Yobo
34 Eliu watwalilile ukulanda ati:
2 “Kutikini uku mazwi yane mwe yantu ya mano;
Nguvwini mwemuno mwamanya ivingi.
3 Pano ikutwi likaezya amazwi
Wakwe vino ululimi lukauvwa ndi cakuti ivyakulya ivilyompa nanti foo.
4 Lekini tuisoolwele icilungame;
Lekini sweswe kwene tupingule icisuma.
5 Pano Yobo watalanda ati, ‘Nene mulungami,
Nomba Leza watamfyenga.
6 Uzye ningabepa pali vino upinguzi wane ulinzile ukuya?
Cilonda cane cisikupola lino pasi vino naluvyanya.’
7 Uzye a weni uwaya wakwe Yobo,
Aakamwa intusi kwati a manzi?
8 Akazanwa pamwi na ya kacita ya viipe,
Nupya akaizizya pamwi na antu aipe.
9 Walanzile ati, ‘Kusi icisuma cino umuntu akazana
Mu kwezya ukuzanzya Leza.’
10 Fwandi kutikini kuli nene mwe yantu aakailuka:
Leza wa cumi asicita iviipe,
Pano uwa Maka Yonsi asiluvyanya.
11 Pano alalambula umuntu ukulingana na vino akacita
Nupya ivikacitikila umuntu vikalingana ni vicitwa vyakwe.
12 Icumi kwene Leza asicita iviipe
Uwa Maka Yonsi asifyenga ali wensi.
13 A weni uwamupeezile amaka aakwangalila insi,
Nupya a weni uwamusonsile ukuti atungulula insi yonsi?
14 Ndi cakuti wika mano kuli vino antu yakacita,
Nupya ndi cakuti wakolonganika umi wao nu mupu wao,
15 Antu yonsi yangalowa,
Nupya yangaswilila uku lukungu.
16 Fwandi ndi cakuti mukailuka, ikini amano kuli cii;
Mukutikisye vino nimalanda.
17 Uzye umuntu uwapata umulinganya angateeka antu,
Nanti uzye ungakalipila umuntu uwa maka nupya umulungami?
18 Uzye unganeena umwene uti, ‘Wewe wa sile sile,’
Nanti ukuneena antu acindikwe uti, ‘Mwemwe yaipe’?
19 Kwaya wenga aataya na kapaatulula kuli ya cilolo
Nupya ataaya na kapaatulula uku yakankala nu ku yapiina,
Pano yonsi i viumbwa vyakwe.
20 Yangafwa ukwaula ukwenekela pakasi ka usiku;
Yakazakaza nu kufwa;
Nanti sile aakateeka yakafumiziwapo, lelo asi antu aakacita vivyo.
21 Pano Leza akalola imiyele ya muntu,
Nupya akalola vyonsi vino akacita.
22 Kutaya imfinzi nanti ukufisame
Kuno ya kacita ya viipe yangafisama.
23 Pano Leza atimika insita uku muntu ali wensi,
Iyakuti ace alolekele kuli aliwe pakuti apingulwe.
24 Akaonona ya kateeka ukwaula ukulondelezya
Nu kwikapo yauze.
25 Pano wamanya vino yakacita;
Akayafumyapo umu nsita ya usiku nupya yakaononwa.
26 Akayonona pa mulandu ni vicitwa vyao iviipe,
Apa ncende ino antu yonsi yangalola,
27 Pa mulandu wakuti yata ukumulondela
Nupya yatacindika vyonsi vino akacita;
28 Yakalenga aapiina ukulilila kuli aliwe,
Pakuti anguvwa ukulila kwa yantu aatakwata aakuyazwa.
29 Ndi cakuti Leza waya mya, a weni aangamupeela umulandu?
Ndi cakuti wafisama, a weni aangamulola?
Kuye u ku luko nanti uku muntu, ivikacitika i vili vimwi,
30 Pakuti umusangu atateeka
Nanti ukuteya iviteyo uku yantu.
31 Pano kusi aanganena Leza ati,
‘Imfululwa nanti cakuti pasi vino induvyanya;
32 Nsambilizye vino nafilwa ukulola;
Ndi cakuti nacita icili consi iciipe, ntalaswilizyapo nupya.’
33 Uzye angakulambula ukulingana ni myelenganyizizye yako lino ukukana upinguzi wakwe?
Wewe upingule, asi nene.
Fwandi neene vino wamanya ningo sana.
34 Antu aakailuka
Nupya aamano aakanguvwa yalaneena yati:
35 ‘Yobo akalanda ukwaula mano,
Nupya vino akalanda vikalanga ukuti asiiluka.’
36 Lekini Yobo aeziwe sana
Pano vino akwasuka ivikolana na vino antu aipe yakaasuka
37 Akalundapo ucipondoka pa luyembu lwakwe;
Akatoota mitumfyo mitumfyo pali sweswe
Nupya akalanda amazwi aipe aingi pali Leza wa cumi!”