Ezekeli
4 “Naawe we mwana wa muntu, tola ulunjelwa ulwike pa nkoleelo yako nu kulengapo umusumba wa Yelusalemu. 2 Ucite kwati ukuulwisya, uuzingulusye ni linga, upange ivya kuuzanzilako ni nkambi, nupya uuzingulusye ni vyanzo ivya kuononelako. 3 Utole icela icipapaatane nupya ucimike wa ciumba ca cela pakasi kako nu musumba. Lyene uwalolekesya umusumba, ulazingulukwa; nupya wewe kwene ulauzinguluka. Cii cimaya i cimanyililo uku ya mu ng’anda yakwe Izlaeli.
4 “Lyene ulinzile ukulaalila kuli cimani nu kwika imembu zya yantu ya mu ng’anda yakwe Izlaeli pali wewe. Nupya ulaya ni membu zyao pa manda aingi yano ulalaalila uku lusansa lulo. 5 Ulacita vivyo pa manda 390, ukulingana ni myaka ino yanjembukila, nupya ulaya nu luyembu lwa ya mu ng’anda yakwe Izlaeli. 6 Nupya ulinzile ukumalilila manda yayo.
“Lyene umuku wakwe ciili ulalaalila ukwi lunji nupya ulaya ni membu zya yantu ya mu ng’anda yakwe Yuda pa manda 40. Uwanda onga ulaya wa mwaka onga, vikwene ali vino inkupimila. 7 Nupya ulalozya icinso cako uku musumba wa Yelusalemu uwatiuzingulukwa ala watupeta ni cakuzwala cako uku makasa nupya ulinzile ukusesema pa musumba uwo.
8 “Ndakunyepelela ni myando pakuti utaca upiliukile uku lusansa luze ukufikila uce umalilile manda yano ulacita kwati ukuzanza umusumba.
9 “Nupya ulinzile ukutola ingaano, baale, cilemba, ilanda, na malezi nu kuvika umu civiya conga nupya upangemo umukate. Pano vikwene avino ulaalya pa manda 390 yano ulalaalila uku lusansa longa. 10 Ulaaipimila ivyakulya pa wanda onga ukulingana na masyekele* 20. Ulaalya pa nsita izisoololwe.
11 “Nupya ulaamwa manzi aapimwe, kuli kuti afu wakwe lita. Ulaamwa pa nsita izisoololwe.
12 “Ulaalya umukate uwo wa mukate uulungane wakwe baale; uce uupange ala na antu yakulolako, nupya mavi ya yantu aume yalaya ali inkwi zino ulaomvya.” 13 Yeova walanzile nu kuti: “Vikwene avino Aina Izlaeli yalaalya umukate wao ukowele umu nko zino ndayasalanganyizizyamo.”
14 Lyene natiile: “Iyee we Yeova Mwene wa Papelapela! Ukufuma uku wance wane ntatala naikowezyapo ukupitila umu kulya inyama iifwile nanti iyatikomwa ni cilyanyi, nupya ntatala nalyapo inyama ikowele.”
15 Fwandi watiile: “Cuvwika, nimaleka uomvye citindi wa ng’ombe ukucila ukuomvya mavi ya muntu, nupya apano ulaapangila umukate.” 16 Lyene wanenyile ati: “We mwana wa muntu, namalenga ukuti umu Yelusalemu mutaya ivyakulya, nupya antu yalauvwa intete ukumwa nu kulya ivyakulya ivingi pano limwi yatanga yakwate ivyakulya pa nsita yuze. 17 Cii cilacitika pakuti lino yalulizya ivyakulya na manzi yace yaalolekesyanya ala iciyapezya mano, nupya yace yalowe pa mulandu ni membu zyao.