Mpankeke isiyani wiira nthoonyere usukhurweela itthu yuupankenlyaaweni Yehova ni Yesu?

Nyuuva nnokhalaka cani mpatthaniinyu oovahakani itthu? Atthunaka, nyuuva nnokhalaka ootteeliya venci cinene ni nnaapheelaka umoonihera mpatthaniinyuuyo wiira ihoocivelani venci cinene itthu yuuvahilyaaweni. Yehova ni Yesu ahonivaha itthuvo yootepa ukhalana ifayita ihinlikananiya, woopwa. Manannani cinlamuliyeehu woonihera usukhuru woopoliya wihu?

1. Manannani cinlamuliyeehu uthoonyera wiira ninaavaha ifayita itthu inipankenlyaawe Yehova ni Yesu?

Ibiiblya inaakhuluveliha wiira ‘otheene ule nomwaamini Yesu’ naahala ukhala mpaka. (Joau 3:16) Manannani cinlamuliyeehu upanka iyo itthwiiyo? Nihaana nooniheraka umwaamini Yesu ni citthu cimpankeehu. (Tiyaku 2:17) Nooniheraka wiira nihaana waamini ni citthu cinoolumeehu ni ciicammo cimpankeehu, ninaalipihaca upatthaniihu ni Yesu ni ciicammo naathumwaane, Yehova.—Nsome Joau 14:21.

2. Nihukuni nofayita cinene ninnikavihera unsukhuru Yehova ni Yesu ile inipankenlyaaya?

Uhiyu waya nihuku naahalaawe wiiviya, Yesu ahaahimyera attharyaawe mananna owoonihera usukhuru wiivaherera wawe. Uyo ahowiirela wiira yaalamuliya uthukumana nihuku nofayita venci cinene, nno nihukunno Ibiiblya ineehana “Iyoolya Yoohiyu ya Apwiiya,” ciicammo nincuweliya ukhala Nuupuwelelo no Nookhwa a Yesu. (1 Akorintu 11:20) Yesu aapheela wiira maapostolwaawe otheene ni makristau eekhweeli otheene yaahala ukhala va watuninyani va wahoolo waya, ahiliyale wiira uyo hovaha ukumyaawe wiira anoopole. Phimaana, uyo ahoruma eeraka: “Nhihiyerere upanka ila nkuupuwelelaka.” (Luka 22:19) Mwarwaaka unuupuweleloni, nyuuva nnawoonihera usukhuru nifento ninnithoonyeraawe Yehova ni Yesu.

MUNCERERE WIITTHUCA WINYU

3. Isiyani inlamuliyeehu upanka wiira nithoonyere usukhuru?

Muupuwele nnari mmoolokoni ncamakoono ni nwuryaka ituuthu, vano naawa ntthu uwoopolani. Niireke nyuuva mwanhala uliyala itthu yuupankenlyaaweni uyo ntthuuyo? Awula mwaahala upanka yotheene yaahaleenyu ukhitiri wiira munsukhuru itthu yuupankenlyaaweni?

Hiiva nihaana nweherero woohala ukhala mpaka nlattu wo itthu inipankenlyaawe Yehova. Nsome 1 Joau 4:8-10, ni mwamalihaka usoma, moopele mwaha ala makohwaala:

• Kontha isiyani wiivaherera wa Yesu ukhanlyaaya itthuvo yofayita cinene?

• Nyuuva nneecoona cani ucuwela winyu itthu yuupankenlyaaweni Yehova ni Yesu?

Manannani ninlamuliyeehu uthoonyera usukhuru itthu inipankenlyaawe Yehova ni Yesu? Nsome 2 Akorintu 5:15 ni 1 Joau 4:11; 5:3. Mwamalihaka usoma, moopele mwaha nna nikohonna:

• Toko cinhimyaaya iveerusunnyo, isiyani inlamuliyeehu upanka wiira nithoonyere usukhuru?

4. Muntakihe Yesu

Inanna ikhwaawe yoothoonyera usukhuru ukhanle untakiha Yesu. Nsome 1 Peturu 2:21, ni mwamalihaka usoma, moopele mwaha nna nikohonna:

• Manannani cinlamuliyeenyu untakiha Yesu?

5. Nrwee wanuupuweleloni no nookhwa a Yesu

Wiira ncuwele itthu impankiya nihuku no Iyoolya Yoohiyu Yaapwiiya, nsome Luka 22:14, 19, 20, ni mwamalihaka usoma, moopele mwa ala makohwaala:

• Isiyani ineerannya nihuku no Iyoolya Yoohiyu Yaapwiiya?

• Iviinyu ni iphaawu cinthoonyera isiyani? — Nwehe 19 ni 20.

Yesu aapheela wiira khula mwaakha, attharyaawe yuupuwelele nihuku naakhwilyaawe. Phimaana, Masaahiti a Yehova anaathukumana khula mwaakha wiira yuupuwelele ukhwa wa Yesu khampa cirumilyaawe. Wiira ncuwele mananna cinoopuweleliyaaya nno nihuku nofayita cinenenno, moone IVIDIYU. Mwamalihaka woona, moopele mwaha nna nikohonna:

IVIDIYU: Muupuwelele ukhwa wa Yesu (1:41)

• Isiyani ineerannya wanuupuweleloni no nookhwa a Yesu?

Wanuupuweleloni, iphaawu inthoonyera irutthu yeepinaatamu ya Yesu yoohipahuwa. Iviinyu inthoonyera iphomyaawe.

UTHIKILELA

Hiiva ninthoonyihera wiira ninaavaha ifayita itthu inipankenlyaawe Yesu namwaaminiki uyova ni naahiloveke nihuku ninoopuweleliyaaya ukhwa wawe.

Wuupuwela

• Umwaamini Yesu maanaaya isiyani?

• Manannani cinlamuliyeenyu uthoonyihera usukhuru itthu yuupankenlyaaweni Yehova ni Yesu?

• Kontha isiyani ikhanlyaaya itthu yofayita urwaa wanuupuweleloni no nookhwa a Yesu?

MWAPHEELAKA UCUWELA CITTHU CIKIINA

Ukhwa wa Yesu isiyani unnikurumicaaya upanka?

Yesu hovarela nteko irutthwaawe wiira anttitthimihe Yehova (9:28)

Mwiitthuce sana-saana uthoonyera waamini maanaaya isiyani.

“Nthoonyere wiira nnawaamini inatiri ca Yehova” (Ukhalenla, yo Outubro yo 2016)

Nhina ihantisi irina muru uneera “Mi kinawiicoona ukhala saana ni ukhalana makhalelo omaana,” moone mananna makhalelo aathiyana amoca cirukunuwilyaaya wiiweeha waya wiivaherera wa Yesu.

“Ibiiblya inaarukunusa makhalelo aatthu” (Ukhalenla, 1 yo Agosto yo 2011)

Moone nlattuni nihuku no nuupuwelelo atthu vakaani phinkhuura iphaawu ni phinwurya iviinyu.

“Iyoolya Yoohiyu Yaapwiiya—kontha isiyani Masaahiti a Yehova anoopuwelelaaya nno nihukunno niinanna yoovirikana cinoopuwelelaaya ittiini cikhwaawe?” (Mwaha umphwanyannya nsayitini jw.org)