Isiyani inhala wuukaviherani uhihiyerera upanka usoma wo veekha khula nihuku?
NYUUVA unawuurikelani upanka usoma wo veekha khula isumana? Ukati nkiina nnawoona ukhala itthu yoonyonya? Khweeliini, otheene cihu unaaninyoonyaka ikwaha cikhwaawe. Masi muupuwele citthu cikhwaawe cimpankeehu khula mahuku, toko urapa. Wiira nipanke iyo, nihaana nikumihaka ukati ni wiikurumica, napankaka commo, ninawiicoona saana! Usoma Ibiibiliya ciicammo pooti ukhala khampa “urapa nuulumo.” (Efesu 5:26) Moopele mwaha citthu cikhwaawe cinhala wuukaviherani:
Nkumihe ukati. Usoma Ibiibiliya wo veekha ikhanle itthu yofayita cinene khula nkristau inlamuliyaawe upanka. (Afili. 1:10) Wiira yuukavihereni utthara iporokaraameenyu, nnoonela cani weesa nipuro nnohaleenyu ukhitiri woona, toko wakwaaturuni yo mahimyo awula waaparerya wasirini winyu? Awula nyuuva pooti waativari alarime ntelefooneni winyu awula nkomputatoreni winyu uhinaaya uphiya ukati woopacera usoma.
Nkumihe ukati ni mananna oosoma anhala wuukaviherani uphwanyera ifayita. Ukatini nyuuva unoocivelaayani usoma? Nyuuva nnaacuwela saana makhalelweenyu. Phimaana, mwaavyerere ukati unoocivelani usoma. Vano moonaka wiira iwoora nthanlileenyu khinookaviherani usoma ratta, nnoonela cani usoma nhina iminuutu 10 paahi? Mwasomaka uyo ukati vakaanuuyo, nyuuva pooti wiitthuca citthu cinci, uvirikana uhisoma. Atthunaka umaliha winyu usoma iminuutu 10 pooti wuucivelani ni upheela usoma-tho ukati vakaani.—Afili. 2:13.
Nthanle mphantte nnohaleenyu usoma. Wakhalaka wiira nnohala wuupulela itthu yoohala usoma unaaphile ukati, nyuuva khanohala “uvarela nteko saana ukatiinyu.” (Efesu 5:16) Nnoonela cani ukhalana nipuro ninhaleenyu wantikha citthu cinhaleenyu usoma? Khula ukati munsomeenyu yakhalaka itthu nhineweheenyu saana, mwantikhe nipuro. Ni wuumaleloni wo khula mphantte nnosomeenyu, nyuuva pooti wantikha citthu cikhwaawe coocivenleni usoma.
Nhikhanyerere usoma itthu imoca. Mmananihe wantikha miphantte cikhwaawe, khampa ukhati unviriheenyu mwasomaka awula miphantte nyuuva nnothanleenyu. Itthu yofayita ukhanle uviriha isumana yotheene nsomaka. Masi wiira mpanke iyo, atthunaka nyuuva nhaana mwaakakhanihaka nihuku, ukatini munsomeenyu awula myaha nyuuva nsomeenyu.
Nasomaka khula mahuku ninaaphwanyera ifayita. Upatthaniihu ni Yehova unaatepa ukhala oolipa, ninaawiitthuca ulakela itthu yoohala upanka ni mananna oocuwelaca ni ninaakhala ookhikicerya.—Jos. 1:8.