Ibuku Lyakwe Ciili Lyakwe Samweli
9 Lyene Devedi uzizye ati: “Uzye kwasyala umwi pa ya mu ng’anda yakwe Saulo wino ningalanga ukutemwa kwa cumi pa mulandu wakwe Yonatani?” 2 Kwali umuomvi wakwe Saulo uwi zina lyakuti Ziba. Fwandi Devedi wamwamile nu kumuzya ati: “Uzye wewe Ziba?” Nawe waswike ati: “Emukwai musambazi wane.” 3 Umwene watwalilile ukuzya ati: “Uzye kuli umwi uwasyala uwa mu ng’anda yakwe Saulo wino ningalanga ukutemwa kwakwe Leza ukwa cumi?” Ziba waswike umwene ati: “Akuno ali umwana umonsi wakwe Yonatani; walemala makulu yonsi yoili.” 4 Umwene wamuzizye ati: “Ali kwi?” Ziba waswike umwene ati: “Ali umu ng’anda yakwe Makili mwana Amiyeli ku Lo-debali.”
5 Lilyo kwene sile umwene Devedi watumile aakuyamusenda uku ng’anda yakwe Makili mwana Amiyeli ku Lo-debali. 6 Lino Mefibosyeti mwana Yonatani umwana wakwe Saulo wafisile kuli Devedi, lilyo kwene sile waile afukama nu kufupama pa nkoleelo yakwe Devedi. Lyene Devedi wamwamile ati: “Mefibosyeti!” Nawe waswike ati: “Mukwai musambazi wane.” 7 Devedi wamunenyile ati: “Utatiina, pano namalanga ukutemwa kwa cumi kuli wewe pa mulandu wakwe Yonatani tata wako, nupya namakuwezezya impanga yonsi iyali yakwe Saulo sokulu, nupya lyonsi umalyanga pamwi nani.”
8 Lilyo kwene Mefibosyeti waponyile pansi nu kulanda ati: “Uzye nene weni uwakuti ulangizye uluse nemuno naya wakwe simbwa mufwe?” 9 Lyene umwene watumile aakuyaama Ziba uwali umuomvi wakwe Saulo, nupya wamunenyile ati: “Vyonsi ivyali vyakwe Saulo ni vyaya umu ng’anda yakwe nimavipeela uku mwizikulu wa musambazi wako. 10 Wemo na ana yako aonsi kumwi na aomvi yako mulaamulimila nupya mulaazombola ivyakulya ivyakupeela amu ng’anda ya mwizikulu wa musambazi wako pakuti yace yalya. Lelo Mefibosyeti umwizikulu wa musambazi wako, wene tumalyanga pamwi nawe lyonsi.”
Ziba wakweti ana aonsi 15 na aomvi 20. 11 Lyene Ziba wanenyile umwene ati: “Musambazi wane ne muomvi wako namacitanga vyonsi vino watulanda.” Fwandi Mefibosyeti walyanga pali pamwi na Devedi kwati ana ya mwene. 12 Mefibosyeti wakweti umwana umulumendo umunono uwi zina lyakuti Mika; nupya yonsi aikalanga umu ng’anda yakwe Ziba izile iyaya aomvi yakwe Mefibosyeti. 13 Mefibosyeti wikalanga umu Yelusalemu, pano lyonsi walyanga pamwi nu mwene; nupya wali umulemale makulu yonsi yoili.