Waanoocivela Ucuwela Ikhweeli?

IKHWEELI yeesiyani? Yo makoho moolupale atthu apankalyaaya. Wootakihera, atthunaka weeva pooti uhopaca wiikoha:

• Niireke Nluku naaniwacera khweeli?

• Ikhotto ni uhuva cinaarwa umala wanihukuni?

• Inkhumelela isiyani akhwaka ntthu?

• Uhaavo nweherero waatthu akhwale?

• Kipankeke isiyani wiira Nluku ewe ulompawaka?

• Kinhala ukhala cani ootteeliya?

Unhala uphwanya vayi macipwo aala makohwaala? Warwaa mmabibliyoteka awula mmalivrariya, pooti uphwanya ilivuru imiliyawucene ceehimyaka ukhalana macipwo. Masi woohihiyerera khula ilivuru inaavanyiha ikhwaaya. Cikinaku cinkhala toko cinhimya ikhweeli, masi nuukathyaaya khacincuwannyaa ni cimpheela uhokoleela uwehawehaciya awula waakakhanihiya.

Masi ihavo ilivuru irina macipwo ookhuluvelya. Ikhanlee ilivuru irina ihapari cowoonannya. Yesu Kristu ahonlompa Nluku eeraka: “Moolumwaa akhanlee ikhweeli.” (Joau 17:17) Ilelo nincuwela wiira ala Moolumwaala akhanlee Ibiiblya Yowaarya. Vano, woone wowaakuvyaa mananna Ibiiblya cinvahaaya macipwo owoonannya ni ookhuluvelyaa omakoho arii nculu.

Niireke Nluku Naaniwacera Khweeli?

KONTHA ISIYANI NINKHUMELELAAYA NNA NIKOHONNA: Ninkhala ntuniyani woocara ikhirini ni citthu coohiloka. Ittiini cinci cineetthuciha wiira uhuva Nluku phinniwaanela.

ITTHU INEETTHUCIHAAYA IBIIBLYA: Nluku thanku khankhuniha citthu cootakhala. Ilivuru ya Jó 34:10 inhimya co: ‘Nluku unkhanlee uttayi wuupuwela upanka itthu yoonanara, ni Nakuru Coothene wuupuwela yoohiloka!’ Ihaavo itthu yonifento Nluku inaapheelelaawe apinaatamu. Phimaana Yesu ahoniitthuciha ulompa: “Paapeehu wiirimu, . . . Umweneenyu uwe. Ipankiye impheelenyu vathi, khampa ciryaaya wiirimu.” (Matewus 6:9, 10) Mananna Nluku yiikurumicalyaawe wiira impheelaawe yiirannyee, anthoonyera wiira naaniwacera cinene.—Joau 3:16.

Uwehe ciicammo Uphattuwaca 1:26-28; Tiyaku 1:13 ni 1 Peturu 5:6, 7.

Ikhotto ni Uhuva Cinaarwa Umala Wanihukuni?

KONTHA ISIYANI NINKHUMELELAAYA NNA NIKOHONNA: Atthu enci arii mookhwa mwaha wo ikhotto. Oothene wihu unaanikhumelela khula nnanna wo uhuva.

ITTHU INEETTHUCIHAAYA IBIIBLYA: Nluku enree wiira uhoolo naarwa utikitherya nnema ntuniyani moothene. Nluku wanhalaawe wancera ulamulela ituniya, “khaavo nkowiitthuca-tho ikhotto”. Uhiya commo, “iyuma cowiiva” ayo “anrwaa uhana ihipa.” (Isaiya 2:4) Nluku nhala umaliha khula nnanna wo uhuva. Inatiri yo Ibiiblya inhimya: “[Nluku] naarwa uwuta minthori, khunhala ukhala-tho ukhwa, ikuttho, isontte-sontte, ni hataa yoowerya. Citthu cokhalayi [utakaniha coohiloka ni uhuva woleelo] cihovira.”—Apokalipise 21:3, 4.

Uwehe ciicammo Isaalimu 37:10, 11; 46:9 ni Mikeya 4:1-4.

Inkhumelela Isiyani Akhwaka Ntthu?

KONTHA ISIYANI NINKHUMELELAAYA NNA NIKOHONNA: Ittiini cinci cineetthuciha wiira akhwaka ntthu, ihavo itthu inhala nuukumi mwiirutthuni. Ittiini cikina cinhimya wiira atthu ookhwa anaakhitiri waattarusa atthu akumi ni Nluku nawaatulumu atthu oohiloka, aarwaanaka umooroni wiira avye mpaka.

ITTHU INEETTHUCIHAAYA IBIIBLYA: Pinaatamu akhwaka, naahiya ukhala. Ilivuru yo Eklesyaste 9:5 inhimya co: “Atthu ookhwa khanoopuwela [awula: khancuwela] hataa itthu.” Ukhala wiira atthu ookhwa khanoopuwela, khankhalana uthunku walaa khampanka mena itthu, ayo khanlamuliya ukhitiri waattarusa ni hataa waakavihera atthu akumi.—Isaalimu 146:3, 4.

Uwehe ciicammo Uphattuwaca 3:19 ni Eklesyaste 9:6, 10.

Uhaavo Nweherero Waatthu Akhwale?

KONTHA ISIYANI NINKHUMELELAAYA NNA NIKOHONNA: Hiiva nimpheela ukhala akumi. Nimpheela ulawa ukumi nkhayi naale anaafenteehu. Irii ikhalelweehu unicivela woona-tho atthu akhwale yaafenteehu.

ITTHU INEETTHUCIHAAYA IBIIBLYA: Atthu enci akhwale anaarwa wummwelelihiya. Yesu hovaha inatiri ineera wiira “oothene arii mmahiyeni . . . anaahala ukhuma.” (Joau 5:28, 29) Toko caapheelalyaawe Nluku wowancera, ale anrwaa wummwelelihiya ankookhala upeephoni watuniyani vaava. (Luka 23:43) Nhina wo inatiri yeela, atthu ootthuna uhimeriya anrwa ukhalana ukumi woohipahuwa ni woohimala. Ibiiblya inhimya co: ‘Ale aneettela isariya phinhala ukhala walaponi, ni ankookhala vaava mpaka.’—Isaalimu 37:29.

Uwehe ciicammo Jó 14:14, 15; Luka 7:11-17; ni Miteko 24:15.

Kipankeke Isiyani Wiira Nluku Ewe Ulompawaka?

KONTHA ISIYANI NINKHUMELELAAYA NNA NIKOHONNA: Atthu ottiini coothene anaalompa. Masi enci anoonela wiira khanaakhuliya.

ITTHU INEETTHUCIHAAYA IBIIBLYA: Yesu honiitthuciha wiira ninyeme waakulela moolumo woolompa. Uyo eenre co: “Weelompaka uhihimye itthu imocaaru wo khula nkwaha.” (Matewus 6:7) Napheela wiira Nluku eewe ulompawihu, nihaana nilompaka cintthunaawe. Wiira nipanke coo, nihaana nicuwelaka ile intthunaawe Nluku, vano philompaka toko cintthunaawe. Ilivuru yo 1 Joau 5:14 inhimya co: “Nna nirii nikhuluvelo nirineehu nuuyo, pooti unlepela impheeleehu yakhalaru ile intthunaawe, uyo naaniiwa.”

Uwehe ciicammo Isaalimu 65:2; Joau 14:6, 14; ni 1 Joau 3:22.

Kinhala Ukhala Cani Ootteeliya?

KONTHA ISIYANI NINKHUMELELAAYA NNA NIKOHONNA: Atthu enci anoona wiira nsurukhu, usamihiya, ni ureera phinhala waawaanela utteeliya. Coo, ayo anawiikurumica wiira aphwanye cennyo citthunnyo, ni yaphwanyakavale phinoonelelaaya wiira khankhala ootteeliya.

ITTHU INEETTHUCIHAAYA IBIIBLYA: Yesu hothoonyera isiiri imphwanyiha utteeliya weeralyaawe: “Ootteeliya phaale ancuwela wiira anaapheela wiitthuca cowiiluku.” (Matewus 5:3) Utteeliya wokhweeli ninhala uphwanya nahoolelihaka ucuwela itthu yuulupale, ikhanlee ucuwela ikhweeli ya Nluku ni itthu innipheelelaawe. Ila ikhweeli ila irii mbiiblyani. Ucuwela iyo, pooti unikavihera woonelela isiyani yuulupale utthara ni ihikhanle yuulupale. Nahiyereraka wiira ikhweeli irii mbiiblyani ilakihere coothanlacihu ni meettelweehu, ninaahala ukhalana ukumi woocuwanyaa.—Luka 11:28.

Uwehe ciicammo Miruku 3:5, 6, 13-18 ni 1 Timotiyu 6:9, 10.

Ala akhanlee macipwo oothikileliya, ombiibliyani, omakoho sita. Waanoocivela ucuwela-tho? Wakhalaka wamoca ni atthu ampheela ucuwela cowiiluku, ucipwawaa ukhanlee iyee. Pooti ukhalaka wiira uhaana makoho makina toko: Akhala wiira Nluku nawaawacera atthu, kontha isiyani naahiyerera uwakathi mwinci cikhumelelaka cootakhala ni uhuva? Kinhala ulokiha cani makhalelo owapuwaniwaka? Ibiiblya ihaana macipwo ootteeliha nrima aala makohwaala ni makoho makina oovirikana.

Masi, atthu enci mahuku oleelo, khansoma Ibiiblya. Anoona wiira iyo ilivuru yuulupale ni inaarikarika wiiwa inhimyaaya. Waanaapheela ukavihiya wiira uphwanye macipwo mbiiblyani? Masaahiti a Yehova anaavaha ikaruma piili cinhala wuufai weeva.

Ikaruma yoopacera ikhanle ibroxura Ihapari Comaana Cinoovahaawe Nluku!, yantikhiye wiira yaakavihe atthu arina ukathi vakani woototha mbiiblyani macipwo owiiwanyaa omakoho moolupale. Ikaruma yonayeeli ikhanlee wiitthucihiya Ibiiblya woohiliva itthu. Saahiti a Yehova umwaattamanannyaa, pooti uwa khula isumana wapuwaniwaa awula nipuro nikina nowuucivela wiira muukathini vakani awoopane myaha co Ibiiblya. Atthu imiliyawucene ahophwanyera ifaita yaala meetthuciherwaala. Wiimaleloniwaaya enci yaahophiyera uhimya co: “Kihoonelela ikhweeli!”

Khiivo-tho itthu ikina yoopheela univaha ifaita. Ikhweeli yombiiblyani inaanikavihera ukhotta citthu coohimyahimiya coohiloka, coohicuwannya, ni woopihiya wootepa. Ibiiblya inaanivaha nweherero, yoolakela mu ukumini ni utteeliya. Yesu ahohimya: “Nnaarwa ucuwela ikhweeli, ni ikhweeli inaarwaa wuukhalihani ootaphuwa.”—Joau 8:32.