Nihophwanya “nluku noopharela nofayita cinene”

Winston, unihimyacere utothale cani ikhweeli yombiiblyani.

Amucyaaka khayaari anattiini. Hiiva naakhala uttayi nipuro naari imatteehu u Queensland, u Austrália, ni miiva kaakhalaka naamucyaaka paahi. Ukati waarinaka myaakha 12, khahancera upheela uncuwela Nluku. Kaholompa ni kahonlepela Nluku wiira akikavihere wiitthuca ikhweelyaawe. Nuukatyaaya, kahohiya ukhala umattani ni kahototha nteko usitati yo Adelaide, iri u Austrália do Sul. Waarinaaka myaakha 21, kahokhuma ifeeriya ni kahorwaa u Sydney, wonwo phancuwenlyaaka Pam. Uyo ahokihimyacera ikhurupu yaanattiini ineehaniya israelismo-britânico, ankupali wiira mabritânico akhanle ucuulu wo “maloko oorimela khuumi o Isarayeli”. Toko cineeraaya ayo atthwaayo, maloko khuumi oorimelaayo akhanle maloko khumi oncoko wooculu woosarayeli, yaakumihiye nlaponi waya myaakha co 800 ni 700 hinaaya uwa Kristu. Ukati waaturuwenlyaaka u Adelaide, kahorwaa wuuluma uyo mwahooyo ni nlophwana mmoca anvaranaaka nteko. Uyo aasomihiya Ibiiblya ni Masaahiti a Yehova, ni nahokhala ukati mwinci noopelaka mwaha citthu cinkupalyaaya Masaahiti a Yehova. Uyo ukatyuuyo, kahocuwela wiira nivekelo naapankalyaaka kinari mwaana, nahaakhuliya. Kaanawiitthuca ikhweeli ya Mpattusyaaka ni Umwennyaawe! Wakhala khampa wiira kihophwanya “nluku noopharela nofayita cinene.”—Mat. 13:45, 46.

Pam, weeva ciicammo wancenre utotha nno nluku noopharelanno unari mwaana. Ukhitinri cani uphwanya?

Mi kuunuwale watthokoni weetteliya ittiini. Hiiva naakhala u Coffs Harbour, ilapo yoo Nova Gales do Sul. Asithumwanaka, ataata ni apiipi yaatthara citthu ceetthucihaaya ikhurupu yo israelismo-britânico. Mi, mwanrokoraka omwankani ni anuunu oolupale, ni ciicammo asaana aanaakhe enci, otheene cihu nahiitthucihiya wiira Nluku nawaakhikicera ale ayariye ni mabritânico. Masi mi akaakupali iyo itthwiiyo. Kaapheela uncuwela Nluku ratta. Waarinaaka myaakha 14, kahokela ikereeca cinci co ncoko waakhalaaka: ikereeca anglicana, batista, adventista do sétimo dia ni ikereeca cikiina. Masi nnyo ikereecannyo khacaakikavihenre uncuwela Nluku.

Wahoolo waya, mi ni amucyaaka nahothamela u Sydney. Wonwo phancuwenlyaaka Winston, aarwaale uviriha ifeeriya. Toko cihimyalyaawe, naanaakhala ukati mwinci noopelaka mwaha ittiini, ni iyo yahoniiriha upheela usomihiya Ibiiblya ni Masaahiti a Yehova. Iwarakha caakiveleeliheraawe, aanawantikha iveerusu combiiblyani cinci! Wuupaceroni, kahokhala ootikhinihiya—mpaka kahorusiya. Masi vakaani-vakaani, kahancera woonelela ikhweeli ca Nluku.

Mwaakha wo 1962, kahothamela isitati yoo Adelaide wiira kikhale wakhiviru ni Winston. Uyo ahokaaverya nipuro noohala miiva ukhala—uwanuwawe Thomas ni Janice Sloman, anamathelana Masaahiti a Yehova yaatokile ukhala mamisiyonaariyu u Papua-Nova Guiné. Ayo yahokiwacera sana-saana. Mi kaarina paasi myaakha 18, ni ayo yahokikavihera wuunuwa mminepani. Vano miiva ciicammo kahancera usoma Ibiiblya ni woohipica kahokupali wiira kahophwanya ikhweeli. Uthelanaca wihu mi ni Winston, naheevaherera woohipica uvara nteko wa Yehova, uniphwanyihale iparakha cinci. Ninawaamini wiira uyo ntekooyo uhaana marikariko, masi uhonikavihera wiira nitepe uvaha ifayita venci nluku noopharela nofayita niphwanyaleehu.

Winston, nkanihimyacere isiyani yookhumelenleni myaakha coopacera uvara nteko wa Yehova.

Uthelanaca wihu, Yehova woohipica ahancera unihulela ‘mikhora cuulupale cinci wiira nivare nteko’. (1 Akor. 16:9) Munna Jack Porter phancerale unihulela nkhora woopacera. Ule ukatyuule, uyo aari mootoliihu osirikwiitu. (Ilelo, hiiva ninvara nteko nkhayi nkhurupuni yo Mahumu Anhoolela iPeteli yo Australásia.) Jack ni amwaarawe, Roslyn, yahonisovenriha uvara nteko weepiyoneeru owiicaaverya (pioneiro regular). Nahoviriha myaakha thanu nivaraka uyo ntekooyo. Ukati waarinaaka myaakha 29, naholattuliya uvara nteko wowootola isirikwiitu ncoko wookhicirwa awula iciviri coohitto u Pacífico, ule ukatyuule caawaceriya niiPeteli yoo Fiji. Nootolaka maloko u Samoa Americana, Samoa, Kiribati, Nauru, Niue, Toquelau, Tonga, Tuvalu ni u Vanuatu.

Ule ukatyuule, atthu yaakhala mmakhicirwa awula iciviri coottayi khayaakhuluvela Masaahiti a Yehova. Phimaana nahaana neettaka ratta. (Mat. 10:16) Maloko yaathotoleehu yaari mankaani, ni ukati nkiina khayaakhalanaka nipuro hiiva noolukama. Phimaana, naanaalepelaka ulukama mmawaani waatthu omwaaliteeya, ni khula ukati ayo yaanaaniwacera.

Winston, weeva unawuucivela cinene nteko wootaphulela ilivuru cihu. Isiyani yuupankihale wuucivela uyo ntekooyo?

Yoole ukatyuule, mayamunna yaakhala ikhicirwa yolapo yoo Tonga yaarina paasi ifolyetu ni ilivuru vakaani coluuka tonganês, iluuka inoolumiya ncoko wo Polinésia. Woosomiha Ibiiblya, ayo yaavarelaka nteko ilivuru A Verdade Que Conduz à Vida Eterna yo inglês. Asuulupaleehu araru yuuluma ratta inglês, yahokupali utaphulela ilivuru A Verdade Que Conduz à Vida Eterna ni iluka tonganês. Pam ahantikha mmaakinani ilivuru yotheene, ni hiiva nahoveleeliha uPeteli yo Estados Unidos wiira yimpirimiriye. Naavirihale isumana 8 navaraka nteko wotheene uyo. Unookhalaru wiira khanaataphulenle ratta-raatta, ile ilivurwiile yahaakavihera wiitthuca ikhweeli atthu enci anooluma iluuka tonganês. Mi ni Pam khaninakhala anamataphulela ilivuru, masi ule ntekoole wahonipankiha unicivela nteko wootaphulela.

Pam, makhalelo mmakhicirwa awula mmacivirini yaavirikana cani ni makhalelo u Austrália?

Yahovirikana venci! Mapuro makiina, caanaanihuviha isencema, yaari mapuro oovihaviha, nttukuttha, makhule, iretta ni, ukati nkiina, uthwaa woyoolya. Wiira niimaalihe, khula nihuku ucoocilo naanaamumula nawehaka ipahari. Naakhala nnupani ineehaniya fale—ncina noo Somoa nineehaneliyaaya inupa coo Polinésia coovatheliya malasi ni coohitekeliya isiri. Mahuku makiina, mweeri waanaapharela cinene uhiyu mpaka naanaakhitiri woona miri cookhala toko mikole ni mweeri waanoonnyeela mpahari. Yaakhala itthu yooreera uweha, mpaka naanawuupuwelaka citthu ca Nluku ni naanaalompaka. Naanaakhitiri uhiya wuupuwela masakheehu ni wuupuwela citthu cooreera.

Yaanaanicivela cinene asinamwane! Ayo waanaaciva cinene uthuka, ni yaakhala ootikhinihiya yanoonaka hiiva, akunya oottayi ootteela venci. Ikwaha imoca naarweeleehu u Niue, mwanhima mmoca ahowa ni ahovara mapuruuru ommoononi wa Winston, eeraka: “Ukicivela cinene ikharari cinyu commoononi.” Kinoona toko ule mwanhimoole aari hinapaca umoona nlopwana ookhalana mapuruuru menci mwiirutthuni toko Winston, phimaana khaacuwela cowiihana ayo mapuruurwaayo!

Itthu yaaniiriha woona uthunku cinene waari woona mananna oohiloka caakhalaaya atthu. Ayo yaakhala mapuro ooreera, masi ukumyaaya khawaawaceriya ratta ni yaanaathwaa maaci. Masi mayamunneehu khayaakhala ni masukhuli. Yaholemalela ale makhalelwaale. Ukhala wakhiviru ni amucyaaya, ukhalana nipuro nonswalela Yehova ni ukhitiri unswalela, nnyo citthunnyo paasi caanaaphwanyiha utteeliya. Ntakihero naya nahonikavihera uhoolelihera utotha citthu citepale ukhalana ifayita ni uhirikarikiha makhalelweehu.

Pam, ukati nkiina weeva wahaana urwaaka urika maaci ni waapyaaca ni mananna ahaalemalenlyaa. Waakhitinri cani?

Kinawaasukhuru cinene apaapa. Ayo ahokiitthuciha citthu cinci, toko upharihela mooro, waapyaaca wamatthuwani ni ahokiitthuciha mananna ookhitiri ukhala woohimihakhu cinci. Ukati waarweeleehu wootola nloko u Kiribati, naalukamale inupa yankaani yootthuleliya malasi ni yosiri co mithale. Kaayaka waapyaaca, kaanaathipa vathi wiira kipharihele mooro. Ni kaahela makahapapa okole wiira mooro uhittiphye. Ukati woorika maaci, kahaana kirwaaka uluusi ukhala nliinyani naathiyana akhwaaka. Ayo yaarikaka maaci ni mwiri toko woomenceriya: waakhala wo meeturu meeli ni waatthukeleliya nkhoyi wuumaleloni waya. Masi uhiya utthukeleliya nimenco, yaatthukeleliya ilaata. Khula nthiyana waaphiyaka ukatyaawe aanaattikhela nkhoyaawe nluusi ni, oonaka wiira ilaata ihophiya mmaacini, aaneenyeenyiha moono woowakuvyaaca. Ilaateeyo yaanaaneela ni yaanaacara maaci. Woonalyaaka, kaheera: “Khinakhala itthu yoorika!” Mpaka uphiya ukatyaaka. Kahottikhela nkhoyi nluusi ikwaha cinci, masi ilaateeyo khayaaneela! Ukati waamanlyaaya athiyana otheene ukithyaa, ahokhuma nthiyana mmoca uwa ukikavihera. Atthu ankhala nne nipuronne anaakaviherana ni akhanle atthu ooreera nrima.

Oyeeli cinyu uhoocivelani cinene uvara nteko mmakhicirwa awula mmacivirini. Nkanihimyacereni citthu cookhumelenleni cihinliyaleenyu.

Winston: Wahovira ukati mwinci wiira nikhitiri ulemalela makhalelo makiina. Wootakihera, mayamunna yaapyaacaka, ayo yanivahaka iyoolya yotheene. Masi hiiva khanaacuwela wiira ilema yo ule ncokoole, wavahiyaka iyoolya khunlamuliya umaliha, uhaana unhiyeraka mwaneene. Ukhala wiira hiiva khaanaacuwela iyo, iyoolya yotheene yaanivahaaya, naanaalya! Masi ukati waacuwenleehu, yanivahaka iyoolya khanaamaliha, naanaahiyera. Hataa navonyaka, mayamunna yaanaanilevelela. Ni naturuwelaka waathotola khula myeeri siita caavira, ayo yaanaakhala ootteeliya venci. Yahaana isariya, kontha thi hiiva paasi naari Masaahiti a Yehova yaacuwelaaya yahaari o wanlokoni waya.

Nootolaka maloko, ciicammo naanawaavaha usaahiti atthu o mapuro naavireehu. Enci yoopuwela wiira Masaahiti a Yehova yaari ittiini yaakumihenryaaya mayamunna o wanlokoni. Masi atthwaayo yamoonaka mootoli osirikwiitu ni amwaarawe olapo ikhwaawe athotoloka nloko, yaanaacuwela wiira nne nlokonne khanaari nimoca paasi ni yaanaatikhinihiya venci.

Pam: Itthu imoca ihinliyalaaka yeerannyeele u Kiribati. Nloko noo Kiribati naarina mayaamunna vakaani ni humu mmoca paasi, Itinikai Matera. Uyo aanaaniwacera ratta. Nihuku nimoca, ahowa nancisile kaafiyaka anhenlyaawe nnyoce nimoca. Ni aheera: “Nna nawinyu.” Ule ncokoole, waanaarika venci uphwanya nnyoce no mwalakhu. Itthu yankaani yaanivahalyaawe yahonitteeliha nrima venci.

Pam, uvira waya myaakha vakaani ahoopwetya mwaana nari mwiirukuluni. Isiyani yookavihenre uvilela ayo masakhaayo?

Mwaakha wo 1973, mi kahorupala irukulu nakhalakoono u Pacífico Sul. Nahoturuwela u Austrália, masi uvira waya myeeri micese ahonipwetya mwaana. Winston ciicammo ahokhala pusya; kontha ciicammo aari mwaamwanawe. Masukhuli yaarinaaka nuukatyaaya yahowukuwa, masi yaamalamanle paasi ukati naakhenleehu irevista A Sentinela 15 yo Abril yo 2009. Mpantta “Perguntas dos Leitores” wahoopela mwaha nna nikohonna: “Existe esperança de ressurreição para um bebê que morre no ventre da mãe?” (Mwaana khwenle mwiirukuluni waanumwaane niireke haana niweherero no wummwelelihiya wahoolo?) Mwahoole uhonuupusera wiira iyo itthu iri mmatatani wa Yehova, ni uyo khanhiya upanka itthu yomaana. Yehova naahala unruma Mwanawe wiira “atankanye miteko ca Sotwani.” (1 Jo. 3:8) Uyo mwahooyo uhoniiriha utepa uvaha ifayita nno “nluku nopharelanno” ninkhalanaaya apoovu a Yehova paahi. Naahala ukhala cani waari wiira khanirina niweherero ninvahiyeehu ni Umwene wa Yehova?

Ukhwa wawe mwanihu, nahoturuwela uvara nteko wowiivahereriya ukati wotheene. Nahokhala uPeteli yo Austrália myeeri vakaani, ni wahoolo waya nahoturuwela uvara nteko wo mootoli osirikwiitu. Mwaakha wo 1981, cinavinre myaakha micese navaraka nteko wo mootoli osirikwiitu mmaaliteeya ncoko woo Nova Gales do Sul ni u Sydney, naheehaniya urwaa uvara nteko uPeteli yo Austrália, ni mpaka nna co wonwo phinvareehu nteko.

Winston, woonela waa, ukati ukhanlyaa uvaraka nteko mmakhicirwa awula ncivirini coo Pacífico Sul, uhookavihera nna va ukati unvaraa nteko nkhurupuni yo Mahumu Anhoolela iPeteli yo Australásia?

Iyee, uhokikavihera ni mananna menci. Woopacera, iPeteli yo Austrália phaarumiye uwacera miteko cihu u Samoa Americana ni u Samoa. Wahoolo, iPeteli yo Austrália ni yo Nova Zelândia cahotakanihiya. Nna va, iPeteli yo Australásia phinwacera miteko cihu u Samoa Americana ni Samoa, ikhicirwa coo Cook, Nova Zelândia, Niue, Timor-Leste, Toquelau ni u Tonga—mapuro yaacaaliyaaka uthotola khampa munna nkhuma uPeteli. Ukati ukhanlyaaka kaavaranaka nteko asuulupalyaaka ni asirokoraka ookhuluvelyaa mmakhicirwa, unaakikavihera nna va, ukati kinaavarelaaka nteko va waPeteli va.

Kihinaaya umalihera, kaapheela uhimya wiira, khampa cinthoonyeraaya itthu ikikhumelenle miiva ni Pam, khanakhala atthu oolupale paasi anonthotha Nluku. Amirawo ciicammo anaapheela uphwanya “nno nluku noopharelanno”—hataa ukhalaka wiira amucyaaya akiina otheene khampheela weettela ikhweeli. (2 Mam. 5:2, 3; 2 Ikor. 34:1-3) Kweeliini, Yehova khanle Nluku oofenta, ni uyo nopheela wiira atthu otheene, amirawo ni oolupale, aphwanye ukumi woohimala!

Ukati miiva ni Pam wancenreehu utotha ikhweeli myaakha coopwaha 50 uttuli, khanaacuwela nipuro naahalaaya uniphiiha nno nluku noopharelanno. Khweeliini, ikhweeli yo Umwene ikhanle nluku noopharela nofayita cinene. Ni hiiva niholakela uvaresesa nno nlukunno ni ikuru cihu cotheene!