cihu, unaalipiha waamini wihu ni ulakela wihu ukhalana makhalelo eekristau.

Nyuuva nnaalattuliya urwaa unkutthaanoni wihu isumana inwa, wiira moone ni meethweenyu cotheene cihimiye nhina ula mphanttyoola. Nyuuva nnaahala waakheleliya saana! Mmikutthaanoni cihu unkeliya mahala ni khinvirihiya iphace ulepeliyaka nsurukhu.

• Mikutthaano cihu ceekristau cintthara ntakiheroni?

• Mikutthaano ceekristau inannani cinnikaviheraaya?